TITUS
Pahlavi Rivayat
Part No. 56
Previous part

Chapter: 56 
Ch. 56


Paragraph: 0    arzōmandīh ī drōn ud mēzd rāy nibēsihēd

Paragraph: 1    drōn pad hangōšīdag ī gētīg nihād estēd u-š girdīh ēdōn čēōn gētīg gird ast u-š kanārag kōf ī harborz abzāyišn ī mayān ī drōn mardōm ud +stōr ud urwar gōsūdāg čagād ī dāidīg pad mayān ī drōn nihād čim ēn kū čagād ī dāidīg pad mayān ī gēhān ast

Paragraph: 2    ud frasast ān ī ohrmazd ī xwadāy rāy pad ǰudāgīh ī az drōn nihād čim ēn kū ohrmazd pad ǰudāgīh ī amahraspandān ud yazadān abāyēd yašt

Paragraph: 3    ud abārīg abāg ohrmazd yazišn bē az srōš čē srōš xwadāy ud dahibed ī gēhān ast ēd rāy ǰudāgīhā abāyēd yaštan

Paragraph: 4    frasast kanārag nē kard čim ēn ast čē harw tis ud harw kas kanārag ast ud ohrmazd hamēīgīhā dād rāy a- kanāragōmand

Paragraph: 5    ast may ī pad drōn āb ī pad zrēh ud purr abāyēd kardan čē nē purrīh rāy gugāyīh bawēd kū zrēh āb nē purr +ābgīr wēšag ī andar zrēh

Paragraph: 6    sprahm afsōn ī amahraspandān

Paragraph: 7    ēsm ud bōy sē tāg humat hūxt huwaršt

Paragraph: 8    ka drōn yazēnd harw tan-ē rāy kē wāz gīrēd sprahm dō tāg pad drōn nihād harw kē wāz gīrēd sprahm ī dō tāg čāšnīg awiš dād čē āōn paydāg kū ka-š čāšnīg stad ud sprahm ī pad drōn ō +uzwān nihād andar ān rōz harw wināh nāmčišt wināh ī margarzān nē šāyēd ahreman ud dēwān +snāh-ē ān garāntar bawēd

Paragraph: 9    kē andar mēzd wādrang pārag-ē xwarēd ā-š wād ī xēzag ī pad galōg nē bawēd

Paragraph: 10    mēzd pad hangōšīdag ī amahraspandān nihād estēd čē ēdōn čēōn ohrmazd abāg amahraspandān nišīnēd ud az amahraspandān tis-iz wāng nē āyēd ēdōn-iz pad mēzd xāmōš abāyēd nišast

Paragraph: 11    mēzd ī meh ast dast sust nasrušt zad wastarag āsānīh ud bāliš nihuft ud afsōn nēk +abar estēd nān xward gyāg šāyēd wirāst abesīh<ē>nišn ī dēwān abārīg purr xwardan pānagīh ī tan rāy +ābgīr andar dast ī mard ast

Paragraph: 12    andar xwaran ka pēšgāh nišīnēd pēšgāh rāy dō yāt ud abārīg harw tan-ē rāy yāt-ē estēd ka be drāyēd +ud +yazad +az +ānōh be šawēd harw tan-ē rāy dēw abāg estēd ud rēmanīh andar may kunēd ud harw tan-ē ī be drāyēd ē-hazār dēw ābus bawēd

Paragraph: 13    ud xēšm-iz drāyēd kū ō gētīg sē tis mādagwar ī pad gētīg abarkār

Paragraph: 14    ud ahreman <drāyēd> kū ān sē tis čē

Paragraph: 15    xēšm drāyēd kū mēzd ud gāhānbār ud xwēdōdah

Paragraph: 16    ahreman drāyēd agar tō kāmē ēn dō tis čārag dānē čē andar mēzd xwad be ras u-šān pad wārom be nišīn tā be drāyēnd yazad az nazdīk ī awēšān be šawēd pad gāhānbār be ras tā ēk az did tis-iz be duzēnd ka-šān ēk az did tis-ē be duzīd gāhānbār škast xwēdōdah hil kū tō bē-šān man-iz čār nē dānēm čē ka čahār bār gāyēnd hagriz mard ud zan az xwēšīh ī ohrmazd bē nē šawēnd bē-šān tang frazandīh abāyēd dād gēhān az kam frazandīh rāy ēg-išān padiš wurrōyistan kāmag nē bawēd enyā pad mard ud zan tis-iz kardan nē šāyēd


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.