TITUS
Armenian NT (Zohrab Bible)
Part No. 16
Previous part

Chapter: 16  
(Ժ՜Զ)


Verse: 1   Link to gnt   Եւ մատուցեալ փարիսեցիքն եւ սադուկեցիք փորձելիվ խնդրէին ինմանէ՝ նշան յերկնից ցուցանել նոցա։

Verse: 2   Link to gnt   Նա պատասխանի ետ՝ եւ ասէ ցնա.

Verse: 3   Link to gnt   

Verse: 4   Link to gnt   ազգ չար եւ շնացօղ՝ նշան խնդրէ, եւ նշան մի տացի նմա, բայց նշան յովնանու մարգարէի։

Section: 32  
Verse: 5   Link to gnt   Գնացին եւ աշակերտքն յայնկոյս, եւ մոռացան առնուլ հաց։

Verse: 6   Link to gnt   Ասէ ցնոսա Յիսուս. տեսէք եւ զգոյշ լերուք ի խմորոյ սադուկեցւոցն եւ փարիսեցւոց։

Verse: 7   Link to gnt   Նոքա խորհէին ընդ միմեանս եւ ասէին՝ թէ հաց ոչ բարձաք.

Verse: 8   Link to gnt   Գիտաց Յիսուս եւ ասէ, զի խորհիք ի միտս ձեր թերահաւատք՝ եթէ հաց ոչ ունիք։

Verse: 9   Link to gnt   Տակաւին չիմանայք՝ եւ ոչ յիշէք զհինգ նկանակն ի հինգ հազարսն, եւ քանի սակառի բարձէք։

Verse: 10   Link to gnt   եւ ոչ զեւթն նկանակն ի չորս հազարսն, եւ քանի զամբիղս բարձէք։

Verse: 11   Link to gnt   Արդ զիարդ ոչ իմանայք՝ եթէ ոչ հացի ասացի ձեզ՝ զգոյշ լինել ի խմորոյ փարիսեցւոցն եւ սադուկեցւոցն։

Verse: 12   Link to gnt   Յայնժամ ի միտ առին, եթէ ոչ ասաց զգուշանալ ի խմորոյ, այլ յաղանդոյ փարիսեցւոցն եւ սադուկեցւոց։

Section: 33  
Passage: 6-1 
Verse: 13   Link to gnt   Եւ ելեալ Յիսուս ի կողմանս փիլիպպեայ կեսարեայն, հարցանէր ցաշակերտսն՝ եւ ասէր. զո ոք ասեն զինէն մարդիկն՝ թէ իցէ որդի մարդոյ։

Verse: 14   Link to gnt   Եւ նոքա ասեն. ոմն՝ յովհաննէս մկրտիչ, եւ այլք՝ զեղիա, եւ կէսք՝ զերեմիա, կամ զմի ոք ի մարգարէիցն։

Verse: 15   Link to gnt   Ասէ ցնոսա Յիսուս. իսկ դուք զո ոք ասէք զինէն թէ իցեմ։

Verse: 16   Link to gnt   Պատասխանի ետ նմա սիմովն պետրոս՝ եւ ասէ. դու ես Քրիստոս որդի Աստուծոյ կենդանւոյ։

Verse: 17   Link to gnt   Պատասխանի ետ Յիսուս եւ ասէ ցնա, երանի քեզ սիմովն որդի յովնանու, զի մարմին եւ արիւն ոչ յայտնեաց քեզ՝ այլ հայր իմ որ յերկինս է։

Verse: 18   Link to gnt   Եւ ես քեզ ասեմ. զի դու ես վէմ, եւ ի վերայ այդր վիմի շինեցից զեկեղեցի իմ, եւ դրունք դժոխոց զնա մի յաղթահարեսցեն։

Verse: 19   Link to gnt   Եւ տաց քեզ զփականս արքայութեան երկնից. եւ զոր միանգամ կապեսցես յերկրի, եղիցի կապեալ յերկինս. եւ զոր արձակեսցես յերկրի, եղիցի արձակեալ յերկինս։

Verse: 20   Link to gnt   Յայնժամ սաստեաց աշակերտացն, զի մի ումեք ասասցեն՝ թէ նա է Քրիստոսն։

Verse: 21   Link to gnt   Յայնմ հետէ սկսաւ Յիսուս ցուցանել աշակերտացն, թէ պարտ է նմա երթալ յերուսաղէմ, եւ բազում չարչարանս չարչարել եւ անարգել ի քահանայապետից եւ ի դպրաց եւ ի ծերոց ժողովրդեանն, եւ սպանանել, եւ յերիր աւուր յառնել։

Verse: 22   Link to gnt   Եւ առեալ զնա մեկուսի՝ պետրոսի՝։ սկսաւ կագել ընդ նմա եւ ասել. քաւ լիցի քեզ տէր, մի եղիցի քեզ այդ։

Verse: 23   Link to gnt   Եւ նա դարձեալ ի պետրոս ասէ. երթ յետս իմ սատանայ, գայթագղութիւն իմ ես. զի ոչ խորհիս դու զԱստուածսն, այլ զմարդկան։

Verse: 24   Link to gnt   Յայնժամ Յիսուս ասէ ցաշակերտսն իւր. եթէ ոք կամիցի զկնի իմ գալ՝ ուրասցի զանձն, եւ առցէ զխաչ իւր՝ եւ եկեսցէ զկնի իմ։

Verse: 25   Link to gnt   Զի որ կամիցի զանձն իւր կեցուցանել՝ կորուսցէ զնա. եւ որ կորուսցէ զանձն իւր վասն իմ՝ գտցէ զնա։

Verse: 26   Link to gnt   Զինչ օգտիցի մարդ՝ եթէ զաշխարհս ամենայն շահեսցի, եւ զանձն իւր տուժեսցի։ կամ զինչ տացէ մարդ փրկանս ընդ անձին իւրում։

Verse: 27   Link to gnt   Զի գալոց է որդի մարդոյ փառօք հօր իւրոյ՝ հանդերձ հրեշտակօք իւրովք, եւ յայնժամ հատուսցէ իւրաքանչիւր ըստ գործս իւր։

Verse: 28   Link to gnt   Ամէն ասեմ ձեզ, զի իցեն ոմանք ի սոցանէ՝ որ աստ կան, որք ոչ ճաշակեսցեն զմահ՝ մինչեւ տեսանիցեն զորդի մարդոյ եկեալ արքայութեամբ իւրով։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.