და იტყოდა უფალი მოსეს მიმართ შემდგომად აღსრულებისა ორთა ძეთა აარონისთაჲსა, მო-რაჲ-იღეს მათ ცეცხლი უცხოჲ წინაშე უფლიას და მოკუდეს.
და თქუა უფალმან მოსეს მიმართ: იტყოდე აარონის მიმართ, ძმისა შენისა, და ნუ შევალ[ნ] ყოველსა ჟამსა სიწმიდეთა მათ უშინაგანეს კრეტსაბმელისა პირისპირ სალხინებელსა, რომელს არს კიდობანი ზედა წამებისასა და არა მოკუდეს, რამეთუ ღრუბლით გამოვჩნდე მე სალხინებელსა ზედა.
და ესრეთ შევიდოდის აარონ წმიდათა მიმართ ჴბოჲთა ზროხათაგან ცოდვისათჳს და ვერძითა ყოვლად დასაწუველად.
და სამოსელი სელისაჲ განწმედილი შთაიცუას და საწჳვენი სელისანი იყვნენ ასოთა მისთა ზედა, და სარტყელი სელისაჲ მოირ\ტყას Page of ms. Ga: 46v და კიდარი სელისაჲ გარე-მოიდვას. სამოსელნი წმიდანი არიან და დაიბანოს წყლითა ყოველი სხეული მისი და შეიმოსნეს ესენი.
და შესაკრებელისაგან ძეთა ისრაელისათაჲსა მიიყვანეს ორნი ვაცნი თხათაგან ცოდვისთჳს და ვერძი ერთი ყოვლად დასაწუველად.
და მოიბას აარონ ჴბოჲ ცოდვისათჳს თავისა თჳსისა და ლხინება-ყოს თავისა თჳსისათჳს Page of ms. Ga: 47r და სახლისა თჳსისა.
და მოიბნეს ორნი ვაცნი და წარადგინნეს იგინი წინაშე უფლისა კარსა თანა კარვისა საწამებლისასა.
და დაასხნეს აარონ ორთავე ზედა ვაცთა წილნი: წილი ერთი -- განმავლინებელისაჲ.
და მოიყვანოს აარონ ვაცი იგი, რომელსა ზედა მივიდა მას ზედა Page of ms. Ga: 47v წილი უფლისაჲ, და შეწიროს ცოდვისათჳს.
და ვაცი, რომელსა ზედა მივიდა მას ზედა წილი განმავლენელისაჲ, და დაადგინოს იგი ცოცხლად წინაშე უფლისა, რაჲთა ლხინება-ყოს მას ზედა განვლინებად იგი განვლენასა მას და განუტევოს იგი უდაბნოდ. და მიიხუნეს ვაცმან Page of ms. Ga: 48r მან უსჯულოებანი თავსა თჳსსა ზედა ქუეყანად მიმართ უვალად.
და მოიბას მღდელმან ჴბოჲ ცოდვისაძლითი თავისა თჳსისათჳს და ლხინება-ყოს თავისა თჳსისა და სახლისა თჳსისათჳს და დაკლას ჴბოჲ იგი ცოდვისა თჳსისა ძლითი.
და მოიღოს სავსე საცეცხური ნაკუერცხალი ცეცხლისაჲ საკურთხეველისაგან, რომელ არს წინაშე უფლისა, და აღივსნეს ჴელნი საკუმეველითა შეზავებულებისაჲთა მწულილითა და შევიდეს უშინაგანეს კრეტსაბმელსა.
და დაასხას საკუმევ\ელი Page of ms. Ga: 51r ცეცხლსა ზედა წინაშე უფლისა და დაფაროს ორთქლმან საკუმეველისამან სალხინებელი ზედა კერძოჲ საწამებელთაჲ და არა მოკუდეს.
და მოიღოს სისხლისაგან ჴბოჲსა და აპკუროს თითითა სალხინებელსა აღმოსავალით კერძო პირისპირ სალხინებელისა და აპკუროს შჳდგზის სისხლისაგან თითითა თჳსითა.
და დაკლას ვაცი იგი ცოდვისა ერისამიერისაჲ წინაშე უფლისა და შეიღოს სისხლისა მისისაგან უშინაგანეს კრეტსაბმელისა და უყოს სისხლსა მას, ვითარ-სახედ უყო სისხლსა ჴბოჲსასა, და აპკუროს სისხლი მისი სალხინებელსა პირისპირ სალხინებელისა.
და ლხინება-იქმნეს წმიდის არაწმიდებათაგან ძეთა ისრაელისათაჲსა და უსამართლოებათაგან მათთა ყოველთათჳს ცოდვათა მათთა. და ესრეთ უყოს კარავსა წამებისასა, შენებულსა მათ შორის საშუალ არაწმიდებისა მათისა.
და ყოველი კაცი არა იყოს კარავსა შინა წამებისასა, შე-რაჲ-ვიდოდის იგი ლხინების-ყოფად წმიდასა შინა, ვიდრე არა გამოვიდეს. და ლხინება-ყოს თავისა თჳსისათჳს და ყოვლისა შესაკრებელისა ისრაელისა.
და გამოვიდეს საკურთხეველისა მომართ, რომელ არს წინაშე უფლისა, და ლხინება-ყოს მას ზედაა და მოიღოს სისხლისაგან ჴბოჲსა და სისხლისაგან ვაცისა და სცხოს რქათა საკურთხეველისათა გარემოჲს.
და ასხუროს მას ზედა სისხლისაგან თითითა მისითა შჳდგზის და განწმიდოს იგი და წმიდა-ყოს იგი არაწმიდებათაგან ძეთა ისრაელისათაჲსა.
და აღასრულოს ლხინებისმყოფელმან წმიდისამან და კარვისა საწამებლისა და საკურთხე\ველისამან Page of ms. Ga: 51v და მღდელთათჳს განწმედისამან და მოიყვანოს ვაცი იგი ცოცხალი.
და დაასხნეს აარონ ორნივე ჴელნი მისნი თავსა ზედა ვაცისა მის ცოცხლისასა და აღიარნეს მას ზედა ყოველნი უშჯულოებანი ძეთა ისრაელისათანი და ყოველნი უსამართლოებანი მათნი და ყოველნი ცოდვანი მათნი და ზედა-დაჰსხნეს ცოცხალსა მას. და განავლინოს ჴელითა კაცისა განმზადებულისაჲთა უდაბნოდ.
და მოიხუნეს ვაცმან მან უსჯულოებანი მათნი თავსა ზედა თჳსსა ქუეყანად უვალად, და განავლინოს ვაცი იგი უდაბნოდ.
და შევიდეს აარონ კარავად საწამებლისად და განიძარცოს სამოსელი სელისაჲ, რომელი შეემოსა შესლვასა მისსა წმიდათა მიმართ, და დადვას იგი მუნ.
და დაიბანოს ტანი თჳსი წყლითა ადგილსა წმიდასა და შეიმოსოს სამოსელი მისი. და გამოსრულმან ყვნეს ყოვლად დასაწუველნი თჳსნი და ყოვლად ნაყოფები ერისანი და ლხინება-ყოს თავისა თჳსისათჳს და სახლისა თჳსისათჳს და ერისათჳს, ვითარცა-სახედ მღდელთათჳს.
და ცმელი ცოდვისაძლითისაჲ აღიღოს Page of ms. Ga: 52r საკურთხეველსა ზედა.
და განმავლინებელმან ვაცისა მის განტევებულისამან მისატევებელად განირხცას სამოსელი თჳსი და დაიბანოს ტანი მისი წყლითა და ამის შემდგომად შევიდეს ბანაკად.
და ჴბოჲ იგი ცოდვისაჲ და ვაცი იგი ცოდვისაჲ, რომელთაჲ სისხლი მათი შეღებულ იქმნა სალხინებელად სიწმიდესა შინა, განიხუნენ იგინი გარეშე ბანაკისა და დაწუნენ იგინი ცეცხლითა და ტყავი მათი და ჴორცი მათი და სკორე მათი.
ხოლო დამწუველმან მათმან განირცხას სამოსელი თჳსი და დაიბანოს ტანი მისი წყლითა და ამის შემდგომად შევიდეს ბანაკად.
და იყოს ესე თქუენდა შჯულად საუკუნოდ: თთუესა მეშჳდესა, ათსა თთჳსასა და დაიმდაბლნეთ სულნი თქუენნი, და ყოველი საქმე არა ჰქმნათ მკჳდრმან და მწირმან, მსხემმან თქუენ შორის.
რამეთუ ამას დღესა შინა ლხინება-იქმნეს თქუენთჳს განწმედად თქუენდა ყოველთაგან ცოდვათა თქუენთა წინაშე უფლისა და განსწმდეთ.
შაბათებ შაბათითა იყოს თქუენ შორის და დაამდაბლენით სულნი თქუენნი შჯულად საუკუნოდ.
ლხინება-ყოს მღდელმან, რომელსაცა სცხონ მას და რომლისანიცა განსრულნენ ჴელნი მისნი მღდელობად შემდგომად მამისა მისისა, და შეიმოსოს სამოსელი სელისაჲ, სამოსელი წმიდაჲ.
და ლხინება-ყოს წმიდაჲ წმიდისაჲ და კარავი წამებისაჲ და საკურთხეველი ლხინება-ყოს და მღდელთათჳს და ყოვლისა შესაკრებელისა ლხინება-ყოს.
და იყოს ესე თქუენდა საუკუნოდ შჯულად სალხინებელად ძეთათჳს ისრაელისათა ყოველთაგან ცოდვათა მათთა; ერთგზის წელიწდისა იქმნებოდის, ვითარცა განუწესა უფალმან მოსეს.
