TITUS
Atharva-Veda-Samhita (Saunaka)
Part No. 466
Previous part

Hymn: 3 


Verse: 1 
Halfverse: a    tásyaudanásya bŕ̥haspátiḥ śíro bráhma múkʰam /

Verse: 2 
Halfverse: a    dyā́vāpr̥tʰivī́ śrotré sūryācandramásāv ákṣiṇī saptar̥ṣáyaḥ prāṇāpānā́ḥ /

Verse: 3 
Halfverse: a    cákṣur músalaṃ kā́ma ulū́kʰalam /

Verse: 4 
Halfverse: a    dítiḥ śū́rpam áditiḥ śūrpagrāhī́ vā́tó 'pāvinak /

Verse: 5 
Halfverse: a    áśvāḥ káṇā gā́vas taṇḍulā́ maśákās túṣāḥ /

Verse: 6 
Halfverse: a    kábru pʰalīkáraṇāḥ śáro 'bʰrám /

Verse: 7 
Halfverse: a    śyāmám áyo 'sya māṃsā́ni lóhitam asya lóhitam /

Verse: 8 
Halfverse: a    trápu bʰásma háritaṃ várṇaḥ púṣkaram asya gandʰáḥ /

Verse: 9 
Halfverse: a    kʰálaḥ pā́traṃ spʰyā́v áṃsāv īṣé anūkyè /

Verse: 10 
Halfverse: a    āntrā́ṇi jatrávo gúdā varatrā́ḥ /

Verse: 11 
Halfverse: a    iyám evá pr̥tʰivī́ kumbʰī́ bʰavati rā́dʰyamānasyaudanásya dyaúr apidʰā́nam /

Verse: 12 
Halfverse: a    sī́tāḥ párśavaḥ síkatā ū́badʰyam /

Verse: 13 
Halfverse: a    r̥táṃ hastāvanéjanaṃ kulyòpasécanam /

Verse: 14 
Halfverse: a    r̥cā́ kumbʰy ádʰihitā́rtvijyena préṣitā /

Verse: 15 
Halfverse: a    bráhmaṇā párigr̥hītā sā́mnā páryūḍʰā /

Verse: 16 
Halfverse: a    br̥hád āyávanaṃ ratʰantaráṃ dárviḥ /

Verse: 17 
Halfverse: a    r̥távaḥ paktā́ra ārtavā́ḥ sám indʰate /

Verse: 18 
Halfverse: a    carúṃ páñcabilam ukʰáṃ gʰarmò 'bʰī́ndʰe /

   [note CORRIGENDA ed. ŚPP]

Verse: 19 
Halfverse: a    odanéna yajñavacáḥ sárve lokā́ḥ samāpyā̀ḥ /

Verse: 20 
Halfverse: a    yásmint samudró dyaúr bʰū́mis tráyo 'varaparáṃ śritā́ḥ /

Verse: 21 
Halfverse: a    yásya devā́ ákalpantóccʰiṣṭe ṣáḍ aśītáyaḥ /

Verse: 22 
Halfverse: a    táṃ tvaudanásya pr̥cʰāmi yó asya mahimā́ mahā́n /

Verse: 23 
Halfverse: a    táṃ tvaudanásya mahimā́naṃ vidyā́t /

Verse: 24 
Halfverse: a    nā́lpa íti brūyān nā́nupasecaná íti nédáṃ ca kíṃ céti /

Verse: 25 
Halfverse: a    yā́vad dātā́bʰimanasyéta tán nā́ti vadet /

Verse: 26 
Halfverse: a    brahmavādíno vadanti párāñcam odanáṃ prā́śī́3ḥ pratyáñcā3m íti /

Verse: 27 
Halfverse: a    tvám odanáṃ prā́śī́3s tvā́m odanā́3 íti /

Verse: 28 
Halfverse: a    párāñcaṃ cainam prā́śīḥ prāṇā́s tvā hāsyantī́ty enam āha /

Verse: 29 
Halfverse: a    pratyáñcaṃ cainaṃ prā́śīr apānā́s tvā hāsyantī́ty enam āha /

Verse: 30 
Halfverse: a    naívā́hám odanáṃ ná mā́m odanáḥ /

Verse: 31 
Halfverse: a    odaná evaúdanáṃ prā́śīt / {8}

Verse: 32_[4_1] 
Halfverse: a    tátas cainam anyéna śīrṣṇā́ prā́śīr yéna caitáṃ pū́rva ŕ̥ṣayaḥ prā́śnan /
Halfverse: b    jyeṣṭʰatás te prajā́ mariṣyatī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    br̥haspátinā śīrṣṇā́ /
Halfverse: e    ténainaṃ prā́śiṣaṃ ténainam ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [1]

Verse: 33_[4_2] 
Halfverse: a    tátaś cainam anyā́bʰyāṃ śrótrābʰyaṃ prā́śīr yā́bʰyāṃ caitáṃ pū́rva ŕ̥ṣayaḥ prā́śnan /
Halfverse: b    badʰiró bʰaviṣyasī́ty enam āha /
Halfverse: c    táṃ vā aháṃ nārvā́ñcaṃ ná párāñcaṃ ná pratyáñcam /
Halfverse: d    dyā́vāpr̥tʰivī́bʰyāṃ śrótrābʰyām /
Halfverse: e    tā́bʰyām enaṃ prā́śiṣaṃ tā́bʰyām enam ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [2]

Verse: 34_[4_3] 
Halfverse: a    tátaś cainam anyā́bʰyām akṣī́bʰyāṃ prā́śīr yā́bʰyāṃ caitáṃ pū́rva ŕ̥ṣayaḥ prā́śnan /
Halfverse: b    andʰó bʰaviṣyasī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    sūryācandramasā́bʰyāṃ akṣī́bʰyām /
Halfverse: e    tā́bʰyām enaṃ prā́śiṣaṃ tā́bʰyām enam ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [3]

Verse: 35_[4_4] 
Halfverse: a    tátaś cainam anyéna múkʰena prā́śīr yéna caitáṃ pū́rva ŕ̥ṣayaḥ prā́śnan /
Halfverse: b    mukʰatás te prajā́ mariṣyatī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    bráhmaṇā múkʰena /
Halfverse: e    ténainaṃ prā́śiṣaṃ ténainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [4]

Verse: 36_[4_5] 
Halfverse: a    tátaś cainam anyáyā jihváyā prā́śīr yáyā caitáṃ pū́rva ŕ̥ṣayaḥ prā́śnan /
Halfverse: b    jihvā́ te mariṣyatī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    agnér jihváyā /
Halfverse: e    táyainaṃ prā́śiṣaṃ táyainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [5]

Verse: 37_[4_6] 
Halfverse: a    tátaś cainam anyaír dántaiḥ prā́śīr yaíś caitáṃ pū́rva ŕ̥ṣayaḥ prā́śnan /
Halfverse: b    dántās te śatsyantī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    r̥túbʰir dántaiḥ /
Halfverse: e    táir enaṃ prā́śiṣaṃ táir enaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [6]

Verse: 38_[4_7] 
Halfverse: a    tátaś cainam anyaíḥ prāṇāpānaíḥ prā́śīr yaíś caitáṃ pū́rva ŕ̥ṣayaḥ prā́śnan /
Halfverse: b    prāṇāpānā́s tvā hāsyantī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    saptar̥ṣíbʰiḥ prāṇāpānaíḥ /
Halfverse: e    táir enaṃ prā́śiṣaṃ táir enaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [7]

Verse: 39_[4_8] 
Halfverse: a    tátaś cainam anyéna vyácasā prā́śīr yéna caitáṃ pū́rva ŕ̥ṣayaḥ prā́śnan /
Halfverse: b    rājayakṣmás tvā haniṣyatī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    antárikṣeṇa vyácasā /
Halfverse: e    ténainaṃ prā́śiṣaṃ ténainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [8]

Verse: 40_[4_9] 
Halfverse: a    tátaś cainam anyéna pr̥ṣṭʰéna prā́śīr yéna caitáṃ pū́rva ŕ̥ṣayaḥ prā́śnan /
Halfverse: b    vidyút tvā haniṣyatī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    divā́ pr̥ṣṭʰéna /
Halfverse: e    ténainaṃ prā́śiṣaṃ ténainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [9]

Verse: 41_[4_10] 
Halfverse: a    tátaś cainam anyénórasā prā́śīr yéna caitáṃ pū́rva ŕ̥ṣayaḥ prā́śnan /
Halfverse: b    kr̥ṣyā́ ná rātsyasī́ty enam āha /
Halfverse: c    táṃ vā aháṃ nārvā́ñcaṃ ná párāñcaṃ ná pratyáñcam /
Halfverse: d    pr̥tʰivyórasā /
Halfverse: e    ténainaṃ prā́śiṣaṃ ténainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [10]

Verse: 42_[4_11] 
Halfverse: a    tátaś cainam anyénodáreṇa prā́śīr yéna caitáṃ pū́rva ŕ̥ṣayaḥ prā́śnan /
Halfverse: b    udaradārás tvā haniṣyatī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    satyénodáreṇa /
Halfverse: e    ténainaṃ prā́śiṣaṃ ténainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [11]

Verse: 43_[4_12] 
Halfverse: a    tátaś cainam anyéna vastínā prā́śīr yéna caitáṃ pū́rva ŕ̥ṣayaḥ prā́śnan /
Halfverse: b    apsú mariṣyasī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    samudréṇa vastínā /
Halfverse: e    ténainaṃ prā́śiṣaṃ ténainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [12]

Verse: 44_[4_13] 
Halfverse: a    tátaś cainam anyā́bʰyām ūrúbʰyāṃ prā́śīr yā́bʰyāṃ caitáṃ pū́rva ŕ̥ṣayaḥ prā́śnan /
Halfverse: b    ūrū́ te mariṣyata íty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    mitrā́varuṇayor urúbʰyām /
Halfverse: e    tā́bʰyām enaṃ prā́śiṣaṃ tā́bʰyām enaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [13]

Verse: 45_[4_14] 
Halfverse: a    tátaś cainam anyā́bʰyām aṣṭʰīvádbʰyāṃ prā́śīr yā́bʰyāṃ caitáṃ pū́rva ŕ̥ṣayaḥ prā́śnan /
Halfverse: b    srāmó bʰaviṣyasī́ti enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    tváṣṭur aṣṭʰīvádbʰyām /
Halfverse: e    tā́bʰyām enaṃ prā́śiṣaṃ tā́bʰyām enaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [14]

Verse: 46_[4_15] 
Halfverse: a    tátaś cainam anyā́bʰyāṃ pā́dābʰyāṃ prā́śīr yā́bʰyāṃ caitáṃ pū́rva ŕ̥ṣayaḥ prā́śnan /
Halfverse: b    bahucārī́ bʰaviṣyasī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    aśvínoḥ pā́dābʰyām /
Halfverse: e    tā́bʰyām enaṃ prā́śiṣaṃ tā́bʰyām enaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [15]

Verse: 47_[4_16] 
Halfverse: a    tátaś cainam anyā́bʰyāṃ prápadābʰyāṃ prā́śīr yā́bʰyāṃ caitáṃ pū́rva ŕ̥ṣayaḥ prā́śnan /
Halfverse: b    sarpás tvā haniṣyatī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    savitúḥ prápadābʰyām /
Halfverse: e    tā́bʰyām enaṃ prā́śiṣaṃ tā́bʰyām enaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [16]

Verse: 48_[4_17] 
Halfverse: a    tátaś cainam anyā́bʰyām hástābʰyāṃ prā́śīr yā́bʰyāṃ caitám pū́rva ŕ̥ṣayaḥ prā́śnan /
Halfverse: b    brāhmaṇáṃ haniṣyasī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    savitúḥ prápadābʰyām /
Halfverse: e    tā́bʰyām enaṃ prā́śiṣaṃ tā́bʰyām enaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [17]

Verse: 49_[4_18] 
Halfverse: a    tátaś cainam anyáyā pratiṣṭʰáyā prā́śīr yáyā caitáṃ pū́rva ŕ̥ṣayaḥ prā́śnan /
Halfverse: b    apratiṣṭʰānó 'nāyatanó mariṣyasī́ty enam āha /
Halfverse: c    táṃ vā́ aháṃ nārvā́ñcaṃ ná párāñcaṃ ná pratyáñcam /
Halfverse: d    satyé pratiṣṭʰā́ya /
Halfverse: e    táyainaṃ prā́śiṣaṃ táyainaṃ ajīgamam /
Halfverse: f    eṣá vā́ odanáḥ sárvāṅgaḥ sárvaparuḥ sárvatanūḥ /
Halfverse: g    sárvāṅga evá sárvaparuḥ sárvatanūḥ sáṃ bʰavati yá eváṃ véda / [18] {9}

Verse: 50_[5_1] 
Halfverse: a    etád vaí bradʰnásya viṣṭápaṃ yád odanáḥ / [1]

Verse: 51_[5_2] 
Halfverse: a    bradʰnáloko bʰavati bradʰnásya viṣṭápi śrayate yá eváṃ véda / [2]

Verse: 52_[5_3] 
Halfverse: a    etásmād vā́ odanā́t tráyastriṃśataṃ lokā́n nír amimīta prajā́patiḥ / [3]

Verse: 53_[5_4] 
Halfverse: a    téṣāṃ prajñā́nāya yajñám asr̥jata / [4]

Verse: 54_[5_5] 
Halfverse: a    sá yá eváṃ vidúṣa upadraṣṭā́ bʰávati prāṇáṃ ruṇaddʰi / [5]

Verse: 55_[5_6] 
Halfverse: a    ná ca prānáṃ ruṇáddʰi sarvajyāníṃ jīyate / [6]

Verse: 56_[5_7] 
Halfverse: a    ná ca sarvajyāníṃ jīyáte puraínaṃ jarásaḥ prāṇó jahāti / [7] {10}


Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.