Negeva bakala Arad šähäri padčaġen inebaki ki, israilluyox Aṭarima taġala yaq̇enṭun č̣ovaksa. Me padčaġ ič känanluney. * Šo azuḳi loxol davinane č̣eri, israilluġoxunal šoṭay kiyel äsir bafṭaloroxe baki.
Ṭe vädä israilluġon elasṗi Q̣ONƷ́UĠO äyitṭun tadi: "Ägär Q̣ONƷ́UĠON me azuḳa beš kiyel tadayin, yan šoṭoġo ḳac̣ṗi ičoġoy šähärmoġoval dirisṭ carpi ciḳalyan. *
Q̣ONƷ́UĠON \ israilluġoy me xoyinśa inebaki. Ṭe aradlu känanluġonal šoṭoġo taševṭunḳi. Azuḳen šoṭoġoy šähärmoġoval, ṭiya yäšäyinšala känanluġoval dirisṭ äfčinebi. Moṭoxun oša ṭe gane c̣iya Xormaṭun * laxi.
Azuḳ Edom oćala nu bayseynaḳ Hor buruġoxun č̣eriṭuxun oša fərəpi Ć̣oć̣a dänizi yaq̇ene taci. Yaq̇ boxoyey, amdarxonal ene portteṭunbsay. *
Šoṭoġon Buxaʒ́uġoxun q̇a Moiseyaxun ṭoṭoṭunney: "Heṭaynaḳnan yax Misiräxun č̣evḳi? Amc̣i oćala biseynaḳ? Nä xeya bu, nä śuma bu! Me hiḳḳala nu därmän ukuni loxolal ene be͑ġes teyan baksa!"
Ṭe vädä Q̣ONƷ́UĠON amdarxo duġseynaḳ azuḳi čurḳala gala zähärlu diziḳxone yaq̇abi, šoṭoġon amdarxo duṭunġsay, azuḳi bošṭanal gele amdare ṗuri.
Israilluġon Moiseyi ṭo͑ġo͑l hari piṭun: "Yan günaxyan äšṗesṭi, Q̣ONƷ́UĠOXUN q̇a vaxun ṭoṭoyanpi, isä xoyinśyanbsa, Q̣ONƷ́UĠO ḳalpa afərəpa, bärkä yax me diziḳxoxun čarḳesṭane!" \ Moiseyen Q̣ONƷ́UĠO azuḳa görä xoyinśebi,
Q̣ONƷ́UĠONAL Moiseya pine: "Sa diziḳ düzbi šoṭo duruṭi loxol osṭaarba. Barta diziḳen duġalṭin šoṭay loxolq̇an be͑ġi, ṭe vädä biyalatene".
Moiseyen misäxun sa diziḳ düzbi šoṭoboxoy duruṭi loxol osṭaarebi, šuval diziḳen duġayin me misnä diziḳi loxol be͑ġaṭan bisateney. *
Israilluyox ṗurum yaq̇aṭun bafṭi, hariyal Ovoṭa čurṭunpi.
Ovoṭaxun č̣eri Moavi be͑ġ č̣eġalač täräf bakala amc̣i oćala, Iye-Avarima čurṭunpi.
Memiin ṗurum yaq̇a bafṭi hari Zered uḳala däräneṭun čurḳala ga düzbi.
Oša ṭeṭiinal č̣eri hari Arnon oqe ṭə͑yä͑mi täräf bakala amc̣i oćalaṭun čurpi. Memiin emorluġoy oćale burqesay. Arnon oq emorluġoy q̇a Moav oćalxoy arane sa zahman ḳinäḳey.
Me barada "Q̣ONƷ́UĠOY davoox" uḳala girke * boš metäre cam: \ "...Sufina bakala Vahev q̇a däroox, Arnon,
Ar ayizexun č̣ovaki Moavi zahmana bakala däräni döšexun taġala yaq̇..."
Ṭeṭiin israilluyox Beera * Q̣ONƷ́UĠUN Moiseya "azuḳa girba, šoṭoġo xe tadoz" pi kärizin ṭo͑ġo͑lṭun hari.
Miyaṭun israilluġon me mä͑ġä͑ mä͑ġpey:
Azuḳi kalaṭoġon q̇a c̣ilaṭoġon
Maṭṭanaxun Naxaliela, Naxalielaxun Bamoṭa,
Bamoṭaxun isä Moav oćala bakala däräneṭun taci. Ṭiya bakala P̣isḳa buruġoy belxun dirisṭ me xam ga aḳesay.
Israilluġon emorluġoy padčaġ bakala Sixoneynaḳ xavar yaq̇abi piṭun:
"Xaišyanbsa, vi oćalaxun č̣ovaksuna yax iǯaza tada! Nä ef äkini, nä ṭulluġxoy bošṭan teyan č̣ovakal, ef kärizxoy xenaxunal teyan u͑ġä͑l. Vi oćalaxun č̣ovakamin Kala yaq̇axun teyan č̣eġal".
Ama Sixonen israilluġo iz oćalaxun č̣ovaksuna iǯaza tene tadi. Šoṭin dirisṭ iz q̇ošuna girbi davabseynaḳ amc̣i oćala šoṭoġoy be͑śe č̣eri. Šorox Yahaca ćo-ćoya hari davaṭunbi.
Davina isä israilluġone tašeri. Šoṭoġo q̇ələnǯen ḳac̣ṗi ičoġoy oćalxo Arnon oqaxun burqi Yabboga oqe ṭo͑ġo͑l bakala ammonluġoy zahmanal ciriḳ exṭundi. Ammonluġon isä ičoġoy oćalxo šaaṭṭun q̇orišbsay.
Hametär, israilluġon emorluġoy Xešbon šähärä q̇a šoṭay härrämine bakala ayizmoġo saal mandi bito šähärmoġo kiyel badi baci ṭiya arṭunci.
Xešbon emorluġoy padčaġ Sixoni arcala šähärey. Šoṭin Moavi moṭoxun be͑ś baki padčaġaxun davabi šoṭoġoy Arnon oqal ciriḳ bakala bito oćalxo exṭeney.
Me barada mä͑ġä͑l cameceney:
Xešbonaxun arux,
Vay vi hala, ay Moav!
Mone, vä͑x tayanšeri,
Hametär, israilluyox baci emorluġoy oćala arṭunci.
Oša Moiseyen Yazer šähäräl piyexun č̣vakesṭeynaḳ amdarxone yaq̇abi. Israilluġon šoṭay härrämine bakala ayizmoġoxunal emorluġo šäṗeci baci ṭiya arṭunci.
Ṭeṭiin č̣eri israilluyox yaq̇en Bašanačṭun laci. Bašani padčaġ bakala Ogenal dirisṭ iz q̇ošuna girbi šoṭoġoy be͑śe č̣eri. Šorox hari Edreyi šähäre davinaṭun č̣eri.
Q̣ONƷ́UĠON Moiseya pine: "Šoṭoxun ma q̇ə͑ba! Zu šoṭo ičuval, iz q̇ošunal, iz ölkinäl va ene tadez! Xešbona arci emorluġoy padčaġ Sixoni bel ečeriṭu šoṭay belal ečalnu".
Israilluġonal šoṭoġo bitova - Oga iču, iz ġarmoġo, dirisṭ iz q̇ošuna - ḳac̣ṗi ciṭunpi. Šoṭoġoxun sayǯo dirisṭ tene mandi, ičoġoy oćalxoval bito israilluġone mandi.
