და მომაქცია მე გზასა მას ბჭისა მის წმიდათაჲსა გარეშჱსა, რომელი ჰხედავს მზის-აღმოსავალად; და იგი იყო დაჴშულ.
და მრქუა მე უფალმან; ბჭჱ ესე დაჴშულ იყოს, და არა განეღოს, და არცა გან-ვინ-ვიდეს მიერ, რამეთუ უფალი ღმერთი ისრაჱლისაჲ შევიდეს მიერ, და იყოს დაჴშულ.
რამეთუ წინამძღუარი ესე დაჯდეს მას შინა ჭამად პურისა წინაშე უფლისა. გზისა მისგან ელამავისა ბჭისა შევიდეს, და მისვე გზისაგან გამოვიდეს.
და შემიყვანა მე გზასა, რომელი ჰხედავს ჩრდილოდ კერძო, წინაშე ტაძარსა მას, და ვიხილე, და აჰა ესერა სავსე იყო დიდებითა უფლისაჲთა ტაძარი იგი უფლისაჲ. და დავვარდი პირსა ზედა ჩემსა.
და მრქუა მე უფალმან, ძეო კაცისაო, დააწესე გულსა შენსა, და იხილე თუალითა შენითა, და ყურითა შენითა ისმინე ყოველი ვე, რომელსა ვიტყჳ შენ თანა ყოვლისა მის-ებრ ბრძანებისა სახლისა უფლისაჲ<სა>, ყოვლისა-ებრ შჯულიერებისა მისისა, და დააწესო გულსა შენსა შესავალსა სახლისასა ყოვლისა მის-ებრ გამოსავალისა მისისა ყოველთა შორის წმიდათა.
და ჰრქუა სახლსა მას განმამწარებელსა, სახლსა ისრაჱლისასა, ამას იტყჳს უფალი უფალი; კმა იყავნ თქუენდა ყოველთაგან უშჯულოებათა თქუენთა, სახლო ისრაჱლისაო.
შემოყვანებაჲ ძეთა უცხოთესლთაჲ წინადაუცუეთელთაჲ გულითა და ჴორცითა, ყოფად სიწმიდეთა შინა ჩემთა, და შეაგინებდეს მათ შეწირვითა მით თქუენითა პურთა, ჴორცსა და სისხლსა, და გარდახჳდოდეთ შჯულსა ჩემსა ყოვლითა უშჯულოებითა თქუენითა.
და განაწესენ<ი>თ ცვად მცველნი სიწმიდეთა შინა ჩემთა.
ამისთჳს ამას იტყჳს უფალი ღმერთი ისრაჱლისაჲ, ყოველი ნაშობი უცხოთესლი წინადაუცუეთელი გულითა <და> წინადაუცუეთელი ჴორცითა არა შევიდეს სიწმიდესა ჩემსა, ყოველი ნაშობი უცხოთესლთაჲ, რომელნი არიან შორის სახლსა ისრაჱლისასა.
არამედ ლევიტელნი, Page of ms. J: B108v რომელნი/ შემომიდგეს მე ცთომასა მას ისრაჱლისასა ჩემგან, შედგომად ზრახვათა მათთა, და მიიხუნენ მათ სიცრუვენი მათნი.
და იყვნენ სიწმიდეთა შინა ჩემთა მსახურად <და> მეკარედ ბჭეთა სახლისა ჩემისათა, და ჰმსახურებდენ სახლსა მას ესენი, და დასწყუდიდენ ყოვლად-დასაწუ<ვ>ელთა და საკლველებსა ერისასა, და ესენი დგენ წინაშე ერისა მს<ა>ხურებად მათა;
ვითარცა იგი ჰმსახურებდეს მათ წინაშე კერპთა მათთა, და ექმნა სახლსა ისრაჱლისასა ტანჯვა სიცრუვის. ამისთჳს აღვიღე ჴელი ჩემი მათ ზედა, იტყჳს უფალი ღმერთი.
და არა მომეახლნენ მღდელობად ჩემდა, არცა შეწირვად სიწმიდესა ძეთა ისრაჱლისათასა, არცა წმიდასა წმიდათა ჩემთასა, და მოიღონ გინებაჲ მათი ცთომისათჳს, რომლითა შესცთეს.
და განაწესონ ცვად საცოსა სახლისასა ყოველსავე საქმესა მისსა, და ყოველსა რასაცა იქმოდიან.
მღდელნი ლევიტელნი იგი, ძენი სადუკისნი, რომელთა დაიცვეს საცოჲ იგი წმიდათა ჩემთაჲ, რაჟამს იგი შესცთა სახლი ისრაჱლისაჲ ჩემგან. ესენი მოვიდენ მსახურებად ჩემდა, და დადგენ წინაშე ჩემსა შეწირვად ჩემდამო მსხუერპლისა, ცმელისა და სისხლისა, იტყჳს უფალი ღმერთი.
ესენი შევიდოდიან სიწმიდეთა ჩემთა, და ესენი მოვიდოდიან ტაბლასა ჩემსა მსახურებასა ჩემსა, და დაცვად საცავთა ჩემთა.
და იყოს რაჟამს შევიდოდიან იგინი ბჭეთა ეზოჲსა მის შინაგანისათა, სამოსელი სელისაჲ შეიმოსოდიან, და არა შეიმოსმდიან მატყლისაჲ მსახურებასა მას ბჭითგან შინაგანისა ეზოჲსაჲთ.
და არმენაგი სელისაჲ ებუროს თავსა მათსა და ნიფხავი სელისაჲ ემოსოს წელთა მათთა, და ნუ შეიმოსედ მას იწროდ.
და გამოსლვასა მათსა ეზოსა მას გარეშესა ერისა მიმართ, განიძარცოდიან სამოსელი მათი, რომლითა ჰმსახურებდეს Page of ms. J: B109r <მათ>, და დადვოდიან იგი/ საჯდომელსა მას წმიდათასა, და შეიმოსოდიან სამოსელი სხუაჲ, და რაჲთა არა განწმიდონ ერი სამოსლითა მათითა.
თავი მათი არა დაიყჳნონ და თმაჲ მათი არა განიშიშულონ, დაბურვით დაიბუროდიან თავთა მათთა.
და ღჳნოსა ნუ სუამნ ყოველი მღდელი შესლვასა მას მათსა ეზოსა მას შინაგანსა.
და ქურივი და განტევებული არა მოიყვანონ თავისა თჳსისა ცოლად, არამედ ქალწული ნათესავისაგან ისრაჱლისა, უკუეთუ იყოს ქურივი იგი მღდელთაგანი, შეირთენ.
და ერსა ჩემსა ასწავებდედ შორის წმიდასა და შეგინებულსა, და შორის განრჩეულსა და ურჩეველსა აუწყებდედ მათ.
და საშჯელსა სისხლისასა ესენი დგენ განშჯად; სამართალნი ჩემნი განამართლნენ, და საშჯელსა ჩემსა შჯიდენ, და შჯულს<ა> ჩემსა და ბრძანებათა ჩემთა ყოველთა დღესასწაულთა ჩემთა იმარხვიდედ, და შაბათთა ჩემთა წმიდა ჰყოფდედ.
და სულსა ზედა კაცისა მკუდრისასა არა შევიდენ, რაჲთა არა შეიგინნენ, არამედ მამასა ზედა და დედასა და ძესა და ასულსა და ძმასა ზედა და დასა მისსა, რომელი არღა იყო ქმრისა, შევიდენ და შეიგინნენ.
და შემდგომად განწმედის<ა> მისისა შჳდნი დღენი აღირაცხნეს თავისა თჳსისა.
და რომელსა დღესა შევიდენ ეზოსა მას შინაგანსა მსახურებად სიწმიდესა შინა, და შესწირვიდენ სალხინებელსა, იტყჳს უფალი ღმერთი.
და არა იყოს მათა სამკჳდრებელად. მე ვიყო სამკჳდრებელ მათა. და ქუეყანაჲ არა ეცეს მათ ძეთა შორის ისრაჱლისათა; მე ქუეყანა სამკჳდრებელ მათა.
და შესაწირავთა და რომელი ცოდვისათჳს და უმეცრებისათჳს არნ მსხუერპლი, მას ესენი ჭამდენ, და ყოველი განჩემებული და აღნათქუემი ისრაჱლსა შორის მათა იყოს.
პირველი ნაყოფი ყოველთაჲ და პირმშოთაჲ და შესაწირავი Page of ms. J: B109v ყოველი პირველთა ნაყოფთა თქუენთაჲ/ მღდელთა <თჳს იყავნ>, და პირველი ნაყოფი თქუენი მიეცით მღდელსა, რაჲთა დაადგრეს კურთხევაჲ თქუენი სახლთა თქუენთა .
და ყოველი მკუდრისაჲ და ნამჴეცავი მფრინველთაგან და პირუტყუთა არა ჭამონ მღდელთა.;
