TITUS
Armenian NT (Zohrab Bible)
Part No. 68
Previous part

Chapter: 24  
(Ի՜Դ)


Verse: 1   Link to gnt   Բայց ի միաշաբաթուն վաղ՝ քան ընդ առաւօտն, եկին ի գերեզմանն, բերին զխունկսն զոր պատրաստեցին. եւ այլ կանայք ընդ նոսա։

Verse: 2   Link to gnt   Եւ գտին զվէմն թաւալեցուցեալ ի գերեզմանէ անտի։

Verse: 3   Link to gnt   Եւ մտեալ ի ներքս՝ ոչ գտին զմարմինն Տեառն Յիսուսի։

Verse: 4   Link to gnt   Եւ եղեւ ընդ հիանալն նոցա վասն այնորիկ, եւ ահա արք երկու հասին առ նոսա ի հանդերձս լուսաւորս։

Verse: 5   Link to gnt   Եւ իբրեւ զահի հարան՝ եւ խոնարհեցուցին զերեսս իւրեանց յերկիր, ասեն ցնոսա. զի խնդրէք զկենդանին ընդ մեռեալս.

Verse: 6   Link to gnt   Չէ աստ այլ յարեաւ։ Յիշեցէք որպէս խօսեցաւ ընդ ձեզ մինչ էրն ի Գալիլեա,

Verse: 7   Link to gnt   Եւ ասէր՝ թէ պարտ է որդւոյ մարդոյ մատնել ի ձեռս մարդոց մեղաւորաց, եւ ի խաչ ելանել, եւ յերրորդ աւուր յառնել։

Verse: 8   Link to gnt   Եւ յիշեցին զբանսն նորա։

Verse: 9   Link to gnt   Եւ դարձան պատմեցին զայս ամենայն մետասանիցն, եւ այլոցն ամենեցուն։

Verse: 10   Link to gnt   Եւ էին Մարիամ Մագդաղենացի, եւ Յովհաննա, եւ Մարիամ Յակովբայ, եւ այլք ընդ նոսա՝ որ պատմեցին զայս առաքելոցն։

Verse: 11   Link to gnt   Եւ երեւեցան առաջի նոցա շաղփաղփութիւն բանքն նոցա՝ եւ չհաւատային նոցա։

Verse: 12   Link to gnt   Բայց Պետրոս յարուցեալ՝ ընթացաւ ի գերեզմանն, եւ հայեցեալ՝ տեսանէ զկտաւսն լոկ՝ զի կային. եւ գնաց ընդ միտս զարմացեալ, թէ զինչ եղեւ։

Section: 83 
Verse: 13   Link to gnt   Եւ ահա՝ երկուք ի նոցանէ երթային ի նմին աւուր ի գեղ մի, որ հեռի էր յԵրուսաղէմէ հարիւր եւ վաթսուն ասպարիսաւ. եւ էր անուն նորա Եմմաւուս։

Verse: 14   Link to gnt   Եւ նոքա խօսէին ընդ միմեանս վասն ամենայն անցիցն անցելոց։

Verse: 15   Link to gnt   Եւ եղեւ ընդ խօսելն նոցա եւ ընդ վիճել, եւ ինքն իսկ Յիսուս մերձեցաւ՝ եւ երթայր ընդ նոսա։

Verse: 16   Link to gnt   Եւ նոցա աչք՝ կալեալ էին առ ի չճանաչելոյ զնա։

Verse: 17   Link to gnt   Եւ ասէ ցնոսա. զինչ են բանքդ՝ վասն որոյ վիճիքդ ընդ միմեանս՝ մինչ դեռ գնայքդ, եւ տրտմեալ էք։

Verse: 18   Link to gnt   Պատասխանի ետ մի ոմն ի նոցանէ՝ որում անուն էր Կղէովպաս, եւ ասէ ցնա. դու միայն կաս յԵրուսաղէմ, որ ոչ գիտացեր զինչ գործեցաւ ի նմա յաւուրսս յայսոսիկ։

Verse: 19   Link to gnt   Եւ ասէ ցնոսա. զինչ։ Եւ նոքա ասեն. զՅիսուսէ Նազովրացւոյ. որ եղեւ այր մարգարէ, հզօր արդեամբք եւ բանիւք առաջի Աստուծոյ, եւ ամենայն ժողովրդեանն։

Verse: 20   Link to gnt   Որպէս մատնեցին զնա քահանայապետքն եւ իշխանքն մեր ի դատաստան մահու, եւ հանին զնա ի խաչ։

Verse: 21   Link to gnt   Մեք՝ ակն ունէաք թէ նա է որ փրկելոցն է զԻսրայէլ։ Այլ եւ հանդերձ այսու ամենայնիւ, այս՝ երրորդ օր է յորմէ հետէ այն գործեցաւ։

Verse: 22   Link to gnt   Այլ եւ կանայք ոմանք ի մէնջ զարմացուցին զմեզ. որք կանխեալ ընդ առաւօտս չոգան ի գերեզմանն,

Verse: 23   Link to gnt   Եւ ոչ գտին զմարմինն նորա. եկին եւ ասեն. թէ եւ տեսիլ եւս հրեշտակաց տեսին որք ասէին զնմանէ թէ կենդանի է։

Verse: 24   Link to gnt   Եւ գնացին ոմանք ի մէնջ ի գերեզմանն, եւ գտին նոյնպէս՝ որպէս կանայքն ասացին. բայց զնա ոչ տեսին։

Verse: 25   Link to gnt   Եւ նա՝ ասէ ցնոսա. ով անմիտք եւ հեղգասիրտք ի հաւատալ։ Յամենայնի, զոր խօսեցան մարգարէքն.

Verse: 26   Link to gnt   Ոչ զնոյնս պարտ էր չարչարել Քրիստոսի, եւ մտանել ի փառս իւր։

Verse: 27   Link to gnt   Եւ սկսեալ ի Մովսիսէ եւ յամենայն մարգարէիցն, մեկնէր նոցա՝ որ ինչ յամենայն գիրս գրեալ է զնմանէ։

Verse: 28   Link to gnt   Իբրեւ մերձեցան ի գեղն յոր երթային, եւ նա պատճառէր՝ հեռագոյն եւս ուրեք երթալ։

Verse: 29   Link to gnt   Եւ բռնադատեցին զնա՝ եւ ասեն. առ մեզ ագիր, զի ընդ երեկս է, եւ տարաժամեալ է օրս։ եւ եմուտ՝ ագանել անդ ընդ նոսա։

Verse: 30   Link to gnt   Եւ եղեւ ի բազմելն նորա ընդ նոսա, առեալ զհացն՝ օրհնեաց, եբեկ՝ եւ ետ նոցա։

Verse: 31   Link to gnt   Եւ նոցա՝ բացան աչք, եւ ծանեան զնա. եւ նա՝ եղեւ ի նոցանէ աներեւոյթ։

Verse: 32   Link to gnt   Եւ ասեն ցմիմեանս. ոչ իսկ եւ սիրտք մեր ճմլէին ի մեզ, մինչ խօսէրն ընդ մեզ զճանապարհայն. եւ որպէս բանայր մեր զգիրս։

Verse: 33   Link to gnt   Եւ յարուցեալ նոյնժամայն՝ դարձան յԵրուսաղէմ, եւ գտին ժողովեալ զմետասանսն՝ եւ զորս ընդ նոսայն էին,

Verse: 34   Link to gnt   Եւ ասեն՝ թէ արդարեւ յարեաւ տէր՝ եւ երեւեցաւ Սիմովնի։

Verse: 35   Link to gnt   Եւ նոքա պատմէին զայն որ առ ճանապարհայնն եւ թէ զիարդ ետ ծանօթս նոցա ի բեկանել հացին։

Verse: 36   Link to gnt   Մինչ դեռ զայն խօսէին, ինքն իսկ Յիսուս եկաց ի մէջ նոցա եւ ասէ ցնոսա. խաղաղութիւն ընդ ձեզ. ես եմ՝ մի երկնչիք։

Verse: 37   Link to gnt   Եւ զահի հարեալ՝ երկնչէին. եւ համարէին ոգի ինչ տեսանել։

Verse: 38   Link to gnt   Եւ ասէ ցնոսա. զի խռովեալ էք, եւ ընդէր խորհուրդք ելանեն՝ ի սիրտս ձեր։

Verse: 39   Link to gnt   Տեսէք զձեռս իմ եւ զոտս, զի ես նոյն եմ. շօշափեցէք զիս՝ եւ տեսէք. զի ոգի՝ մարմին եւ ոսկերս ոչ ունի, որպէս զիսս տեսանէք զի ունիմ։

Verse: 40   Link to gnt   Եւ զայս ասացեալ՝ եցոյց նոցա զձեռսն եւ զոտս։

Section: 84 
Verse: 41   Link to gnt   Եւ մինչ դեռ տակաւին չհաւատային ի խնդութենէն, եւ զարմացեալ էին, ասէ ցնոսա. ունիք ինչ կերակուր աստ։

Verse: 42   Link to gnt   Եւ նոքա ետուն նմա ձկան խորովելոյ մասն. եւ խորիսխ մեղու։

Verse: 43   Link to gnt   Եւ առ՝ եկեր առաջի նոցա. եւ զմնացորդսն ետ նոցա։

Verse: 44   Link to gnt   Եւ ասէ ցնոսա. այս բանք են զոր խօսեցայ ընդ ձեզ, մինչ առ ձեզն էի, թէ պարտ է՝ լնուլ ամենայն գրելոցն յօրէնսն Մովսիսի, եւ ի մարգարէս, եւ ի սաղմոսն վասն իմ։

Verse: 45   Link to gnt   Յայնժամ եբաց զմիտս նոցա իմանալ զգիրս։

Verse: 46   Link to gnt   Եւ ասէ ցնոսա, թէ այսպէս պարտ էր չարչարել Քրիստոսի, եւ յառնել ի մեռելոց յաւուր երրորդի.

Verse: 47   Link to gnt   Եւ քարոզել յանուն նորա ապաշխարութիւն եւ թողութիւն մեղաց յամենայն ազգս՝ սկսեալ յԵրուսաղեմէ.

Verse: 48   Link to gnt   Եւ դուք էք վկայք այսոցիկ։

Verse: 49   Link to gnt   Եւ ահա ես առաքեմ զաւետիս հօր իմոյ ի ձեզ. եւ դուք՝ նստարուք ի քաղաքիս յԵրուսաղէմ, մինչեւ զգենուցուք զօրութիւն ի բարձանց։

Verse: 50   Link to gnt   Եհան զնոսա մինչեւ ի Բեթանիա. եւ ամբարձեալ զձեռս իւր օրհնեաց զնոսա։

Verse: 51   Link to gnt   Եւ եղեւ յօրհնելն նորա զնոսա, մեկնեցաւ ի նոցանէ, եւ վերանայր յերկինս։

Verse: 52   Link to gnt   Եւ նոցա երկիր պագեալ նմա՝ դարձան յԵրուսաղէմ ուրախութեամբ մեծաւ։

Verse: 53   Link to gnt   Եւ էին հանապազ ի տաճարին եւ գովէին եւ օրհնէին զԱստուած։
Section:  



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.