TITUS
Biblia Mcxetica
Part No. 645
Previous part

Chapter: 118 
ალელუაჲ


ალეფ.


Verse: 1  Link to psa Link to sept   ნეტარ არიან უბიწონი გზასა, რომელნი ვლენან შჯულსა უფლისასა.

Verse: 2  Link to psa Link to sept   ნეტარ არიან, რომელნი გამოიკულევენ წამებათა მისთა, ყოვლითა გულითა გამოიძინენ იგი.

Verse: 3  Link to psa Link to sept   რამეთუ არა მოქმედნი უსჯულოებისანი გზათა მისთა ვიდოდეს.

Verse: 4  Link to psa Link to sept   შენ ამცენ მცნებათა შენთა დამარხვად ფრიად.

Verse: 5  Link to psa Link to sept   წარ-თუ-მცა-მართებულ იყვნეს გზანი ჩემნი დაცვად სიმართლეთა შენთა,

Verse: 6  Link to psa Link to sept   მაშინ არა მრცხუენოდის, რაჟამს ვხედვიდე მე ყოველთა მიმართ მცნებათა შენთა,

Verse: 7  Link to psa Link to sept   აღგიარო შენ სიწრფოებითა გულისათა, რაჟამს ვისწავლნე მე განკითხვანი სიმართლისა შენისანი.

Verse: 8  Link to psa Link to sept   სიმართლენი შენნი ვიმარხნე; ნუ დამაგდებ მე ვიდრე ფრიად.



ბეთ


Verse: 9  Link to psa Link to sept   რაჲთამე წარიმართოს ჭაბუკმან გზა თჳსი? არამედ იმარხნეს თუ სიტყუანი შენნი.

Verse: 10  Link to psa Link to sept   ყოვლითა გულითა ჩემითა გამოგიძიე შენ; ნუ განმაშორებ მე მცნებათაგან შენთა.

Verse: 11  Link to psa Link to sept   გულსა შინა ჩემსა დავიფარენ სიტყუანი შენნი, რათა არა შეგცოდო შენ.

Verse: 12  Link to psa Link to sept   კურთხეულ ხარ შენ, უფალო, მასწავენ მე სიმართლენი შენნი.

Verse: 13  Link to psa Link to sept   ბაგითა ჩემითა მიუთხრენ ყოველნი სამართალნი პირისა შენისანი.

Verse: 14  Link to psa Link to sept   გზასა წამებათა შენთასა განვსცხრებოდე, ვითარცა ყოვლითა სიმდიდრითა.

Verse: 15  Link to psa Link to sept   მცნებათა შენთა გულსა ვეტყოდი და განვიცადნე მე გზანი შენნი.

Verse: 16  Link to psa Link to sept   სიმართლეთა შენთასა ვიწურთიდე და არა დავივიწყოდი მე სიტყუაჲ შენი.



გიმელ


Verse: 17  Link to psa Link to sept   მომაგე მონასა შენსა, ვცხონდე და დავიმარხნე სიტყუანი შენნი.

Verse: 18  Link to psa Link to sept   განანათლენ თუალნი ჩემნი, და განვიცადნე საკჳრველებანი შჯულისა შენისანი.

Verse: 19  Link to psa Link to sept   მწირ ვარი მე ქუეყანასა ზედა, ნუ დაჰფარავ ჩემგან მცნებათა შენთა.

Verse: 20  Link to psa Link to sept   სურვიელ იქმნა სული ჩემი გულისთქმად სამართალთა შენთა ყოველსა ჟამსა.

Verse: 21  Link to psa Link to sept   შეჰრისხენ შენ ამპარტავანთა; წყეულ არიან, რომელთა გარდააქციეს მცნებათაგან შენთა.

Verse: 22  Link to psa Link to sept   მოსპე ჩემგან ყუედრებაჲ და შეურაცხებაჲ, რამეთუ წამებანი შენნი გამოვიძიენ.

Verse: 23  Link to psa Link to sept   და რამეთუ დასხდენ მთავარნი, ჩემთჳს ძჳრსა იტყოდეს, ხოლო მონა შენი ზრახვიდა სიმართლეთა შენთა.

Verse: 24  Link to psa Link to sept   და რამეთუ წამებანი შენნი წურთა არიან ჩემდა და ზრახვა ჩემდა არიან სიმართლენი შენნი.



დალეთ


Verse: 25  Link to psa Link to sept   მიეახლა სული ჩემი მიწასა; მაცხოვნე მე სიტყჳსაებრ შენისა.

Verse: 26  Link to psa Link to sept   გზანი ჩემნი გითხრენ შენ, და ისმინე ჩემი; მასწავენ მე სიმართლენი შენნი.

Verse: 27  Link to psa Link to sept   გზა სიმართლეთა შენთა გულისჴმა-მიყავ მე, და ვიტყოდი მე საკჳრველებათა შენთა.

Verse: 28  Link to psa Link to sept   მიერულა სულსა ჩემსა მოწყინებითა; დამამტკიცე მე სიტყჳთა შენითა.

Verse: 29  Link to psa Link to sept   გზა სიცრუჲსა განმაშორე ჩემგან და სჯულითა შენითა შემიწყალე მე.

Verse: 30  Link to psa Link to sept   გზა ჭეშმარიტებისა სათნო-ვიყავ და სიმართლენი შენნი მე არა დავივიწყენ.

Verse: 31  Link to psa Link to sept   შევეყავ წამებათა შენთა; უფალო, ნუ მარცხუენ მე.

Verse: 32  Link to psa Link to sept   გზასა მცნებათა შენთასა ვრბიოდე, რაჟამს განავრცე გული ჩემი.



ჰე {!}


Verse: 33  Link to psa Link to sept   შჯულიერ-მყავ მე, უფალო, გზასა სამართალთა შენთასა, და გამოვიძიო იგი მარადის.

Verse: 34  Link to psa Link to sept   გულისჴმა-მიყავ მე და გამოვიძიო შჯული შენი და დავიმარხო იგი ყოვლითა გულითა ჩემითა.

Verse: 35  Link to psa Link to sept   მიძღოდე მე ალაგსა მცნებათა შენთასა, რამეთუ იგი მთნდა მე.

Verse: 36  Link to psa Link to sept   მოდრიკე გული ჩემი წამებათა შენთა და ნუ ანგაჰრებასა.

Verse: 37  Link to psa Link to sept   მოაქციენ თუალნი ჩემნი, რათა არა იხილონ ამავოებაჲ, და გზათა შენთა მაცხოვნე მე.

Verse: 38  Link to psa Link to sept   დაამტკიცე მონისა შენისა თანა სიტყუაჲ შენი, რათა მეშინოდის მე შენგან.

Verse: 39  Link to psa Link to sept   მოსპე ჩემგან ყუედრებაჲ იგი, რომელსაცა ვეჭუ მე, რამეთუ სამართალნი შენნი ტკბილ არიან.

Verse: 40  Link to psa Link to sept   ესერა, გულმან მითქუა მცნებათა შენთა; სიმართლითა შენითა მაცხოვნე მე.



თავ {!}


Verse: 41  Link to psa Link to sept   და მოვედინ ჩემ ზედა წყალობაჲ შენი, უფალო, და მაცხოვარებაჲ შენი სიტყჳსაებრ შენისა.

Verse: 42  Link to psa Link to sept   და მიუგო მაყუედრებელთა ჩემთა სიტყუაჲ, რამეთუ მე სიტყუასა შენსა ვესავ.

Verse: 43  Link to psa Link to sept   და ნუ განაშორებ პირსა ჩემსა სიტყუასა ჭეშმარიტებისასა სრულიად, რამეთუ მე სამართალთა შენთა ვესავ.

Verse: 44  Link to psa Link to sept   და დავიცვა შჯული შენი მარადის, უკუნისამდე და უკუნითი უკუნისამდე.

Verse: 45  Link to psa Link to sept   და ვიდოდე მე ფართოსა, რამეთუ მცნებანი შენნი გამოვიძიენ.

Verse: 46  Link to psa Link to sept   და ვიტყოდე მე წამებათა შენთა წინაშე მეფეთასა და არა მრცხუენოდა.

Verse: 47  Link to psa Link to sept   და ვიწურთიდ მცნებათა შენთა, რომელნიცა შევიყვარენ ფრიად.

Verse: 48  Link to psa Link to sept   და აღვიპყრენ ჴელნი ჩემნი მცნებათა შენთა მიმართ, რომელნიცა შევიყუარენ და ვზრახეედ სიმართლეთა შენთა.



ზაინ


Verse: 49  Link to psa Link to sept   მომაჴსენე სიტყუაჲ შენი მონასა შენსა, რომლისა მოსავ-მყავ მე.

Verse: 50  Link to psa Link to sept   ამან ნუგეშინის-მცა მე სიმდაბლესა შინა ჩემსა, რამეთუ სიტყუამან შენმან მაცხოვნა მე.

Verse: 51  Link to psa Link to sept   ამპარტავანნი უსჯულოებდეს ფრიად, ხოლო მე შჯულისა შენისაგან გარდავაქციე.

Verse: 52  Link to psa Link to sept   მოვიჴსენენ სამართალნი შენნი საუკუნითგან, უფალო, და ნუგეშინის-მეცა მე.

Verse: 53  Link to psa Link to sept   ურვამან შემიპყრა მე ცოდვილთამან, რომელთა დაუტევეს შჯული შენი.

Verse: 54  Link to psa Link to sept   საგალობელ იყვნეს ჩემდა სამართალნი შენნი ადგილსა მას მწირობისა ჩემისასა.

Verse: 55  Link to psa Link to sept   მოვიჴსენე ღამე სახელი შენი, უფალო, და დავიცევ შჯული შენი.

Verse: 56  Link to psa Link to sept   ესე მეყო მე, რამეთუ სამართალნი შენნი გამოვიძიენ მე.



ეთ


Verse: 57  Link to psa Link to sept   ნაწილი ჩემი ხარი შენ, უფალო, ვთქუ, რათა ვიმარხო შჯული შენი.

Verse: 58  Link to psa Link to sept   ვლოცევდ პირსა შენსა ყოვლითა გულითა ჩემითა, შემიწყალე მე სიტყჳსაებრ შენისა.

Verse: 59  Link to psa Link to sept   განვიზრახევდ გზათა შენთა და მოვაქციენ ფერჴნი ჩემნი წამებათა შენთა.

Verse: 60  Link to psa Link to sept   განვემზადე და არა შევძრწუნდი, რამეთუ ვიმარხენ მე მცნებანი შენნი.

Verse: 61  Link to psa Link to sept   საბელნი ცოდვილთანი მომეხჳნეს მე, და შჯული შენი მე არა დავივიწყე.

Verse: 62  Link to psa Link to sept   შუვაღამე აღვდეგი აღსაარებად შენდა განკითხვათათჳს სიმართლისა შენისათა.

Verse: 63  Link to psa Link to sept   შევეყავ მე ყოველთა მოშიშთა შენთა და რომელთა დაიცვნიან მცნებანი შენნი.

Verse: 64  Link to psa Link to sept   წყალობითა შენითა, უფალო, სავსე არს ქუეყანა; სიმართლენი შენნი მასწავენ მე.



ტეთ


Verse: 65  Link to psa Link to sept   სიტკბოებანი ჰყავ მონისა შენისა თანა, უფალო, სიტყჳსაებრ შენისა.

Verse: 66  Link to psa Link to sept   სიტკბოებაჲ და სწავლულებაჲ და მეცნიერებაჲ მასწავე მე, რამეთუ მცნებანი შენნი მრწმენნეს მე.

Verse: 67  Link to psa Link to sept   პირველ დამდაბლებად ჩემდადმდე მე ვცოდე, ამისთჳს სიტყუაჲ შენი ვიმარხე.

Verse: 68  Link to psa Link to sept   ტკბილ ხარ შენ, უფალო, და სიტკბოებითა შენითა მასწავენ მე სიმართლენი შენნი.

Verse: 69  Link to psa Link to sept   გამრავლდა ჩემ ზედა სიცრუე ამპარტავანთა, ხოლო მე ყოვლითა გულითა ჩემითა გამოვიძინე მცნებანი შენნი.

Verse: 70  Link to psa Link to sept   შეიყო, ვითარცა სძე, გული მათი, ხოლო მე შჯულსა შენსა ვიტყოდე.

Verse: 71  Link to psa Link to sept   კეთილ არს ჩემდა, რამეთუ დამამდაბლე, რათა ვისწავლნე მე სიმართლენი შენნი.

Verse: 72  Link to psa Link to sept   კეთილ არს ჩემდა შჯული პირისა შენისა უფროს ათასეულისა ოქროსა და ვეცხლისა. დიდებაჲ



იოთ


Verse: 73  Link to psa Link to sept   ჴელთა შენთა შემქმნეს მე და დამბადეს მე; გულისჴმა-მიყავ მე, და ვისწავლნე მე მცნებანი შენნი.

Verse: 74  Link to psa Link to sept   მოშიშნი შენნი მხედვიდენ მე და იხარებდენ, რამეთუ მე სიტყუათა შენთა ვესავ.

Verse: 75  Link to psa Link to sept   გულისჴმა-ვყავ, უფალო, რამეთუ სიმართლით არიან განკითხვანი შენნი, და ჭეშმარიტაღ დამამდაბლე მე.

Verse: 76  Link to psa Link to sept   იყავნ წყალობაჲ შენი ნუგეშინის-მცემელ ჩემდა სიტყჳსაებრ შენისა, მონისა შენისა.

Verse: 77  Link to psa Link to sept   მოვიდენ ჩემ ზედა მოწყალებანი შენნი, და ვცხონდე, რამეთუ შჯული შენი არს ზრახვა ჩემდა.

Verse: 78  Link to psa Link to sept   ჰრცხუენოდენ ამპარტავანთა, რამეთუ სიცრუჲთ უსჯულოებდეს ჩემდა მომართ, ხოლო მე გულსა ვეტყოდი მცნებათა შენთა.

Verse: 79  Link to psa Link to sept   მომაქციედ მე მოშიშთა შენთა და რომელთა იცნიან წამებანი შენნი.

Verse: 80  Link to psa Link to sept   იყავ გული ჩემი უბიწო სამართალთა შინა შენთა, რათა არა მრცხუენეს მე.



ხაფ


Verse: 81  Link to psa Link to sept   მოაკლდების მაცხოვარებისა შენისა მიმართ სულსა ჩემსა, რამეთუ მე სიტყუათა შენთა ვესავ.

Verse: 82  Link to psa Link to sept   მოაკლდეს თუალნი ჩემნი სიტყუათა მიმართ შენთა, მეტყჳედ რაჲ: ოდესმე ნუგეშინის-მცე მე?

Verse: 83  Link to psa Link to sept   რამეთუ ვიქმენი, ვითარცა თხიერი ნეფხუასა, ხოლო სიმართლენი შენნი მე არა დავივიწყენ.

Verse: 84  Link to psa Link to sept   რაოდენმე არიან დღენი მონისა შენისანი? ანუ ოდესმე ჰყო სასჯელი ჩემი მდევართა ჩემთაგან?

Verse: 85  Link to psa Link to sept   მითხრეს მე უსჯულოთა ზრახვა, არამედ არა იყო, ვითარ შჯული შენი, უფალო.

Verse: 86  Link to psa Link to sept   ყოველნი მცნებანი შენნი ჭეშმარიტებით არიან; უსამართლოდ მდევნიდეს მე, შემეწიე მე.

Verse: 87  Link to psa Link to sept   წუთღა წარმწყმედდეს მე ქუეყანასა ზედა, ხოლო მე არა დაუტევენ მცნებანი შენნი.

Verse: 88  Link to psa Link to sept   წყალობითა შენითა მაცხოვნე მე, და დავიმარხნე წამებანი პირისა შენისანი.



ლამედ


Verse: 89  Link to psa Link to sept   უკუნისამდე, უფალო, სიტყუაჲ შენი დაადგრების ცათა შინა.

Verse: 90  Link to psa Link to sept   და ნათესავითი ნათესავადმდე ჭეშმარიტებაჲ შენი; დააფუძნე ქუეყანა და ჰგიეს.

Verse: 91  Link to psa Link to sept   ბრძანებასა შენსა ელის დღე, რამეთუ ყოვლითურთ გმონებს შენ.

Verse: 92  Link to psa Link to sept   არა თუმცა შჯული შენი ზრახვა იყო ჩემდა, მაშინვე სამემცა წარვწყმდი სიმდაბლესა შინა ჩემსა.

Verse: 93  Link to psa Link to sept   უკუნისამდე არა დავივიწყენ მე სიმართლენი შენნი, რამეთუ ამას შინა მაცხოვნე მე.

Verse: 94  Link to psa Link to sept   შენი ვარ, მაცხოვნე მე, რამეთუ სიმართლენი შენნი გამოვიძიენ მე.

Verse: 95  Link to psa Link to sept   მელოდეს მე ცოდვილნი წარწყმედად, რამეთუ წამებანი შენნი გულისჴმა-ვყვენ.

Verse: 96  Link to psa Link to sept   ყოვლისა დასასრულისა ვიხილე ოხჭანი; ფართო არს მცნებაჲ შენი ფრიად.



მემ


Verse: 97  Link to psa Link to sept   რაბამად შევიყუარე შჯული შენი, უფალო, ყოველსა დღესა წურთა არს ჩემდა.

Verse: 98  Link to psa Link to sept   უფროს მტერთა ჩემთასა მეცნიერ-მყავ მე მცნებათა შენთა, რამეთუ უკუნისამდე ჩემნი არიან.

Verse: 99  Link to psa Link to sept   უფროს ყოველთა მასწავლელთა ჩემთასა გულისჴმა-ვყავ, რამეთუ წამებანი შენნი წურთა არიან ჩემდა.

Verse: 100  Link to psa Link to sept   უფროს მოხუცებულთასა გულისჴმა-ვყავ, რამეთუ წამებანი შენნი გამოვიძიენ მე.

Verse: 101  Link to psa Link to sept   ყოვლისაგან გზისა უკეთურისა დავაყენენ ფერჴნი ჩემნი, რათა ვიმარხნე მე სიტყუანი შენნი.

Verse: 102  Link to psa Link to sept   სამართალთა შენთაგან არა გარდავაქციენ, რამეთუ შენ შჯულიერ-მყავ მე.

Verse: 103  Link to psa Link to sept   რაბამად ტკბილ არიან სასასა ჩემსა სიტყუანი შენნი, უფროს თაფლისა პირსა ჩემსა.

Verse: 104  Link to psa Link to sept   მცნებათა შენთაგან გულისჴმა-ვყავ; ამისთჳს მოვიძულე ყოველი გზა სიცრუჲსა.



ნონ


Verse: 105  Link to psa Link to sept   სანთელ არს ფერჴთა ჩემთა შჯული შენი და ნათელ-ალაგთა ჩემთა.

Verse: 106  Link to psa Link to sept   ვფუცე და დავამტკიცე, რათა დავიცუნე მე განკითხვანი სიმართლისა შენისანი.

Verse: 107  Link to psa Link to sept   დავმდაბლდი ფრიად; უფალო, მაცხოვნე მე სიტყჳსაებრ შენისა.

Verse: 108  Link to psa Link to sept   ნებსითი პირისა ჩემისა სათნო-იყავ, უფალო, და სამართალნი შენნი მასწავენ მე.

Verse: 109  Link to psa Link to sept   სული ჩემი ჴელთა შენთა შინა არს მარადის, და შჯული შენი მე არა დავივიწყე.

Verse: 110  Link to psa Link to sept   დამირწყეს მე ცოდვილთა მახე, და მცნებათა შენთაგან მე არა შევსცეთ.

Verse: 111  Link to psa Link to sept   დავიმკჳდრენ წამებანი შენნი უკუნისამდე, რამეთუ სიხარულ არიან გულისა ჩემისა.

Verse: 112  Link to psa Link to sept   მოვდრიკე გული ჩემი ყოფად სამართალთა შენთა უკუნისამდე მერმისა მისთჳს მოსაბებელისა.



სამეხ {!}


Verse: 113  Link to psa Link to sept   უსჯულონი მოვიძულენ, ხოლო შჯული შენი შევიყუარე.

Verse: 114  Link to psa Link to sept   შემწე და ჴელისა ამპყრობელი ჩემი ხარი შენ, მე სიტყუათა შენთა ვესავ.

Verse: 115  Link to psa Link to sept   მისდერკით ჩემგან, უკეთურნო, და გამოვიძინე მცნებანი ღმრთისა ჩემისანი.

Verse: 116  Link to psa Link to sept   შემეწიე მე სიტყჳსაებრ შენისა და მაცხოვნე მე და ნუ მარცხუენ მე სასოებისაგან ჩემისა.

Verse: 117  Link to psa Link to sept   შემეწიე მე, და ვსცხონდე და ვიწურთიდე მე სიმართლეთა შენთა ყოველსა ჟამსა.

Verse: 118  Link to psa Link to sept   შეურაცხ-ჰყვენ ყოველნი, რომელნი განგიდგეს სამართალთაგან შენთა, რამეთუ სიცრუვით იყვნეს ზრახვანი მათნი.

Verse: 119  Link to psa Link to sept   გარდამავალად შევჰრაცხენ ყოველნი ცოდვილნი ქუეყანისანი, ამისთჳს შევიყუარენ წამებანი შენნი.

Verse: 120  Link to psa Link to sept   განმსჭუალენ შიშითა შენითა ჴორცნი ჩემნი, რამეთუ საშჯელთა შენთაგან შემეშინა.



აინ


Verse: 121  Link to psa Link to sept   ვყავ განკითხვა და სიმართლე; ნუ მიმცემ მე მავნებელთა ჩემთა.

Verse: 122  Link to psa Link to sept   შეიწყნარე მონა შენი კეთილსა შინა, და ნუ ცილსა შემწამებენ მე ამპარტავანნი.

Verse: 123  Link to psa Link to sept   მოაკლდა თუალთა ჩემთა მაცხოვარებისა მიმართ შენისა და სიტყუათა მათ სიმართლისა შენისათა.

Verse: 124  Link to psa Link to sept   ყავ მონისა შენისა თანა წყალობისაებრ შენისა და სიმართლენი შენნი მასწავენ მე.

Verse: 125  Link to psa Link to sept   მონა შენი ვარ; მეცნიერ-მყავ მე, და გულისჴმა-ვყვნე წამებანი შენნი.

Verse: 126  Link to psa Link to sept   ჟამი არს მსახურებად უფლისა, რამეთუ განაქარვეს შჯული შენი. ამისთჳს შევიყუარენ მცნებანი შენნი უფროს ოქროსა და ანთრაკისა;

Verse: 128  Link to psa Link to sept   ამისთჳს ყოველთა მიმართ მცნებათა შენთა წარვჰმართე და ყოველი გზაჲ სიცრუჲსა მოვიძულე.



პე {!}


Verse: 129  Link to psa Link to sept   საკჳრველ არიან წამებანი შენნი, ამისთჳს გამოიძინა ესენი სულმან ჩემმან.

Verse: 130  Link to psa Link to sept   განცხადებაჲ სიტყუათა მათ შენთა განანათლებს და გონიერ-ჰყოფს ჩჩჳლთა;

Verse: 131  Link to psa Link to sept   პირი ჩემი აღვაღე და მოვიღე სული, რამეთუ მცნებათა შენთა მსუროდა. დიდება

Verse: 132  Link to psa Link to sept   მოიხილე ჩემ ზედა და შემიწყალე მე სამართალთათჳს მოყუარეთა სახელისა შენისათა.

Verse: 133  Link to psa Link to sept   სლვანი ჩემნი წარმართენ სიტყუათაებრ შენთა, და ნუ მეუფლებინ ყოველი უსჯულოებაჲ.

Verse: 134  Link to psa Link to sept   მიჴსენ მე ცილისწამებისაგან კაცთასა, და დავიცუნე მცნებანი შენნი.

Verse: 135  Link to psa Link to sept   გამოაჩინე პირი შენი მონისა შენისა ზედა და მასწავენ მე სიმართლენი შენნი.

Verse: 136  Link to psa Link to sept   ნაკადულნი წყალთანი გარდამოდიოდეს თუალთა ჩემთა, რამეთუ არა დავიცევ შჯული შენი.



სადე


Verse: 137  Link to psa Link to sept   მართალ ხარ შენ, უფალო, და წრფელ არიან განკითხვანი შენნი.

Verse: 138  Link to psa Link to sept   ამცენ სიმართლე წამებათა შენთა, და ჭეშმარიტ არს ფრიად.

Verse: 139  Link to psa Link to sept   განმკაფა მე შურმან შენმან, რამეთუ დაივიწყეს სიტყუაჲ შენი მტერთა ჩემთა.

Verse: 140  Link to psa Link to sept   გამოჴურვებულ არს სიტყუაჲ შენი ფრიად, და მონამანცა შენმან შეიყუარა იგი.

Verse: 141  Link to psa Link to sept   ყრმა ვარი მე და შეურაცხ, ხოლო სიმართლენი შენნი მე არა დავივიწყენ.

Verse: 142  Link to psa Link to sept   სიმართლე შენი სიმართლე არს უკუნისამდე და შჯული შენი - ჭეშმარიტ.

Verse: 143  Link to psa Link to sept   ჭირთა და ღუაწლთა მპოეს მე, და მცნებანი შენნი ზრახვა იყვნეს ჩემდა.

Verse: 144  Link to psa Link to sept   სიმართლით არიან განკითხვანი შენნი უკუნისამდე, გულისჴმა-მიყავ და ვცხოვნდე.



კოფ


Verse: 145  Link to psa Link to sept   ღაღად-ვყავ ყოვლითა გულითა ჩემითა; ისმინე ჩემი, უფალო, და სიმართლენი შენნი მოვიძინე.

Verse: 146  Link to psa Link to sept   ჴმა-ვყავ შენდამი, მიჴსენ მე, და დავიცუნე წამებანი შენნი.

Verse: 147  Link to psa Link to sept   აღვიმსთუე უჟამოსა და ჴმა-ვყავ, რამეთუ მე სიტყუათა შენთა ვესავ:

Verse: 148  Link to psa Link to sept   აღიმსთუეს თუალთა ჩემთა განთიად ზრახვად სიტყუათა მათ შენთა.

Verse: 149  Link to psa Link to sept   ჴმისა ჩემისა ისმინე, უფალო, წყალობითა შენითა და სამართლითა შენითა მაცხოვნე მე.

Verse: 150  Link to psa Link to sept   მიეახლნეს მდევარნი ჩემნი უსჯულოებასა, ხოლო შჯულსა შენსა განეშორნეს.

Verse: 151  Link to psa Link to sept   ახლოს ხარ შენ, უფალო, და ყოველნი გზანი შენნი ჭეშმარიტებით არიან.

Verse: 152  Link to psa Link to sept   დასაბამითგან ვცან წამებათაგან შენთა, რამეთუ უკუნისამდე დააფუძნენ შენ იგინი.



რეს


Verse: 153  Link to psa Link to sept   იხილე სიმდაბლე ჩემი და მიჴსენ მე, რამეთუ შჯული შენი მე არა დავივიწყე.

Verse: 154  Link to psa Link to sept   საჯე შჯა ჩემი და მიჴსენ მე და სიტყჳთა შენითა მაცხოვნე მე.

Verse: 155  Link to psa Link to sept   შორს არს ცოდვილთაგან ცხორებაჲ, რამეთუ სამართალნი შენნი გამოიძინეს.

Verse: 156  Link to psa Link to sept   წყალობანი შენნი მრავალ არიან, უფალო; სამართლითა შენითა მაცხოვნე მე.

Verse: 157  Link to psa Link to sept   მრავალ არიან მდევარნი ჩემნი და მაჭირვებელნი ჩემნი, და წამებათა შენთაგან არა გარდავაქციე.

Verse: 158  Link to psa Link to sept   ვიხილენ უგულისჴმონი და დავდნებოდე, რამეთუ სიტყუანი შენნი არა დაიმარხნეს.

Verse: 159  Link to psa Link to sept   იხილე, რამეთუ მცნებანი შენნი შევიყუარენ; უფალო, წყალობითა შენითა მაცხოვნე მე.

Verse: 160  Link to psa Link to sept   დასაბამი სიტყუათა მათ შენთა ჭეშმარიტებაჲ არს, და უკუნისამდე ყოველნი განკითხვანი სიმართლისა შენისანი.



სინ


Verse: 161  Link to psa Link to sept   მთავარნი მდევნიდეს მე ცუდად, და სიტყუათა შენთაგან შეეშინა გულსა ჩემსა,

Verse: 162  Link to psa Link to sept   ვიხარებდე მე სიტყუათა შენთა ზედა, ვითარცა ვინ პოვის ტყუჱ დიდძალი.

Verse: 163  Link to psa Link to sept   ცოდვა მოვიძულე და მოვიძაგე, ხოლო შჯული შენი შევიყუარე.

Verse: 164  Link to psa Link to sept   შჳდგზის დღესა შინა გაქებდი შენ განკითხვათათჳს სიმართლისა შენისათა.

Verse: 165  Link to psa Link to sept   მშჳდობაჲ მრავალ არს მათ თანა, რომელთა უყუარს შჯული შენი, და არა არს მათ თანა საცთურ.

Verse: 166  Link to psa Link to sept   ველოდე მე მაცხოვარებასა შენსა, უფალო, და მცნებანი შენნი შევიყუარენ.

Verse: 167  Link to psa Link to sept   დაიცვნა სულმან ჩემმან წამებანი შენნი და შეიყუარნა იგინი ფრიად.

Verse: 168  Link to psa Link to sept   დავიმარხენ მცნებანი შენნი და წამებანი შენნი, რამეთუ ყოველნი გზანი ჩემნი წინაშე შენსა არიან, უფალო.



თავ


Verse: 169  Link to psa Link to sept   მიეახლენ ლოცვა ჩემი წინაშე შენსა, უფალო, და სიტყჳთა შენითა გულისჴმა-მიყავ მე.

Verse: 170  Link to psa Link to sept   შევედინ შენ წინაშე ვედრებაჲ ჩემი, უფალო, და სიტყჳთა შენითა მიჴსენ მე.

Verse: 171  Link to psa Link to sept   აღმოთქუან ბაგეთა ჩემთა გალობაჲ შენი, რაჟამს მასწავლნე მე სიმართლენი შენნი.

Verse: 172  Link to psa Link to sept   თქუნეს ენამანცა ჩემმან სიტყუანი შენნი, რამეთუ ყოველნი მცნებანი შენნი სიმართლით არიან.

Verse: 173  Link to psa Link to sept   იყავნ ჴელი შენი მაცხოვრად ჩემდა, რამეთუ მცნებანი შენნი აღვირჩიენ.

Verse: 174  Link to psa Link to sept   მსუროდა მაცხოვარებაჲ შენი, უფალო, და სჯული შენი არს ზრახვა ჩემდა.

Verse: 175  Link to psa Link to sept   ცხონდეს სული ჩემი და გაქებდეს შენ, და სამართალნი შენნი შემეწიენ მე.

Verse: 176  Link to psa Link to sept   შევსცეთი მე, ვითარცა ცხოვარი წყმედული; მომიძიე მონა შენი, რამეთუ მცნებანი შენნი მე არა დავივიწყენ. დიდება



კანონი ი̂ჱ



Next part


This text is part of the TITUS edition of Biblia Mcxetica.

Copyright TITUS Project, Frankfurt a/M, 22.3.2021. No parts of this document may be republished in any form without prior permission by the copyright holder.