ოც და ოთხსა თჳსა მის მეექუსისასა, მეორესა წელსა დარიოზ მეფისასა, მეშჳდესა თუესა, ოც და ერთსა თჳსასა, იტყოდა უფალი ჴელითა ანგეს წინაწარმეტყუელისაჲთა, და თქუა.
არქუ ზორობაბელს სალათიელისსა ტომისაგან Page of ms. J: A20r იუდაჲსა, და იესუს იოსედეკისსა მღდელსა მას/ დიდსა, და ყოველსა მას ნეშტსა ერისასა, და არქუ,
ვინ არს თქუენგანი, რომელსა ეხილვა სახლი ესე დიდებითა თჳსითა პირველად, და ვითარ ხედავთ აწ მას ვითარცა არა ყოფილსა თქუენ წინაშე.
და აწ განძლიერდი ზორობაბელ, იტყჳს უფალი, და განძლიერდი იესუ იოსედეკისო მღდელი ეგე დიდი, და განძლიერდინ ყოველი იგი ერი ქუეყანისაჲ, იტყჳს უფალი, და იქმოდეთ, რამეთუ მე თქუენ თანა ვარ, იტყჳს უფალი ყოვლისა-მპყრობელი.
სიტყუაჲ რომელი აღგითქუ თქუენ გამოსლვასა თქუენსა ეგჳპტით, და სული ჩემი დადგრომილ არს თქუენ შორის. ნუ გეშინინ თქუენ,
რამეთუ ამას იტყჳს უფალი ყოვლისა-მპყრობელი, რამეთუ ერთგზის და შევძრა მე ცაჲ და ქუეყანაჲ, ზღუაჲ და ჴმელი.
და შევძრნე ყოველნი ნათესავნი, და მოვიდენ რჩეულნი ყოველთა თესლთანი, და აღვავსო სახლი ესე დიდებითა, იტყჳს უფალი ყოვლისა-მპყრობელი.
ჩემი არს ვეცხლი, და ჩემი არს ოქროჲ, იტყჳს უფალი ყოვლისა-მპყრობელი.
რამეთუ დიდ იყოს დიდებაჲ სახლისაჲ ამის უკუანაჲსკნელი უფროჲს პირველისა, იტყჳს უფალი ყოვლისა-მპყრობელი, და ადგილსა ამას მოვსცე მშჳდობაჲ, იტყჳს უფალი ყოვლისა-მპყრობელი, და მშჳდობაჲ სულისაჲ შესაწევნელად ყოველთა, რომელნი აშჱნებდეს აღმართებად ტაძარსა ამას.
ოც და ოთხსა მეცხრისა მის თთჳსასა, მეორესა წელსა დარიოზ მეფისასა, იყო სიტყუაჲ უფლისაჲ ანგეაჲსა მიმართ წინაწარმეტყუელისა, და თქუა.
ამას იტყჳს უფალი ყოვლისა-მპყრობელი, ჰკითხე შენ მღდელთა მათ შჯული, და არქუ;
უკუეთუ მოიღოს კაცმან ჴორცი წმიდაჲ კიდესა სამოსლისა თჳსისასა და შეეხოს წუერსა სამოსლისა მისისასა პურისათანი, ანუ წუენისაჲ, Page of ms. J: A20v გინა ღჳნისაჲ, გინა ზეთისაჲ;/ გინა თუ ყოვლისავე საჭმლისაჲ, უკუეთუ განწმიდნეს. და მიუგეს მღდელთა მათ, და ჰრქუეს, არა.
და თქუა ანგეოს; უკუეთუ შეეხოს შეგინებული სულითა ამის ყოვლისაგანსა, უკუეთუ შეიგინოს. და მიუგეს მღდელთა მათ, და ჰრქუეს, შეიგინოს.
მიუგო ანგეოზ და ჰრქუა; ეგრეთცა ესე ერი, და ეგრეთცა ესე ნათესავი წინაშე ჩემსა, იტყჳს უფალი. ეგრეთცა საქმენი ჴელთა მათთანი, და რომელი შეეხოს მათ, შეიგინოს სიტყუათა მათთათჳს განთიადისათა; ელმოდის წინაშე პირსა უკეთურებისა მათისასა, და გძულდა ბჭეთა ზედა მამხილებელი.
და აწ დაიდევ<ი>თ გულთა თქუენთა ამიერ დღითგან და მერმეცა, ვიდრე დადეგადმდე ლოდი ლოდსა ზედა ტაძარსა უფლისასა.
ვინ იყვენით, ოდეს იგი დასდევით საუნჯესა ოცი სათუელი, და იქმნა ათ სათუელ ქრთილი, და შთაჰჴედით საწნეხელსა აღმოვსებად ერგასისისა საწყაულისა, და იყო იგი ოც,
დაგეც თქუენ უნაყოფოებითა და ხორშაკითა და სეტყჳთა ყოველსა ზედა საქმესა ჴელთა თქუენთასა, და არა მოიქეცით ჩემდა, იტყჳს უფალი.
დააწესენით აწ გულნი თქუენნი ამიერ დღითგან, და მიმდემი, ოც და ოთხითგან მეცხრისა თთჳსაჲთ, და ამიერ დღითგან ვინაჲთგან დაეფუძნა ტაძარი უფლისაჲ, დაიდევით გულთა თქუენთა,
უკუეთუ საცნაურ იყოს კალოსა მერმე და ვენაჴსა და ლეღუსა და მროწეულსა და ხესა ზეთის-ხილისასა რომელსა არა მოაქუნდა ნაყოფი, ამიერ დღითგან ვაკურთხო.
და იყო სიტყუაჲ უფლისაჲ ანგეს მიმართ წინაწარმეტყუელისა მეორედ ოც და ოთხსა თთჳსასა/, Page of ms. J: A21r და თქუა.
არქუ ზორობაბელსა სალათიელისსა ტომისაგან იუდაჲსსა, ვითარმედ მე შევძრა ცაჲ და ქუეყანაჲ, ზღუაჲ და ჴმელი;
და დავამჴუნე საყდარნი მეფეთანი, და მოვსრა ძალი მეფეთა ყოველთა თესლთაჲ, და დავსცე ეტლები და მჴედრები, და დაეცეს ცხენები <და მჴედრები>, და აღმჴედრებულნი მათ ზედა კაცად-კაცადი მახჳლითა ძმისა მიმართ თჳსისა.
მას დღესა შინა, იტყჳს უფალი ყოვლისა-მპყრობელი; მოგიყვანო შენ ზორობაბელ სალათიელსო მონაო ჩემო, იტყჳს უფალი, და დაგადგა შენ <ვითარცა> ბეჭედი, რამეთუ შენ სათნო გიყავ, იტყჳს უფალი ყოვლისა-მპყრობელი.: .: .:
