ჰრქუა უფალმან მოსეს: შევედ ფარაოჲსა და არქუ მას: ამას იტყჳს უფალი ღმერთი ებრაელთა: გამოავლინე ერი ჩემი, რაჲთა მსახურებდენ მე.
უკუეთუ არა ინებო გამოვლინებაჲ ერისა ჩემისაჲ, არამედ მერმე კუალად იპყრობდე-ღა,
აჰა-ესერა ჴელი უფლისაჲ იყოს საცხოვართა მათთა ზედა, რომელ არს ველთა გარე, ცხენთა ზედა და კარაულთა, ზროხათა და ცხოვართა სიკუდილი დიდი ფრიად.
და ვიდიდო მე მას ჟამსა შინა შოვრის საცხოვართა მათ ეგჳპტელთაჲსა და შოვრის საცხოვართა ძეთა ისრაჱლისათა, არა მოკუდეს საცხოვართაგანი ძეთა ისრაჱლისათაჲ არცა ერთ.
და მოსცა ღმერთმან განჩინებაჲ ესე და თქუა, ხვალე ყოს უფალმან სიტყუაჲ ესე ქუეყანასა ზედა.
.. და მოწყჳდა ყოველი საცხოვარი ეგჳპტისაჲ, ხოლო საცხოვართაგან ძეთა ისრაჱლისათა არა მოკუდა არცა ერთ.
Page of ms. O: 83v იხილა ფარაო, რამეთუ არა მოკუდა საცხოვართაგან ძეთა ისრაჱლისათა არცა ერთ, დამძიმდა გული ფარაოჲსი და არა განუტევა ერი იგი.
ეტყოდა უფალი მოსეს და აჰრონს და ჰრქუა: მოიღეთ თქუენ ჴელითა თქუენითა სავსჱ ნაცარი საჴუმილისაგან და აღაფქურიენ მოსე ცად წინაშე ფარაოჲსა და წინაშე მსახურთა მისთა.
და იყავნ მტუერი ყოველსა ქუეყანასა ეგჳპტისასა. და იყოს კაცთა ზედა და ყოველთა ზედა ოთხფერჴთა ფაქლი გამომტკუეფლვარჱ აღმოსხმით კაცთა ზედა და ოთხფერჴთა და ყოველსა ქუეყანასა ეგჳპტისასა.
მოიღო მოსე მტუერი იგი საჴუმილისაჲ წინაშე ფარაოჲსა და აღაფქურია ცად. და იყო ფაქლი მტკუეფლვარჱ გამოსხმით კაცთა ზედა და ოთხფერჴთა.
და ვერ ეძლო გრძნეულთა მათ დადგომად წინაშე მოსესა გუემისა მისგან, რამეთუ იყო ფაქლი იგი გრძნეულთაცა ზედა და ყოველსა ქუეყანასა ეგჳპტისასა.
განიფიცხა გული თჳსი ფარაო და არა ისმინა მათი, ვითარ-იგი ეტყოდა უფალი.
ჰრქუა უფალმან მოსეს: აღიმსთუე განთიად და დადეგ წინაშე ფარაოჲსა და არქუ მას: ამას იტყჳს უფალი ღმერთი ებრაელთაჲ, გამოავლინე ერი ჩემი, რაჲთა მსახურებდენ მე უდაბნოსა ზედა.
უკუეთუ არა, აწვე ამას ჟამსა შინა გამოვავლინნე ყოველნი შემთხუევანი ჩემნი გულსა შენსა და მსახურთა და ერისა შენისასა და სცნა, ვითარმედ სხუაჲ არავინ არს Page of ms. O: 84r ჩემსა გარეშე ყოველსა ქუეყანასა;
რამეთუ აწ მივავლინო ჴელი ჩემი და მოგსრა შენ და ერი შენი და მოისპო შენ ქუეყანით.
რამეთუ და-ვე ამასთჳს -გმარხე შენ. რაჲთა ვაჩუენო შენ ზედა ძალი ჩემი და რაჲთა განითქუას სახელი ჩემი ყოველსა ქუეყანასა ზედა;
რამეთუ შენ იყენებ-ღა ერსა ჩემსა არა გამოვლინებად მათა.
აჰა-ეგერა ვაწჳმო ჟამსა ოდენ ამას ხვალე სეტყუაჲ დიდადი ფრიად, რომელ ეგევითარი არა ყოფილ იყოს ეგჳპტეს, ვინაჲთგან დაებადა, ვიდრე აქამომდე.
აწ იწრაფე შეკრებად საცხოვარი შენი და რაოდენი-რაჲ არს ველსა ზედა შენი: ყოველივე კაცი და საცხოვარი, რაოდენი იპოოს ველსა ზედა და არა შევიდეს სახლსა, დაეცეს მას ზედა სეტყუაჲ და მოკუდეს.
რომელთა-იგი შეეშინა სიტყჳსაგან უფლისა მსახურთაგანთა ფარაოჲსთა, შეიკრიბეს საცხოვარი მათი სახლებსა.
ხოლო რომელი-იგი არა ერჩდა გონებითა თჳსითა სიტყუასა უფლისასა, დაუტევეს ველსა გარე.
ჰრქუა უფალმან მოსეს: განირთხ ჴელი შენი ცად და იყოს სეტყუაჲ ყოველსა ქუეყანასა ეგჳპტისასა, კაცთა ზედა და ცხოვართა და ყოველსა ზედა მწუანვილსა ველისასა.
განირთხა მოსე ჴელი თჳსი ზეცად და უფალმან მოსცა ქუხილი და სეტყაჲ და აღატყდებოდა ცეცხლი და აწჳმა უფალმან სეტყუაჲ ყოველსა ქუეყანასა ეგჳპტისასა კაცითგან მიპირუტყუამდე.
Page of ms. O: 84v იყო სეტყუაჲ და ცეცხლი შემწუველი სეტყუასა მას თანა. ხოლო სეტყუაჲ იგი დიდ იყო ფრიად, რომელ ეგევითარი არა ყოფილ იყო ყოველსა ქუეყანასა ეგჳპტისასა ვინაჲთგან იყო მას ზედა ნათესავი.
და მოსრა სეტყუამან ყოველსა ქუეყანასა ეგჳპტისასა კაცითგან მიპირუტყუამდე და ყოველივე მწუანვილი. რომელი იყო ველსა ზედა, მოსრა სეტყუამან და ყოველი ხჱ ველისაჲ მოსრა.
ხოლო ქუეყანასა გესემისასა, რომელსა ზედა იყვნეს ძენი ისრაჱლისანი, არა იყო სეტყუაჲ.
მოუწოდა ფარაო მოსეს და აჰრონს, და ჰრქუა მათ: ვცოდე აწ უფლისა მიმართ. მართალ არს უფალი და მე და ერი ჩემი უღმრთო.
ილოცეთ ჩემთჳს უფლისა მიმართ და დასცხრენ ჴმანი ესე ღმრთისანი ამიერითღან, ცეცხლი ესე და სეტყუაჲ, და განგიტევნე თქუენ.
ჰრქუა მას მოსე: ვითარცა განვიღე ქალაქით, განვიპყრნე ჴელნი ჩემნი უფლისა მიმართ და ჴმანი ესე დასცხრენ, და სეტყუაჲ და წჳმაჲ არღარა იყოს, ... რამეთუ უფლისაჲ არს ქუეყანაჲ ესე.
ხოლო შენ და მსახურნი შენნი გიცნი, რამეთუ არღა გეშინის ღმრთისა.
სელი და ქრთილი იგუემა, რამეთუ ქრთილი წარმოდგომილ იყო და სელი თესლოოდა.
ხოლო იფქლი და ასლი არა იგუემა, რამეთუ მცხუედ იყო.
გამოვიდა მოსე გარე ქალაქით ფარაოჲსგან და განიპყრნა ჴელნი უფლისა მიმართ. ქუხილი იგი დასცხრა და სეტყუაჲ და წჳმაჲ არღარა დასწუეთა ქუეყანასა ზედა.
Page of ms. O: 85r ვითარცა იხილა ფარაო, რამეთუ დასცხრეს ქუხილნი იგი, სეტყუაჲ და წჳმაჲ, შე-ღავე-სძინა ცოდვად და დაიმძიმა გული თჳსი და მსახურთა მისთა.
განფიცხნა გული ფარაოჲსი და არა განუტევა ერი იგი, ძენი ისრაჱლისანი, ვითარ-იგი ეტყოდა უფალი მოსეს.
