TITUS
Pahlavi Rivayat
Part No. 62
Previous part

Chapter: 62 
Ch. 62


Paragraph: 0    šnāyišn ī dādār ohrmazd amahraspandān hamāg yazadān ī mēnōgān yazadān ī gētīgān

      handarz ī anōšag ruwān ādurbād ī mānsarspandān

Paragraph: 1    hāwišt-ē anōšag ruwān ī ādurbād ī mānsarspandān būd was rōzgārān abāg ādurbād būd

Paragraph: 2    u-š ēn-iz be ō ādurbād guft kū-m frahang-ē kun ī ka az nazdīk ī hērbed frāz šawēm ēg-im ān frahang rāy ruwān weh tuwān

Paragraph: 3    ādurbād guft kū pad yazadān abē-gumān bāš menišn ud gōwišn ud kunišn frārōn ud rāst dār tis-iz wināh ma men ma gōw ud ma kun ud ahlaw bāš

Paragraph: 4    ud hāwišt guft kū pad ēn ī hērbed guft nē spurrīg hēm bē-m frahang ī nāmčištīg gōw tā kunēm ud ahlaw bawēm

Paragraph: 5    ādurbād guft kū ān wīst ud dō wāzag ī mihr ohrmazd ī man hērbed az ādurōg ašnawīd andar kār dār ud ahlaw bawē

Paragraph: 6    hāwišt guft kū agar-im pad arzānīg dāre framāy guft tā ašnawēm ud kunēm

Paragraph: 7    ādurbād pad passox guft kū wāzag ēn sē ēwēnag rādīh čahārom rāstīh panǰom +hunarāwandīh šašom tuxšāgīh haftom ǰādag-gōwīh haštom hu-mihrīh nohom āšt-xwāhagīh dahom dādestān<īg>īh yāzdahom hamīh dwāzdahom nihād-snehīh sēzdahom paymānīgīh čahārdahom ērīh pānzdahom ēr-menišnīh šāzdahom nihānīh haftdahom xwašīh haštdahom bowandagīh nēzdahom bārestānīh wīstom mardōm-dōstīh wīst-ud-ēkom hunsandīh wīst-ud-dowom ēkīh

Paragraph: 8    rādīh ī weh fradom kē-š aziš nē xwāhēnd be dahēd dudīgar ān kē-š <aziš> xwāhēnd pad gyāg be dahēd sidīgar ān kē-š aziš xwāhēnd ud zamān kunēd pad zamān ī kunēd be dahēd ān weh kū ka ō <ōy> dahēd kē hagriz andar ōy ēmēd nē dārēd kū-m abāz dahēd nē +wāzāragīh +ayāftan nē čašm-kāmagīh rāy dahēd

Paragraph: 9    dudīgar čahārom rāstīh ān bawed kē menišn gōwišn ud kunišn abāg yazadān ī mēnōgān ud abārīg harw dām ī gētīg rāst dārēd

Paragraph: 10    panǰom +hunarāwandīh ān bawēd kē kōxšišn abāg druz ī mēnōg kunēd ēč druz andar ō tan nē hilēd pad nāmčištīg ēn čahār druz az tan abāz dārēd āz ud xēšm ud waran ud nang

Paragraph: 11    šašom tuxšāgīh ān bawēd kē andar harw gāh ud zamān ān ī menēd ud gōwēd ud kunēd ka ham zamān widerān bawēd ēg-iš bīm nēst kū-m tis-ē ǰuttar abāyist menīd ud guft ud kard

Paragraph: 12    haftom ǰādag-gōwīh ān bawēd kē zan ī wēwag ud aburnāyag ī gursag ud ātaxšān gāwān gōspandān ud abārīg +a-tuwānīgān nāmčištīg ruwān ī xwēš rāy saxwan gōwēd

Paragraph: 13    haštom hu-mihrīh ān bawēd kē abāg hamāg dām ī ohrmazd mihr drust ud ēkānag dārēd mihr abāg kas-iz nē drōzēd mihr ī griftag ān-iz ī būdag nāmčišt abāg ruwān ī xwēš mihr xūb ud rāst dārēd

Paragraph: 14    nohom āšt-xwāyīh +dādestān winārišn ī gēhān ud dāštār ud parwardār ud rāyēnīdār ī hamāg dām ud dahišn čē az abestāg paydāg kū rist-āxēz ud tan ī pasēn kardan ud a-margīh winārdan pad rāh ī āštīh šāyēd būd

Paragraph: 15    dahom dādestānīgīh ān bawēd kē pad dād ī yazadān estēd

Paragraph: 16    yāzdahom hamīh ān bawēd kē pad harw tis ī frārōn abāg yazadān ud wehān ham bawēd

Paragraph: 17    dwāzdahom nihād-snehīh ān bawēd kē abāg hamāg dām ī ohrmazd sneh be nihēd ud hēnīh abāg kas-iz nē kunēd ud pad harw tis ī abārōn ī ahreman ud dēwān wattarīh ǰud bawēd čē wizīdār-menišnīh ud wizīdār-kunišnīh andar nihād-snehīh bawēd

Paragraph: 18    sēzdahom paymānīg<īh> ān bawēd kē harw tis be ō paymān handāzēd kū wēš ud kam andar nē abāyēd čē harw xīr bowandagīh paymān čē ān tis kē paymānīgīh nēst dānāgīh ud dōst ud kirbag

Paragraph: 19    čahārdahom ērīh ān bawēd kē hamāg dām ī ohrmazd rāy ēdōn menēd kū ān weh-iz šāyēd būd kū man

Paragraph: 20    pānzdahom ēr-menišnīh ān bawēd kē ōy ī aziš keh pad hamāl ud hamāl pad aziš weh ud aziš +meh pad xwadāy dārēd

Paragraph: 21    šāzdahom nihānīh ān bawēd kē hunar ud dānišn abzār ī-š nēst dānēd kū-m nēst pad xwāstan ō xwēš kardan abar tuxšēd ud zamān ī kār ud dādestān šnāsēd kār ud dādestān tā zamān ī xwēš frāz nē kunēd nihān mard ī hanǰamanīg ud tan gilān-ōbār ahlaw bawēd

Paragraph: 22    haftdahom xwašīh ān bawēd kē pad pēšīh kas nē āzārēd ka-š kas pad zanišn ō ōy šawēd ēg-iš narmīhā ud xwašīhā be ō padīrag estēd abāg hamāg dām ī ohrmazd ēdōn be dānēd sāxtan kū harw kas pad ēd dārēd kū abāg man xwaštar

Paragraph: 23    haštdahom bowandagīh ān bawēd kē ān ī nē sazēd nē menēd ud nē gōwēd ud nē kunēd ān ī sazēd menēd nazdist xūb be nigerēd pas gōwēd ud kunēd

Paragraph: 24    nozdahom bārestānīh ān bawēd kē bār ī ruwān ī ō tan abāyist ka-š škeftīh abar frāz rasēd u-š ō kas tuwān spōxtan nē spōzēd bē bārestānīh<ā> xwad abar padīrēd

Paragraph: 25    wīstom mardōm-dōstīh ān bawēd kē sūd ud nēkīh ī harw wehān ēdōn abāyēd čēōn ān ī xwēs ān ī-š pad xwēštan nē nēk sahēd pad kas nē kunēd hu-čašmīh ān bawēd kē āhōg ud hunar ī kasān be nigerēd az pas ahōg ī xwēš wirāst tuxšēd wehān rāy wehīh ī āškārag ud āhōg ī-šān ast xwēšīh nē pad snāh be dōstīhā wirāyēd nē awešān gōwēd

Paragraph: 26    wīst-ud-ēkom hunsandīh ān bawēd kē xwadāyīh ud xwāstag ī-š ast u-š awiš mad estēd hunsand ud bārestān pad ān tis kē-š abzāyišn ī ruwān aziš šāyēd būd ēdōn tuxšāg ud gyān-abespār tā zīndag hagriz aziš hunsand nē bawēd

Paragraph: 27    wīst-ud-dōwom ēkīh ān dō rāh bawēd ī pad dēn paydāg kū rāh be ān ī dō tā +kand ud ēk frārōn ud ēk abārōn ān ī abārōn aziš be wardēd pad ān ī frārōn padiš be estēd hagriz az ān rāh be nē +estēd nē wardēd ud tis-iz abārōnīh nē menēd nē gēwēd nē kunēd

Paragraph: 28    hāwišt guft kū hērbed xwadāy ahlaw bāš čē az frahang ī hērbed be kard pad gēhān ahlaw pad nāmčīšt pad amā ēwāz ēn frahang abzār ī ayārēnīdārtar ud waxšēnīdārtar ud agar az xrad agar az tuxšāgīh amā be nē mānēd +ēg amā harwisp mardōm az ēn frahang ka andar kār dārēnd ahlaw bawēnd pad yazadān kām ōz nērōg xwābarīh ud āmurzīdārīh frazaft pad drōd ud šādīh ud huramīh ud abē-bīmīh


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.