Page of ms. P: 187r ...ვაჲ სულისა მათისათჳს, რამეთუ ზრახეს ზრახვაჲ ბოროტი,
და თქუეს: შევკრათ მართალი იგი, რამეთუ განმაძნელებელ ჩუენდა არს. აწ უკუე ნაყოფსა საქმეთა მათთასა ჭამდენ.
ვაჲ ურჩულოსა მას, რამეთუ ბოროტი შეემთხჳოს მას საქმეთა მათთაჲ.
ერო ჩემო, ხარკის მომჴდელნი თქუენნი მოგკუფხლვიდენ თქუენ და, რომელნი მიგჴდიან, იგინივე უფლებდენ თქუენ ზედა; ერო ჩემო, რომელნი გნატრიან თქუენ, იგინივე გაცთუნებენ და კუალსა ფერჴთა თქუენთასა შეგირყევენ.
და აწ დადგეს სასჯელად უფალი და წარმოგიდგინოს სასჯელად ერი თჳსი.
რაჲსათჳს მოსწჳთ ვენაჴი ჩემი, და ნატაცები გლახაკთაჲ არს სახლთა შინა თქუენთა?
თქუენ რაჲსათჳს ავნებთ ერსა ჩემსა და პირსა გლახაკთასა არცხუენთ? ამას იტყჳს უფალი ძალთაჲ.
