TITUS
Biblia Udica, Versio Nizhensis: Vetus Testamentum
Part No. 62
Previous part

Chapter: 22 

Moavi padčaġ Balagen israilluġo q̇arġišbseynaḳ Bileama ḳalpsun
Moavi padçağ Balagen israilluğo q'arğişbseynak' Bileama k'alpsun


Verse: 1  Link to rat Israilluyox ṗurum yaq̇aṭun bafṭi, hariyal Moavi düzänluġa, Iordan oqe ṭo͑ġo͑l bakala Yerixon šähäri be͑ś čurṭunpi.
   İsrailluyox p'urum yaq'at'un baft'i, hariyal Moavi düzənluğa, İordan oqe t'ǒğǒl bakala Yerixon şəhəri běš çurt'unpi.

Verse: 2  Link to rat Ṭe vädä Moavi padčaġ Ciṗṗori ġar Balagey. Šoṭin israilluġon emorluġoy bel ečeriṭoġoy barada ibakeney.
   T'e vədə Moavi padçağ Üip'p'ori ğar Balagey. Şot'in israilluğon emorluğoy bel eçerit'oğoy barada ibakeney.

Verse: 3  Link to rat Israilluyox ṭema geleṭuniy ki, moavluġon šoṭoġoy c̣iya ibakaṭan q̇ə͑yaṭun bafsṭay, ičoġo ṭuṭultinene haq̇say.
   İsrailluyox t'ema gelet'uniy ki, moavluğon şot'oğoy s'iya ibakat'an q'ı̌yat'un bafst'ay, içoğo t'ut'ultinene haq'say.

Verse: 4  Link to rat Moavluġon Midyani aġsaq̇q̇alxo metärṭun pi: "Belin sürünen čöle o nu efalṭullariḳ, me azuḳenal beš loxol eġayin, yaxun hiḳḳal tene efal". \ Moavi padčaġ bakala Ciṗṗori ġar Balagenal
   Moavluğon Midyani ağsaq'q'alxo metərt'un pi: "Belin sürünen çöle o nu efalt'ullarik', me azuk'enal beş loxol eğayin, yaxun hik'k'al tene efal". \ Moavi padçağ bakala Üip'p'ori ğar Balagenal

Verse: 5  Link to rat iz amdarxo Yevfrat oqe ṭo͑ġo͑l bakala P̣eṭor šähäre yaq̇anebi ki, ṭiya yäšäyinšala Beori ġar Bileama metärq̇aṭun pi: "Misiräxun č̣eri azuḳen här ganu haq̇layinšene, isääl hari beš oćalxoy ṭo͑ġo͑le čurpe. *
   iz amdarxo Yevfrat oqe t'ǒğǒl bakala P'et'or şəhəre yaq'anebi ki, t'iya yəşəyinşala Beori ğar Bileama metərq'at'un pi: "Misirəxun c'eri azuk'en hər ganu haq'layinşene, isəəl hari beş oç̌alxoy t'ǒğǒle çurpe. *

Verse: 6  Link to rat Xaišezbsa, zaynaḳ sa äš biq̇a: eki me azuḳi loxol q̇arġiš cipa. Šorox häysä zaxun zorbaṭun, ama šoṭoġo zäyifläyinša ki, zu šoṭoġo bez ölkinäxun šäṗeces bakaz. Axəri vi tadala xeyir-bäräkäten biq̇ala ḳinäḳ, vi ciḳala q̇arġišenal bineq̇sa".
   Xaişezbsa, zaynak' sa əş biq'a: eki me azuk'i loxol q'arğiş śipa. Şorox həysə zaxun zorbat'un, ama şot'oğo zəyifləyinşa ki, zu şot'oğo bez ölkinəxun şəp'eśes bakaz. Axıri vi tadala xeyir-bərəkəten biq'ala k'inək', vi śik'ala q'arğişenal bineq'sa".

Verse: 7  Link to rat Moavi aġsaq̇q̇alxo q̇a Midyani aġsaq̇q̇alxoval Bileami me biq̇ala äšlin haq̇q̇a exṭi šoṭay ṭo͑ġo͑lṭun taci. Šoṭoġon Balagi piṭoġo bitova ṗaṗesṭunbi.
   Moavi ağsaq'q'alxo q'a Midyani ağsaq'q'alxoval Bileami me biq'ala əşlin haq'q'a ext'i şot'ay t'ǒğǒlt'un taśi. Şot'oğon Balagi pit'oğo bitova p'ap'est'unbi.

Verse: 8  Link to rat Bileamen šoṭoġo pine: "Vä͑n me üše memiya mandanan, zu Q̣ONƷ́UĠOY ǯoġaba avabaki vä͑x uḳoz". Moavi aġsaq̇q̇alxoval šoṭay ḳoya manṭundi.
   Bileamen şot'oğo pine: "Və̌n me üşe memiya mandanan, zu Q'ONČUĞOY coğaba avabaki və̌x uk'oz". Moavi ağsaq'q'alxoval şot'ay k'oya mant'undi.

Verse: 9  Link to rat Buxaʒ́ux Bileameynaḳ aḳeci pine: "Vi ḳoya bakala me amdarxo šuva?"
   Buxačux Bileameynak' ak'eśi pine: "Vi k'oya bakala me amdarxo şuva?"

Verse: 10  Link to rat Bileamen Buxaʒ́uġo ǯoġabe tadi: "Moavi padčaġ Ciṗṗori ġar Balagene me amdarxo yaq̇abe ki, za izi muzin me äyitmoġo uḳaṭun:
   Bileamen Buxačuğo coğabe tadi: "Moavi padçağ Üip'p'ori ğar Balagene me amdarxo yaq'abe ki, za izi muzin me əyitmoğo uk'at'un:

Verse: 11  Link to rat "Mone, Misiräxun č̣eri azuḳen oćali ćoya haq̇layinšene. Xaišezbsa, eki me azuḳi loxol q̇arġiš cipa ki, zäyifläyinšäkeq̇aṭun, zuval šoṭoġo bez ölkinäxun šäṗeces bakaz".
   "Mone, Misirəxun c'eri azuk'en oç̌ali ç̌oya haq'layinşene. Xaişezbsa, eki me azuk'i loxol q'arğiş śipa ki, zəyifləyinşəkeq'at'un, zuval şot'oğo bez ölkinəxun şəp'eśes bakaz".

Verse: 12  Link to rat Buxaʒ́uġon Bileama pine: "Ma taki me amdarxoxun. Ṭe azuḳi loxol q̇arġiš cimapa, šoṭo görä ki, šoṭoġo Zuz xeyir-bäräkät tade".
   Buxačuğon Bileama pine: "Ma taki me amdarxoxun. T'e azuk'i loxol q'arğiş śimapa, şot'o görə ki, şot'oğo Zuz xeyir-bərəkət tade".

Verse: 13  Link to rat Äyč̣indäri savaxṭan Bileamen hayzeri Balagi yaq̇abi aġsaq̇q̇alxo pine: "Ef ölkinä qaybakanan, Q̣ONƷ́UĠON za vä͑xun taysa bartenne".
   Əyc'indəri savaxt'an Bileamen hayzeri Balagi yaq'abi ağsaq'q'alxo pine: "Ef ölkinə qaybakanan, Q'ONČUĞON za və̌xun taysa bartenne".

Verse: 14  Link to rat Moavi aġsaq̇q̇alxoval Balagi ṭo͑ġo͑l qaybaki piṭun: "Bileam yaxun tene hari".
   Moavi ağsaq'q'alxoval Balagi t'ǒğǒl qaybaki pit'un: "Bileam yaxun tene hari".

Verse: 15  Link to rat Ṭe vädä Balagen süfṭinṭuxun gele hamal šoṭoġoxun hörmätlu saal c̣ila aġsaq̇q̇alxone yaq̇abi.
   T'e vədə Balagen süft'int'uxun gele hamal şot'oğoxun hörmətlu saal s'ila ağsaq'q'alxone yaq'abi.

Verse: 16  Link to rat Šorox Bileami ṭo͑ġo͑l hari piṭun: "Ciṗṗori ġar Balagen metäre nex: "bez vaxun xaišṗi äšlä nu bsuna kapmapa.
   Şorox Bileami t'ǒğǒl hari pit'un: "Üip'p'ori ğar Balagen metəre nex: "bez vaxun xaişp'i əşlə nu bsuna kapmapa.

Verse: 17  Link to rat Va ḳä čurensa tadoz, ḳä uḳalnu booz, sayǯä eki me azuḳa q̇arġišṗa".
   Va k'ə çurensa tadoz, k'ə uk'alnu booz, saycə eki me azuk'a q'arğişp'a".

Verse: 18  Link to rat Bileamen Balagi amdarxo ǯoġab tadi pine: "Balagen za iz q̇əzəlen q̇a gümüšen buy ḳožal tadayin, zu bez Buxaʒ́ux bakala Q̣ONƷ́UĠOY nu čureġala sal sa äš biq̇es tez bakon.
   Bileamen Balagi amdarxo coğab tadi pine: "Balagen za iz q'ızılen q'a gümüşen buy k'ojal tadayin, zu bez Buxačux bakala Q'ONČUĞOY nu çureğala sal sa əş biq'es tez bakon.

Verse: 19  Link to rat Ama Q̣ONƷ́UĠON za ene ḳä upsuna avabaksun čurnansasa, vä͑nal me üše memiya mandes banankon".
   Ama Q'ONČUĞON za ene k'ə upsuna avabaksun çurnansasa, və̌nal me üşe memiya mandes banankon".

Verse: 20  Link to rat Buxaʒ́uxal ṭe üše Bileama aḳeci šoṭo pine: "Isä ki me amdarxo va tašṭaṭun hare - taki! Ama Zu va ḳä uḳozsa, šoṭo balnu".
   Buxačuxal t'e üşe Bileama ak'eśi şot'o pine: "İsə ki me amdarxo va taşt'at'un hare - taki! Ama Zu va k'ə uk'ozsa, şot'o balnu".



Bileami elem
Bileami elem


Verse: 21  Link to rat Savaxṭan Bileam hayzeri, iz elemi loxol palanal laxi Moavi aġsaq̇q̇alxoxun sagala yaq̇ane bafṭi.
   Savaxt'an Bileam hayzeri, iz elemi loxol palanal laxi Moavi ağsaq'q'alxoxun sagala yaq'ane baft'i.

Verse: 22  Link to rat Ama šo taġaṭan Buxaʒ́uġoy äǯuġ bäč̣üḳeci, Q̣ONƷ́UĠOY angelal be͑ś č̣eri iz yaq̇a boṭesedi. Bileam elemi loxol tanesay, ičuxunal ṗä͑ nökär.
   Ama şo tağat'an Buxačuğoy əcuğ bəc'ük'eśi, Q'ONČUĞOY angelal běš c'eri iz yaq'a bot'esedi. Bileam elemi loxol tanesay, içuxunal p'ə̌ nökər.

Verse: 23  Link to rat Elemen aḳaṭan ki, yaq̇e boš iz kiyel q̇ələnǯla Q̣ONƷ́UĠOY angele čurpe, yaq̇axun č̣eri q̇oruġane baci. Bileamen isä elema duġi šoṭo yaq̇a qaysṭune čureci.
   Elemen ak'at'an ki, yaq'e boş iz kiyel q'ılıncla Q'ONČUĞOY angele çurpe, yaq'axun c'eri q'oruğane baśi. Bileamen isə elema duği şot'o yaq'a qayst'une çureśi.

Verse: 24  Link to rat Ṭe vädä Q̣ONƷ́UĠOY angel ṗä͑ ṭulluġi aranexun č̣ovakala ǯəġəri boše čurpi, ṭe ǯəġəri ṗä͑ täräfäl bariney.
   T'e vədə Q'ONČUĞOY angel p'ə̌ t'ulluği aranexun c'ovakala cığıri boşe çurpi, t'e cığıri p'ə̌ tərəfəl bariney.

Verse: 25  Link to rat Elemen Q̣ONƷ́UĠOY angela aḳi barinane läčäq̇eci. Bileami tural elemi q̇a barin arane mandi ṗe͑ṭeci. Bileamen elema ṗurum duġsane burqi.
   Elemen Q'ONČUĞOY angela ak'i barinane ləçəq'eśi. Bileami tural elemi q'a barin arane mandi p'ět'eśi. Bileamen elema p'urum duğsane burqi.

Verse: 26  Link to rat Q̣ONƷ́UĠOY angel isä samalal be͑ś hari ṭetär sa q̇ač̣ galane čurpi ki, ṭiya nä tärse fərəpes baksay, nä yön.
   Q'ONČUĞOY angel isə samalal běš hari t'etər sa q'ac' galane çurpi ki, t'iya nə tərse fırıpes baksay, nə yön.

Verse: 27  Link to rat Bileami arci elemen moṭo aḳi čökedi, Bileamiyal äǯuġon biq̇i elema ḳovalen duġsane burqi.
   Bileami arśi elemen mot'o ak'i çökedi, Bileamiyal əcuğon biq'i elema k'ovalen duğsane burqi.

Verse: 28  Link to rat Ṭe vädä Q̣ONƷ́UĠON elema muzalebi, šoṭinal Bileama pine: "Zu va ḳäz be ki, mo xibimǯi käräme za ṭaṗenne?"
   T'e vədə Q'ONČUĞON elema muzalebi, şot'inal Bileama pine: "Zu va k'əz be ki, mo xibimci kərəme za t'ap'enne?"

Verse: 29  Link to rat Bileamen elema pine: "Za laġan haq̇sa? Häysä bez kiyel sa q̇ələnǯ \ bakayin va besezbon!"
   Bileamen elema pine: "Za lağan haq'sa? Həysə bez kiyel sa q'ılınc \ bakayin va besezbon!"

Verse: 30  Link to rat Elemen Bileama ǯoġabe tadi: "Zu vi hämišänin č̣idala elem tezu ki, memačaġ metär bezu?" Bileamen "tää" pine.
   Elemen Bileama coğabe tadi: "Zu vi həmişənin c'idala elem tezu ki, memaçağ metər bezu?" Bileamen "təə" pine.

Verse: 31  Link to rat Ṭe vädä Q̣ONƷ́UĠON Bileami pulmoġo qayepi, šoṭinal ǯəġəri boš čurpi iz kiyel q̇ələnǯ bakala Q̣ONƷ́UĠOY angela aneḳi. Bileamen čökṭi iz ćoya oćalane duġi.
   T'e vədə Q'ONČUĞON Bileami pulmoğo qayepi, şot'inal cığıri boş çurpi iz kiyel q'ılınc bakala Q'ONČUĞOY angela anek'i. Bileamen çökt'i iz ç̌oya oç̌alane duği.

Verse: 32  Link to rat Q̣ONƷ́UĠOY angelen isä pine: "Me elema heṭu görän xib käräm ṭapi? Vi be͑ś č̣eri va taysa nu barḳalo zuzu. Šoṭo görä ki, vi biq̇ala äš Q̣ONƷ́UĠOY piyes düzgün tene aḳesa.
   Q'ONČUĞOY angelen isə pine: "Me elema het'u görən xib kərəm t'api? Vi běš c'eri va taysa nu bark'alo zuzu. Şot'o görə ki, vi biq'ala əş Q'ONČUĞOY piyes düzgün tene ak'esa.

Verse: 33  Link to rat Elemen za aḳi xib käräm bez be͑śṭan fərənepi. Ke elem nu fərəpiniy, isä vi elmoġo haq̇ezuy! Ama elema galdala tezuy!"
   Elemen za ak'i xib kərəm bez běšt'an fırınepi. Ke elem nu fırıpiniy, isə vi elmoğo haq'ezuy! Ama elema galdala tezuy!"

Verse: 34  Link to rat Bileamen Q̣ONƷ́UĠOY angela pine: "Günaxez äšṗesṭi! Vi bez be͑śṭan boṭesṭuna tez avay. Ama bez biq̇ala äš vi piyes pise aḳesasa, zu qaybakaz".
   Bileamen Q'ONČUĞOY angela pine: "Günaxez əşp'est'i! Vi bez běšt'an bot'est'una tez avay. Ama bez biq'ala əş vi piyes pise ak'esasa, zu qaybakaz".

Verse: 35  Link to rat Q̣ONƷ́UĠOY angelen Bileama metäre pi: "Taki me amdarxoxun, ama sayǯä zu va uḳalṭoġo äyitṗa". Bileamal Balagi yaq̇abi aġsaq̇q̇alxoxun sagala taneci.
   Q'ONČUĞOY angelen Bileama metəre pi: "Taki me amdarxoxun, ama saycə zu va uk'alt'oğo əyitp'a". Bileamal Balagi yaq'abi ağsaq'q'alxoxun sagala taneśi.



Balagi Bileama aksun
Balagi Bileama aksun


Verse: 36  Link to rat Balagen Bileami eysuna ibaki, iz be͑ś č̣eyseynaḳ Arnon oqe ṭo͑ġo͑l bakala Ir-Moav šähärene taci. Me šähär iz oćali lap ṭe beley.
   Balagen Bileami eysuna ibaki, iz běš c'eyseynak' Arnon oqe t'ǒğǒl bakala İr-Moav şəhərene taśi. Me şəhər iz oç̌ali lap t'e beley.

Verse: 37  Link to rat Balagen Bileama pine: "Vi bać̣anexun hema käräm amdarez yaq̇abi, heṭu görä ten eysay? Yäni va vi čureġala ḳinäḳ tez yaq̇a badaliy?"
   Balagen Bileama pine: "Vi bač'anexun hema kərəm amdarez yaq'abi, het'u görə ten eysay? Yəni va vi çureğala k'inək' tez yaq'a badaliy?"

Verse: 38  Link to rat Bileamen Balaga metäre ǯoġab tadi: "Mone, häysä vi ṭo͑ġo͑lzu. Ama ḳä pesez baksa? Buxaʒ́uġon za bürüšalṭoġoxun avuzin hiḳḳal pes tez bakon".
   Bileamen Balaga metəre coğab tadi: "Mone, həysə vi t'ǒğǒlzu. Ama k'ə pesez baksa? Buxačuğon za bürüşalt'oğoxun avuzin hik'k'al pes tez bakon".

Verse: 39  Link to rat Oša Balagen Bileama Qiryaṭ-Xucoṭ šähärene tašeri.
   Oşa Balagen Bileama Qiryat'-Xuśot' şəhərene taşeri.

Verse: 40  Link to rat Miya Balagen, beliġoy q̇a eġelxoy q̇urban śampesṭi ṭe yeq̇axun Bileama q̇a šoṭoxun bakala aġsaq̇q̇alxone tadi.
   Miya Balagen, beliğoy q'a eğelxoy q'urban šampest'i t'e yeq'axun Bileama q'a şot'oxun bakala ağsaq'q'alxone tadi.

Verse: 41  Link to rat Äyč̣indäri savaxṭan isä Balagen Bileama exṭi Bamoṭ Baal * uḳala bul ḳoc̣bala galane laci. Memiin Bileamen israilluġoy čurḳala gane sa ṭo͑ġä͑ aneksay.
   Əyc'indəri savaxt'an isə Balagen Bileama ext'i Bamot' Baal * uk'ala bul k'os'bala galane laśi. Memiin Bileamen israilluğoy çurk'ala gane sa t'ǒğə̌ aneksay.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.