Page of ms. P: 384V და გამოვიდა მიერ და მოვიდა თჳსსა მამულსა, და მისდევდეს მას თჳსნი მოწა[ფენი].
და იყო შაბათი, და იწყო შესაკრებელსა სწავლად მათა, და მრავალთა, რომელთა ესმოდა, განუკჳრდებოდა და იტყოდეს: ვინაჲ არს ესე ამისა? ანუ რაჲ არს სიბრძნჱ ესე მოცემული ამისა, და ძალი ესოდენი, ჴელთა შინა ამისთა რომელნი იქმნებიან?
ანუ არა ესე არს ხუროჲსაჲ მის და ძჱ Page of ms. P: 285R მარიამისი, ძმაჲ იაკობისი და იოვანესი, იუდაჲსი და სიმონისი, და დანი მისნი ყოველნი ჩუენ თანა არიან? და დაჰპკოლდებოდეს მისა მიმართ.
ხოლო იესუ იტყოდა: არა არს წინაწარმეტყუელი შეურაცხ, გარნა თჳსსა სოფელსა და ნათესავთა შორის მისთა და სახლსა შინა მისსა.
და არა ქმნა მუნ სასწაული არცა ერთი, გარნა მცირედთა სნეულთა ჴელი დასდვა და განკურნნა იგინი.
და დაუკჳრდა ურწმუნოებაჲ იგი მათი Page of ms. P: 291R და მიმოიქცეოდა გარემო სოფლებსა მას და ასწავებდა მათ.
და მოუწოდა ათორმეტთა მათ და იწყო წარვლინებად ორ-ორი და მისცა მათ ჴელმწიფებაჲ სულთა ზედა არაწმიდათა.
და ამცნებდა მათ, რაჲთა არარაჲ მიიღონ გზასა ზედა, გარნა კუერთხი ხოლო: ნუცა ვაშკარანი, ნუცა პური, ნუცა სარტყელსა რვალი.
და რომელსა ესხნენ სანდალნი, და ნუცა შემოსად ორი სამოსელი.
და ეტყოდა მათ: ვიდრეცა ხუალთ სახლსა, მუნ დადგერით, ვიდრე მიერ გამოსლვადმდე.
და რაოდენთა არა შეგიწყნარნენ და არცა ისმინონ თქუენი, გამო-რაჲ-ხჳდოდით მიერ, განიყარეთ მტუერი ფერჴთაგან თქუენთა საწამებელად მათა.
და გამოვიდეს და ქადაგებდეს, რაჲთა შეინანონ.
და ეშმაკნი Page of ms. P: 291V მრავალნი განასხნეს და სცხებდეს ზეთსა მრავალთა სნეულთა და განჰკურნებდეს.
Page of ms. P: _ Page of ms. L: 591R და გამოვიდა იესუ, იხილა ერი მრავალი და შეეწყალნეს იგინი, რამეთუ იყვნეს Page of ms. L: 591V იგინი, ვითარცა ცხოარნი, რომელთა არა აქუნ მწყემსი. და იწყო სწავლად მათა ფრიად.
და ვითარ მრავალი ჟამი წარულ იყო, მოუჴდეს მას მოწაფენი მისნი და ეტყოდეს, ვითარმედ: უდაბნო არს ადგილი ესე, და ჟამი არსღა ფრიად.
განუტევე ერი ესე, რაჲთა წარვიდენ გარემო [სოფლებსა და] სანახებსა და იყიდონ თავისა მათისა, რაჲ ჭამონ.
ხოლო მან მიუგო და ჰრქუა მათ: ეცით თქუენ ჭამადი მაგათ. ხოლო მათ ჰრქუეს მას: წარვიდეთ და ვიყიდოთ ორასის დრაჰკნის პური და ვსცეთ მაგათ ჭამადი?
ხოლო იესუ ჰრქუა მათ: რავდენი გაქუს თქუენ პური? მივედით და იხილეთ. იხილეს და ჰრქუეს: ხუთი პური და ორი თევზი.
და უბრძანა მათ ყოველთა დასხდომაჲ პურისმტედ-[პურისმტედ] მწუანვილსა ზედა თივისასა.
დასხდა მწყობრ ას-ასი [და] ერგასის-ერგასისი.
და მოიღო ხუთი იგი პური და ორი თევზი და [აღ]იხილა ზეცად, Page of ms. L: 592R აკურთხა, დამუსრა პური იგი და მისცემდა მოწაფეთა თჳისთა, რაჲთა დაუგონ მათ; და ორი იგი თევზი ეგრევე განუყო ყოველთა
ჭამეს და განძღეს.
და აღიღეს ნამუსრავი ათორმეტი გოდორი სავსეჲ, თევზისა მისგანიცა.
და იყვნეს, რავდენთა-იგი ჭამეს, ვითარ ხუთ ათას კაცნი.
და მეყუსეულად აწუევდა მოწაფეთა შესლვად [ნავსა], რაჲთა წინაწარუძღვენ მას წიაღკერძო ზღუასა მას ბეთსაიდად, ვიდრე განუტეოს ერი.
და უჯმნა მათ და აღვიდა მთასა მას ლოცვად.
და ვითარცა შემწუხრდა, იყო კუალად ნავი იგი შუა ოდენ ზღუასა მას, და იგი თავადი მარტოი იყო ქუეყანასა.
და იხილნა იგინი, Page of ms. L: 591V რამეთუ იურვოდეს სლვასა მას ნავისასა, რამეთუ იყო ქარი იგი პირით კერძო მის ნავისა. და მეოთხესა [საჴუმილავსა] მის ღამისას მოვიდა მათა იესუ სლვით ზღუასა ზედა და უნდა თანაწარსლვად მათა.
ხოლო მათ იხილეს იგი, ვიდოდა რაჲ ზღუასა ზედა, ჰგონებდეს, რამეთუ საუცარ რაჲმე არს, და ღაღატ-ყვეს.
რამეთუ ყოველთა იხილეს იგი და შეძრწუნდეს. მეყუსეულად ეტყოდა მათ და ჰრქუა: გულდებულ იყვენით, მე ვარ, ნუ გეშინინ!
და აღვიდა მათ თანა ნავსა, და დასცხრა ქარი იგი; და უმეტესად დაუკუირდებოდა მოწაფეთა მისთა,
რამეთუ ვერ გულისხმა-ყვეს პურსა მას ზედა, რამეთუ იყვნეს გულნი მათნი დასულებულ.
და წიაღჴდეს და მოვიდეს ქუეყანად გენესარეთა.
და გამო-ოდენ-ვიდოდეს მიერ ნავით, Page of ms. L: 593R მეყუსეულად იცნეს იგი კაცთა მის ადგილისათა.
და მიმორბიოდეს ყოველსა მას სოფლებსა და იწყეს ცხედრებითა ყოველთა სნეულთა მიმოღებად, სადაცა ესმის, ვითარმედ მუნ არს.
და ვიდრეცა შევიდოდა დაბნებსა და ქალაქებსა და აგარაკებსა, უბანთა ზედა დასდგმიდეს უძლურებსა, ევედრებოდეს მას, რაჲთა ფესუსა ოდენ სამოსლისა მისისასა შე-ოდენ-ეხოს. და რავდენთაგანნი შე-ოდენ-ეხებოდეს, ცხონდებოდეს.
