მი-თუ ვინმე-იყვანოს ცოლი და ითანამკჳდროს იგი, და იყოს, უკუეთუ ვერ პოვოს მადლი წინაშე მისსა, რამეთუ პოვა მის თანა უშუერი საქმე, დაუწეროს მას წიგნი განტევებისაჲ და მისცეს ჴელთა მისთა და განავლინოს იგი სახლისაგან თჳსისა.
... ... ... ..
... ... ... .. უკუეთუ მოკუდეს ქმარი მისი უკუანაჲსკნელი, რომელმან მოიყვანა იგი თავისა თჳსისა ცოლად,
ვერღარა ძალ-უც ქმარსა მისსა პირველსა, რომელმან განავლინა იგი, კუალად-ქცევით მიყვანებაჲ მისი Page of ms. Ga: 269r თავისა თჳსისა ცოლად შემდგომად შეგინებისა მისისა, რამეთუ საძაგელება არს წინაშე უფლისა ღმრთისა შენისა. და არა შეაგინოთ ქუეყანაჲ, რომელსა უფალი ღმერთი თქუენი მიგცემს თქუენ წილად.
უკუეთუ ვინმე მიიყვანოს ცოლი ახლად, არა განვიდეს ბრძოლად და არა მიეხოს იგი არარას საქმესა, უბრალოდ იყოს სახლსა შინა თჳსსა წელიწად ერთ, ახაროს ცოლსა თჳსსა, რომელი მიიყვანა.
არა იჴუთო წისქვილი, არცა ზედაჲ წისქჳლი, რამეთუ სულსა იჴუთავს ესრეთ.
უკუეთუ ჴელთ-იგდოს Page of ms. Ga: 269v კაცმან მპარავმან სული ძმათაგან მისთა ძეთა ისრაელისათა და მიმძლავრებელმან მისმან განყიდოს, მოკუედინ მპარავი იგი და მოსპეთ ბოროტი თქუენ მაგათგან.
იგულე, თავი შენი შეხებასა შინა კეთრისასა დაიცვა ფრიად ქმნად ყოველთაებრ შჯულისა, რომელსა მიგითხრობდენ თქუენ მღუდელნი ლევიტელნი, ვითარ-სახედ გამცენ თქუენ, დაიცევით ქმნად.
მოიჴსენე, რაოდენი უყო უფალმან ღმერთმან შენმან მარიამს გზასა ზედა გამოსლვასა თქუენსა ეგჳპტით.
თანამდები თუ იყოს მოყუსისა შენისა თანა რაჲვე თანანადები, არა შეხჳდე სახიდ მისსა ჴუთვად ნაჴუთევისა.
გარე დასდგე და კაცმან, რომელი მოვალე იყოს, თავით თჳსით გამოგართუას ნაჴუთევი გარე.
ხოლო უკუეთუ უპოვარებდეს კაცი იგი, არა დაიყენო სამოსელი მისი შენ თანა,
უკუნ-ცემით უკუნ-სცე სამოსელი მისი დასლვასა მზისასა და დაიძნოს სამოსლითა მისითა და გაკურთხოს შენ და შენი იყოს მოწყალებაჲ წინაშე უფლისა ღმრთისა შენისა.
არა დააკლო სასყიდელსა დავრდომილსა და მოქენისასა ძმათა შენთაგანისა ანუ მწირთა\განისასა, Page of ms. Ga: 270r რომელნი არიან ქალაქთა შინა შენთა,
მასვე დღეობით უკუნ-სცე სასყიდელი მისი. არა დაჰჴდეს მზე მას ზედა, რამეთუ დავრდომილი არს და მისდა მიმართ აქუს სასოებაჲ, და არა ჴმა-ყოს შენთჳს უფლისა მიმართ და იყოს შენდა ცოდვა.
არა მოკუდენ მამანი შვილთათჳს და ძენი არა მოკუდენ მამათათჳს, თჳთოეული თჳსითა ცოდჳთა მოკუდეს.
არა მოსდრიკო მშჯავრი მწირისა და ობლისა და ქურივისაჲ, არა იჴუთო სამოსელი ქურივისაჲ.
და მოიჴსენე, რამეთუ მწირ იყავ ქუეყანასა ეგჳპტისასა და გიჴსნა შენ უფალმან ღმერთმან შენმან მიერ. და ამისთჳს მე გამცნებ შენ სიტყუასა ამას ყოფად.
ჰმკიდე თუ სამკალსა ყანასა შინა შენსა და დაგიშთეს მუნ მჭელეული, არა მიიქცე მირებად მისსა, გლახაკისა და მწირისა და ობლისა და ქურივისად იყოს, რაჲთა გაკურთხოს შენ უფალმან ღმერთმან შენმან ყოველთა შინა საქმეთა ჴელთა შენთასა.
ჰსთულებდე თუ ზეთსა, არა უკუნ-იქცე მოცურევად უკუანა ლერძოთა შენთა, მწირსა და ობოლსა და ქურივსა Page of ms. Ga: 270v ეყვნენ, და მოიჴსენე, რამეთუ მსხემ იყავ ქუეყანასა ეგჳპტისასა. ამისთჳს მე გამცნებ შენ სიტყუასა ამას.
უკუეთუ ჰსთულებდე ვენაჴსა შენსა, არა მოჰკუფხლო იგი უკუანა კერძო შენსა, მწირსა და ობოლსა და ქურივსა ეყოს.
და მოიჴსენე, რამეთუ მსხემ იყავ ქუეყანასა ეგჳპტისასა, ამისთჳს მე გამცნებ შენ სიტყუასა ამას.
