Page of ms. J: B37r და იყო შემდგომად ოც და ათისა წლისა, მეოთხესა თთუესა, ხუთსა თთჳსასა. და მე ვიყავ შორის წარტყუენულთა მათ მდინარესა მას ზედა ქობარისასა. და განეხუნეს ცანი, და ვიხილე ხილვაჲ ღმრთისაჲ.
მეხუთესა თთჳსასა, ესე იყო მეხუთჱ წელი ტყუეობისა მეფისა იოაკიმისი. და იყო სიტყუაჲ უფლისაჲ ეზეკიელისა მიმართ, ძისა ბუზისა, მღდელისა, ქუეყანასა ქალდეველთასა, მდინარესა ზედა ქობარისასა.
და იყო ჩემ ზედა ჴელი უფლისაჲ,
და ვიხილე, და აჰა ესერა სული აღმაღლებული მოვიდოდა ჩრდილოჲთ, და ღრუბელი დიდი მას შინა, და ნათელი გარემო მისსა, და ცეცხლი ელვარჱ.
და შორის მისსა ვითარცა ხილვაჲ ფერისა ილიკტრონისაჲ, რომელ იგი ოქროჲ და ვეცხლი და/ Page of ms. J: B37v რვალი ერთად შედნობილ არნ შორის ცეცხლსა მას, და ნათელი მას შინა,
და შორის მისსა ვითარცა მსგავსებაჲ ოთხთა ცხოველთაჲ. და ესე იყო ხილვაჲ მათი; მსგავსებაჲ კაცისაჲ მათ ზედა,
და ოთხნი პირნი იყვნეს ერთისანი, და ოთხნი ფრთენი ერთისანი, და წჳვნი მართლ, და ფრთოვან ფერჴნი მათნი, და ნაბერწყალნი გამოჰკრთებოდეს ვითარცა ელვარესა რვალსა, და თხელ ფრთენი მათნი.
და ჴელი კაცისაჲ ქუეშჱ კერძო ფრთეთა მათთა ოთხკერძოსავე მათსა. და პირები მათი ოთხთაჲვე.
არა გარე-შეიქცეოდა სლვასა მათსა; თითოეული მათი წინაშე პირსა თჳსსა ვიდოდა,
და მსგავსებაჲ პირებისა მათისაჲ, პირი კაცისაჲ, და პირი ლომისაჲ მარჯუენით ოთხთა მათ, და პირი ზუარაკისაჲ მარცხენით ოთხთა მათ, და პირი ორბისაჲ ოთხთა მათ თანა.
და ფრთენი მათნი განმარტებულ ზედა კერძო ოთხთავე მათ, და თითოეულსა ორორი შეუღლვილ ურთიერთას, და ორითა იფარვიდეს ზედა კერძო გუამთა მათ მათთა,
და ორკერძოვე წინაშე პირსა მათსა ვიდოდეს, ვიდრეცა ვალს სული იგი, ეგრევე იგინიცა მივიდიან, და არა გარე-შეიქციან.
და შორის ცხოველთა მათ ხილვაჲ, ვითარცა ნაკუერცხალთა ცეცხლისაჲ, აგზებულ,
ვითარცა პირი ლამპრებისა შეკრებულისაჲ შორის ცხოველთა მათ, და ნათელი ცეცხლისაჲ, და ცეცხლისა მისგან გამოვიდოდეს ელვანი.
და ვიხილე, და აჰა ესერა ეტლის-თუალი ერთი ქუეყანასა მახლობელად ცხოველთა მათ ოთხთა .
და ხილვაჲ მათ ეტლის-თუალთაჲ, ვითარცა ხილვაჲ თარშისაჲ, და მსგავსებაჲ შორის ოთხთაჲვე მათ ერთ, და ქმნულებაჲ მათი, და ხილვაჲ მათი სწორ, ვითარმცა იყო ეტლის-თუალი ეტლის-თუალსა შინა.
ოთხკერძოვე მათსა ვიდოდეს, და არა გარე-შეიქცეოდეს სლვასა მათსა.
და არცა ზურგნი მათნი მოიქციან, და სიმაღლჱ მათი იყო დიდ; და ვიხილენ იგინი და ზურგნი Page of ms. J: B58r მათნი/ სავსე იყვნენ თუალებითა გარემო ოთხთაჲვე.
და სლვასა მას ფხოველთასა ვიდოდეს ეტლის-თუალნიცა იგი მახლობელად მათსა; აღმაღლებასა მას ცხოველთასა ქუეყანით აღმაღლდიან ურმის-თუალნიცა იგი.
და სადაცა არნ ღრუბელი იგი, მუნცა სული იგი მივალნ; ვლენედ ცხოველნი იგი და ეტლის-თუალნი, და აღმაღლდიან მათ თანა, რამეთუ სული ცხოველი იყო ეტლის-თუალთა მათ შინა.
და სლვასა მას მათსა ვლენედ, და დგომასა მას მათსა დგანედ, და აღმაღლებასა მას მათსა ქუეყანით აღმაღლდიან მათ თანა, რამეთუ სული ცხოველი იყო ეტლის-თუალთა მათ შინა.
და მსგავსებაჲ ზედა კერძო თავსა მას ზედა ცხოველთასა ვითარცა სამყროჲ, ვითარცა ხილვაჲ ბროლისაჲ გარდამა<რ>ტებულ ფრთეთა მათთა ზედა კერძო.
და ქუეშჱ კერძო სამყაროსა მას ფრთენი მათნი განმარტებულ. ფრინვიდეს ერთი ერთისა თანა, თითოეული ორორი შეუღლვილი იფარვიდეს გუამებსა მას მათსა.
და მესმოდა ჴმაჲ ფრთეთა მათთაჲ სლვასა მას მათსა, ვითარცა სლვაჲ წყალთა მრავალთაჲ; ვითარცა ჴმაჲ სიმრავლისაჲ სლვასა მას მათსა, და ჴმაჲ სიტყუათა მათთაჲ ვითარცა ჴმაჲ ბანაკისა მრავლისაჲ. დადგომასა მას მათსა დასცხრიან ფრთენიცა მათნი.
და აჰა ესერა ჴმაჲ ზედა კერძო სამყაროსა მას, რომელ იყო ზედა კერძო თავსა მათსა.
ვითარცა ხილვაჲ ქვისა საფირონისაჲ, და მსგავსებაჲ საყდრისაჲ მას ზედა. და მსგავსებასა მას ზედა საყდრისასა, მსგავსებაჲ ხატისა კაცისაჲ და ზედა კერძო მას.
და ვიხილე ვითარცა ხილვაჲ ილიკტრონისაჲ, რმმელ არნ ოქროჲ და ვეცხლი და რვალი ერთად შედნოგილი, ეგრე იყო ბრწყინვალებაჲ ხილვითგან წელთაჲთ და აღმართ, და ხილვითგან წელთაჲთ დამართ ვიხილე ვითარცა ხილვაჲ ცეცხლისაჲ, და ნათელი მისი გარემო.
ვითარცა ხილვაჲ მშჳლდისაჲ, რომელი დგან ღრუბელთა შინა დღესა წჳმისასა, ესრე იყო ხილვაჲ/ Page of ms. J: B58v ბრწყინვალებისაჲ მის გარემო.;
