Page of ms. L: 522V მაშინ მოუჴდეს ფარისეველნი, გამოსცდიდეს იესუს და ეტყოდეს: უკუეთუ ჯერ-არს კაცისა განტევებაჲ ცოლისა თუისისაჲ ყოვლისავეთუის ბრალისა?
მიუგო იესუ და ჰრქუა მათ: არა აღმოგიკითხავსა, რამეთუ რომელმან დაჰბადა დასაბამსა კაცი, მამაკაცად და დედაკაცად შექმნა იგინი?
და ჰრქუა: ამისთუის დაუტეოს კაცმან Page of ms. L: 553R მამაჲ თუისი, დედაჲ თუისი და შეეყოს ცოლსა თუისსა, და იყვნენ ორნივე ერთ ჴორც,
რამეთუ არღა არიან ორ, არამედ ერთ ჴორც. და რომელი-იგი ღმერთმან შეაუღლა, კაცი ნუ განაშორებნ მას.
ჰრქუეს მას: რაჲსათუის მოსე დაწერა წიგნი განტევებისაჲ მიცემად და განტევებად?
მიუგო იესუ და ჰრქუა მათ: გულფიცხელობისა თქუენისათუის მოსე გიბრძანა თქუენ განტევებაჲ ცოლთა თქუენთაჲ, ხოლო დასაბამსა არა ეგრე იყო.
ხოლო მე გეტყუი თქუენ: რომელმან განუტეოს ცოლი თჳსი თუინიერ სიძვისა და სხუაჲ შეირთოს, მან იმრუშა; და რომელმან განტევებული შეირთოს, მანცა იმრუშოსვე.
ჰრქუეს მას მოწაფეთა: უკუეთუ ესოდენი Page of ms. L: 522V ბრალი არს კაცისა დედაკაცი, ჯერ-არს შე-ვე-არა-ხებაჲ.
ხოლო იესუ ჰრქუა მათ: არა ყოველთა დაიტიონ სიტყუაჲ ეგე, არამედ რომელთა მიცემულ არს ღმრთისა მიერ.
რამეთუ არიან საჭურისნი, რომელნი კაცთაგან გამოისაჭურისნეს; და არიან საჭურისნი, რომელთა გამოისაჭურისნეს თავნი თჳსნი სასუფევლისათუის ცათაჲსა, ხოლო რომელი შემძლებელ არს დატევნად, დაიტიენ.
Page of ms. L: 574R [პატივ ეც მამასა] შენსა, დედასა შენსა, შეიყუარე მოყუასი შენი, ვითარცა თავი თუისი.
ჰრქუა მას ჭაბუკმან მან: ესე ყოველი დამიმარხავს სიყრმით ჩემითგან: რაჲღა მაკლს მე?
ჰრქუა მას იესუ: უკუეთუ გნებავს, რაჲთა სრულ ხოლო იყო, წარვედ და განყიდე ნაყოფი შენი, მიეც გლახაკთა და გაქუნდეს საუნჯე ცათა შინა; მოედ და შემომიდეგ მე.
და ვითარცა ესმეს ჭაბუკსა მას სიტყუანი ესე, წარვიდა მწუხარჱ, რამეთუ აქუნდა ნაყოფი ფრიად.
ხოლო იესუ ჰრქუა მოწაფეთა თჳსთა: ამენ გეტყუი თქუენ, რამეთუ მდიდარი ძნიად შევიდეს სასუფეველსა ცათასა.
და მერმე გეტყუი თქუენ: უადვილეს არს ნავის მანქნისსაბელი განსლვად ჴურელსა ნემსისასა, ვიდრე მდიდარი შესლვად სასუფეველსა ღმრთისასა. Page of ms. L: 574V
ვითარცა ესმა ესე მოწაფეთა, განუკუირდებოდა ფრიად და იტყოდეს: ვისმე ჴელ-ეწიფების ცხორებად?
მიხედა იესუ და ჰრქუა მათ: კაცთაგან ესე შეუძლებელ არს, ხოლო ღმრთისა მიერ ყოველივე შესაძლებე[ლ] არს.
Page of ms. L: _ Page of ms. P: 241R მაშინ მიუგო პეტრე და ჰრქუა იესუს: უფალო, აჰა ესერა ჩუენ ყოველივე დაუტევეთ და შეგიდეგით შენ: რაჲ-მე იყოს ჩუენთჳს?
ხოლო იესუ ჰრქუა მათ: ამენ გეტყჳ თქუენ: რომელნი მე შემომიდეგით, მერმესა მას ყოფასა, რაჟამს დაჯდეს ძჱ კაცისაჲ საყდართა დიდებისა თჳსისათა, დასხდეთ თქუენცა ათორმეტთა საყდართა განსჯად ათორმეტთა ნათესავთა.
და ყოველსა რომელსა დაეტეოს სახლი, გინა ძმანი, გინა დანი, გინა მამა-დედანი, გინა ცოლი, გინა შვილნი, გინა ქუეყანაჲ სახელისა ჩემისათჳს, ასი წილი მიიღოს და ცხორებაჲ საუკუნოჲ დაიმკჳდროს.
ხოლო მრავალნი იყვნენ პირველნი უკუანა და უკუანანი წინა.
