Page of ms. P: 360V არა მნებავს უმეცრებაჲ თქუენი, ძმანო, რამეთუ მამანი ჩუენნი ყოველნი ღრუბელსა ქუეშჱ იყვნეს და ყოველნი ზღუასა მას განჴდეს.
და ყოველთა მოსჱს მიერ ნათელ-იღეს ღრუბლითა და ზღჳთა;
და ყოველთა იგივე საზრდელი სულიერი ჭამეს;
და ყოველთა იგივე სასუმელი სუეს; რამეთუ სუმიდის იგინი სულიერისა მისგან კლდისა, რომელსაცა შეუდგეს: ხოლო კლდჱ იგი იყო ქრისტე.
Page of ms. P: _ Page of ms. L: 602V აწ უკუე, საყუარელნო ჩემნო, ევლტოდეთ კერპთმსახურებასა.
გარნა ბრძენთა გეტყუი: ცანთ, რომელსა-ესე ვიტყუი:
სასუმელი ცხორებისაჲ, რომელ ვაკურთხით, არამე ზიარებაჲ სისხლთა ქრისტესთაჲ არსა? პურსა მას, რომელსა განუტეხთ, არამე ზიარებაჲ ჴორცთა ქრისტეთაჲ არსა?
ხოლო ერთ პურ და ერთ ჴორც ჩუენ ყოველნი ვართ, რამეთუ ყოველთა ერთისა მისგან პურისა მოგუაქუს.
იხილეთღა ისრაჱლი ჴორციელად: ანუ არა რომელნი-იგი ჭამენ შესაწირავთა მათ, ზიარ საკურთხეველისა მის Page of ms. L: 603R არიან?
რაჲმე უკუე არს.
რასა-იგი უგებენ წარმართნი, ეშმაკთა უგებენ და არა ღმერთსა; ხოლო მე არა მნებავს თქუენი ეშმაკთა ზიარებაჲ.
ვერ ჴელ-ეწიფების სასუმელი უფლისაჲ სუმად და სასუმელი ეშმაკისაჲ; ვერ ჴელ-ეწიფების ტაბლისაგან უფლისა ჭამად და ტაბლისაგან ეშმაკთაჲსა.
ანუ ვაშურვოთმე რაჲ უფალსა? ნუუკუე უძლიერეს მისა ვართ?
ყოველივე ჯერ-არს, არამედ არა ყოველი აღსაშენებელ არს.
ნუვინ თავისასა ხოლო ეძიებნ, არამედ მოყუსისაცა.
ყოველი, რომელი სამზარეულოსა ისყიდებოდის, ჭამეთ, ნურას განიკითხავთ იჭუისათუის,
რამეთუ უფლისაჲ არს ქუეყანაჲ და სავსებაჲ მისი.
უკუეთუ ვინმე გხადოდის თქუენ ურწმუნოთაგანი და გინდეს მისლვის, ყოველი Page of ms. L: 602V წინადაგებული თქუენი ჭამეთ და ნურას განიკითხავთ იჭუისათუის.
უკუეთუ ვინმე გითხრას თქუენ, ვითარმედ ნაკერპალი არს, _ ნუ შჭამთ მის მაუწყებელისათჳს [და იჭუისა].
და იჭუსა მას ვიტყუი არა თავისა ჩემისასა, არამედ მოყუსისასა; რაჲსათჳს აზნაურებაჲ ჩემი განიკითხვის სხუისაგან იჭუისა?
უკუეთუ მე მადლობით ვჭამ, რაჲსთჳს ვიგმობი, რომლისათუის-იგი მე ვჰმადლობ?
გინა თუ შჭამდეთ, გინა თუ სუმიდეთ და გინა რას იქმოდით, ყოველსავე სადიდებელად ღმრთისა იქმოდეთ.
დაუბრკოლებელ იყვენით ჰურიათა მიმართ და წარმართთა და ეკლესიათა მიმართ ღმრთისასა.
ვითარცა მე ყოველითავე ყოველთათუის სათნო ვარ, რამეთუ არა ვეძიებ თავისა ჩემისა უმჯობესსა, არამედ მრავალთასა, რაჲთა ცხონდენ.
