და იყოს, შე-თუ-ხჳდე ქუეყანად, რომელსა უფალი ღმერთი შენი მიგცემს შენ წილითა დამკჳდრებად მას, და დაემკჳდრო მას ზედა,
და მოიღო დასაბამისაგან ნაყოფთა ქუეყანისა შენისათაჲსა, რომელი უფალმან ღმერთმან შენმან მიგცეს შენ, და შთასდვა კარტალსა და წარხჳდე ადგიდ, Page of ms. Ga: 272v რომელიცა გამოირჩიოს უფალმან ღმერთმან შენმან წოდებად სახელი მისი მუნ,
და მიხჳდე მღდელისამ რომელი იყოს მათ დღეთა შინა, და სთქუა მღდელისა მიმართ: მიუთხრობ დღეს უფალსა ღმერთსა ჩემსა, ვითარმედ შემოვედ ქუეყანად, რომელსა ეფუცა უფალი მამათა ჩუენთა.
და მიიღოს მღდელმან კარტალი ჴელისაგან შენისა და დადვას იგი წინაშე საკურთხეველსა უფლისა ღმრთისა შენისასა.
და მიუგო და სთქუა წინაშე უფლისა ღმრთისა შენისა: ასურეთი დაუტევა მამამან ჩემმან და შთავიდა ეგჳპტედ და იმსხემა მუნ რიცხუსა მცირესა და იქმნა მუნ ნათესავად დიდად და სიმრავლედ ფრიადად და დიდად.
და გუაჭირვებდეს ჩუენ მეგჳპტელნი და დამამდაბლნეს ჩუენ და დამასხნეს ჩუენ საქმენი ფიცხელნი.
და აღვიღეთ ჴმაჲ უფლისა მიმართ, ღმრთისა მამათა ჩუენთაჲსა და იხილა სამდაბლე ჩუენი და შრომაჲ ცუენი და წირვეულობა ჩუენი.
და გამომიყვანნა ჩუენ უფალმან ეგჳპტით თჳთ ძალითა დიდითა და ჴელითა მტკიცითა და მკლავითა მაღლითა მისითა და ჩუენებითა დიდ-დიდითა და სასწაულებითა და ნიშნებითა.
და შემომიყვანნა ჩუენ ადგილსა ამას და მომცა ჩუენ ქუეყანაჲ ესე, ქუეყანაჲ, მდინარე სძისა და თაფლისაჲ.
აწ, ესერა, მოვედ და მოვიღე პირველი ნაყოფი ქუეყანისა ამის, რომელი მომცა მე უფალმან ქუეყანაჲ, რომელსა გამოსდის სძე და თაფლი, დაუტევნე იგინი წინაშე უფლისა ღმრთისა შენისა და თაყუანის-სცე მუნ წინაშე უფლისა ღმრთისა შენისა.
და იხარო მუნ ყოველთა ზედა Page of ms. Ga: 273r კეთილთა, რომელნი მოგცნა შენ უფალმან ღმერთმან შენმან და სახლმან შენმან და ლევიტელმან და მწირმან შენშორისმან.
ხოლო სრულ-ჰყო თუ განათეულებაჲ ყოვლისა ათეულისა ნაშრომთა ქუეყანისათაჲ წელიწადსა მესამესა, მეორე ათეული მისცე ლევიტელსა და მწირსა და ობოლსა და ქურივსა, და ჭამდენ მათ ქალაქთა შინა შენთა და იხარებდენ.
და სთქუა წინაშე უფლისა ღმრთისა შენისა: განვბიწენ წმიდანი სახლისაგან ჩემისა და მივსცენ იგინი ლევიტელსა და მწირსა და ობოლსა და ქურივსა მსგავსად ყოველთა მცნებათა შენთა და არა დავივიწყე.
და არა ვჭამე სალმობასა შინა ჩემსა მათგან, არა მივეც მათგან მკუდარსა, ვისმინე ჴმაჲ უფლისა ღმეთისა ჩემისაჲ, ვყავ, ვითარცა მამცნო მე.
გარდამოიხილე სახლით წმიდით შენით ცით და აკურთხე ერი შენი ისრაელი და ქუეყანაჲ, რომელი მიეც მათ, ვითარ-იგი ეფუცე მამათა ჩუენთა მო\ცემად Page of ms. Ga: 273v ჩუენდა ქუეყანაჲ, დამდინარე სძისა და თაფლისაჲ.
ამას დღესა შინა უფალმან ღმერთმან შენმან გამცნო შენ ქმნად ყოველთა ამათ სამართალთა და მშჯავრთა და დაიცვენით და ყვენით ესენი ყოვლითა გულითა თქუენითა.
ღმერთი გამოირჩიე დღეს ყოფად შენდა ღმრთად და სლვად გზათა შინა მისთა და დაცვად სამართალთა და მშჯავრთა და მცნებათა მისთა და სმენად ჴმისა მისისა.
და უფალმან გამოგარჩია შენ დღეს ყოფად მისსა ერად საზეპუროდ, ვითარცა-იგი გრქუა შენ დაცვად ყოველთა მცნებათა მისთა
და ყოფად შენდა ზეშთა ზენა ყოევლთა ნათესავთასა, ვითარცა გყო შენ სახელოან და საქადულ და დიდებულ, ყოფად შენდა ერად წმიდად უფლისა ღმრთისა შენისა, ვითარცა იტყოდა.
