ისმინეთ მღდელთა, და ერჩდით სახლი ეგე ისრაჱლისაჲ, და სახლმან ეფრემისმან ყურად-იღენ, რამეთუ თქუენდა მიმართ არს საშჯელი, საბრჴე ექმნენით სამსტუროსა, და ვითარცა მახჱ განმარტებული ოლეთა ზედა.
რომელი იგი მონადირეთა მათ ნადირისათა დაარწყჳან, ხოლო მე მსწავლელი თქუენი ვარ.
ვიცან ეფრემ, და ისრაჱლი არა შორს არს ჩემგან, რამეთუ აწ ისიძვა ეფრემ; და შეიბილწა ისრაჱლი,
არა მოსცნეს ზრახვანი მათნი ცნობად ღმრთისა მათისა, ხოლო სული სიძვისაჲ მათ შორის არს, და უფალი არა იცნეს.
და დამდაბლდეს გინებაჲ ისრაჱლისაჲ წინაშე პირსა მისსა, და ისრაჱლი და ეფრემ მოუძლურდენ სიცრუვითა მათითა, და მოუძლურდეს მათ თანა იუდა.
ცხოვართა თანა და ზროხათა ვიდოდიან გამოძიებად უფლისა, და არა პოვონ იგი; მიაქცია მათგან.
რამეთუ უფალი დაუტევეს, რამეთუ შვილნი უცხონი ეშვნას მათ. აწ შეჭამნეს იგინი ბუზმან, და ნაწილნიცა მათნი.
დაჰბეროთ ნესტუსა ბორცუთა ზედა, ოხრიდით მაღალთა ზედა; ქადაგებდით სახლსა ზედა ონისსა. განჰკრთა ბენიამენ.
ეფრემ განსარყუნელად შეიქმნა დღეთა Page of ms. O: 371r მხილებისათა;/ ტომთა შორის ისრაჱლისათა ვაჩუენო სარწმუნოებაჲ.
იქმნნეს მთავარნი იუდაჲსნი ვითარცა გარდამცვალებელნი საზღვრისანი, მათ ზედა მივჰფინო ვითარცა წყალი ზედა-მისლვაჲ ჩემი.
ჰმძლავრა ეფრემ მოსაჯულსა მისსა, და დათრგუნა სამართალი რამეთუ იწყო მისლვად და შედგომად ამაოთა.
და მე ვითარცა შეძრწუნებაჲ ეფრემისი, და ვითარცა საწერტელი სახლსა ზედა იუდაჲსსა.
მათ დღეთა იხილა ეფრემ სენი თჳსი, და იუდაჲ სალმობაჲ თჳსი; და წარვიდა ეფრემ ასურასტანელთა მათ, და მიუვლინნა მოციქულნი მეფესა იორამისასა, და მან ვერ უძლოს ჴსნად თქუენდა, და არა დასცხრეს თქუენგან სალმობაჲ.
რამეთუ მე ვარ ვითარცა ვეფხი სახლსა ზედა ეფრემისსა, და ვითარცა ლომი სახლსა იუდაჲსსა, წარვიდე და მოვიღო, და არა ვინ იყოს განმარინებელ.
წარვიდე და მოვიქცე ადგილსა ვე ჩემსა, ვიდრემდე განირყუნნენ და ეძიებდენ პირსა ჩემსა.:
