TITUS
Armenian NT (Zohrab Bible)
Part No. 27
Previous part

Chapter: 27  
(Ի՜Է)


Verse: 1   Link to gnt   Իբրեւ այդ եղեւ, խորհուրդ արարին ամենայն քահանայապետքն եւ ծերք ժողովրդեան վասն Յիսուսի՝ սպանանել զնա։

Verse: 2   Link to gnt   Կապեցին զնա, եւ առին գնացին, եւ ետուն ի ձեռս պոնտացւոյ պիղատոսին դատաւորի։

Section: 67 
Verse: 3   Link to gnt   Յայնժամ տեսեալ յուդայի՝ որ մատնեաց զնա. թէ պարտաւորեցաւ. զղջացաւ. եւ դարձոյց զարծաթն առ քահանայապետսն եւ ծերս ժողովրդեանն՝

Verse: 4   Link to gnt   եւ ասէ, մեղայ զի մատնեցի զարիւն արդար։ եւ նոքա ասեն. մեզ չէ փոյթ, դու գիտես։

Verse: 5   Link to gnt   Եւ ընկէց զարծաթն ի տաճարին՝ եւ գնաց, եւ չոգաւ խեղդեցաւ։

Verse: 6   Link to gnt   Իսկ քահանապետիցն առեալ զարծաթն՝ ասեն. ոչ է արժան ընդունել զայդ ի կորբանն. քանզի գինք արեան են։

Verse: 7   Link to gnt   Խորհուրդ արարեալ, գնեցին այնու զագարակն բրտին ի գերեզման օտարաց։

Verse: 8   Link to gnt   Վասն այնորիկ կոչեցաւ ագարակն այն. ագարակ արեան մինչեւ ցայսօր։

Verse: 9   Link to gnt   Յայնժամ լցաւ՝ որ ասացաւն ի ձեռն երեմիայի մարգարէին. եւ առին զերեսուն արծաթին զգինս վաճառելոյն, զոր արկին յորդւոցն իսրայէլի։

Verse: 10   Link to gnt   Եւ ետուն զնա յագարակն բրտի. որպէս հրամայաց ինձ տէր։

Verse: 11   Link to gnt   Եւ Յիսուս եկաց առաջի դատաւորին։ եհարց ցնա դատաւորն՝ եւ ասէ. դու ես թագաւորն հրէից, եւ Յիսուս ասէ. դու ասես։

Verse: 12   Link to gnt   Եւ ի չարախօսելն նորա ի քահանայապետիցն եւ ծերոց, ոչ ինչ ետ պատասխանի

Verse: 13   Link to gnt   Յայնժամ ասէ ցնա պեղատոս. ոչ լսես՝ որչափ դոքա հակառակ քո վկայեն,

Verse: 14   Link to gnt   Եւ ոչ ետ նմա պատասխանի՝ եւ ոչ բան մի, մինչեւ զարմացեալ դատաւորի յոյժ։

Verse: 15   Link to gnt   Բայց ըստ տօնի սովոր օր դատաւորն արձակել ժողովրդեանն կապեալ մի զոր կամէին։

Verse: 16   Link to gnt   Ունէին յայնժամ կապեալ մի նշանաւոր, որում անուն էր յեսու բարաբբայ։

Verse: 17   Link to gnt   Իբրեւ ժողովեցան, ասեէ ցնոսա պեղատոս. զի կամիք յերկուց աստի՝ զի արձակեցից ձեզ, զյեսու բարաբբա թէ զՅիսուս զանուանեալն Քրիստոս։

Verse: 18   Link to gnt   Քանզի գիտէր՝ թէ առ նախնաձու մատնեցին զնա։

Verse: 19   Link to gnt   Եւ մինչ նստէր յատենին, առաքեալ առ նա կինն իւր եւ ասէ չկայ ինչ՝ քո եւ արդարոյն այնորիկ, զի բազում անցք անցին ընդ իս այսօր յանուրջս վասն նորա։

Verse: 20   Link to gnt   Իսկ քահանայապետքն եւ ծերք հաւանեցուցին զժողովուրդն, զի խնդրեսցեն զբարաբբայն՝ եւ զՅիսուս կորուսցեն։

Verse: 21   Link to gnt   Պատասխանի ետ դատաւորն՝ եւ ասէ ցնոսա. զո կամիք զի ազատ արձակեցից ձեզ յերկուց աստի, եւ նոքա ասեն, զբարաբբա,

Verse: 22   Link to gnt   Ասէ ցնոսա պեղատոս. իսկ զի արարից զՅիսուս զանուանեալն Քրիստոս։

Verse: 23   Link to gnt   Ասեն ամենեքեան՝ խաչեսցի, եւ նա՝ ասէ, զինչ չար արար։, եւ նոքա առաւել եւս աղաղակէին եւ ասէին, խաչեսցի։

Verse: 24   Link to gnt   Եւ տեսեալ պիղատոսի՝ թէ ոչ ինչ օգնէ, այլ առաւել խռովութիւն լինի, առեալ ջուր՝ լուաց զձեռս առաջի ժողովրդեանն՝ եւ ասէ. քաւեալ եմ ես յարենէ արդարոյդ այդորիկ. դուք գիտասջիք։

Verse: 25   Link to gnt   Պատասխանի ետ ամենայն ժողովուրդն եւ ասէ. արիւն դորա՝ ի վերայ մեր եւ ի վերայ որդւոց մերոց։

Verse: 26   Link to gnt   Յայնժամ արձակեաց նոցա զբարաբայն. եւ զՅիսուս գան հարեալ ետ ի ձեռս՝ զի խաչեսցի։

Verse: 27   Link to gnt   Յայնժամ զինուորք դատաւորին առին զՅիսուս յապարանս. եւ ժողովեցին ի վերայ նորա զամենայն զգունդն.

Verse: 28   Link to gnt   Մերկացին զնա, եւ արկին զնովաւ քղամիտ կարմիր։

Verse: 29   Link to gnt   Եւ բոլորեալ պսակ ի փշոց՝ եդին ի գլուխ նորա, եւ եղէգն յաջու ձեռին նորա·ի ծունր իջեալ առաջի նորա կատակէին եւ ասէին. ողջ լեր՝ թագաւոր հրէից։

Verse: 30   Link to gnt   Եւ թքեալ ի նա առնուին զեղէգնն եւ ծեծէին զգլուխ նորա։

Verse: 31   Link to gnt   եւ յորժամ ձաղեցին զնա. մերկացուցին ի նմանէ զքղամիդն կարմիր՝ եւ ագուցին նմա զիւր հանդերձն, եւ տարան զնա ի խաչ հանել։

Verse: 32   Link to gnt   Եւ ելեալ արտաքս՝ գտին այր մի կիւրենացի՝ անուն սիմովն, զնա կալան պահակ՝ զի բարձցէ զխաչն Նորա։

Verse: 33   Link to gnt   Եւ եկեալ ի տեղին անուանեալ գողգոթա, որ է տեղի կառափելոյ։

Verse: 34   Link to gnt   Ետուն նմա ըմպել գինի ընդ լեղի խառնեալ, եւ իբրեւ ճաշակեաց. ոչ կամէր ըմպել։

Verse: 35   Link to gnt   Եւ հանեալ զնա ի խաչ, բաժանեցին զհանդերձսն նորա վիճակաւ. զի լցցի բանն՝ որ ասացաւ ի մարգարէէն. բաժանեցին զհանդերձս իմ յիւրեանց, եւ ի վերայ պատմուճանիոն իմոյ վիճակս արկանէին։

Verse: 36   Link to gnt   եւ նստեալ պահէին զնա։

Verse: 37   Link to gnt   Եւ եդին ի վերայ գլխոյ նորա գրեալ՝ զվնաս նորա, թէ այս է Յիսուս թագաւոր հրէից։

Verse: 38   Link to gnt   Յայնժամ հանին ընդ նմա ի խաչ երկուս աւազակս, մի՝ յաջմէ նորա, եւ մի յահեկէ։

Verse: 39   Link to gnt   Եւ որ անցանէին՝ հայհոյէին զնա. շարժէին զգլուխս իւրեանց.

Verse: 40   Link to gnt   Եւ ասէին. Վահ, որ քակէիր զտաճարն, եւ զերիս աւուրս շինէիր զնա. ապրեցո զքեզ, թէ որդի ես Աստուծոյ՝ էջ ի խաչէդ։

Verse: 41   Link to gnt   Նոյնպէս եւ քահանայապետք ձաղէին հանդերձ դպրօքն եւ ասէին.

Verse: 42   Link to gnt   զայլս ապրեցոյց, զինքն ոչ կարէ ապրեցուցանել. եթէ թագաւոր է իսրայէլի իջցէ ի խաչեդ՝ եւ հաւատասցուք դմա։

Verse: 43   Link to gnt   Եթէ յուսացաւ յԱստուած, փրկեսցէ այժմ զդա՝ եթէ կամի. Քանզի ասաց՝ եթէ Աստուծոյ որդի եմ։

Verse: 44   Link to gnt   Զնոյն եւ աւազակքն՝ որ խաչեալ էին ընդ նմա, նախատէին զնա։

Verse: 45   Link to gnt   Եւ ի վեց ժամէ աւուրն՝ խաւար եղեւ ի վերայ ամենայն երկրի մինչեւ ցինն ժամ։

Verse: 46   Link to gnt   Եւ զինն ժամաւն գոչեաց Յիսուս ի ձայն մեծ՝ եւ ասէ. էղի, էղի ղամա սաբաքթանի. այս ինքն Աստուած իմ, Աստուած իմ, ընդէր թողեր զիս.

Verse: 47   Link to gnt   Ոմանք յայնցանէ որ անդ կային, իբրեւ լուան՝ ասէին. զեղիայ կարդայ դա։

Verse: 48   Link to gnt   Եւ վաղվաղակի ընթացաւ մի ոմն ի նոցանէ, առ սպունգ լի քացախով, հարեալ յեղեգան՝ ետ ըմպել նմա։

Verse: 49   Link to gnt   Եւ կէսքն ասէին, թող տեսցուք եթէ գայ եղեայ փրկել զդա։

Verse: 50   Link to gnt   Եւ Յիսուս դարձեալ աղաղակեաց ի ձայն մեծ, եւ արձակեաց զոգին։

Verse: 51   Link to gnt   Եւ ահա՝ վարագոյր տաճարին ցելաւ յերկուս, ի վերուստ մինչեւ ի վայր։ Եւ երկիր շարժեցաւ, եւ վէմք պատառեցան։

Verse: 52   Link to gnt   Եւ գերեզմանք՝ բացան, եւ բազում մարմինք ննջեցելոց սրբոց յարեան։

Verse: 53   Link to gnt   Եւ ելեալ ի գերեզմանաց յետ յարութեան նորա, մտին ի քաղաքն սուրբ, եւ երեւեցան բազմաց։

Verse: 54   Link to gnt   Իսկ հարիւրապետն՝ եւ որ ընդ նմա պահէին զՅիսուս, իբրեւ տեսին զշարժումն եւ զեղեալսն, երկեան յոյժ՝ եւ ասեն. արդարեւ Աստուծոյ որդի էր սա։

Verse: 55   Link to gnt   Էին անդ կանայք բազումք, կային ի հեռաստանէ՝ եւ հայէին, որք եկին զկնի Յիսուսի ի գալիլեէ պաշտել զնա։

Verse: 56   Link to gnt   Յորս էր մարիամ մագդաղենացի, եւ մարիամ յակովբայ յովսեայ մայր, եւ մայր որդւոցն զեբեդեայ։

Verse: 57   Link to gnt   Եւ իբրեւ երեկոյ եղեւ, եկն այր մի մեծատուն յարիմաթեայ, որոյ անուն էր՝ յովսէփ. որ աշակերտեցաւ իսկ Յիսուսի։

Verse: 58   Link to gnt   սա մատուցեալ առ պեղատոս խնդրեաց զմարմինն Յիսուսի։ յայնժամ պեղատոս հրամայեաց տալ մարմինն։

Verse: 59   Link to gnt   Եւ առեալ զմարմինն յովսէփ՝ պատեաց սուրբ կտաւովք,

Verse: 60   Link to gnt   եւ եդ ի նոր գերեզմանի՝ զոր փորեաց ի վիմի. եւ թաւալեցուցեալ կափարիչ դրան գերեզմանին վէմ մի մեծ՝ գնաց։

Verse: 61   Link to gnt   Անդ էր մարիամ մագդաղենացի եւ մեւս մարիամն, նստէին հանդէպ գերեզմանին։

Verse: 62   Link to gnt   Եւ ի վաղիւ անդր՝ որ է յետ ուրբաթուն, ժողովեցան քահանայապետքն եւ փարիսեցիքն առ պեղատոս,

Verse: 63   Link to gnt   Եւ ասեն. տէր՝ յիշեցաք զի մոլորեցուցիչն այն՝ ասէր մինչ կենդանին էր. թէ յետ երից աւուրց յառնեմ։

Verse: 64   Link to gnt   Արդ՝ հրամայեա զգուշանալ գերեզմանին մինչեւ ցերիս աւուրս, գուցէ եկեալ աշակերտքն գիշերի՝ գողանայցեն զնա, եւ ասիցեն ժողովրդեանն, թէ յարեաւ ի մեռելոց. եւ լինիցի յետին մոլորութիւն չար քան զառաջինն։

Verse: 65   Link to gnt   Ասէ ցնոսա պեղատոս, ունիք զօրականն, երթայք զգուշացարուք որպէս եւ գիտէք։

Verse: 66   Link to gnt   Եւ նոքա երթեալ՝ զգուշացան գերեզմանին, եւ կնքեցին զվէմն հանդերձ զօրականօքն։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.