TITUS
Biblia Mcxetica
Part No. 632
Previous part

Chapter: 105 
ალელუაჲ


Verse: 1  Link to psa Link to sept   აუარებდით უფალსა, რამეთუ ტკბილ არს, რამეთუ უკუნისამდე არს წყალობაჲ მისი.

Verse: 2  Link to psa Link to sept   
ვინმე იტყოდის ძლიერებათა უფლისათა, სასმენელ-ყუნეს ყოველნი ქებულებანი მისნი?

Verse: 3  Link to psa Link to sept   
ნეტარ არიან, რომელთა დაიცვან სამართალი და ყონ სიმართლე ყოველსა ჟამსა.

Verse: 4  Link to psa Link to sept   
მომიჴსენენ ჩუენ, უფალო, სათნოებითა ერისა შენისათა და მომხედენ ჩუენ მაცხოვარებითა შენითა,

Verse: 5  Link to psa Link to sept   
რათა ვიხილოთ ჩუენ სიტკბოებაჲ რჩეულთა შენთა და ვიხარებდეთ ჩუენ სიხარულითა ნათესავისა შენისათა, რათა ვიქებოდით ჩუენ სამკჳდრებელთა შენთა თანა.

Verse: 6  Link to psa Link to sept   
ვცოდეთ მამათა ჩუენთა თანა, უსჯულო ვიქმნენით და გეცრუენით შენ.

Verse: 7  Link to psa Link to sept   
მამათა ჩუენთა ეგჳპტეს შინა არა გულისჴმა-ყვნეს საკჳრველებანი შენნი, არცა მოიჴსენეს მრავალნი წყალობანი შენნი და გაგამწარეს წიაღ სლვასა ზღჳსა მის მეწამულისასა.

Verse: 8  Link to psa Link to sept   
და იჴსნა იგინი სახელისა მისისათჳს, რათამცა გულისჴმა-ყვეს ძლიერებაჲ მისი;

Verse: 9  Link to psa Link to sept   
და შეჰრისხნა ზღუასა მეწამულსა, და განჴმა, და უძღოდა მათ უფსკრულსა შინა, ვითარცა უდაბნოსა ზედა;

Verse: 10  Link to psa Link to sept   
და განარინნა იგინი ჴელისაგან მოძულეთასა და იჴსნნა იგინი ჴელისაგან მტერთა მათთასა;

Verse: 11  Link to psa Link to sept   
და დაფარნა წყალმან მაჭირვებელნი მათნი, და ერთიცა მათგანი არა განერა.

Verse: 12  Link to psa Link to sept   
და ჰრწმენა მათ სიტყჳსა მისისა და აქებდეს ქებულებასა მისსა.

Verse: 13  Link to psa Link to sept   
ისწრაფეს და დაივიწყეს მათ საქმენი მისნი და არა დაუთმეს ზრახვასა მისსა.

Verse: 14  Link to psa Link to sept   
და გულმან უთქუა გულისთქმაჲ უდაბნოსა შინა და განცადეს ღმერთი ურწყულსა შინა.

Verse: 15  Link to psa Link to sept   
და მოსცა მათ თხოვა მათი და მოუვლინა სავსებაჲ სულსა მათსა.

Verse: 16  Link to psa Link to sept   
და განარისხეს მოსე ბანაკსა შინა და აჰრონ, წმიდაჲ უფლისაჲ.

Verse: 17  Link to psa Link to sept   
განეპო ქუეყანაჲ და დანთქა დათან და დაფარნა ბანაკი აბირონისი;

Verse: 18  Link to psa Link to sept   
და ცეცხლი აღატყდა კრებულსა შორის მათსა, და ალმან შეწუნა ცოდვილნი.

Verse: 19  Link to psa Link to sept   
და ქმნეს ჴბოჲ ქორებს და თაყუანი-სცეს კერპსა მას;

Verse: 20  Link to psa Link to sept   
და ცვალეს დიდებაჲ მათი მსგავსად ჴბოსა მის თივისმჭამელისა.

Verse: 21  Link to psa Link to sept   
და დაივიწყეს ღმრთისა მაცხოვარისა მათისა, რომელმან ქმნნა დიდ-დიდნი ეგჳპტეს შინა,

Verse: 22  Link to psa Link to sept   
საკჳრველებანი მისნი ქუეყანასა მას ქამისსა და საშინელებანი მისნი ზღუასა მას ზედა მეწამულსა.

Verse: 23  Link to psa Link to sept   
და თქუა მოსრვა მათი, არა თუმცა მოსე, რჩეული მისი, დადგა სრვასა მას წინაშე მისსა, გარემიქცევად გულისწყრომა მისი, რათამცა არა მოსრნა იგინი.

Verse: 24  Link to psa Link to sept   
და შეურაცხ-ყვეს ქუეყანა იგი გულისსათქმელი და არა ჰრწმენა მათ სიტყჳსა მისისა;

Verse: 25  Link to psa Link to sept   
დრტჳნვიდეს იგინი კარვებსა მათსა და არა ისმინეს ჴმაჲ უფლისაჲ.

Verse: 26  Link to psa Link to sept   
და აღიღო ჴელი მისი მათ ზედა დაცემად მათდა უდაბნოსა ზედა

Verse: 27  Link to psa Link to sept   
და დაცემად თესლისა მათისა წარმართთა შორის და განბნევად მათდა სოფლებსა შორის.

Verse: 28  Link to psa Link to sept   
და შეიბილწნეს იგინი ბელფეგორს და ჭამეს ნაგები მკუდართა.

Verse: 29  Link to psa Link to sept   
და განარისხეს იგი საქმითა მათითა, და განმრავლდა მათ ზედა დაცემა.

Verse: 30  Link to psa Link to sept   
და დადგა ფინეზ და ლხინება-ყო, და დაეყენა სრვა;

Verse: 31  Link to psa Link to sept   
და შეერაცხა მას სიმართლედ და თესლითი თესლადმდე მიუკუნისამდე.

Verse: 32  Link to psa Link to sept   
და განარისხეს იგი წყალთა მათ ზედა ცილობისათა, და განბოროტნა მოსე მათთჳს,

Verse: 33  Link to psa Link to sept   
რამეთუ მათ განამწარეს სული მისი; და განუჩინა მათ ბაგითა თჳსითა.

Verse: 34  Link to psa Link to sept   
და არა მოსრნეს ნათესავნი იგი, რომელთა ჰრქუა მათ უფალმან.

Verse: 35  Link to psa Link to sept   
და აერინეს წარმართთა და ისწავლნეს საქმენი მათნი;

Verse: 36  Link to psa Link to sept   
და ჰმონეს კერპთა მათთა, და ექმნა მათ იგი საცთურ;

Verse: 37  Link to psa Link to sept   
და დაუკლნეს ძენი მათნი და სულნი მათნი ეშმაკთა.

Verse: 38  Link to psa Link to sept   
და დასთხიეს სისხლი უბრალო, სისხლი ძეთა და ასულთა მათთა, რომელ-იგი უზორეს კერპსა მას ქანანისასა, დაკლვით მოისრა ქუეყანაჲ სისხლითა

Verse: 39  Link to psa Link to sept   
და შეიგინა საქმითა მათითა, რამეთუ ისიძვიდეს იგინი საქმეთა შინა მათთა.

Verse: 40  Link to psa Link to sept   
და განრისხნა გულისწყრომით უფალი ერსა თჳსსა ზედა და მოიძაგა სამკჳდრებელი თჳსი;

Verse: 41  Link to psa Link to sept   
და მისცნა იგინი ჴელთა მტერთასა, დაეუფლნეს მათ მოძალენი მათნი;

Verse: 42  Link to psa Link to sept   
და აჭირვებდეს მათ მტერნი მათნი, და დამდაბლდეს იგინი ქუეშე ჴელსა მათსა.

Verse: 43  Link to psa Link to sept   
მრავალგზის იჴსნნა იგინი, ხოლო მათ გან-ვე-ამწარეს იგი ზრახვითა მათითა და დამდაბლდეს უსჯულოებითა მათითა.

Verse: 44  Link to psa Link to sept   
და მოხედნა უფალმან ჭირსა მათსა, რაჟამს შეისმინა მან ვედრებისა მათისა;

Verse: 45  Link to psa Link to sept   
და მოიჴსენა აღთქმისა თჳსისა და შეინანა მრავლითა წყალობითა თჳსითა;

Verse: 46  Link to psa Link to sept   
და მისცნა იგინი საწყალობელად წინაშე ყოველთა წარმტყუენველთა მათთა.

Verse: 47  Link to psa Link to sept   
მაცხოვნენ ჩუენ, უფალო ღმერთო ჩუენო, და შემკრიბენ ჩუენ წარმართთაგან, რათა აუაროთ სახელსა შენსა წმიდასა და ვიქებოდით ჩუენ ქებულებითა შენითა.

Verse: 48  Link to psa Link to sept   
კურთხეულ არს უფალი ღმერთი ისრაჱლისა ამიერითგან და უკუნისამდე, და თქუას ყოველმან ერმან: იყავნ, იყავნ. დიდება



Next part



This text is part of the TITUS edition of Biblia Mcxetica.

Copyright TITUS Project, Frankfurt a/M, 22.3.2021. No parts of this document may be republished in any form without prior permission by the copyright holder.