Page of ms. Gb: 91v და მოუჴდეს მთავარნი ნათესავთა ტომისა Page of ms. Ga: 211r ძეთა გალაად, ძისა მაქირ, ძისა მანასსისთანი, ტომისაგან ძეთა იოსებისთა, და თქუეს წინაშე მოსესსა და წინაშე ელეაზარ მღდელისა და წინაშე მთავართა სახლისა ტომთა ძეთა ისრაელისათა,
და თქუეს: უფალსა ჩუენსა ამცნო უფალმან უკუნ-ცემად ქუეყანაჲ მკჳდრობისაჲ წილითა ძეთა ისრაელისათა Page of ms. Ga: 211v და უფალსა უბრძანა უფალმან მიცემად სამკჳდრებელი სალპაად ძმისა ჩუენისაჲ ასულთა მისთა.
და იყვნენ ერთისა ტომთა ძეთა ისრაელისათაგანისა ცოლებ, და აღღებულ იქმნეს ნაწილი მათი დასაპყრობელისაგან მამათა, ჩუენთაჲსა და შეეძინოს სამკჳდრებელად ტომისა, რომელსაცა იქმნენ ცოლებ, და წილისაგან სამკჳდრებელისა ჩუენისა განიყვნენ.
და რომელიცა იქმნა განყოფაჲ ძეთაგან ისრაელისათა, და შეეძინოს სამკჳდრებელი მათი სამკჳდრებელსა ზედა ტომისა, რომლისაცა იქმნენ ცოლებ, და სამკჳდრებელისაგან ტომისა ნათესავისა ჩუენისა განიყოს სამკჳდრებელი მათი.
და ამცნო მოსემან ძეთა ისრაელისათა ბრძანებითა უფლისაჲთა, მეტყუელმან: ესრეთ ტომნი ძეთა იოსებისთანი იტყჳან.
ესე არს სიტყუაჲ, რომელი განუჩინა უფალმან ასულთა სალპაადისთა, მეტყუელმან: რომელი სთნდეს წინაშე მათსა, ეყვნენ ცოლებ, თჳნიერ დასისაგანთა მამისა მათისათა ეყვნენ ცოლებ,
და არა მიიქცეს მკჳდრობაჲ ძეთა ისრაელისათაჲ ტომისაგან ტომისა მიმართ, რამეთუ თითოეული სამკჳდრებელსა შინა ტომისა ნათესავისა მათისასა შეეყვნენ ძენი ისრაელისანი.
და ყოველი ასული, მეძიებელი სამკჳდრებელსა ტომთა ისრაელისათასა, ერთისა მამისა მისისა დასისაგანისა იყვნენ ცოლებ, Page of ms. Ga: _ რაჲთა გამოიძიონ ძეთა ისრაელისათა თითოეულმან სამკჳდრებელი მამული თჳსი,
და არა გარდაიცვალოს წილი ტომისაგან ტომისა მიმართ სხჳსა, არამედ თითოეული სამკჳდრებელსა შინა თჳსსა შეეყვნენ ტომნი ძეთა ისრაელისათანი.
ვითარ სახედ უბრძანა უფალმან მოსეს, ესრეთ ყვეს ასულთა სალპაადისთა.
და იქმნეს მაალა და თერსა და ეღლა და მელხა და ნუა -- ასულნი სალპაადისნი, მამის ძმისწულთა მათთა,
დასისაგანთა მანასისი, ძისა იოსებისთა ეყვნეს ცოლებ, და იქმნა სამკჳდრებელი მათი ტომსა თანა დასისა მამისა მათისასა.
ესე არიან მცნებანი და სამართალნი და მშჯავრნი, რომელნი ამცნნა უფალმან ჴელითა მოსესითა დასავალით კერძო მოაბისა, იორდანესა ზედა, იერიქიოდ მიმართ.
