Page of ms. P: 236V და აღსრულებასა დღისა მის მეერგასისასა იყვნეს ყოველნი ერთბამად შეკრებულ.
და იყო მეყსეულად ზეცით ოხრაჲ, ვითარცა მოწევნაჲ ქარისა სასტიკისაჲ, და აღივსო ყოველი იგი სახლი, სადა-იგი სხდეს.
და ეჩუენნეს მათ განყოფანი ენათანი, ვითარცა ცეცხლისანი, და დაადგრა თითოეულსა კაცად-კაცადსა.
და აღივსნეს ყოველნი სულითა წმიდითა, და იწყეს სიტყუად უცხოთა ენათა, ვითარცა სული იგი მოსცემდა მათ.
იყვნეს იერუსალჱმს დამკჳდრებულნი კაცნი ღმრთისმოშიშნი ყოველთაგან თესლთა, რომელნი არიან ცასა ქუეშე.
ვითარცა იყო ჴმაჲ ესე, შეკრბა სიმრავლჱ ერისაჲ და შეშფოთნა, რამეთუ ესმოდა თითოეულსა კაცად-კაცადსა მათსა თჳსი სიტყუაჲ, იტყოდეს რაჲ იგინი.
განჰკრთეს ყოველნი და იტყოდეს ურთიერთას: ანუ არა, აჰა, ესერა, ესე ყოველნი არიან გალილეველ?
და ვითარ ჩუენ გუესმის კაცად-კაცადსა სიტყუაჲ თჳსი, რომელნი-ესე ვართ,
მარნი და არშაკნი და ელამიტელნი და მკჳდრნი შუამდინარისანი, ჰურიასტანისანი და კაბადუკიისანი,
ფრეგჳაჲსანი და პანფილიაჲთ, ეგჳპტით და ლუბიით კერძონი, კჳრინით კერძო და მოსრულნი ჰრომნი, ჰურიანი [და] მწირნი,
კრეტელნი და არაბიელნი, გუესმის სიტყუაჲ მათი ენითა ჩუენითა სიმდიდრჱ ესე ღმრთისაჲ?
განუკჳრდებოდა ყოველთა ერთიერთისა თანა და იტყოდეს: რაჲმე ჰნებავს ამათ ყოფაჲ?
ხოლო სხუანი ეკიცხევდეს, ვითარმედ: ტკბილთაგან სავსე არს კაცები ესე და რაჲცა ჰნებავს, მასცა იტყჳან.
დადგა პეტრე ათერთმეტთა მათ თანა, აღიმაღლა ჴმაჲ თჳსი და ეტყოდა მათ: კაცნო ჰურიანო და ყოველნი, რომელნი დამკჳდრებულ ხართ იერუსალჱმს! ესე ცხად იყავნ თქუენდა და ყურად-იხუენით სიტყუანი ჩემნი;
რამეთუ არა ვითარ თქუენ ჰგონებთ, ვითარმედ ამათ სთრავს, რამეთუ არს ჟამი დღისაჲ ამის მესამჱ,
არამედ ესე იგი არს თქუმული იოველ წინაწარმეტყუელისაჲ:
და იყოს, ამისა შემდგომად, იტყჳს უფალი, მივჰფინო სულისაგან ჩემისა ყოველსა ზედა ჴორციელსა, და წინაწარმეტყუელებდენ ძენი თქუენნი და ასულნი თქუენნი; და ჭაბუკნი თქუენნი ხილვასა იხილვიდენ: და მოხუცებულთა თქუენთა ჩუენებით განვეცხადო;
და მონათა ჩემთა ზედა და მჴევალთა ჩემთა მათ დღეთა მივჰფინო სულისაგან ჩემისა და წინაწარმეტყუელებდენ.
და ვსცე ნიშებ ცათა შინა და სასწაულ ქუეყანასა ზედა, სისხლი და ცეცხლი და არმური კუამლისაჲ.
მზჱ გარდიქცეს ბნელად და მთოარჱ -- სისხლად პირველ მოსლვადმდე დღისა მის დიდისა და განჩინებულისა.
და იყოს, ყოველმან რომელმან ხადოს სახელსა უფლისასა, ცხონდეს.
Page of ms. P: _ Page of ms. L: 342V კაცნო ისრაიტელნო! ისმინეთ სიტყუანი ესე: იესუ ნაზარეველი, კაცი განჩინებული ღმრთისა მიერ თქუენდა მიმართ ძალითა და ნიშებითა და სასწაულებითა, რომელი-იგი ქმნა ღმერთმან მის მიერ შორის თქუენსა, ვითარცა-იგი უწყით,
ესე, განჩინებულითა ზრახვითა, წინაჲსწარ ცნობითა Page of ms. L: 343R ღმრთისაჲთა [და] განცემითა, ჴელითა უშჯულოთაჲთა შემშჭუალეთ და მოჰკალით,
რომელი ღმერთმან აღადგინა და დასცნა სალმობანი სიკუდილისანი, რამეთუ ვერ შესაძლებელ იყო დაყენებაჲ მისი მის მიერ.
რამეთუ დავით იტყუის მისთჳს: წინაჲსწარ ვხედავ უფალსა, წინაშე ჩემსა არს მარადის, რამეთუ მარჯულ ჩემსა [არს], რაჲთა არა შევიძრა მე.
ამისთჳს განიხარა გულმან ჩემმან და იხარებდა ენაჲ ჩემი; უფროის ჴორცთაცა ჩემთა დაიმკუიდრონ სასოებით.
რამეთუ არა [შენ] დაუტეო სული ჩემი ჯოჯოხეთს შინა, არცა სცე წმიდასა შენსა ხილვად განსახრწნელი.
მაუწყენ მე, უფალო, გზანი შენნი ცხორებისანი და აღმავსენ ჩუენ სიხარულითა პირისა შენისაჲთა. Page of ms. L: 344V
კაცნო ძმანო, ჯერ-არს თქუმად განცხადებულად თქუენდა მომართ მამათმთავრისა დავითისთუის, რამეთუ აღესრულა და დაეფლა, და საფლავი მისი არს ჩუენ შორის ვიდრე დღენდელად დღემდე.
წინაჲსწარმეტყუელი ...
Page of ms. L: 346R სიტყუაჲ იგი მისი და ნათელ-იღეს მას დღესა შინა ვითარ სამ ათას ოდენ.
და იყვნეს განკრძალულ მოძღურებასა მოციქულთასა და ზიარებასა და კურთხევასა პურისასა, ლოცვასა.
იყო ყოველსა მას სულსა შიში; მრავალი ნიშები და სასწაულები მოციქულთა მიერ იქმნებოდა იერუსალჱმს.
ყოველნივე მორწმუნენი იყვნეს ერთბამად და აქუნდა ყოველივე ზოგად.
დაბნებსა და მონაგებსა ...
აკურთხევდეს სახლმდაბრ პურსა და მიიღებდეს საზრდელსა მხიარულითა [და განმარტებულითა] გულითა.
აქებდეს ღმერთსა და აქუნდა მადლი ყოვლისა მიმართ ერისა. ხოლო უფალი შესძინებდა ცხორებულთა მათ უფროის დღითი-დღე[დ] ეკლესიათა.
