Isusen Iču u͑mu͑xlaxala amdarxo Iz äyitmoġo pi čarḳiṭuxun oša Ḳefernaumane baci.
Ṭeṭiya sa izbašin gele lazəmlu nökär azarainšbaki elmoġoy loxol basḳeney.
Me izbašinen Isusi barada ibakaṭan, hari iz nökärä q̇olaybeq̇an pi, Iudeyin bäzi aġsaq̇q̇alxo Šoṭay ṭo͑ġo͑le yaq̇abi.
Šorox Isusi ṭo͑ġo͑l hari Šoṭo üḳin xoinśbi metärṭun pi: "Me amdar Vi kömäyä layiġe.
Šoṭaynaḳ ki, šoṭin beš millätä čuresa, yaynaḳ sinagoge biq̇esṭe".
Isus šoṭoġoxun sagala yaq̇ane bafṭi. Šo ḳoža iśalainšakaṭan izbašinen iz bäzi dosṭurxo yaq̇abi Šoṭaynaḳ metär xavare yaq̇abi: "Ay Q̣onʒ́ux, zähmät ma zapa. Zu layiġ tezu ki, Hun bez ḳoya ba ġan.
Ḳoṭaynaḳal Vi ṭo͑ġo͑l eysunal za laiġ tez be͑ġi. Ama sa äyit upa ki, bezi nökär q̇olay bakeq̇an.
Šoṭaynaḳ ki, zuval tabi bakala sa amdarzu, beziyal kiin oq̇a äsḳärxono. Sunṭu zu uḳaṭan "Taki!" šo tanesa, ṭi͑yämiṭu isä "Eki!" šoval enesa. Nökärä "Metär ba!" šoṭinal bsane".
Moṭo ibakala Isusen izbašina määṭṭäle mandi. Šoṭin fərəpi Iz bać̣anexun eġala amdarxo pine: "Vä͑x nexsu: sal Israilal me q̇ädär ve͑luġ tez aḳe".
Yaq̇abi amdarxo ḳoya qaybakaṭan azaru nökärä q̇olaybaḳiṭun aḳi.
Moṭoxun samal oša Isus Nain c̣ila sa šähärene taci. Isusi šagirdxo saal ġele amdar Šoṭay bać̣anexune taysay.
Šo šähäri darvazina iśalainšakaṭan sa süpür nanay täk sa ġare meyidäṭun č̣evḳsay. Šähäri amdarxoy geloval nanaxun taṭunsay.
Q̣onʒ́uġon šoṭo akaṭan šoṭo Iz goroxe hari, čuġo pine: "Ma o͑no͑pa!"
Iśalainšaki Iz kula sanduġane duġi, meyida tašalorox čurṭunpi. Isusen pine: "Ay ǯäyil, va nexzu: hayza!"
P̣uriyo hayzeri arci bureqi äyitsa. ωsusen šoṭo iz nanane tadi.
Bitova q̇i͑yen haneq̇i. "Beš arane kala sa xavartašale bi͑yex č̣eri!" saal "Buxaʒ́uġon Iz azuḳi loxole be͑ġi!" - upsun Buxaʒ́uġo tärifläinšṭunbi.
Isusi barada me xavar bütüm Iudeyina saal härräminä bakala oćalxo yäymiše baki.
Ioani šagirdxonal šoṭo bütüm me äšurxoy barada xavarṭun tadi. Ioanen iz šagirdxoxun ṗranna iz ṭo͑ġo͑l ḳalpi
yaq̇anebi ki, Q̣onʒ́uġoxun xavar haq̇eq̇aṭun: "Eġala Bakalo Hunnu, yoxsa q̇eräzṭay yaq̇a be͑ġen?"
Amdarxo Isusi ṭo͑ġo͑l hari piṭun: "Xačzaṗḳal Ioanen yax Vi ṭo͑ġo͑le yaq̇abi ki, xavar haq̇ayan: "Eġala Bakalo Hunnu, yoxsa q̇eräzṭay yaq̇a be͑ġen?""
Ṭe vaxṭ Isusen gele azarxo, saal šär urufxo biq̇eci amdarxo q̇olayebi, hamal gele ḳać̣iġoy pula qayepi .
Isusen šoṭoġo metäre ǯoġab tadi: "Takinan, ef aḳi, ibakiṭoġo Ioana avabakesṭanan: Ḳać̣iṭoġon aneḳsa, axsaġo taraṭunne, Ǯuzamluyox tämizṭun baksa, karurxon iṭunbaksa, P̣uriyorox dirilmišṭun baksa, käsibxo Mu͑q Xavare bayan baksa.
Šu Za görä bidirläinš nu bayin, he bäxṭävärä!"
ωoani yaq̇abiyorox taciṭuxun oša, Isusen bureqi amdarxo ωoani barada upsa: "Vä͑n čölö heṭu be͑ġsanan tacey? Mušen galgaldala ge͑śa?
P̣oy ṭe vädä heṭu be͑ġsanan tacey? Šaaṭ e͑be͑ci paltar lapi sa amdara? Ama gözäl paltar lapi tamtaraġi boš yäšäyinšalorox padčaġxoy sarayaṭun baksa.
P̣oy ṭe vädä heṭu be͑ġsanan tacey? Sa xavartašala? Hoo, vä͑x nexsu, lap xavartašalaxun ala bakala sunṭu.
Mo ṭe amdare ki, šoṭay barada camecene: "Mone, Vi be͑ś Bez elčinaz yaq̇absa. Šoṭin Vi be͑ś Vi yaq̇a häzzürbale".
Vä͑x nexsu: nanaxun bakiṭoġoy arane Ioanaxun ala bakalo tenebu. Ama Buxaǯuġoy Padčaġluġa än mic̣iḳo šoṭoxun alane".
Ioanen xač zapi azuḳi bitoṭin, laṗ nalog girbalxonal, moṭo ibakaṭan Buxaʒ́uġoy düzgünluġa täsṭiġṭunbi.
Ama fariseyxonq̇a ḳanun camḳalxon Ioani xač zapsuna q̇abul teṭunbi, moṭinal Buxaʒ́uġoy ičoġoynaḳ balaṭu teṭun q̇abulbi.
Isusen Iz äyitä davame bi: "Me näsili amdarxo heṭu ošq̇ardaz? Šorox heṭuṭun ošq̇ar?
Bazari meydane arci "Yan vä͑ynaḳ ṭüṭṭäyyan farpi, vä͑n isä äčitenanpi, Yan o͑no͑ḳala mä͑ġurxoyan mäġpi, vä͑n isä o͑no͑tenanpi" pi, sun-suna ḳalḳala äyloġoṭun ošq̇ar.
Šoṭaynaḳ ki, Xačzaṗḳal Ioan eġaṭan nä śum tene uksay, nä fi tene u͑ġsay. Vä͑nal nexnan: "Šo ǯinane biq̇ece".
Insani Ġar eġaṭan käyi-u͑neġi, vä͑nal pinan: "Me puldeši saal u͑ġä͑la be͑ġanan! Nalog girbalxoxunq̇a günax balṭoġoxune dost baki!"
Ama haq̇əl- kamal iz ġarmoġoy bitoṭay täräfäxun täsṭiġe baksa".
Fariseyxoy sunṭin Isusa ičuxun sagala śum uksane ḳalpi. Šoval fariseyi ḳoya baci sulfin bać̣anene arci.
Ṭe šähäre günax bala sa čuuxe yäšäyinšbsay. Šoṭin fariseyi ḳoya Isusi sulfin bać̣ane arsṭuna avabakaṭan mac̣i märmäri sa q̇ave boš varde xene ečeri.
Čuux bać̣anin täräf, Isusi turmoġosṭa arci o͑no͑ḳa iz neġen Šoṭay turmoġo śarpsane burqi. Šoṭin Isusi turmoġo iz popen q̇arinebi, mučṗi šoṭoġo varde xene duġi.
Isusa iz ḳoya ḳalpi fariseyen moṭo aḳi ičin -iču metäre pi: "Ägär me amdar xavartašal bakiniy, Iču lafṭala šu saal heǯürä čuux baksuna avane bakoy, šoṭaynaḳ ki, me čuux gu͑naxkare".
Isusen šoṭo ćo taradi metäre pi: "Simon, Bez va äyitebu". Šoṭinal pine: "Määlim, bürüša".
"Sa borǯ tadalṭu ṗä͑ tane borǯebuy. Soġo qobać, ṭi͑yämino isä älli dinar boršluṭuniy.
Šoṭoġoy borǯa qaydala imkan tenebuy. Šoṭaynaḳal borǯ tadalṭin ṗrannayal borǯa baġəšlainšebi. Upa beġaz, me amdarxoy maṭin šoṭo samalal gele čureġale?"
Simonen ǯoġabe tadi: "Zändezbsa ki, ṭe amdaren, maṭu gelene baġəšlainšake". Isusen šoṭo "düzen bä͑ġä͑be" pine.
Oša Isusen čuġoy täräf be͑ġi Simona pine: "Hun me čuġo anḳsa? Zu vi ḳoyaz hari, hun Bez turmoġo oc̣ḳseynaḳ Za xeyal ten tadi. Me čuġon isä Bez turmoġo iz piin neġen šäinbi iz popen q̇arinebi.
Hun Za mučtenpi, me čuġon isä Zu ḳoya baciṭuxun maġay Bez turmoġo mučene.
Hun Bez bel zeytuni č̣äyin ten duġi. Šoṭin isä Bez turmoġo varde xene duġi.
Moṭaynaḳal va nexsu: me čuġoy gele günaxxone baġəšlainšaki. Kala čuresun aḳesṭunal koṭoxune. Šu mal baġəšlainšakene, mal čureġale".
Oša Isusen čuġo pine: "Vi günaxxo baġəšlainšebaki".
Ṭe vädä Isusaxun sagala sulfin bać̣ane arciṭoġon ičoġoy arane äyitbsaṭun burqi: "Me amdar šuva ki, günaxxoval baġəšlainšebsa?"
Ama Isusen čuġo pine: "Vi ve͑baksunen va čarḳesedi. Arxayin taki".
