Page of ms. J: A10v სიტყუაჲ ნინევისათჳს, წიგნი ხილვისაჲ ნაუმისი ელკესელისაჲ.
ღმერთი მოშურნეა და შურის-მგებელი უფალი გულის-წყრომით, შური იძიოს უფალმან მტერთა მისთაჲ, და აღიხუნეს მან მტერნი მისნი.
უფალი სულ-გრძელ, Page of ms. J: A11r და დიდ არს ძალი მისი,/ და უბრალოებით არა უბრალო ყვის უფალმან; აღსრულებით და ძრვით გზაჲ მისი, და ღრუბელი მტუერისაჲ ფერჴთა მისთა.
უთქუმიდეს ზღუასა, და განაჴმოს იგი, და ყოველნი მდინარენი მოაოჴრნეს, შემცირდა ბასაანელი იგი და კარმელი, და ყუავილოანნი ლიბანისანი მოაკლდენ.
მთანი შეიძრნეს მისგან, და ბორცუნი შეირყინეს, და შეიპყრა ქუეყანაჲ ყოველი პირისაგან მისისა, და ყოველნი დამკჳდრებულნი მას ზედა.
პირისაგან რისხვისა მისისა ვინ მე დაუდგეს, ანუ ვინ წინა-აღუდგეს რისხვასა გულის-წყრომისა მისისასა. გულის-წყრომაჲ მისი დაადნობს მთათა და კლდენი შეიმუსრნეს მისგან.
ტკბილ არს უფალი მოთმინეთა მისთათჳს ჟამსა ჭირისასა, და იცვნის მოშიშნი მისნი.
და წყლით-რღუნითა სლვისა მისისაჲთა აღსასრული ყოს, და რომელნი აღდგომილ იყვნენ; და მტერთა მისთა სდევნიდეს ბნელი.
რასა ჰგონებთ უფლისა მიმართ, აღსასრული მან ყოს, და არა შური იძიის ერთბამად ორგზის ჭირსა შინა.
რამეთუ ვიდრე საფუძველადმდე მისა მოოჴრდეს, და ვითარცა ბრწამლ<ი> მოხუეული შეიჭამოს, და ვითარცა ლერწმოანი სიჴმელითა სავსჱ.
რომლისაგან გამოვიდის გულის-სიტყუაჲ უფლისათჳს, ბოროტსა ზრახვიდა წინა-აღ<მ>დგომსა.
ამას იტყჳს უფალი, რომელი ჰმთავრობს წყალთა მრავალთა, და ესრეთ გამოერჩინენ, და ჰამბავი შენი არა ისმეს მერმე. Page of ms. J: A11v
და აწ შევმუსრო კუერთხი მისი შენგან,/ და საკრველნი შენნი განვხეთქნე.
და ამცნოს შენთჳს უფალმან, არა ითესოს სახელითა შენითა მერმე; სახლისაგან ღმრთისა შენისა მოვსპო კერპები, და გამოდნობილნი დავდვა საფლავი შენი, რამეთუ მწრაფლ არს.
აჰა ესერა მთათა ზედა ფერჴნი მახარებელისანი, და რომელი აღუთქუამს მშჳდობასა; დღესასწაულობდ იუდა დღესასწაულთა შენთა; მისცენ ლოცვანი შენნი, რამეთუ არღარა შესძინონ მერმე განსლვად და საძუელებელად.:
