"Serina, serinaz vä͑x nex: eġeli aġəla iz ćomoxun tää, čärvändäxun ǯupi baġalo oġri saal fu͑q̇ḳale.
Ama ćomoxun baġalo eġelxoy čobane.
Q̣aroolčinen ćomo šoṭaynaḳe qayḳon, eġelxonal šoṭay säsäne u͑mu͑xlaxon. Šoṭinal iz eġelxo c̣iyen ḳalpi šoṭoġo qavunane č̣evḳon.
Iz eġelxo bitova qavuna č̣evḳiṭuxun oša ič be͑ś, eġelxoval šoṭay bać̣anexune taġon, šoṭaynaḳ ki, šoṭay säsä čalṭunxsa.
Ama q̇eräz amdari bać̣anexun teṭun taġon, šoṭoxun ṭiṭunṭon, šoṭaynaḳ ki, q̇eräz amdari säsä teṭun čalxsa".
Isusen me mäsälinä exlätebi, ama šoṭoġon Isusi exläti mäninä teṭun q̇amišaki.
Šoṭaynaḳal Isusen šoṭoġo ṗurum pine: "Serina, serinaz vä͑x nex: Zu - eġelxoynaḳ ćomozu.
Zaxun be͑ś hariyorox bito oġriyox q̇a fu͑q̇ḳalxone, ama eġelxon šoṭoġo teṭun u͑mu͑xlaxi.
Zu - ćomozu, šu me ćomoxun baġayin, čarḳeġale. Šo baci-č̣eġale, ičeynaḳ oṭṭaġ bä͑ġä͑bale.
Oġri sayǯä bašq̇seynaḳ, bespseynaḳ saal carbseynaḳe eysa, Zu isä šoṭoġo yäšäyinš, äsil yäšäyinš tasṭeynaḳez hare.
Zu - šaaṭ čobanzu, šaaṭ čobanen eġelxoynaḳ iz elmoġoval q̇urbane tadon.
Tänginen äyiteci čoban isä eġelxoy q̇onʒ́ux tene, šoṭaynaḳal ule eysuna aḳaṭan šoṭoġo bosi ṭineṭon. Ulenal šoṭoġo hä͑fä͑don, šoṭoġo carpi cineḳon.
Šo tänginen äyitecine, šoṭaynaḳal eġelxoynaḳ üḳ tene boḳospsa.
Zu šaaṭ čobanzu. Hetär ki, Bavan Zane čalxsa, Zu Bavaz čalxsa, hametäräl beziṭoġoz čalxsa, beziṭoġonal Zaṭun čalxsa. Zu eġelxoynaḳ Bezi elmoġo q̇urbanez tasṭa. *
Bezi me aġəlaxun nu bakala q̇eräzäl eġelxozax bu, Zu šoṭoġoval ečalazu. Šoṭoġonal Bezi säsä ibakalṭun, ṭe vädä täk sa sürü, täk sa \ Čoban bakale.
Zu Bezi elmoġo q̇urbanez tasṭa ki, oša šoṭo qaydi qoš exṭaz. Bavanal Za moṭo göräne čuresa.
Bezi elmoġo Zaxun šuḳḳalen haq̇es tene bakon, ama šoṭo Zuz tasṭa. Šoṭo tasṭeynaḳal, oša qaydi qoš exsṭeynaḳal Bezi exṭiyäre bu. Axəri me ämirä Bezi Bavaxunez haq̇e".
Me äyitmoġo görä iudeyxoy arane ṗurum fikirxo ǯöyebaki.
Šoṭoġoy geleṭin pine: "Me amdarasṭa murdar urufe bu, ko giže. Heṭaynaḳnan koṭo u͑mu͑xlaxsa?"
Ṭə͑yä͑miṭoġon isä piṭun: "Morox ičusṭa murdar uruf bakala amdari äyitmux tene. Maya aḳece ki, murdar urufen ḳać̣i amdari pulmoġo q̇olaybane?" \ Iudeyxoy Isusa nu ve͑baksun
ω͑źenaney, Yerusalimal *Išiġi axsibayṭun * č̣ovakesṭay.
Isus *xrame määlin härrämine bakala Solomoni seyvane taranney.
Iudeyxo Isusi härrämine gireci Šoṭo piṭun: "Heq̇ädär yax šüpin boš efalnu? Ägär Hun *Xrisṭosnusa, yax qay upa".
Isusen šoṭoġo ǯoġabe tadi: "Zu vä͑x exlätezbi, ama ve͑ tenan. \ Bezi Bavay c̣iyen biq̇i äšurxon Bezi barada šahidluġebsa.
Ama vä͑n Za ve͑ tenan, šoṭaynaḳ ki, Bezi q̇uziġoxun tenan.
Bezi q̇uziġon Bezi säsä čalṭunxsa, Zuval šoṭoġo čalezxsa, šorox Bezi bać̣anexunṭun eysa.
Zu šoṭoġo hämišäluġ yäšäyinšez tasṭa. Šoroxal sal sa vädä teṭun biyal, šuḳḳalen šoṭoġo Bezi kiyexun haq̇es tene bakal.
Šoṭoġo Za tadi Bava bitoṭuxun üsṭüne. Šuḳḳalen šoṭoġo Bavay kiyexun haq̇es tene bakon.
Zu q̇a Bava sayan".
Iudeyxon ṗurum źe͑ṭun exṭi ki, Šoṭo źe͑layinšaṭun.
Isusen šoṭoġo pine: "Zu vä͑x Bavaxun eġala gele šaaṭ äšurxoz aḳesṭi. Vä͑n koṭoġoy maṭu göränän Za źe͑layinšbsun čuresa?"
Iudeyxon Šoṭo ǯoġabṭun tadi: "Va koṭo görä tää, adi amdar baksunen Va Buxaʒ́ux bi Buxaʒ́uġoy äleyinä äyitpsuna göräyan źe͑layinšbsa". *
Isusen šoṭoġo pine: "P̣oy ef ω͑vel Came boš tene camece ki, "Buxaʒ́uġon pene: <Vä͑n buxaʒ́uxxonan>"? *
Buxaʒ́uġon Izi äyitä avabakesṭi amdarxo Ičine <buxaʒ́uxxonan> nexe. ω͑vel Camal avanan ki, pozmišakes tene bakon.
Isä vä͑n uḳalnan ki, Zu - Buxaʒ́uġon č̣äḳṗi düynäne yaq̇abi Amdaren - "Zu Buxaʒ́uġoy Ġarzu" upsunen Buxaʒ́uġoy äleyinäz äyite?
Ägär \ Bavay biq̇ala äšurxo tez biq̇sasa, Za ve͑ ma bakanan.
Ama me äšurxo bizaqsasa, Za ve͑ nuval bakaynan, Bezi biq̇ala äšurxo ve͑bakanan ki, Bava Zasṭa, Zuval Bavasṭa baksuna avabaki q̇amišakes bakanan".
Iudeyxon ṗurum Isusa biq̇sunṭun čureci, ama Šo ičoġoy kiyexun č̣efedi.
Isus ṗurum Iordan oqe ṭe soġo täräf, Ioanen süfṭä *ḳunuḳbala gala taci ṭeṭiya manedi. *
Šoṭay ṭo͑ġo͑l gele amdare eysay. Šoṭoġon nexṭuniy: "Ioanen sal sa möǯüzälü niśan nuval aḳesṭi bakayin, šoṭay me Amdari barada pi bito äyitmux düze č̣eri".
Gele amdarxoval ṭeṭiya Isusa ve͑ṭun baki.
