Page of ms. P: 15V გიხაროდენ მარადის უფლისა მიმართ; მერმე გეტყჳ: გიხაროდენ.
სიმდაბლჱ ეგე თქუენი ცხად იყავნ ყოველთა კაცთა. უფალი ახლოს არს.
ნურას ჰზრუნავთ, არამედ ლოცვითა და ვედრებითა და მადლობითა თხოვანი ეგე თქუენნი საცნაურ იყვნედ ღმრთისა მიმართ;
და მშჳდობამან ღმრთისამან, რომელი ჰმატს ყოვლითა გონებითა, განამტკიცენინ გულნი თქუენნი და გონებანი ქრისტე იესუჲს მიერ.
ამიერითგან, ძმანო ჩემნო, რაჲ-იგი არს ჭეშმარიტ, რაჲ-იგი არს მართალ, რაჲ-იგი არს სიწმიდე, რაჲ-იგი არს საყუარელ, რაჲ-იგი არს საქებელ, სათნო და ქებულ, ამას ზრახევდით.
რომელიცა-იგი ისწავეთ და მიიღეთ და გესმა და იხილეთ ჩემ თანა, ამას იქმოდეთ; და ღმერთი მშჳდობისაჲ იყავნ თქუენ თანა.
