არა მოჰგუარო უფალსა ღმერთსა შენსა ზუარაკი ანუ ცხოვარი, რომლისა თანა იყოს ბიწი, მის თანა ყოველი ჭამადი ხენეში, რამეთუ საძულელ არს უფლისა ღმრთისა შენისა.
ხოლო იპოოს თუ შენ შორის ერთსა შინა ქალაქთა შენთაგანსა, რომელთა უფალი ღმერთი მიგცემს შენ, მამაკაცი ანუ დედაკაცი, რომელმან ქმნას ბოროტი წინაშე უფლისა ღმრთისა შენისა,
გარდასლვაჲ მცნებისა მისისაჲ და მოსრულთა ჰმსახურონ ღმერთთა სხუათა და თაყუანის-სცენ მათ მზესა, ანუ მთუარესა, ანუ ყოველსავე ცისა სამკაულისაგანსა, რომელი არა უბრძანე,
და მიგეთხრა შენ და გამოიძიე ფრიად, და, აჰა, ჭეშმარიტ Page of ms. Ga: 246v იქმნა სიტყუაჲ: ქმნილ არს საძაგელებაჲ მისი ისრაელსა შორის,
და განიყვანო კაცი იგი ანუ დედაკაცი იგი, რომელთა ქმნეს საქმე ესე ბოროტი, გარეგან ბჭესა და ქვადაკრებულ-ჰყვენით იგინი ქვებითა და აღესრულნენ.
ორითა მოწამითა ანუ სამითა მოწამითა მოკუდინ მოკუდომად, არა მოკუდეს ერთითა მოწამითა.
და ჴელნი მოწამეთანი იყვნენ მის ზედა პირველად მოკუდინებად მისსა და ჴელი ყოვლისა ერისაჲ უკუანაჲსკნელ და მოსპეთ ბოროტი თქუენ მაგათგან.
ხოლო უკუეთუ შეუძლებელ იქმნეს თქუენგან სიტყუაჲ საშჯელსა შინა შორის სისხლისა სისხლი და შორის შეხებისა შეხებაჲ და შორის ცილობისა ცილობაჲ, სიტყუაჲ საშჯელისაჲ ქალაქთა შინა შენთა, და აღდგომილი აღხჳდე ადგილად, რომელიცა გამოირჩიოს უფალმან ღმერთმან შენმან წოდებად სახელი მისი მუნ.
Page of ms. Ga: 247r მიხჳდე მღდელთა მიმართ ლევიტელთა და მსაჯულისა მიმართ, რომელიცა იყოს მათ დღეთა შინა, და გამომეძიებელთა მიგითხრან შენ მშჯავრი.
და ჰქმნა სიტყჳსაებრ, რომელი მიგითხრან შენ ადგილისაგან მათ, რომელიცა გამოირჩიოს უფალმან ღმერთმან შენმან წოდებად სახელი მისი მუნ, და დაიცვა ფრიად ქმნად ყოვლისაებრ, რაოდენი რაჲ შჯულ-გიდვან შენ.
შჯულისაებრ და მშჯავრისაებრ, რომელიცა გრქუან შენ, ჰყო, არა მისდრკე სიტყჳსაგან, რომელი მიგითხრა შენ, მარჯუენით, არცა მარცხენით.
და კაცმან, რომელმანცა ყოს თქუენ შორის ამპარტავნებით არასმენაჲ მღდელისა წარდგომილისაჲ მსახურებად სახელსა ზედა უფლისა ღმრთისა შენისასა ანუ მსაჯულისაჲ, რომელიცა იყოს იგი და მოსპოთ ბოროტი ისრაელისაგან.
და ყოველსა ერსა მსმენელსა შეეშინ\ოს Page of ms. Ga: 247v და არღა იუღმრთოოს მერმე.
და უკუეთუ შეხჳდე ქუეყანასა, რომელსა უფალი ღმერთი შენი მიგცემს შენ წილად, და დაიმკჳდრო იგი და დაეშენო მას ზედა და სთქუა: დავიდგინო თავისა ჩემისა მთავარი, ვითარცა სხუათა წარმართთა გარემოჲს ჩემსა.
და დადგინებით დაიდგინო თავსა შენსა ზედა მთავარი, რომელიცა გამოირჩიოს უფალმან ღმერთმან შენმან ძმათაგან შენთა, დაადგინო თავსა ზედა მთავარი, არა გეძლოს დადგინებად შენ ზედა კაცი უცხოჲ, რამეთუ არა ძმაჲ შენი არს.
გარნა არა განიმრავლოს თავისა თჳსისა ცხენი, არცა მიაქციოს ერი ეგჳპტედ, რაჲთა არა განიმრავლოს თავისა თჳსისა ცხენი, ხოლო უფალმან თქუა: არა შესძინოთ უკუმოქცევად მერმე გზასა ამას.
და ნუ განიმრავლებნ თავისა თჳსისა ცოლებსა, რაჲთა არა განდრკეს გული მისი და ვეცხლი და ოქროჲ არა განიმრავლოს თავისა თჳსისა ფრიად.
Page of ms. Ga: 248r და იყოს, რაჟამს დაჯდეს საყდარსა ზედა მთავრობისა თჳსისა და დაწეროს თავისა თჳსისათჳს მეორე საშჯულოჲ ესე წიგნად მღდელთა მიერ ლევიტელთა
და იყოს მის თანა დღეთა ცხორებისა მისისათა, რაჲთა ისწავოს შეშინებად უფლისაგან ღმრთისა თჳსისა დაცვად ყოველთა ამათ მცნებათა და სამართალთა მისთა ქმნად,
რაჲთა არა ამაღლდეს გული მისი ძმათაგან მისთა, რაჲთა არა გარდაჰხდეს მცნებათაგან მარჯულ ანუ მარცხლ, რაჲთა გრძელ ჟამ იყოს მთავრობასა შინა თჳსსა იგი და ძენი მისნი შემდგომად მისსა ძეთა შორის ისრაელისათა.
