და იქმნას თუ ცილობაჲ შორის კაცთა და მოვიდენ საშჯელად და განსაჯნენ და განამართლონ მართალი და განაცრუონ უღმრთოჲ.
და იყოს თუ ღირს წყლულებათა უღმრთოჲ, დაჰსუა იგი წინაშე მათსა და გუემონ იგი წინაშე მათსა უღმრთოებისაებრ მათისა,
რიცხჳთა ორმეოც\ითა Page of ms. Ga: 271r გუემონ იგი, არა შესძინონ. ხოლო თუ შესძინონ გუემად მისსა, ზეშთა ამათ წყლულებათასა უმრავლესნი, უშუერ იქმნეს ძმაჲ შენი წინაშე შენსა.
არა პირაღკრულ-ჰყო ჴარი მეკალოე.
უკუეთუ მკჳდრ იყვნენ ძმანი ერთბამად და მოკუდეს ერთი მათგანი, ხოლო თესლი არა იყოს მისსა, არა იყოს ცოლი მომკუდარისაჲ გარეულისა კაცისა არმახლობლისა, ძმაჲ ქმრისა მისისაჲ შევიდეს მისსა მიმართ და მიიყვანოს იგი თავისა თჳსისა ცოლად და თანაისახლეულოს Page of ms. Ga: 271v იგი.
და იყოს, ყრმაჲ, რომელიცა იშვეს, დაიდგინოს სახელსა ზედა აღსრულებულისასა და არა აღიჴოცოს სახელი მისი ისრაელისაგან.
ხოლო უკუეთუ არა ინებოს კაცმან მიყვანებად ცოლი ძმისა თჳსისაჲ, აღვიდეს დედაკაცი ბჭესა თანა ბერობისა მიმართ და თქუას: არა ჰნებავს ძმასა ქმრისა ჩემისასა აღდგინებად სახელი ძმისა თჳსისაჲ ისრაელსა შორის,
და მოუწოდოს მას ბერობამან მის ქალისამან და ჰრქუას მას, ხოლო მასნ წარმოდგომილმან თქუას: არა მნებავს მიყვანებაჲ მისი,
და მოუჴდეს ცოლი ძმისა მისისაჲ წინაშე ბერობისა, განუჴსნას ჴამლი მისი ერთი ფერჴისაგან მისისა და შეჰნერწყოს პირსა მისსა და მიმგებელმან ჰრქუას: ესრეთ ეყოს კაცსა, რომელმან არა აღაშენოს სახლი ძმისა თჳსისაჲ.
და ეწოდოს სახელი მისი ისრაელსა შორის `სახლი სანდალგანჴსნილისაჲ'.
იბრძოდინ თუ ორნი კაცნი ურთიერთას, კაცნი ძმისა თანა თჳ\სისა Page of ms. Ga: 272r და მივიდეს ცოლი ერთისა მათგანისაჲ განრინებად ქმრისა თჳსისა ჴელისაგან მცემელისა მისისა და განმყოფელმან ჴელისა თჳსისამან შეუპყრნეს მარჩბივნი მისნი,
მოჰკუეთო ჴელი მისი, არა ერიდოს თუალი შენი მის ზედა.
არა იყოს ვაშკარანსა შინა შენსა სასწორი და სასწორი დიდი და მცირე.
არა იყოს სახლსა შინა შენსა საწყეოჲ და საწყეოჲ დიდი და მცირე.
სასწორი ჭეშმარიტი და მართალი იყოს და საწყევოჲ ჭეშმარიტი და მართალი იყოს შენი, რაჲთა დღემრავალ იყო ქუეყანასა ზედა, რომელსა უფალი ღმერთი შენი მიგცემს შენ წილად,
რამეთუ საძაგელ უფლისა ღმრთისა შენისა ყოველი მოქმედი უსამართლოთაჲ.
მოიჴსენემ რაოდენნი გიყვნა შენ ამალეკმან გზასა ზედა, გამო-რაჲ-ხჳდოდე შენ ქუეყანით ეგჳპტით.
ვითარ წინააღგიდგა შენ და მოგკუეთა ბოლოჲ შენი მაშურალნი შემდგომად შენსა, ხოლო შენ გშიოდა და დაშურებოდე, და არა შიშინა ღმერთსა.
და იყოს, რაჟამს დაგაწყნაროს შენ უფალმან ღმერთმან შენმან ყოველთაგან მტერთა შენთა გარემოჲს შენსა ქუეყანასა შინა, რომელსა უფალი ღმერთი შენი მიგცემს შენ წილითა დამკჳდრებად მას, აღჰჴოცო სახელი მისი ცისქუეშისაგან და არა დაივიწყო.
