Page of ms. J: A34v ხილვაჲ რომელი იხილა ესაია ძემან ამოსისმან, რომელ იხი/ლა ჰურიასტანისათჳს და იჱრუსალემისათჳს, მეფობასა ოზიაჲსსა იოათამი<ს>სა აქაზისსა და ეზეკიაჲსსა, რომელნი მეფობდეს ჰურიასტანს,
ისმინე ცაო, და ყურად-იღე ქუეყანაო, რამეთუ უფალი იტყოდა: შვილ ვისხენ და აღვზარდენ, და მათ შეურაცხ-მყვეს მე.
იცნა ჴარმან მომგებელი თჳსი, და ვირმან ბაგაჲ უფლისა თჳსისაჲ, ხოლო ისრაჱლმან მე არა მიცნა, და ერმან ჩემმან მე არა გულის-ჴმა-მყო.
ვაჲ ნათესავსა ცოდვილსა: ერი რომელ სავსე არს ცოდვითა, ნათესავნი ბოროტნი ძენი უშჯულოებისანი. დაუტევეს უფალი და განარისხეს წმიდაჲ იგი ისრაჱლისაჲ.
რაჲსა და იწყლვით და შეიძინებთ უშჯულოებასა: ყოველი თავი სალმობად და ყოველი გუამი მწუხარებად.
ფერჴთაგან ვიდრე თავადმდე, არა არს მას შინა სიცოცხლჱ, არა წყლულ არცა ნაგუემ არცა ბრძჳრი განსივებულ. არა არს სალბუნი დასადებელ არცა ზეთი არცა შესახუეველ.
ქუეყანაჲ თქუენი ოჴერ არს, ქალაქნი თქუენნი ცეცხლით მომწუარ: საყოფელსა თქუენსა თქუენ წინაშე უცხონი შეშჭამდენ, და მოოჴრებულ არს და დაქცეულ ერისაგან უცხოთესლთაჲსა.
და დაშთეს ასული სიონისაჲ ვითარცა კარავი ვენაჴსა შინა, და ვითარცა ხილის-საცავი ნესოვანსა, და ვითარცა ქალაქი მოცვული.
და უკუეთუმცა არა უფალმან საბაოთ დაგჳტევა ჩუენ ნათესავი, ვითარცა სოდომელნიმცა შევიქმნენით, და გომორელთამცა მივემსგავსენით.
ისმინეთ სიტყუაჲ უფლისაჲ მთავართა სოდომისათა: ერჩდით შჯულსა ღმრთისასა ერი ეგე გომორისაჲ.
რაჲსათჳს ჩემდა სიმრავლჱ მსხუერპლთა თქუენთაჲ: იტყჳს უფალი, რამეთუ სავსე ვარ მე მრგულიად-მწუართაგან ვერძთა და ცმელითა კრავთაჲთა:/ Page of ms. J: A35r და სისხლი ზუარაკთაჲ და ვაცთაჲ არა მნებავს.
არცა მო-ღათუ-ხჳდეთ ჩემ წინაშე ჩუენებად: ვინ ეძიებდა ამას ჴელთაგან თქუენთა შემოსლვადვე ეზოსა ჩემსა.
არღარა შესძინოთ, უკუეთუ მომართუათ მე სამინდოჲ ამაო არს და საკუმეველი საძაგელ არს ჩემდა.
თთჳს-თავნი თქუენნი და შაბათნი და დღჱ იგი დიდი არა სათნო ვიყავ: მარხვაჲ და უქმებაჲ და დღესასწაულნი თქუენნი სძულან სულსა ჩემსა, რამეთუ მექმნენით მე სიმაძღრჱ, არღარა მიგიტევნე ცოდვანი თქუენნი.
რაჟამს განიპყრნეთ ჴელნი თქუენნი ჩემდამო, გარე-მოვაქციო პირი ჩემი თქუენგან, და თუ განამრავლეთ ვედრებანი თქუენნი, არა ვისმინო თქუენი, რამეთუ ჴელნი თქუენნი სავსე არიან სისხლითა.
განიბანენით, განიწმიდენით, განიშორეთ უკეთურებაჲ თქუენი სულთაგან თქუენთა წინაშე თუალთა ჩემთა: დასცხერით ბოროტთაგან თქუენთა.
ისწავეთ კეთილისა საქმჱ, გამოირჩიეთ სამართალი, იჴსნიდით დაწუნებულთა, უსაჯეთ ობოლსა და განამართლეთ ქურივი:
და მოვედით და შევიტყუნეთ, იტყჳს უფალი. და უკუეთუ იყვნენ ცოდვანი თქუენნი ვითარცა ღებილნი ვითარცა თოვლი განვასპეტაკო: დაღათუ იყვნენ ვითარცა მეწამულნი ვითარცა მატყლი განვასპეტაკო.
და უკუეთუ გინდეს და ისმინოთ ჩემი კეთილსა ქუეყანისასა შჭამდეთ.
უკუეთუ არა ინებოთ, და არცა ისმინოთ ჩემი, მახჳლმან შეგჭამნეს თქუენ, რამეთუ პირი უფლისაჲ იტყოდა ამას.
ვითარ იქმნა მეძავ სიონი ქალაქი სარწმუნოჲ, სავსჱ სამართალითა, Page of ms. J: A36r რომელსა შინა სიმართლემან განისუენა მუნ./ ხოლო აწ აღივსო კაცის-კლვითა.
ვეცხლი თქუენი მრღუე არს, ღჳნის-მოფარდულნი თქუენნი განზავებენ ღჳნოსა წყლითა.
მთავარნი შენნი ურჩ არიან და ზიარ მპარავთა: უყუარს ქრთამი, შეუდგან შურის-ღებასა: ობოლსა არა უშჯიან, და სამართალსა ქურივთასა არა მიხედიან.
ამისთჳს ამას იტყჳს უფალი ღმერთი საბაოთ ძლიერი ისრჲლისაჲ [!?!], რამეთუ არა დასცხრეს გულის-წყრომაჲ ჩემი წინა-აღმდგომთა ზედა, და საშჯელი ვყო მტერთა ჩემთაჲ.
და მივყო ჴელი ჩემი შენ ზედა, და გამოგაჴურვო შენ წმიდად, ხოლო ურჩნი იგი წარუწყმიდნე, და მოვსპნე ყოველნი უშჯულოებანი შენგან, და ყოველნი ამპარტავანნი დავამდაბლნე.
და დავადგინნე მსაჯულნი შენნი ვითარცა პირველ, და მზრახვალნი შენნი ვითარცა დასაბამსა. და ამისა შემდგომად გეწოდოს შენ ქალაქი სიმართლისაჲ, დედაქალაქი სარწმუნოჲ სიონი.
რამეთუ სამართ<ა>ლითა განერეს ტყუჱ მისი, და მოწყალებით.
და შეიმუსრნენ უშჯულონი და ცოდვილნი ერთად, და რომელთა დაუტევეს უფალი მოისრნან,
რამეთუ ჰრცხუენეს კერპთა მათთა ზედა, რომელთაჲ იგი მათ ინებეს, და ჰრცხუენეს გამოქანდაკებულთა მათთა ზედა, რომელი მათ ქმნნეს. და ჰრცხუენოდის მტილებსა მათსა ზედა: რომელთათჳს გული უთქუმიდა.
რამეთუ იყვნენ [!] იგინი ვითარცა ბელეკონნი ფურცელ-დაყრილნი, და ვითარცა სამოთხე რომელსა არა აქუნ წყალი.
და იყოს ძალი მათი ვითარცა ნაძეძი სელისაჲ, და საქმენი მათნი ვითარცა ნაბერწყალნი ცეცხლისანი, და დაიწუნენ უშჯულონი და ცოდვილნი ერთად, და არა ვინ იყოს დამშრეტელ.
