და იყო სიტყუაჲ უფლისაჲ იონაჲსა მიმართ მეორედ, და ჰრქუა;
აღდეგ და წარვედ შენ ნინევედ ქალაქსა მას დიდსა, და ქადაგებდ მას შინა ქადაგებისა მის-ებრ პირველისა, რომელსა მე გეტყოდე შენ.
და აღდგა იონა და წარვიდა ნინევდ ვითარცა იგი ეტყოდა მას უფალი. ხოლო ნინევი იყო ქალაქი დიდი ღმრთისაჲ ვითარმედ სავალი იყო იგი სამისა დღისა გზა.
და იწყო იონა შესლვად ქალაქად ვითარ დღისა ერთისა ოდენ გზა, და იწყო ქადაგებად და თქუა; სამ და დღჱ და ნინევი დაქცევად არს.
და ჰრწმენა კაცთა მათ ნინევისათა ღმერთი, და ქადაგეს მარხვაჲ და შეიმოსეს ძაძაჲ მცირითგან ვიდრე დიდადმდე მათა.
და მიიწია სიტყუაჲ ესე მეფისა მის ნინეველთაჲსა, და აღდგა საყდრისაგან თჳსისა, და განიძარცუა სამოსელი მისი მისგან, და შეიმოსა ძაძაჲ, და დაჯდა იგი ნაცარსა ზედა.
და იქადაგა და ითქუა ნინევს შინა მეფისა მიერ და მთავართა მისთა მიერ, და თქუეს; კაცნი და საცხოვარნი, ზროხაჲ და ცხოვარი, Page of ms. J: A3v ნუ რას გემოსა იხილვედ, ნუცა ძოვედ ნუცა წყალსა/ სუმედ.
და ძაძაჲ შეიმოსეს კაცთა და საცხოვართა, და ღაღად-ყვეს ღმრთისა მიმართ ერთბამად, და მოაქცია კაცად-კაცადმან გზისაგან თჳსისა ბოროტისა, და სიცრუვისაგან ჴელთა მათთაჲსა, და იტყოდეს;
ვინ უწყის, შეინანოს ღმერთმან, და მოაქციოს რისხვისაგან გულის-წყრომისა მისისა, და არა წარვ<წ>ყმდეთ.
და იხილნა ღმერთმან საქმენი მათნი, რამეთუ მოიქცეს საქმეთა მათთაგან ბოროტთა, და შეინანა ღმერთმან ბოროტის-ყოფისათჳს, რომელსა იტყოდა ყოფად მათთჳს, და არა ყო.:
