რამეთუ მსგავს არს სასუფეველი ცათაჲ კაცსა სახლისა უფალსა, რომელი განვიდა განთიად სასყიდლით დადგინებად მუშაკთა ვენაჴსა თჳსსა.
და აღუთქუა [მათ სასყიდელი] თითოეულად დრაჰკანი დღესა Page of ms. P: 241V და წარავლინნა იგინი ვენაჴსა თჳსსა.
და განვიდა ჟამსა მესამესა და იხილნა სხუანი, მდგომარენი უბანთა ზედა უქმად,
და ჰრქუა მათ: წარვედით თქუენცა ვენაჴსა ჩემსა და მიგცე თქუენ სასყიდელი.
ხოლო იგინი წარვიდეს. და მერმე განვიდა მეექუსესა და მეცხრესა [ჟამსა] და ყო ეგრევე.
ხოლო მეთერთმეტესა ჟამსა განვიდა და პოვნა სხუანი მდგომარენი და ჰრქუა მათ: რაჲსა სდგათ დღე-ყოველ უქმად?
ხოლო მათ ჰრქუეს: არავინ დაგჳდგინნა ჩუენ. ჰრქუა მათ სახლისა უფალმან: წარვედით თქუენცა ვენაჴსა ჩემსა.
და ვითარცა შემწუხრდა, ჰრქუა უფალმან მის ვენაჴისამან ეზოჲს-მოძღუარსა თჳსსა: მოუწოდე მუშაკთა მათ და მიეც სასყიდელი; იწყე უკუანაჲსკნელითგან, ვიდრე პირველადმდე.
და მოვიდეს მეათერთმეტისა ჟამისანი და მიიღეს თითოჲ დრაჰკანი.
და მოვიდეს პირველისანი იგი და მიიღეს თითოჲ დრაჰკანი.
ხოლო მი-რაჲ-იღეს, დრტჳნვიდეს სახლისა უფლისათჳს
და იტყოდეს, ვითარმედ: უკუანაჲსკნელთა ამათ ერთი ოდენ ჟამი ქმნეს და სწორ ჩუენდა ჰქმნენ იგინი, რომელთა ვიტჳრთეთ სიმძიმჱ დღისაჲ და სიცხჱ.
ხოლო მან მიუგო ერთსა მათგანსა და ჰრქუა მას: მოყუას, არა[ს] გავნებ, ანუ არა დრაჰკანი ერთი აღგითქუაა?
მიიღე შენი და ვიდოდე! ხოლო მე მნებავს უკუანაჲსკნელსა მას მიცემად, ვითარ შენ.
არა ჯერ-არს ჩემდა, რომელი მნებავს ყოფად ნაყოფთა ჩემთა ზედა? ანუ თუალი შენი ვიდრემე ბოროტ არს, ხოლო მე სახიერ ვარ.
ესრჱთ იყვნენ პირველნი უკუანა და უკუანანი წინა, რამეთუ მრავალნი არიან ჩინებულ, ხოლო მცირედნი -- რჩეულ.
Page of ms. P: 162R და ვითარცა აღვიდა იესუ უერუსალჱმდ, თანაწარიყვანნა ათორმეტნი მოწაფენი და მგზავრ ეტყოდა მათ:
აჰა ესერა აღვალთ იერუსალჱმდ, და ძჱ კაცისაჲ მიეცეს ჴელთა ცოდვილთა, და დასაჯონ იგი სიკუდიდ.
და მისცენ იგი წარმართთა კიცხევად და ტანჯვად და ჯუარცუმად, და მესამესა დღესა აღდგეს.
მაშინ მოუჴდა მას დედაჲ ძეთა ზებედჱსთაჲ ძეთა მისთა თანა, თაყუანის-სცემდა მას და ითხოვდა რასმე მისგან.
ხოლო თავადმან ჰრქუა მას: რაჲ გნებავს? ხოლო მან ჰრქუა: თქუ, უფალო, რაჲთა დასხდენ ორნი ესე ძენი [ჩემნი] Page of ms. P: 162V , ერთი მარჯუენით შენსა და ერთი მარცხენით სასუფეველსა შენსა.
მიუგო იესუ და ჰრქუა მათ: არა იცით, რასა ითხოვთ. ძალ-გიცსა [შესუმად] სასუმლისა, რომელი ჩემდა შესუმად არს, ანუ ნათლის-ღებაჲ, რომელი მე ნათელ-ვიღო, ნათელ-იღოთა? ჰრქუეს მასა: ძალ-გჳც.
ჰრქუა მათ იესუ: სასუმელი სამე ჩემი შესუათ და ნათლისღებაჲ, რომელი მე ნათელ-ვიღო, ნათელ-იღოთ, ხოლო დაჯდომაჲ მარჯუენით ჩემსა და მარცხენით არა არს ჩემი მიცემაჲ, არამედ ვიეთა განმზადებულ არს მამისა ჩემისა მიერ.
ვითარცა ესმა ესე ათთა მათ, განრისხნეს ორთა მათ ძმათათჳს.
ხოლო იესუ მიუგო და ჰრქუა მათ: იცითა, რამეთუ მთავარნი წარმართთანი უფლებდენ მათ ზედა და დიდ-დიდი ჴელმწიფებედ მათ ზედა?
ხოლო თქუენ ზედა არა ეგრე იყოს, არამედ რომელსა უნდეს თქუენ შორის დიდი ყოფაჲ, იყოს იგი თქუენდა მონა.
ვითარცა-იგი ძჱ კაცისაჲ არა მოვიდა, რაჲთამცა იმსახურა, არამედ მსახურებად და მიცემად სული თჳსი საჴსრად მრავალთათჳს.
