ხოლო იესუ უწინარჱ ექუსისა დღისა ვნებისა მის მოვიდა ბეთანიად, სადა-იგი იყო ლაზარე მომკუდარი, რომელი-იგი აღადგინა მკუდრეთით.
და დაუმზადეს მას სერი, ხოლო მსახურებდა მას მართა, და ლაზარე იყო ერთი მეინაჴეთა მისთაგანი.
ხოლო მარიამ მოიღო ლიტრა[ჲ] ერთი ნელსაცხებელი ნარდისა სარწმუნოჲსაჲ მრავალ-სასყიდლისაჲ და სცხო ფერჴთა იესუჲსთა და თმითა თჳსითა წარჰჴოცნა ფერჴნი მისნი, და სახლი იგი ყოველი აღივსო სულნელებითა მის ნელსაცხებელისაჲთა.
თქუა ვინმე ერთმან მოწაფეთა მისთაგანმან, იუდა სიმონისმან, ისკარი[ოტელმან], Page of ms. P: 156V რომელსა ეგულებოდა მიცემაჲ მისი:
რაჲსათჳს არა განიყიდა ნელსაცხებელი ესე სამასის დრაჰკნის და მიეცა გლახაკთა?
ხოლო ესე მისთჳს თქუა, არა თუ გლახაკთაჲ რაჲმე ზრუნვაჲ ედვა მას, არამედ რამეთუ მპარავი იყო, და გადრუცი მას აქუნდა, და შთასადებელი ეკიდა მას.
და თქუა იესუ: უტევეთ მაგას, რაჲთა დღედ საფლავად ჩემდა დაიმარხოს.
რამეთუ გლახაკნი მარადის თუქენ თანა არიან, ხოლო მე არა მარადის თქუენ თანა ვარ.
გულისხმა-ყო ყოველმან ერმან ჰურიათამან, რამეთუ იესუ მუნ არს, და მოვიდეს არა ხოლო იესუჲსთჳს, არამედ რაჲთა ლაზარეცა იხილონ, რომელი-იგი აღადგინა მკუდრეთით.
ზრახვა-ყვეს მღდელთ-მოძღუართა მათ, რაჲთა ლაზარეცა მოკლან.
რამეთუ მრავალნი ჰურიათაგანნი მოვიდოდეს და ჰრწმენ მათ იესუჲსი.
Page of ms. P: 156V ხვალისაგან ერი მრავალი რომელი მოსრულ იყო დღესასწაულსა მას, რამეთუ ესმა, ვითარმედ იესუ მოვალს იერუსალჱმდ,
აღიღეს რტოჲ დანაკის-კუდისაჲ და განვიდეს მიგებებად მისა, ღაღადებდეს და იტყოდეს: ჵსანა! კურთხეულ არს მომავალი სახელითა უფლისაჲთა, მეუფჱ ისრაჱლისაჲ!
და მოჰგუარეს ვირი და დაჯდა მას ზედა, ვითარცა წერილ არს:
ნუ გეშინინ, ასულო სიონისაო! აჰა ესერა მეუფჱ შენი მომავალს შენდა და ზე-ზის იგი კიცუსა ვირსა.
ესე არა ეცნა მოწაფეთა Page of ms. P: 157R მისთა პირველად, არამედ ოდესცა იდიდა იესუ, მოეჴსენა, რამეთუ ესე იყო მისთჳს წერილ, და ესე უყვეს მას.
და ერი იგი, რომელი იყო მის თანა, ეწამებოდა მას, რამეთუ ლაზარეს უწოდა საფლავით და აღადგინა იგი მკუდრეთით.
ამისთჳს მიეგებვოდა მას ერი იგი, რამეთუ ესმინა ვითარმედ ესე სასწაულ ქმნა.
ხოლო ფარისეველთა მათ ჰრქუეს: ხედავთა, რამეთუ არას ირგებთ არარას? აჰა ესერა ყოველი სოფელი მივიდა შემდგომად მისა.
იყვნეს ვინმე წარმართნიცა მოსრულთა მათგანნი, რაჲთა თაყუანის-სცენ დღესასწაულსა მას.
ესენი მოვიდეს ფილიპჱსა, რომელი იყო ბეთსაიდაჲთ გალილეაჲსაჲთ, ჰკითხვიდეს და ეტყოდეს: უფალო, გჳნებს იესუჲსი ხილვაჲ.
მოვიდა ფილიპე და ჰრქუა ანდრეას; და მოვიდეს ანდრეა და ფილიპე და ჰრქუეს იესუს.
Page of ms. P: _ Page of ms. K: 118R ხოლო იესუ მიუგო და ჰრქუა მათ: მოიწია ჟამი, რაჲთა იდიდოს ძჱ კაცისაჲ.
Page of ms. K: _ Page of ms. P: 367V ამენ, ამენ გეტყჳ თქუენ: უკუეთუ მარცუალი იფქლისაჲ დავარდეს ქუეყანასა და არა მოკუდეს, იგი ხოლო ეგოს; უკუეთუ მოკუდეს, მრავალი ნაყოფი გამოიღოს.
რომელსა უყუარდეს თავი თჳსი, განუტეოს იგი. და რომელსა სძულდეს თავი თჳსი ამას სოფელსა, ცხოვრებად საუკუნოდ დაიმარხოს იგი.
უკუეთუ ვინმე მსახურებდეს, მე შემომიდეგინ; და სადაცა მე ვიყო, მუნცა მსახური ჩემი იყოს. უკუეთუ ვინმე მსახურებდეს, პატივ-სცეს მამამან ჩემმან ზეცათამან.
აწ სული ჩემი შეძრწუნებულ არს და რაჲმე ვთქუა? მამაო, მიჴსენ მე ამის ჟამისაგან. არამედ ამისთჳს მოვედ ჟამსა ამას.
მამაო, ადიდე სახელი შენი. მოიწია ჴმაჲ ზეცით: გადიდე და კუალად გადიდო.
ხოლო ერი იგი დგა და ესმა, იტყოდეს: ქუხილი არს; ხოლო სხუანი იტყოდეს: ანგელოზი ეტყოდა მას.
მიუგო იესუ და ჰრქუა: არა ჩემთჱს იყო ჴმაჲ ეგე, არამედ თქუენთჳს.
აწ სარჩელი არს ამის სოფლისაჲ, აწ მთავარი იგი ამის სოფლისაჲ გარდამოვარდეს ქუე.
და მე ავმაღლდე ზე, ყოველნი ჩემდა მოვიზიდნე.
ხოლო ამას იტყოდა და აუწყებდა, რომლითა Page of ms. P: 377R სიკუდილითა ეგულებოდა სიკუდილი.
მიუგო ერმან მან: ჩუენ გუასმიეს შჯულისაგან, ვითარმედ ქრისტე უკუნისადმდე ეგოს, და შენ ვითარ იტყჳ, რამეთუ ჯერ-არს ამაღლებაჲ ძისა კაცისაჲ ვინ? არს ესე ძჱ კაცისაჲ?
ჰრქუა მათ იესუ: მცირედ ჟამ ნათელი თქუენ თანა არს. ვიდოდეთ, ვიდრე ნათელი გაქუს, რაჲთა არა გეწიოს თქუენ ბნელი, რამეთუ რომელი ვალნ ბნელსა, არა იცინ, ვიდრე ვალნ.
ვიდრემდე ნათელი გაქუს, გრწმენინ ნათელი, რაჲთა ძე ნათლის იყვნეთ. ამას ეტყოდა იესუ და დაეფარა მათგან.
და ესოდენი სასწაული ქმნა წინაშე მათსა, და არა ჰრწმენა მათ მისა მიმართ.
რაჲთა აღესრულოს სიტყუაჲ იგი ესაია წინაწარმეტყუელისაჲ, რომელსა იტყჳს: უფალო, ვის-მე ჰრწმენა სასმენელი ჩუენი? და მკლავი უფლისაჲ ვის გამოეცხადა?
ამისთჳს ვერ უძლო რწმუნებად, რამეთუ კუალად თქუა ესაია:
დაუბნელდენ თუალნი მათნი და დაუსულბენ გულნი მათნი, რაჲთა ვერ იხილონ თუალითა და არცა გულისხმა-ყონ გულითა და მოიქცენ, და მე განვკურნე იგინი.
ესე თქუა ესაია, ოდეს იხილა დიდებაჲ მისი და იტყოდა მისთჳს.
Page of ms. P: _ Page of ms. L: 442R ხოლო მთავართაცა მრა\ვალთა Page of ms. L: 442V ჰრწმენა მისი მიმართ, და ფარისეველთათუის ვერ აღიარეს, რაჲთა არა კრებულისაგან განასხნენ.
რამეთუ შეიყუარეს დიდებაჲ კაცთაჲ უფროის, ვიდრე დიდებაჲ ღმრთისაჲ.
Page of ms. L: _ Page of ms. P: 208R ხოლო იესუ ღაღად-ყო და თქუა: რომელსა მე ვჰრწმენე, არა მე ვჰრწმენე, არამედ მომავლინებელი ჩემი.
და რომელმან მიხილა მე, იხილა მომავლინებელი ჩემი.
მე ნათელი მოვივლინე სოფლად, რაჲთა ყოველსა რომელსა ჰრწმენეს ჩემი, არა დაადგრეს ბნელსა შინა.
და რომელმან ისმინნეს სიტყუანი ჩემნი და [არა] დაიმარხნეს, არა ვსაჯო იგი, რამეთუ არა მოვედ დასჯად სოფლისა, არამედ რაჲთა ვაცხოვნო სოფელი.
რომელმან შეურაცხ-მყოს მე და არა შეიწყნარნეს სიტყუანი ჩემნი, აქუნდეს მსაჯული თჳსი: სიტყუასა რომელსა ვიტყოდე, მან საჯოს იგი უკუანაჲსკნელსა დღესა.
რამეთუ მე თავით ჩემით არა ვიტყჳ, არამედ რომელმან მომავლინა მე მამამან, მომცა მე მცნებაჲ და რაჲ ვთქუა ანუ რასა ვიტყოდი.
და ვიცი, რამეთუ მცნებანი მისნი ცხორება საუკუნე არიან და რომელსა-იგი მე ვიტყჳ, ვითარცა-იგი მამამან მრქუა, ეგრეცა ვჰყოფ.
