TITUS
Armenian NT (Zohrab Bible)
Part No. 65
Previous part

Chapter: 21  
(Ի՜Ա)


Section: 74  
Verse: 1   Link to gnt   Եւ հայեցեալ՝ ետես զմեծատունսն որ արկանէին զտուրս իւրեանց ի գանձանակն։

Verse: 2   Link to gnt   Ետես եւ զկին ոմն այրի աղքատ, որ արկ անդր երկուս լումայս։

Verse: 3   Link to gnt   Եւ ասէ. արդարեւ ասեմ ձեզ. զի այրին այն աղքատ՝ աւելի արկ քան զամենեսին։

Verse: 4   Link to gnt   Ամենեքին նոքա ի մթերից իւրեանց արկին յընծայսն Աստուծոյ. բայց նա ի կարօտութենէ իւրմէ զամենայն զկեանս իւր՝ զոր ունէր արկ։

Passage: 7-7 
Verse: 5   Link to gnt   Եւ յասել ոմանց զտաճարէն, թէ գեղեցիկ վիմօք եւ աշտարակօք զարդարեալ է, ասէ.

Verse: 6   Link to gnt   Զայդ ամենայն զոր տեսանէք, եկեսցեն աւուրք՝ յորս ոչ թողցի այդր քար ի քարի վերայ, որ ոչ քակտեսցի։

Section: 75  
Verse: 7   Link to gnt   Հարցին ցնա եւ ասեն. վարդապետ երբ լինիցի այդ, եւ զինչ նշան իցէ՝ յորժամ այդ լինելոց իցէ։

Verse: 8   Link to gnt   Եւ նա ասէ. զգոյշ կացէք. մի խաբիցիք. զի բազումք գայցեն յանուն իմ, եւ ասիցեն թէ ես եմ. եւ մերձեցաւ ժամանակ. մի երթայցէք զկնի նորա։

Verse: 9   Link to gnt   Եւ յորժամ լսիցէք պատերազմունս եւ խռովութիւնս՝ մի զարհուրիցիք, զի պարտ է նախ՝ այնմ լինել, այլ ոչ առժամայնն կատարած։

Verse: 10   Link to gnt   Յայնժամ ասէ ցնոսա. յարիցէ ազգ յազգի վերայ, եւ թագաւորութիւն ի թագաւորութեան վերայ։

Verse: 11   Link to gnt   Եւ շարժմունք մեծամեծք. եւ ի տեղիս սովք եւ սրածութիւնք. եղիցին արհաւիրք եւ նշանք մեծամեծք յերկնից։

Verse: 12   Link to gnt   Բայց յառաջ քան զայս ամենայն, մխեսցեն զձեռս իւրեանց ի ձեզ՝ եւ հալածեսցեն. մատնեսցեն ի ժողովուրդս եւ ի բանտս, եւ տանիցին առաջի դատաւորաց եւ թագաւորաց վասն անուան իմոյ.

Verse: 13   Link to gnt   Եւ լինիցի ձեզ այն ի վկայութիւն։

Verse: 14   Link to gnt   Արդ՝ դիք ի սիրտս ձեր, մի յառաջագոյն կրթել տալոյ պատասխանի։

Verse: 15   Link to gnt   Զի ես տաց ձեզ բերան եւ իմաստութիւն, որում ոչ կարիցեն կալ հակառակ՝ կամ տալ պատասխանի ամենայն հակառակորդքն ձեր։

Verse: 16   Link to gnt   Մատնեսջիք եւ ի ծնողաց, եւ յեղբարց, եւ յազգականաց եւ ի բարեկամաց, եւ սպանանիցեն ի ձէնջ.

Verse: 17   Link to gnt   Եւ եղիջիք ատեցեալք յամենեցունց Վասն անուան իմոյ.

Verse: 18   Link to gnt   Եւ մազ մի ի գլխոյ ձերմէ՝ ոչ կորիցէ.

Verse: 19   Link to gnt   Եւ համբերութեամբ՝ ձերով ստասջիք զոգիս ձեր։

Verse: 20   Link to gnt   Այլ յորժամ տեսանիցէք շուրջ պատեալ զօրօք զԵրուսաղէմ, յայնժամ գիտասջիք թէ մերձ է օր նորա։

Verse: 21   Link to gnt   Յայնժամ որ ի Հրէաստանի իցեն՝ փախիցեն ի լերինս, եւ որ ի միջի նորա իցեն՝ խուսեսցեն, եւ որ ի գաւառսն իցեն՝ մի մտցեն ի նա։

Verse: 22   Link to gnt   Զի աւուրք վրէժխնդրութեան են այնոքիկ, առ ի կատարելոյ ամենայն գրելոց։

Verse: 23   Link to gnt   Բայց վայ իցէ յղեաց եւ ստնտուաց յաւուրսն յայնոսիկ։ Զի եղիցի տագնապ մեծ ի վերայ երկրի, եւ բարկութիւն ժողովրդեանն այնմիկ։

Verse: 24   Link to gnt   Եւ անկցին ի սուր սուսերի, եւ գերեսցին յամենայն հեթանոսաց. եւ Երուսաղէմ եղիցի կոխան յազգաց, մինչեւ կատարեսցին ժամանակք հեթանոսաց։

Verse: 25   Link to gnt   Եւ եղիցին նշանք յարեգակն եւ ի լուսին եւ յաստեղս. եւ յերկրի տագնապ հեթանոսաց՝ ի յահեղ բարբառոյ իբրեւ ծովու եւ խռովութեան։

Verse: 26   Link to gnt   Յելանելոյ ոգւոց մարդկան յերկիւղէ՝ եւ ի կարծեաց եկելոց ի վերայ տիեզերաց. զի զօրութիւնք երկնից շարժեսցին։

Verse: 27   Link to gnt   Եւ յայնժամ տեսցեն զորդի մարդոյ եկեալ՝ ամպովք զօրութեամբ եւ փառօք բազմօք։

Verse: 28   Link to gnt   Եւ յորժամ սկսանիցի այս լինել, ամբարձջիք եւ բարձրացուսջիք զգլուխս ձեր. զի մերձ է փրկութիւն ձեր։

Verse: 29   Link to gnt   Եւ ասաց առակ մի նոցա. տեսանիցէք զթզենիդ, եւ զամենայն ծառ.

Verse: 30   Link to gnt   Յորժամ ցուցանիցեն զպտուղ իւրեանց, տեսանէք՝ եւ ի նոցանէ ճանաչէք եթէ մերձ է ամառն։

Verse: 31   Link to gnt   Նոյնպէս եւ դուք՝ յորժամ տեսանիցէք զայս ամենայն եղեալ, գիտասջիք թէ մերձ է արքայութիւն Աստուծոյ։

Verse: 32   Link to gnt   Ամէն ասեմ ձեզ. թէ ոչ անցցէ ազգս այս, մինչեւ ամենայն այս լինիցի։

Verse: 33   Link to gnt   Երկինք եւ երկիր անցցեն, եւ բանք իմ ոչ անցանիցեն։

Verse: 34   Link to gnt   Զգոյշ լերուք անձանց, գուցէ ծանրանայցեն սիրտք ձեր շուայտութեամբ եւ արբեցութեամբ՝ եւ հոգւովք աշխարհականօք, եւ յանկարծակի հասանիցէ ի վերայ ձեր օրն այն.

Verse: 35   Link to gnt   Զի իբրեւ զորոգայթ հասանիցէ ի վերայ ամենեցուն որ բնակեալ են ընդ ամենայն երեսս երկրի։

Verse: 36   Link to gnt   Արթուն կացէք այսուհետեւ, յամենայն ժամ աղօթս արարէք, զի արժանի լինիջիք զերծանել յայնմ ամենայնէ որ լինելոց է, եւ կալ առաջի որդւոյ մարդոյ։

Verse: 37   Link to gnt   Եւ ի տուէ ի տաճարին ուսուցանէր, եւ զգիշերս ելեալ ագանէր ի լերինն՝ որ կոչէր Ձիթենեաց։

Verse: 38   Link to gnt   Եւ ամենայն ժողովուրդն կանխէր ընդ առաւօտս առ ի տաճարն լսել ի նմանէ։
Passage:  


Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.