და ეტყოდა უფალი მოსეს, მეტყუელი:
თქუ აარონის მიმართ და ყოველთა მიმართ Page of ms. Ga: 52v ძეთა ისრაელისათა და ეტყოდე მათ: ესე სიტყუაჲ ამცნო უფალმან, მეტყუელმან:
კაცმან ისრაელისაგანმან, რომელმან დაკლას ცხოარი ანუ ზუარაკი ანუ თხაჲ ბანაკსა შინა და რომელმან გარეშე ბანაკისა დაკლას,
და კარსა თანა კარვისა საწამებელისასა არა მოიყვანოს იგი, რაჲთა ეყოს მათ ყოვლად დასაწუველ მაცხოვრებისა უფლისა მითუელულად სულად სულნელებისად, და რომელმან დაკლას გარე და კარად კარვისა საწამებლისა არა მოიყვანოს, ვითარცა შეწირვად იგი ძღუნად უფალსა წინაშე კარვისა უფლისასა, სისხლად შეერაცხოს კაცსა მას. სისხლი დასთხია, მოისპოს სული იგი ერისაგან თჳსისა.
არამედ რაჲთა მოიღოდიან ძენი ისრაელისანი, რაოდენთა-რაჲ დაჰკლვენ იგინი ველსა ზედა, და მიჰგურიდენ მათ უფალსა კართა თანა კარვისა საწამებლისათა მღდელისა მიმართ და დაუკლვიდენ მათ საცხორებელად უფალსა.
და მოღუაროს მღდელმან სისხლი საკურთხეველსა ზედა წინაშე უფლისა კარსა თანა კარვისა საწამებლისასა. და შეწიროს ცმელი სულად სულნელებისად უფლისა.
და არა შესწირვიდენ მერმე მსხუერპლთა მათთა ამოთა, რომელთა-იგი ისიძვენ შემდგომად მათსა. შჯულად საუკუნოდ იყოს თქუენდა ნათესავსა შინა თქუენსა.
და თქუ მათდა მიმართ: კაცმან, კაცმან ძეთაგან ისრაელისათა და ძეთაგან მწირთა მახლობელთა თქუენ\თაჲსა, Page of ms. Ga: 53v რომელმან ყოს ყოვლად დასაწუველი ანუ მსხუერპლი
და კარსა თანა კარვისა საწამებლისასა არა მიიღოს ქმნად იგი უფლისა, მოისპოს სული იგი ერისაგან მისისა.
და კაცმან, კაცმან ძეთაგან მწირთა მახლობელთა თქუენთაჲსა, რომელმან ჭამოს ყოველი სისხლი, და დავამტკიცო პირი ჩემი სულსა მას ზედა მოსპობად იგი ერისაგან თჳსისა.
რამეთუ სული ყოვლისა ჴორცისაჲ სისხლი მისი არს, და მე მიგეც იგი თქვენ საკურთხეველსა ზედა ჩემსა ლხინების-ყოფად სულთა თქუენთათჳს, რამეთუ სისხლი მისი ნაცვალად სულისა მისისა ლხინება-ჰყოფს.
ამისთჳს ვარქუ ძეთა ისრაელისათა: ყოველმან სულმან თქუენგანმან არა ჭამოს სისხლი.
და კაცმან, კაცმან ძეთა ისრაელისათამან ანუ მწირთა მახლობელთა თქუენთამან, რომელმან ინადიროს ნადირად ნადირი გინა მფრინველი, რომელი იჭამების, და დასთხიოს სისხლი მისი, დაფარნენ იგი მიწითა.
რამეთუ სული ყოვლისა ჴორცისა სისხლი მისი არს, და არქუ ძეთა ისრაელისათა: სისხლი ყოვლისა ჴორცისაჲ არა შჭამოთ, რამეთუ სული ყოვლისა ჴორცისა სისხლი მისი არს. ყოველი მჭამელი მისი მოისპოს.
და ყოველმან სულმან, რომელმან ჭამოს მძორი ანუ ნამჴეცავი, მკჳდრთა ანუ მწირთაშორისმან, მოისპოს სული იგი ერიასგან თჳსისა. და რომელი შეეხოს მათგანსა, განირცხას სამოსელი მისი და დაიბანოს ტანი მისი წყლითა და არაწმიდა იყოს ვიდრე მწუხრადმდე და მერმე განწმიდნეს.
ხოლო უკუეთუ არა განირცხას სამოსელი მისი და ტანი მისი არა დაიბანოს წყლითა, მოიღოს მან უსჯულოებაჲ თჳსი.
