ლოცვაჲ ამბაკუმისი.
უფალო მესმა სმენაჲ შენი, და შემეშინა, უფალო; განვიცადენ საქმენა შენნი, Page of ms. J: A15v და დამიკჳრდა, შორის ორთა მათ ცხოველთასა;/ გამოსცხადნე, მოახლებასა წელთასა საცნაურ იყო; მოწევნასა ჟამთასა გამოშჩნდე, შეძრწუნებასა სულისა ჩემისასა, რისხვასა შინა, წყალობაჲ მოიჴსენო შენ.
ღმერთი თემანით მოვიდეს, და წმიდაჲ იგი მთისაგან ჩრდილოჲთ მაღნარით. განსუენებაჲ. დაფარნა ცანა შუენიერებამან მისმან, და ქებითა მისითა აღივსო ქუეყანაჲ.
და ბრწყინვალებაჲ მისი ვითარცა ნათელი იყოს, და რქანი ჴელთა შინა მისთა, და დადვა სიყუარული მტკიცჱ ძლიერებისა მისისაჲ.
წინაშე პირსა მისსა ვიდოდის სიტყუაჲ, და განვიდეს ველად კუალსა მისსა.
დადგა, და შეიძრა ქუეყანაჲ; მიხედა, და დადნას წარმართნა, შეიმუსრნეს მთანი სასტიკებითა მისითა; დადნას ბორცუნი საუკუნენი სლვანა საუკუნანი მისნი.
შრომის წილ ვიხილენ საყოფელნი ეთიოპელთანი; შეძრწუნდენ და კარვები ქუეყანისა მის მადიამისაჲ.
ნუ მდინარეთა ზედა განჰრისხნები უფალო, გინა მდინარეთა ზედა გულის-წყრომაჲ შენა, გინა ზღუასა ზედა სლვაჲ შენა, რამეთუ აჰჴედ შენ ცხენთა შენთა, და მჴედრობაჲ შენი ცხორება არს.
მორთხმით მოირთხამ მშჳლდსა შენსა თესლთა ზედა, იტყჳს უფალი. განსუენებაჲ. მდინარეთაჲ განსქდეს ქუეყანაჲ,
გიხილონ შენ, და ელმოდის ერთა, განაბნევდეს სლვასა წყალთასა; მოსცა უფსკრულმან ჴმაჲ თჳსი სიმაღლითა საკჳრველებათა მისთაჲთა.
ა<ღ>მაღლდა მზჱ, და მთოვარჱ დადგა წესსა ზედა თჳსსა, ისარნი შენნი ნათლად ვიდოდიან, და ბრწყინვალებად ელვისა საჭურველი შენი.
თქუმით Page of ms. J: A16r შეამცირო ქუეყანაჲ, და გულის/-წყრომით დასცნე წარმართნა.
გამოხუედ მაცხოვარად ერისა შენისა ცხორებად ცხებულთა შენთა; მოჰჴადე თავთა ზედა უშჯულოთასა სიკუდილი, აღადგინან საკრველნი ვიდრე ქედად მათამდე სრულიად.
შეჰმუსრენ განკჳრვებითა თავნი ძლიერთანი, შეიძრნენ მას შინა, აღახუნან ღაწუნი მათნი, ვითარცა ჭამნ რაჲ გლახაკი იდუმალ.
ივლინან ზღუასა ზედა ჰუნენი შენნა აღძრვად წყალთა მრავალთა.
დავიცევ და შემიძრწუნდა გული ჩემი ჴმისაგან ლოცვისა ბაგეთა ჩემთაჲსა, და შეედვა ზრზოლაჲ ძუალთა ჩემთა; და ჩემ თანა შემიძრწუნდა გუამი ჩემი; განაისუენო მე დღესა ჭირისა ჩემისასა აღსლვასა მას ჩემსა ერისა მის მწირობისა ჩემისასა.
რამეთუ ლეღუმან არა გამოიღოს ნაყოფი თჳსი, და ვენაჴისა გამონაღები არა იპოოს; ეცრუოს საქმჱ ზეთისაჲ, და ველთა არა ყონ საჭმელი. მოაკლდეს საჭმელთაგან ცხოვარნი, და ჴარნი არა არიან ბაგათა.
ხოლო მე უფლისა მიმართ ვიხარებდე, და მხიარულ ვიყო მე ღმრთისა მიმართ მაცხოვარისა ჩემისა.
უფალი ღმერთი ძალ ჩემდა, და დაადგინნას ფერჴნი ჩემნი სრულიად მაღალთა ზედა; აღმიყვანა მე ძლევად გალობითა მისითა.: .:
