არა შესწირო უფლისა ღმრთისა შენისა ზუარაკი ანუ ცხოვარი, რომლისა თანა იყოს ბიწი ანუ სიხაშმე, რამეთუ საძაგელ არს უფლისა ღმრთისა თქუენისა.
იყოს თუ ვინმე შორის შენსა ანუ ქალაქთა შენთა, რომელი-იგი უფალმან ღმერთმან შენმან მოგცეს შენ, მამაკაცი გინა დედაკაცი, რომელმან ქმნეს ბოროტი წინაშე უფლისა ღმრთისა შენისა,
და უკუეთუ მოიღოს შენ თანა ერთი ქალაქთაგან შენთა, რომელი უფალმან ღმერთმან შენმან მოგცეს შენ, მამაკაცი ანუ დედაკაცი, რომელი ჰყოფს ბოროტსა წინაშე უფლისა ღმრთისა შენისა,
და გარდაჰჴდეს მცნებათა მისთა და მივიდეს და მსახუროს მან კერპთა და თაყუანი-სცეს მზესა, გინა მთოვარესა, გინა ყოველსა სამკაულსა ცისასა, რომლისა მე არა უბრძანე,
და აგრძნეთ, გამოიძიეთ და გამოიკითხეთ ფრიად, თუ ჭეშმარიტად ყოფილ იყოს სიტყუა იგი ბილწებისა შორის ისრაელსა,
განიყვანოს კაცი იგი გარეშე ქალაქსა, მამაკაცი Page of ms. E: 48V იყოს, გინა დედაკაცი, ქვა დაჰკრიბონ მას და მოკუდეს. და რომელი-იგი მოკუდებოდეს,
ორისა და სამისა მოწამითა მოკუდეს, ნუ ერთითა მოწამითა.
ორისა თანა მოწამისა ანუ სამითა რაჲთა მოკუდეს მოკუდავი, რაჲთა არა მოკვდეს ერ[თ]ითა მოწამითა.
ხოლო ჴელნი პირველად მოწამეთანი შეეხნენ მოკუდინებად სიკუდილისა თანამდებისა მის, (7S) მაშინდა ჴელი ყოვლისა ერისა მის შემდგომად მათსა, მოისპენ უკეთური იგი თქუენ შორის.
ვერ თუ რაჲმე შესაძლებელ იყოს თქუენ შორის სიტყუა სასჯელისა განგებასა განსაგებელისასა, ანუ განკითხვასა რასმე სარჩელისასა, ანუ იჭჳსა მიმართ რასმე გონებისასა, ანუ ცილობისათჳს რასმე სიტყჳსა სარჩელისასა ქალაქთა შინა შენთა, აღსდგე და აღხჳდე შენ ადგილსა, რომელსაცა-იგი გამოირჩიოს უფალმან ღმერთმან თქუენმან წოდებად სახელი მისი მას ზედა.
მიხჳდე შენ მღდელთა მათ ლევიტელთა და მსაჯულნი იგი, რომელ იყვნენ მათ ჟამთა, გამოიკითხონ სარჩელი იგი და გითხრან შენ განგება იგი სარჩელისა მის.
და ჰყო მსგავსად სიტყჳსა მის, რომელი-იგი გითხრან შენ ადგილისა მისგან, რომელი გამ\ოირჩია Page of ms. E: 49R უფალმან. ეკრძალო მას ყოფად ყოვლისა მის მცნებისა სასჯელისასა, (11S) რომელი-იგი სჯული შეგითხრა შენ.
და რაჲცა გასწაონ შენ, ჰყო შენ მსგავსად სიტყჳსა მის მათისა, რაჲცა-იგი გრქუან შენ, არა გარდააქციო მარჯულ, არცა მარცხლ.
იყოს თუ ვინმე კაცი და ამპარტავანებდეს, არა ერჩდის სიტყუასა მღდელისასა, რომელი დგეს მსახურად სახელისა მის უფლისა ღმრთისა შენისასა, ანუთუ მსაჯულთა მათ, რომელნი დგეს მათ ჟამთა, სიკუდილისა თანამდებ არს კაცი იგი, სიკუდილით მოკუედინ და მოისპენ ბოროტი იგი შორის ისრაელსა,
რაჲთა ყოველსა ერსა. რომელსა ესმეს, ეშინოდის და არა ამპარტავანებდეს.
შე-თუ-ხჳდე ქუეყანასა მას, რომელ უფალმან ღმერთმან შენმან მოგცეს შენ ნაწილად მკჳდრობისა შენისა. და დაემკჳდრო მუნ და მოიჴსენო გულსა შინა შენსა და სთქუა: დავიდგინო თავისა ჩემისა მთავარი. ვითარცა სხუათა ნათესავთა, რომელნი გარემო არიან ჩემსა.
არა დაიდგინო შენ სხუა, არამედ რომელი გამოირჩიოს უფალმან ღმერთმან შენმან ძმათაგანვე შენთა, Page of ms. E: 49V იგი დაიდგინო მთავრად შენ ზედა, რომელ არა ძმათა შენთაგან იყოს.
არა იდგინო შენ სხუაჲ მთავარი, არამედ რომელიცა გამოირჩიოს უფალმან ღმერთმან შენმან ძმათაგანი შენ თანა, დაადგინო თქუენდა მთავარნი. არა ძალ-გიცს თქუენ ზედა დადგინებად მთავარი და კაცი უცხო, რამეთუ არა ძმა თქუენი არს.
ნუუკუე ერისკრება-ყოს და განამრავლოს შენ ზედა მჴედარი და მიაქციოს ერი ეგე მუნვე ეგჳპტედ, რამეთუ უფალმან ესრეთ თქუა: არღარა შესძინო მერმე მოქცევად გზასავე ამას.
და ნუ განიმრავლებნ თავისა თჳსისა ცოლებსა, რაჲთა არა განდრკეს გული მისი, ოქროსა და ვეცხლსა ნუ შეიკრებნ ძლიერად.
და იყოს, რაჟამს დაჯდეს საყდართა მათ ზედა მთავრობისა მისისათა, გარდაწერე წიგნი ესე მეორისა სჯულისა წიგნთა (19S) მღდელთაგან და ლევიტელთა
და იყოს მის თანა მარადის და ჰკითხვიდეს მას ყოველთა დღეთა ცხორებისა მისისათა, რაჲთა შეისწაოს შიში უფლისა ღმრთისა შენისა და დაიმარხნეს ყოველნი მცნებანი და სამართალნი, და ყოს ესე,
რაჲთა არა ამადლდეს გული მისი ძმათაგან თჳსთა და გარდააქციოს სჯულისა მისგან მარჯუენით ანუ მარცხენით, რაჲთა Page of ms. E: 50R დღეგრძელ იყოს მთავრობასა მას ზედა მისსა იგი და შვილნი მისნი შორის ძეთა მათ ისრაელისათა.
