TITUS
Pahlavi Rivayat
Part No. 31
Previous part

Chapter: 31 
Ch. 31
(a)


Paragraph: a1    paydāg kū petītīgīh tis-ē ēdōn arzōmand ud sahīg kū zarduxšt az ohrmazd pursīd kū ān kē pad tan ī mardōmān andar gēhān kardārtom būd ā-m ruwān be nimāy

Paragraph: a2    ohrmazd ruwān ī ǰam az abāxtar nēmag be xwāst

Paragraph: a3    pad šnūg ud ārešniz hamē raft u-š +warr nihuft estād ī darrīdag kē az hamāg kustag sūrāg būd

Paragraph: a4    u-š wastarag paymōxt estād ī bazagēn būd

Paragraph: as    u-š šarm ī az ohrmazd rāy dwāzdah gām az ohrmazd dūr nišast

Paragraph: a6    zarduxšt guft kū ohrmazd ēd kē kē-š šarm ī az ašmā rāy <dwāzdah gām az ašmā> dūr nišast

Paragraph: a7    ud ohrmazd guft kū ēd ǰam ī wiwanghān

Paragraph: a8    zarduxšt guft kū-š čē kard ǰam ī wiwanghān kē-š dādestān ēdōn wad

Paragraph: a9    ohrmazd guft kū-m nazdist az gētīgān ā-m dēn ō ǰam nimūd ka-š dānāgtar abāyist būd be ō rāh ī ahreman ud dēwān estād

Paragraph: a10    u-š guft kū āb man dād zamīg man dād urwar man dād xwaršēd man dād māh man dād star man dād ud asmān man dād gōspand man dād mardōm man dād hāmōyēn dahišn ī gētīg man dād u-š ēdōn drō guft kū hil ēd kū ōy dād bē ēd kū čēōn dād estād ā-š nē dānist ud pad ān drō-gōwišnīh ā-š xwarrah ud xwadāyīh aziš appār būd u-š tan be ō wišōbišn ī dast ī dēwān mad abārīg-iz +pas +kē xwēštan ān hunar stāyēd ī-š nēst ā-š ān ī ast ēdōn aziš be šawēd čēōn az ǰam be šud


(b)


Paragraph: b1    zarduxšt ēn-iz pursīd az ohrmazd kū ǰām pad gēhān nēkīh čē weh kard

Paragraph: b2    ohrmazd guft kū ān ī ka dēwān be ō mardōmān guft kū gōspand be ōzanēd tā-tān amā pīl dahēm ī sūdōmand kē-š dāštār ud pānag nē abāyēd

Paragraph: b3    mardōmān guft kū tā pad dastwarīh ī ǰam be kunēm u-šān kard ud ǰam pad nē ōzad ī mardōmān gōspand ud pad nē stad ī mardōmān az dēwān pīl abāg dēwān ēdōn pahikārd ī-š dēw be ēraxt hēnd u-š margōmand ud pādifrāhōmand kard hēnd


(c)


Paragraph: c1    zarduxšt ēn-iz pursīd az ohrmazd kū ǰām pad gēhān čē wattar kard

Paragraph: c2    ohrmazd guft kū ka-m dēn awiš nimūd nē padīrift

Paragraph: c3    ruwān ī ǰam be ō zarduxšt wāng kard kū pahrēz saxwan ī dēwān ma ašnaw ud dēn be padīr čē ēd zamān weh ud pāšom +ka ō tō gōwēd ohrmazd

Paragraph: c4    čē-š nazdist be ō man nimūd ud ka dānāgtar abāyist būd ō rāh ī dēwān estād hēm

Paragraph: c5    u-m harw dām ud dahišn ī mēnōg ud gētīg guft kū man dād

Paragraph: c6    pad ān drō ī-m guft man xwarrah ud xwadāyīh aziš appār būd u-m tan be ō wišōbišn ī dastī dēwān mad

Paragraph: c7    tā kē zarduxšt hē ka-t tangīh bawād ka frāxīh az dēn guftan abāz ma est čē ēn zamīg ka hāmōn be bawēd āb ka andar zrēh be estēd ud sēn-murw ka andar wēšag āšyān kunēd ud harw kē pad gēhān ka abāz āxēzēd xwaršēd ka pad ān rāh rawēd harw kē pad gēhān ka a-wināh be bawēd ahreman ud dēwān ka +abesīhēd hamāg yazišn ud niyāyišn ī ohrmazd ud amahraspandān pad dēn bawēd

Paragraph: e8    ka ǰam pad ēn ēwēnag guft būd ā-š petītīgīh ud abaxšīh be <ō> mar āmad ud ohrmazd ud amahraspandān ud abārīg yazadān be āmurzīd ud az abaxtar nēmag be ō hamēstagānīh ud xwadayih ī hamēstagān mad


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.