Page of ms. Ga: 305r Page of ms. Gb: 150r და იყო შემდგომად აღსრულებისა მოსესსა და ჰრქუა უფალმან იისუს, ძესა ნავესსა, მსახურსა მოსესსა, მეტყუელმან:
მოსე, მსახური ჩემი, აღესრულა. აწ უკუე აღდგომილი წიადვედ იორდანესა შენ და ყოველი ესე ერი ქუეყანასა [მას], რომელსა მე მივცემ მათ.
ყოველსა ადგილსა, Page of ms. Ga: 305v რომელსაცა აღვიდეს კუალი ფერჴისა თქუენისაჲ, თქუენ მიგცე იგი, ვითარ-სახედ ვარქუ მოსესა.
უდაბნოჲ და წინაშე ლიბანესა ვიდრე დიდად მდინარედ ევფრატად, ყოველი ქუეყანაჲ ქეტტელისაჲ და ვიდრე ზღუამდე უკუანაჲსკნელად, დასავალით მზისაჲთ იყოს საზღვარ თქუენდა.
და არა წინააღდგეს კაცი არცა ერთი წინაშე თქუენსა ყოველთა დღეთა სიცოცხლისა შენისათა და ვითარ Page of ms. Ga: 307r -- იგი ვყავ მოსეს თანა, ეგრეთ ვყო შენ თანაცა. და არა დაგიტეო შენ, არცა უგულებელს-გყო შენ.
განძლიერდი და მმამრობდ, რამეთუ შენ განუნაწილო ერსა ამას ქუეყანაჲ, რომლისა ვეფუცე მამათა მათთა მიცემად მათდა.
ძლიერობდცა უკუე და მმამრობდ დამარხვად და ქმნად, ვითარ-იგი გამცნო შენ მოსემან. მონამან ჩემმან. და არა მისდრკე მათგან მარჯუენედ მიმართ, არცა მარცხენედ მიმართ, რაჲთა გულისხუმიერ იყო ყოველთა შინა, რომელთა ჰყოფდე.
და არა განიშორო წიგნი შჯულისაჲ ამის პირისაგან შენისა და იწურთიდე მას დღე და ღამე. რაჲთა დაიცვნე ქმნად ყოველნი შთაწერილნი მას შინა. მაშინ წარგემართოს და წარიმართნე გზანი შენნი და მაშინ გულისხუმა-ჰყო
აჰა, გამცნებ მე შენ: განძლიერდი და მმამრობდ, ნუ შეშჯაბნდები, ნუცა შეშინდები. რამეთუ შენ თანა არს უფალი ღმერთი შენი ყოველსა ადგილსა, რომელსაცა ხჳდოდი.
და ამცნო იისუმან მწიგნობართა ერისათა, მეტყუელმან:
შევედით საშუალ ბანაკსა ერისასა და ამცენით ერსა მეტყუელთა: აღიმზადეთ გამოსაზრდელი, რამეთუ მერმე სამნიღა დღენი, და განჰვლოთ იორდანე ესე, შესრულთა დამკჳდრებად ქუეყანისა, რომელსა უფალი ღმერთი მამათა თქუენთაჲ მიგცემს თქუენ.
და რუბენსა და გადსა და კერძოსა ტომსა მანასისსა ჰრქუა იისუმან:
მოიჴსენეთ სიტყუაჲ, რომელი გამცნო თქუენ მოსემან. მონამან უფლისამან. მეტყუელმან: უფალმან ღმერთმან თქუენმან განგისუენა თქუენ და მოგცა თქუენ ქუეყანაჲ ესე.
Page of ms. Ga: 307v ცოლნი თქუენნი და შვილნი თქუენნი და საცხოვარი თქუენი დაემკჳდრენინ ქუეყანასა, რომელი მოგცა თქუენ მოსემან წიაღ იორდანესა, ხოლო თქუენ წიადმოჴედით კეთილ-სარტყლებნი უპირველესნი ძმათა თქუენთანი, ყოველი შემძლებელი, და ეთანამბრძოლენით მათ,
ვიდრემდისცა განუსუენოს უფალმან ღმერთმან ჩუენმან ძმათა თქუენთა, ვითარ-იგი თქუენ, და დაიმკჳდრონ ამათცა ქუეყანაჲ, რომელი უფალმან ღმერთმან თქუენმან მისცეს მათ. და წარხჳდეთ თითოეული სამკჳდრებელსა თჳსსა, რომელი მიგცა თქუენ მოსემან, მონამან უფლისამან, წიაღ იორდანესა აღმოსავალით მზისაჲთ.
და მიმგებელთა იისუჲსთა ჰრქუეს: ყოველთა, რაოდენთა მამცნებ ჩუენ, ეჰყოფთ და ყოველსა ადგილსა, რომელსაცა მიმავლინენ ჩუენ, მივალთ.
და ყოველთაებრ, რაოდენნი ვისმინენით მოსესნი, ვისმენთ შენსა, თჳნიერ იყავნ უფალი ღმერთი ჩუენი შენ თანა, ვითარ-სახედ იყო მოსეს თანა.
ხოლო კაცი, რომელი გეურჩოს შენ და ვინცა არა ისმინნეს სიტყუანი შენნი, ვითარ-სახედცა ამცნო მას. მოკუჱდინ, არამედ განძლიერდი და მმამრობდ.
