Kala Šurin üzviyox bito turel hayzeri Isusa P̣ilaṭi ṭo͑ġo͑lṭun tašeri.
Šoṭo taxsərlainšbsa burqi piṭun: "Yan ayanḳi ki, me amdaren beš millätä yaq̇nuxun č̣eveksa. ωmṗeraṭora nalog tasṭuna tene bare, Ičuval Xrisṭos, Padčaġ c̣ine tasṭa".
P̣ilaṭen Šoṭoxun xavare haq̇i: "Hun Yevreyxoy padčaġnu? Isusen ǯoġab tadi šoṭo pine: "Hun pi ḳinäḳe".
P̣ilaṭen kala be͑inśxo saal amdarxo pine: "Zu me amdarasṭa sal sa taxsər atezksa".
Ama šoṭoġon äyitin loxol čurpi piṭun: "Me amdar Galileyanaxun biq̇i me oćalxol ciriḳ bütüm Iudeyinä amdarxo zombsunen täšvišäne basṭa".
P̣ilaṭen Ġalileyin barada ibaki xavare haq̇i: "Me Amdar Ġalileyalune ki?"
Isusi Iroden kalaluġbala oćalaxun baksuna avabaki Šoṭo Irodi ṭo͑ġo͑le yaq̇abi. Šoṭaynaḳ ki, ṭe ġimxosṭa Irodal Yerusalimaney.
Iroden Isusa aḳi gele mu͑qe baki. Šoṭay barada gele šeyurxone ibakey, Ičuval aḳsune čuresay. Šoṭoxun sa niśan aḳuna umudey.
Iroden Šoṭo gele sualxone tadi, ama Isusen šoṭo sal sa ǯoġab tene tadi.
Kala be͑inśxo saal ḳanun camḳalxo hayzeri Šoṭo möhkäm taxsərlainšṭunbsay.
Iroden iz äsḳärxoxun sagala Šoṭo tähkir bi laġane haq̇i. Šoṭay loxol sa q̇äšäng paltar lapesṭi P̣ilaṭi ṭo͑ġo͑le qaydi.
Süfṭinaxun sun-sunaxun düšmän bakala P̣ilaṭq̇a Irod ṭe ġi sunaxun dosṭṭun baki.
Ṭe vädä P̣ilaṭen kala be͑inśxo, kalaluġ balṭoġo saal amdarxo topbi
šoṭoġo pine: "Vä͑n me Amdara bez ṭo͑ġo͑l šoṭaynaḳnan ečere ki, Koṭin amdarxo yaq̇nuxune č̣evḳsa. Mone, zu ef be͑ś mäsälinä be͑ġi, me Amdara ef uḳala taxsərxoy sayǯäṭusṭa taxsər tez bä͑ġä͑bi.
Irodenal sa šey tene bä͑ġä͑bi. Šoṭaynaḳ ki, me Amdara beš ṭo͑ġo͑le qoš qaydi. Mone, Kono besbsuni ǯäzina lafṭala hiḳḳal tene be.
Moṭaynaḳal zu Koṭo ǯäza tadi tärboz".
P̣ilaṭen axsibaya görä sa biq̇eciṭu tärbalaney.
Ama bito amdarxon sagala harayṭunpi: "Me Amdar besbeceq̇an! Yaynaḳ Barabbana tärba!"
Barabban šähäre üsyan bi, amdar besbsuni loxol zindanane bosecey.
P̣ilaṭen Isusa tärbseynaḳ ṗurum iz säsä alanebi.
Ama šoṭoġon: "Koṭo xačaxun suruḳba, xačaxun suruḳba!" uḳa harayṭunney.
P̣ilaṭen xibimǯi käräm šoṭoġo pine: "Axər Koṭin ḳä pisluġa be? Zu Koṭosṭa besbesuna layiġ sal sa šey tez bä͑ġä͑bi. Koṭo görä Koṭay ǯäzinä tadi tärboz".
Ama šoṭoġon äyiti loxol čurpi alloy säsen täläbṭunbsay ki, Šo xačaxun suruḳ bakeq̇an. Šoṭoġoy säs bitoṭuxun osṭaare č̣eysay.
P̣ilaṭen šoṭoġoy fikirä bex ṗaṗesbsuni q̇äräräne hari.
Üsyanbi, amdar besbsuna görä zindana boseci amdara šoṭoġoy čuresuna görä tärebi. Isusa isä šoṭoġoy exṭiyäräne tadi.
Äsḳärxon Isusa tašaṭan, ayizexun eġala Simon c̣ila Kirenalu sa amdarṭun biq̇i. Xača šoṭay bać̣ane laxi, Isusi bać̣anexun xorbsuna mäǯburṭunbi.
Isusi bać̣anexun gele amdar saal Šoṭaynaḳ o͑no͑pi neġ cikala čupuxe taysay.
Isusen šoṭoġoy täräf fərəpi pine: "Ay Yerusalimi xuyärmux, Bez därden ma o͑no͑panan. Vä͑ynaḳ saal ef äyloġoynaḳ o͑no͑panan.
Šoṭaynaḳ ki, ṭetär ġimxone eysa ki "He bäxṭävärä songsuzxo, äyel nu baki tapanxo saal nu c̣umeci döšürxo bakala čupux!" uḳalṭun.
"Ṭe vaxṭ buruxmoġo <Beš loxol bitanan!> alloy ganxo <Yax butkanan!> upsa burqalṭun".
Šoṭaynaḳ ki, ägär göyün xode bel moṭoġo eṭunšṭasa, ṗoy q̇ari xoda hetär balṭun?"
Isusaxun sa gala ṗä͑ tan ǯinäyätbiṭoġoval besbsa taṭunšṭay.
Källä c̣i bakala gala eġaṭan Šoṭoq̇a ǯinäyätbiṭoġo-sunṭu yön täräf, ṭesunṭu tärs täräf xačaxun suruḳṭunbi.
Ama Isusen nexey: "Bava! Koṭoġo baġəšlainša, šoṭaynaḳ ki, ičoġoy ḳä bsuna avateṭun". Šoṭoġoy paltara čöp bosi ičoġoy arane payṭunbi.
Ǯamaaten čurpi tamašanebsay. Šoṭoġoxun sagala kalaṭoġonal Isusa laġa haq̇i nexṭuniy: "Moṭin q̇eräzṭoġone čarḳesṭay. Ägär Ko Buxaʒ́uġon č̣äḳṗi Xrisṭosesa, barta Ičuval čarḳesṭeq̇an!"
Äsḳärxoval iśalainšaki Šoṭo laġaṭun haq̇i. Šoṭo fine oq̇oy tadi
metärṭun pi: "Ägär Hun Yevreyxoy Padčaġnusa, Va čarḳesṭa".
Šoṭay besṭa "Yevreyxoy Padčaġ mone" came camecey.
Xačaxun suruḳbay ǯinäyätbalṭoġoy sunṭin Šoṭo böhṭan bosi nexey: "Hun Xrisṭos tenu ki? Vaal, yaxal čarḳesṭa!"
Ṭi͑yämi ǯinayätbalṭin šoṭo q̇adaġanbi nexey: "Hun sal Buxaʒ́uġoxun q̇i͑tenbsa? Hunal hake ǯäzinän biq̇ece!
Yan beš ämälxo görä haq̇lu biq̇eceyan, beš ǯäzinal layiġyan. Me Amdaren isä sal sa haqsuzluġ tenebe".
Oša Isusa pine: "Ay Isus, Vi Padčaġluġa eġaṭan za eyex bada!"
Isusen šoṭo pine: "Va düzinäz nex ki, ge hun Zaxun sagala ǯännäte bakalnu".
Ġenaxun u͑qu͑mǯi saadey.e Vuyumǯi saadal ciriḳf bütüm oćali ćoyel bayinq̇e baki, * *
be͑ġen iz išiġa sateneḳsay. Buxaʒ́uġoy ḳožin pärdä bi͑yexun ǯöyebaki.
Isusen alloy säsen bayan bi pine: "Ay Bava! Bez Urufa Vi kiyelez tasṭa". Isusen moṭo pi, axərənǯi näfäsäne tadi.
Moṭoġo aḳala izbašinen: "Serine ki, me Amdar düzgün amsarey" uḳa Buxaʒ́uġo alxəšebi.
Moṭoġo tamašabseynaḳ gireci amdarxo me baki äšurxo aḳi, ičoġoy döšä ṭapsun qošṭun qaybaki.
Isusa čalxala amdarxon bitoṭin saal Šoṭay qošṭan Galileyanaxun hari čupuġon isä ä͑xil čurpi baki-č̣ovakiṭoġoṭun be͑ġsay.
Kala Šurin üzvi bakala Iosif c̣ila xeyir tadala, hamal Buxaʒ́uġo ve͑ sa amdarebuy.
Šo Kala Šurin q̇äräraxunq̇a äšurxoxun iräzi tene bakey. Me amdar Iudeyin Arimaṭeya šähärexuney, šoṭinal Buxaʒ́uġoy Padčaġluġane yaq̇beġsay.
Šo P̣ilaṭi ṭo͑ġo͑l taci Isusi meyidäne čureci.
Meyidä xače loxolxun civḳi parčina bäč̣ürpi, q̇ayane kaśeci, hälä memačaġ šuḳḳal nu oćalaxeci sa gärämzoġo lanexi.
Ṭe ġi Häzirluġ beġala ġiney,g U͑qu͑mǯi ġiyal iśalainšebaksay. *
Isusaxun sa gala Galileyanaxun hari čupuxal Iosifi bać̣anexun taci gärämzoġo saal Šoṭay meyidä höndä laxsuna aṭunḳi.
Šoṭoġon ḳoya taci šaaṭ adeġala oyurxo saal toyexlu č̣äyinxoṭun häzirbi. Üqümǯi ġine Buxaʒ́uġoy buyruġen äšteṭunbi.
