ჭირსა შინა მათსა და აღიმსთონ ჩემდა მომართ, და იტყოდიან, მოვედით და მოვიქცეთ უფლისა ღმრთისა ჩუენისა, რამეთუ მან მიყო, და განმკურნნას ჩუენ, მწყლნეს და მილხინოს ჩუენ.
განმაცხოველნეს შემდგომად ორისა დღისა, მესამესა დღესა აღვდგეთ, და ვცხონდეთ წინაშე მისსა.
და ვცნათ, და Page of ms. O: 371v ვსდევდეთ ცნობად უფალსა და ვითარცა ცისკარი,/ მზაჲ ვპოვოთ იგი, და მოგჳჴდეს ჩუენ ვითარცა წჳმაჲ მსთუაჲ და მცხუედი ქუეყანასა ზედა.
რაჲ გიყო შენ ეფრემ, ანუ რაჲ გიყო შენ იუდა, ხოლო წყალობაჲ თქუენი ვითარცა ღრუბელი განთიადისაჲ, და ვითარცა ცუარი ცისკრისაჲ წარმავალი.
ამისთჳს მოვმკენ წინაწარმეტყუელნი თქუენნი, და მოვწყჳდენ იგინი სიტყჳთა პირისა ჩემისაჲთა, და საშჯელი შენი ვითარცა ნათელი გამოვიდეს.
რამეთუ წყალობაჲ მნებავს და არა მსხუერპლი, და ცნობაჲ ღმრთისაჲ, ვიდრე ყოვლად-დასაწუველნი.
ხოლო იგინი არიან ვითარცა კაცი გარდამავალი შჯულისაჲ;
მუნ შეურაცხ-ვყო მე გალაად ქალაქი მოქმედი ამაოჲსაჲ, აღმარღუეველი წყლისაჲ.
და ძალი შენი კაცისა განმცდელისაჲ; დამალეს მღდელთა გზაჲ; მოსრეს სიკიმაჲ, რამეთუ უშჯულოებაჲ ქმნეს,
სახლსა ისრაჱლისასა ვიხილე მუნ შესაძრწუნებელი სიძვაჲ ეფრემისი, შეიგინა ისრაჱლი და იუდა.
იწყე სთულებად თავისა შენისა მოქცევასა ჩემსა ტყუესა ერისა ჩემისასა.:
