Page of ms. P: 160V და ვითარცა მიეახლნეს იგინი იერუსალჱმდ და მოვიდეს ბეთბაგედ და ბეთანიად, მთასა მას ზეთის-ხილთასა, მაშინ წარავლინნა იესუ ორნი მოწაფეთა მისთაგანნი
და ჰრქუა მათ: წარვედით დაბასა მაგას, რომელ არს წინაშე თქუენსა, და მეყსეულად ჰპოოთ ვირი დაბმული და კიცჳ მის თანა; აჰჴსენით და მომგუარეთ მე.
და უკუეთუ ვინმე გრქუას რაჲ, თქუენ არქუთ მას, ვითარმედ: უფალსა უჴმან ეგენი, და მეყსეულად მოავლინნეს იგინი.
ესე ყოველი იქმნა, რაჲთა აღესრულოს სიტყუაჲ იგი წინაწარმეტყუელისაჲ, რომელ თქუა:
არქუთ ასულსა სიონისა[სა], რამეთუ აჰა ესერა მეუფჱ შენი მოვალს შენ ზედა მშჳდი და ზე-ზის იგი ვირსა და კიცუსა, ნაშობსა კაჰრაულისასა.
ხოლო მოწაფენი წარვიდეს და ყვეს ეგრე, ვითარცა უბრძანა მათ იესუ.
და მოჰგუარეს ვირი იგი და კიცჳ მის თანა და დაასხეს სამოსელი მას ზედა, და დაჯდა მას ზედა.
ხოლო უმრავლჱსი იგი ერი დაუფენდა სამოსელსა გზასა ზედა, და სხუანი მოჰკაფდეს რტოებსა ხეთაგან და დაუფენდეს გზასა ზედა.
და ერი იგი, რომელი წინა-უძღოდა და რომელი უკუანა შეუდგა, ღაღადებდეს და იტყოდეს: ჵსანა [ძესა დავითისსა]! კურთხეულ არს მომავალი სახელითა უფლისაჲთა! ჵსანა მაღალთა შინა!
და შევიდა იესუ იერუსალჱმდ და შეიძრა ყოველი იგი ქალაქი და იტყოდეს: ვინ არს ესე?
ხოლო ერი იგი იტყოდა: ესე არს წინაწარმეტყუელი იესუ ნაზარეთით გალილეაჲსაით.
და შევიდა იესუ ტაძარსა მას და გამო\ასხა Page of ms. P: 161R მიერ ყოველი იგი განმსყიდელი და ყოველი, რომელი იყიდდა ტაძარსა მას შინა, და ტაბლები იგი მეკერმეთაჲ მათ დაუმჴუა და სასხდომელი მსყიდელთა მათ ტრედისათაჲ განუთხია.
და ჰრქუა მათ: წერილ არს: სახლსა მამისა ჩემისასა სახლ სალოცველ ეწოდოს, ხოლო თქუენ გიყოფიეს ქუაბ ავაზაკთა.
და მოუჴდეს ბრმანი და მკელობელნი, და განკურნნა იგინი.
და ვითარცა იხილეს მღდელთ-მოძღუართა მათ და მწიგნობართა, რომელი-იგი იქმნა სასწაული, და ყრმები იგი, რომელ ღაღადებდეს ტაძარსა მას შინა და იტყოდეს: ჵსანა ძესა დავითისსა,
განრისხნეს და ჰრქუეს მას: გესმის, რასა-ესე იტყჳან? ხოლო იესუ ჰრქუა მათ: ჰე; არასადა აღმოგიკითხავსა, რამეთუ პირითა ყრმათა ჩჩჳლთაჲთა დაემტკიცოს ქებაჲ?
და დაუტევნა იგინი და განვიდა გარეშე ქალაქით ბეთანიად და იქცეოდა მუნ.
და ხვალისაგან მოვიდოდა ქალაქად და შეემშია.
და იხილა ლეღჳ ერთი გზასა ზედა და მოვიდა მას და არარაჲ პოა მას შინა ნაყოფი, გარნა ფურცელი ხოლო. და ჰრქუა მას: ნუღარა იყოფინ შენგან ნაყოფი საუკუნოდ! და მეყსეულად განჴმა ლეღჳ იგი.
ვითარცა იხილეს მოწაფეთა მათ, უკჳრდა და იტყოდეს: ვითარ მეყსეულად განჴმა ლეღჳ ესე!
მიუგო იესუ და ჰრქუა მათ: ამენ გეტყჳ თქუენ: Page of ms. P: 161V უკუეთუ გაქუნდეს სარწმუნოებაჲ და არა შეორგულდეთ, არა ხოლო ლეღჳსაჲ ამის ჰყოთ, არამედ ჰრქუათ თუ მთასა ამას: აღიფხუერ ამიერ და შთავარდი ზღუასა, -- იყოს ეგრე.
და ყოველსა რაოდენსა ითხოვდეთ ლოცვასა შინა სარწმუნოებით, გეყოს თქუენ.
და მო-რაჲ-ვიდა იგი ტაძრად, მოუჴდეს მას მღდელ-მოძღუარნი და მოხუცებულნი ერისანი, ვითარ-იგი ასწავებდა ერსა, და ჰრქუეს მას: რომლითა ჴელმწიფებითა იქმ ამას, და ვინ მოგცა შენ ჴელმწიფებაჲ ესე?
