TITUS Texts: Biblia Udica, Versio Nizhensis: Vetus Testamentum

TITUS
Text collection: VT
The Udi Bible (Nij version)

Old Testament Books

on the basis of the translation by
Racik Aǧacani, Rafik Danakari, Elmina Danakari, Robert Mobili and Naida Rzaeva
as published on https ://www.udibibliya.com
and in
Rut' - Iona / Rut - Yunus,
Chambersburg 2009,
electronically prepared by Wolfgang Schulze and Jost Gippert,
Gräfensteinberg, 2009 / Hamburg, 2022;
TITUS version by Jost Gippert,
Hamburg, 6.6.2022

Book: Ex.

Chapter: 1

Israilluġoy Misirä bakala väzyät
İsrailluğoy Misirə bakala vəzyət

Verse: 1

Iaḳovaxun, yäni Israilaxun sagala ičoġoy külfätäl exṭi Misirä hari iz ġarmoġoy c̣iyurxo metärey:
İak'ovaxun, yəni İsrailaxun sagala içoğoy külfətəl ext'i Misirə hari iz ğarmoğoy s'iyurxo metərey:

Verse: 2

Ruven, Simeon, Levi, Iuda,
Ruven, Simeon, Levi, İuda,

Verse: 3

Issaḳar, Zevulun, Binyamin,
İssak'ar, Zevulun, Binyamin,

Verse: 4

Dan, Nafṭali, Gad, Ašer. ^*
Dan, Naft'ali, Gad, Aşer. ^*

Verse: 5

Iaḳovi külfäti say, Misirä bakala iz ġar Iosifi külfätäxun sagala, bütüm yetmiš taney.
İak'ovi külfəti say, Misirə bakala iz ğar İosifi külfətəxun sagala, bütüm yetmiş taney.

Verse: 6

Vaxṭ č̣ovaneki, Iosif, iz vičimux saal ṭe näsil ṗure.
Vaxt' c'ovaneki, İosif, iz viçimux saal t'e nəsil p'ure.

Verse: 7

Ama israilluyox gelebaki avuzebaksay, ičoġoy sayal avuzebaksay, šorox zorbaṭun baksay; ṭe ölkä šoṭoġoxun buyebaksay. ^*
Ama israilluyox gelebaki avuzebaksay, içoğoy sayal avuzebaksay, şorox zorbat'un baksay; t'e ölkə şot'oğoxun buyebaksay. ^*

Verse: 8

Oša ṭetär sa vädäne hari ki, Misirä \ Iosifa nu čalxala sa padčaġe taxṭa laci. ^*
Oşa t'etər sa vədəne hari ki, Misirə \ İosifa nu çalxala sa padçağe taxt'a laśi. ^*

Verse: 9

Šoṭin iz azuḳa pine: "Be͑ġanan, israilluyox ičoġoy saya görä yaxun gele hamal zorbaṭun.
Şot'in iz azuk'a pine: "Běğanan, israilluyox içoğoy saya görə yaxun gele hamal zorbat'un.

Verse: 10

Yan ḳänesa biyan buq̇on, tenesa samalal avuzbakalṭun. Sa dava bakayin isä beši düšmänxo gärbaki beš loxol e͑qġalṭun, yax tabi nu bakiyal ölkinäxun č̣eġalṭun". ^*
Yan k'ənesa biyan buq'on, tenesa samalal avuzbakalt'un. Sa dava bakayin isə beşi düşmənxo gərbaki beş loxol ěqğalt'un, yax tabi nu bakiyal ölkinəxun c'eğalt'un". ^*

Verse: 11

Metärluġen, misirluġon israilluġoy loxol q̇äddar näzärätčiyoxṭun laxi ki, šoṭoġo bə͑hi äšlen äzyätq̇aṭun tadi. Israilluġonal faraoneynaḳ P̣iṭom saal Ramses uḳala ambarla šähärmuxṭun biq̇i.
Metərluğen, misirluğon israilluğoy loxol q'əddar nəzərətçiyoxt'un laxi ki, şot'oğo bı̌hi əşlen əzyətq'at'un tadi. İsrailluğonal faraoneynak' P'it'om saal Ramses uk'ala ambarla şəhərmuxt'un biq'i.

Verse: 12

Ama israilluġo äzyät tasṭunen \ šorox ṭe ölkinä samalal gelebaki avuzṭun baksay. Koṭo göräl misirluġon israilluġoxun lap geleṭun zaṗesa burqi,
Ama israilluğo əzyət tast'unen \ şorox t'e ölkinə samalal gelebaki avuzt'un baksay. Kot'o görəl misirluğon israilluğoxun lap gelet'un zap'esa burqi,

Verse: 13

šoṭoġo lap gele səxəšṭəriši koruġ tasṭaṭun burqi.
şot'oğo lap gele sıxışt'ırişi koruğ tast'at'un burqi.

Verse: 14

Misirluġon israilluġo bə͑hi äšurxon - oć̣i ćaxćuxṗesṭi, kärpič boṭesṭi, čöle här ǯürä äšurxo zülüm tasṭun äšṗesṭi šoṭoġoy yäšäyinšä aġuṭunbsay
Misirluğon israilluğo bı̌hi əşurxon - oč'i ç̌axç̌uxp'est'i, kərpiç bot'est'i, çöle hər cürə əşurxo zülüm tast'un əşp'est'i şot'oğoy yəşəyinşə ağut'unbsay

Faraoni mamačiġo tadi ämir
Faraoni mamaçiğo tadi əmir

Verse: 15

Misiri padčaġen sunṭay c̣i Šifra, ṭe sunṭay c̣i isä P̣ua bakala äbrani mamačiġo pine:
Misiri padçağen sunt'ay s'i Şifra, t'e sunt'ay s'i isə P'ua bakala əbrani mamaçiğo pine:

Verse: 16

"Be͑ġanan, äbrani čupuxxoy äyel bakaṭan ägär äyel ġar bakayin, šoṭo besṗanan, xuyärmoġo isä efanan".
"Běğanan, əbrani çupuxxoy əyel bakat'an əgər əyel ğar bakayin, şot'o besp'anan, xuyərmoğo isə efanan".

Verse: 17

Ama mamačiġon Buxaʒ́uġo čalxsuna görä Misiri padčaġen šoṭoġo ämirbi ḳinäḳ teṭunbsay, ġar äyloġo dirisṭṭun efsay.
Ama mamaçiğon Buxačuğo çalxsuna görə Misiri padçağen şot'oğo əmirbi k'inək' tet'unbsay, ğar əyloğo dirist't'un efsay.

Verse: 18

Ṭe vädä Misiri padčaġen mamačiġo ḳalpesṭi šoṭoġo pine: "Heṭaynaḳnan metär bsa? Heṭaynaḳnan ġar äyloġo dirisṭ efsa?"
T'e vədə Misiri padçağen mamaçiğo k'alpest'i şot'oğo pine: "Het'aynak'nan metər bsa? Het'aynak'nan ğar əyloğo dirist' efsa?"

Verse: 19

Mamačiġon faraona piṭun: "Šoṭaynaḳ ki, äbraniġoy čupuxxo misirluġoy čupuxxo ḳinäḳ teṭun, šorox gele elmuxlaṭun, mamačiyox eġamin šoṭoġoy äyel baneksa".
Mamaçiğon faraona pit'un: "Şot'aynak' ki, əbraniğoy çupuxxo misirluğoy çupuxxo k'inək' tet'un, şorox gele elmuxlat'un, mamaçiyox eğamin şot'oğoy əyel baneksa".

Verse: 20

Metärluġen, Buxaʒ́uġoy azuḳ gelebaki avuzebaksay. Buxaʒ́uġon mamačiġoval Iz šaaṭluġane aḳesṭi.
Metərluğen, Buxačuğoy azuk' gelebaki avuzebaksay. Buxačuğon mamaçiğoval İz şaat'luğane ak'est'i.

Verse: 21

Šoṭin Iču čalxsuna görä mamačiġo ailäne tadi.
Şot'in İçu çalxsuna görə mamaçiğo ailəne tadi.

Verse: 22

Faraonen bütüm iz azuḳa ämirbi pine: "Äbraniġoy nanaxun bakala bütüm ġar äyloġo Nil oqe boš bosanan, xuyärmoġo isä efanan". ^*
Faraonen bütüm iz azuk'a əmirbi pine: "Əbraniğoy nanaxun bakala bütüm ğar əyloğo Nil oqe boş bosanan, xuyərmoğo isə efanan". ^*

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.