და აწ, ისრაელ, ისმინე სამართალთა და მშჯავრთაჲ, რაოდენთა მე გასწავებ თქუენ დღეს ქმნად, რაჲთა ცოცხალ იყვნეთ და განჰმრავალწილნეთ და შესრულთა დაიმკჳდროთ ქუეყანაჲ, რომელი უფალმან ღმერთმან მამათა თქუენთამან მოგცეს თქუენ.
არა შესძინოთ სიტყუასა, რომელსა მე გამცნებ თქუენ დღეს, და არა დააკლოთ მისგან დაცვად ყოველთა მცნებათა უფლისა ღმრთისა ჩუენისათა, რაოდენთა მე გამცნებ თქუენ დღეს, და არა დააკლოთ მისგან დაცვად ყოველთა მცნებათა უფლისა ღმრთისა ჩუენისათა, რაოდენთა მე გამცნებ თქუენ დღეს.
თუალთა თქუენთა იხილნეს ყოველნი, რაოდენნი უყვნა უფალმან ღმერთმან თქუენმან ველფეგორს, რამეთუ ყოველი კაცი, რომელი ვიდოდა შემდგომად ველფეღორისსა, აღჴოცა იგი უფალმან ღმერთმან თქუენმან თქუენ მიერ.
ხოლო თქუენ შეახლებულნი უფალსა ღმერთსა თქუენსა ცოცხალ იყვნეთ ყოველნი დღეს-დღებრ.
იხილეთ, გიჩუენენ თქუენ სამართალნი და მშჯავრნი, ვითარცა მამცნო მე უფალმან ქმნად ესრეთ ქუეყანასა შინა, რომელსა თქუენ შეხუალთ მუნ დამკჳდრებად მისსა:
და დაიცვენით და ყვენით, რამეთუ ესე არს სიბრ\ძნე Page of ms. Ga: 221v თქუენი და გულისჴმის-ყოფაჲ წინაშე ყოველთა წარმართთასა, რომელთაცა ესმნენ ყოველნი ესე სამართალნი და თქუან: აჰა, ერი ბრძენი და მიწთომილი ნათესავი ესე დიდი.
რამეთუ რომელი ნათესავი არს დიდ, რომლისა არს მისსა ღმერთი მახლობელ მათსა, ვითარცა უფალი ჩუენდა ყოველსა შინა, რომელსაცა მჰხადოდი მას?
და რომელი ნათესავი არს დიდ, რომლისა არიან მისსა სამართალნი და მშჯავრნი მართალნი ყოველთაებრ ამის შჯულისათა, რომელსა მე მივსცემ Page of ms. Ga: 222r წინაშე თქუენსა დღეს?
ეკრძალე მას და დაიცევ სული შენი ფრიად. ნუ დაივიწყენ ყოველთა სიტყუათა, რომელნი იხილნეს თუალთა შენთა, და ნუ განეშორებიან გულისაგან შენისათა და შეამთხჳნე ძეთა შენთა და ძეთა შენთასა
დღესა, რომელსა დასდეგით წინაშე უფლისა ღმრთისა თქუენისა მთასა შინა ხორივს, დღესა ეკლესიობისასა, რამეთუ თქუა უფალმან ჩემდამო: ეკლესია-ყავ ჩემდა მომართ ერი და ისმინნენ სიტყ\უანი Page of ms. Ga: 222v ჩემნი, რაჲთა ისწავონ შიში ჩემი ყოველთა დღეთა, რაოდენთა ცოცხალ იყვნენ იგინი ქუეყანასა ზედა, და ძეთა მათთა ასწაონ.
და მოხუედით და დასდეგით ქუეშე მთისა. და მთაჲ იწუებოდა ცეცხლითა ვიდრე ცადმდე, ბნელი, ნისლი, ალმური, ჴმაჲ დიდი
და იტყოდა თქუენდა მიმართ მთასა ზედა საშუალ ცეცხლისა: ჴმაჲ სიტყუათაჲ გესმა თქუენ და მსგავსებაჲ არა იხილეთ, არამედ ჴმაჲ.
და მიგითხრა თქუენ აღთქუმაჲ თჳსი, რომელი გამცნო თქუენ ქმნად ათნი სიტყუანი, და დაწერნა იგინი ორთა ზედა ფიცართა.
და მე მამცნო უფალმან მას ჟამსა შინა სწავლად თქუენდა სამართალთა და მშჯავრთა ქმნად თქუენგან მათ ქუეყანასა ზედა, რომლისა მიმართ თქუენ მიხუალთ მუნ დამკჳდრებად მისსა.
და დაიცვენით ფრიად სულნი თქუენნი, რამეთუ მსგავსებაჲ არა იხილეთ მას დღესა შინა, რომელსა იტყოდა უფალი თქუენდა მიმართ ქორივს მთასა შინა საშუალ ცეცხლისა:
ნუ უშჯულოებთ და იქმთ თავთა თქუენთად მსგავსებასა წახნაგებულსა ყოველსა ხატსა, მსგავსებასა მამრისა ანუ მდედრისასა,
მსგავსებასა საცხოვართა მყოფთასა ქუეყანასა ზედა, მსგავსებასა ყოველისა ქათმისა ფრთოვნისასა, რომელი ფრინავს,
მსგავსებასა ყოვლისა ქუეწარმავალისასა, რომელი ვალს ქუეყანასა ზედა, მსგავსებასა ყოვლისა თევზისასა, რაოდენი არს წყალთა შინა ქუეშე კერძო ქუეყანისასა.
და ნუ აღიხილავთ ცად და მხილველი მზისა და Page of ms. Ga: 223r მთოვარისა და ვარსკულავთაჲ და ყოველთა სამკაულთა ცისათაჲ შეცთომილი თაყუანის-სცემ მათ და ჰმსახურებ მათ, რომელნი მისცნა უფალმან ღმერთმან თქუენმან ყოველთა წარმართთა, მყოფთა ცასა ქუეშე.
ხოლო თქუენ შეგიწყნარნა ღმერთმან და გამოგიყვანნა თქუენ საჴუმილით რკინისაჲთ ეგჳპტით ყოფად მისსა ერად მკჳდრობისად, ვითარცა დღესა ამას შინა.
და უფალი ღმერთი გამიგულმწყრალნა მე თქუმულთათჳს თქუენ მიერ და ფუცა, რაჲთა არა განვვლო იორდანე ესე და რაჲთა არა შევიდე ქუეყანად, რომელსა უფალი ღმერთი მოგცემს ნაწილად.
რამეთუ მე მოვკუდები ქუეყანასა ამას შინა და არა განვვლო იორდანესა ამას. ხოლო თქუენ განჰვლოთ და დაიმკჳდროთ ქუეყანაჲ კეთილი ისი.
ეკრძალენით, ნუ დაივიწყებთ აღთქუმასა უფლისა ღმრთისა თქუენისასა, რომელი აღთქუა თქუენდა მიმართ. და ნუ ჰგონებთ და იქმთ თქუენ თავისა თქუენსია წახნაგებულსა მსგავსებასა ყოველთასა, რომელნი გიბრძანნა შენ უფალმან ღმერთმან შენმან.
რამეთუ უფალი ღმერთი შენი ცეცხლ განმლეველ არს, ღმერთი მოშეურნე.
ხოლო უკუეთუ ჰშვნე ძენი და ძენი ძეთა შენთანი და დაიყოვნოთ ქუეყანასა ზედა და უშჯულო იქმნნეთ და ჰქმნათ ქანდაკებული მსგავსებაჲ ყოვლისაჲ და ჰქმნათ ბოროტი წინაშე უფლისა ღმრთისა თქუენისა და განარისხო იგი,
გიწამებ თქუენ დღეს ცასა და ქუეყანასა, ვითარმედ წარწყმედით წარსწყმდეთ ქუეყანისაგან, რომლისა მიმართ თქუენ წიაღ-ხუალთ იორდანესა მუნ დამკჳდრებად მისსა, არა იმრავალჟამეულნეთ დღენი მას ზედა, არამედ აღჴოცით აღიჴოცნეთ.
და განგლესნეს უფალმან თქუენ ყოველთა შორის, რომელთა მიმართ შეგიყვანნეს თქუენ უფალმან მუნ.
და ჰმსახურებდეთ თქუენ ღმერთთა უცხოთა, ქმნულთა ჴელთა კაცთასა, ძელთა და Page of ms. Ga: 224r ქვათა, რომელნი არა ჰხედვენ, არცა ესმის, არცა ჭამენ, არცა იყნოსენ.
და გამოიძიოთ მუნ უფალი ღმერთი თქუენი და ჰპოოთ იგი, რათა შენითა და ყოვლითა სულითა შენითა წირსა შინა შენსა.
და ჰპოვნეთ ყოველნი ესე სიტყუანი უკუანაჲსკნელთა დღეთასა. და მოიქცე უფლისა მიმართ ღმრთისა შენისა და ისმინო ჴმისა მისისაჲ.
რამეთუ უფალი ღმერთი მოწყალე არს, უფალი ღმერთი შენი, არა დაგიტევოს შენ, არცა აღჴოცოს შენ, არა დაივიწყოს აღთქუმისა მამათა შენთაჲსა, რომელსა ეფუცა მათ უფალი.
იკითხეთ დღეთა ყოფილთა უწინარეს შენსა, დღითგან, რომლით აღაგო ღმერთმან კაცი ქუეყანასა ზედა, და კიდითგან ცისაჲთ ვიდრე კიდედ ცისამდე, უკუეთუ იქმნა მსგავსად სიტყჳსა ამის დიდისა, უკუეთუ გესმა-ყე ესევითარი,
უკუეთუ ესმა ნათესავსა ჴმაჲ მცხოვნისა, მზრახვალისაჲ საშუალით ცეცხლისაჲთ, ვითარ-სახედ გესმა შენ და სცხოვნდი,
უკუეთუ განცადა ღმერთმან, შესრუ\ლმან Page of ms. Ga: 224v გამოყვანებად თავისა თჳსისა ნათესავი შორის ნათესავთაჲსა, განსაცდელითა და სასწაულებითა და ნიშებითა და ბრძოლითა და ჴელითა მტკიცითა და მკლავითა მაღლითა და საჩუენებელებითა დიდითა ყოველთაებრ, რომელნი მიყვნა ჩუენ უფალმან ღმერთმან ცუენმან ეგჳპტეს შინა წინაშე შენსა მხედველისა,
რაჲთა სცნა შენ, ვითარმედ უფალი ღმერთი შენი ესე ღმერთ არს და არა არს მერმე თჳნიერ მისსა.
ცით გამო სასმენელ შენდა და ქუეყანასა ზედა გიჩუენა შენ ცეცხლი მისი დიდი, და სიტყუანი მისნი გესმნეს საშუალით ცეცხლისაჲთ
სიყუარულისათჳს მის მიერ მამათა შენთაჲსა და გამოგირჩია თესლი მათი მათ თანა თქუენ. ამოგიყვანა შენ მან ძალითა თჳსისთა დიდთა ეგჳპტით
მოსრვად ნათესავი დიდი და უძლიერესი შენსა წინაშე პირსა შენსა, შეყვანებად შენდა და მოცემად ქუეყანაჲ მათი სამკჳდრებელად, ვითარცა გაქუს დღეს.
და ცან დღეს და მოიქეც განგონებითა, ვითარმედ უფალი ღმერთი შენი ესე არს ღმერთ ცათა შინა ზე და ქუეყანასა ზედა ქუე, და არა არს მერმე თჳნიერ მისსა.
და დაიცვენ სამართალნი მისნი და მცნებანი მისნი, რომელთა მე გამცნებ შენ დღეს, რაჲთა კეთილი იქმნეს შენდა და ძეთა შენთა შენ თანა, რაჲთა გრძელდღე იქმნნეთ ქუეყანასა ზედა, რომელი უფალმან ღმერთმან მოგცეს შენ ყოველთა დღეთა.
მაშინ განუჩინნა მოსემან სამნი ქალაქნი წიაღ იორდანესა მზისა აღმოსავალით კერძო.
შელტოლვად მუნ კაციმსკლველისა, რომელიცა შეილტოდის მუნ და ცხონდეს. რომელმანცა მოკლას მოყუასი უმეცრებით და ესრეთ არა სძულდა იგი უწინარეს გუშინისა და მესამისა, და შეივლტოდის Page of ms. Ga: _ ერთსა ქალაქთა ამათგანსა და ცხოვნდეს:
ბოსორი უდაბნოს ქუეყანასა შინა ველობსა რუბენს, და რაბოთი გალაადისაჲ გადს, და ღვლონი ბასსანისაჲ მანასის.
ესე შჯული არს, რომელი დაუდვა მოსემან ძეთა ისრაელისათა,
გა-მო-რაჲ-სრულ იყვნეს იგინი ქუეყანით ეგჳპტით,
წიაღ იორდანისა, ღელესა შინა მახლობელად სახლსა ფოღორისსა, ქუეყანასა სიონ მეფისა ამორრეველთაჲსასა, რომელი მკჳდრ იყო ესსევონს, რომელი დასცა მოსემან და ძეთა ისრაელისათა გამოსლვასა მათსა ქუეყანით.
და დაიმკჳდრეს ქუეყანაჲ მისი და ქუეყანაჲ ოგისი მეფისა ბასანისაჲ ორთა მეფეთა ამორრეველთაჲსაჲ, რომელნი იყვნეს წიაღ იორდანესა აღმოსავალით კერძო მზისაჲთ,
აროირითგან, რომელ არს ბაგესა თანა ნაღუარევისა არნონისასა, და მთასა თანა სებონისასა, რომელ არს ერმონი,
ყოველი არაბიაჲ წიაღ იორდანისა აღმოსავალით კერძო მზისაჲთ ქუე ასიდოთითგან გამოთლილი.
