და იყოს, ვითარცა წიაღ-ჰჴდეთ იორდანესა ქუეყანად მიმართ, რომელსა უფალი ღმერთი თქუენი მიგცემს თქუენ, უკუეთუ სმენით ისმინოთ ჴმისაჲ უფლისა ღმრთისა თქუენისაჲ დაცვად და ქმნად ყოველთა მცნებათა მისთა, რომელმან მე გამცნებ თქუენ დღეს, და მიგცეს შენ უფალმან ღმერთმან შენმან ზეშთა კერძო ყოველთა მათესავთა ქუეყანისთა
და მოვიდენ შენ ზედა ყოველნი ესე კურთხევანი და გპოვონ შენ, უკუეთუ სმენით ისმინო ჴმისა უფლისა ღმრთისა შენისაჲ.
კურთხეულ იყო შენ ქალაქსა შინა და კურთხეულ იყო შენ ველსა ზედა.
კურთხეულ იყვნენ შვილის წულნი მუცლისა შენისანი და ნაშრომნი ქუეყანისა შენისანი, Page of ms. Ga: _ მროწეულნი ზროხათა შენთანი და სამწყსონი ცხოვართა შენთანი!
კურთხეულ იყვნენ დასაკრებელნი შენნი და ნეშტებნი შენნი!
კურთხეულ იყო შენ შესლვასა შენსა და კურთხეულ იყო განსვლასა შენსა!
მოგცნეს შენ უფალმან ღმერთმან შენმან მტერნი შენნი, წინააღმდგომნი შენნი შემუსრვილად წინაშე პირსა შენსა! გზასა ერთსა შემოვიდოდინ შენდა და შჳდით გზით ივლტოდინ პირისაგან შენისა!
მოავლინოს უფალმან შენ ზედა კურთხევაჲ, საუნჯეთა შენთა ზედა და ყოველსა ზედა, რასაცა მიჰყო ჴელი შენი ქუეყანასა ზედა, რომელსა უფალი ღმერთი შენი მიგცემს სენ.
აღგადგინოს შენ უფალმან ღმერთმან შენმან თავისა თჳსისა ერად წმიდად, ვითარ-სახედ ეფუცა მამათა შენთა, უკუეთუ ისმინო ჴმისა უფლისა ღმრთისა შენისაჲ და ხჳდოდი გზათა მისთა.
და გიხილონ შენ ყოველთა ნათესავთა ქუეყანისათა, ვითარმედ სახელი უფლისაჲ წოდებულ არს შენ ზედა და მოშიშ გექმნენ შენ.
და განგამრავლოს შენ უფალმან ღმერთმან შენმან კეთილთა მიერ შვილის წულთა თანა მუცლისა შენისათა და ნაშობის ნაშობთა მიერ საცხოვართა შენთასა და ნაშრომთა მიერ ქუეყანასა ზედა, რომელსა ეფუცა ღმერთი მამათა შენთა მიცემად შენდა.
განგიღოს შენ უფალმან საუნჯე მისი კეთილი ცაჲ მიცემად წჳმაჲ ქუეყანასა შენსა ჟამსა თჳსსა, კურთხევად ყოველნი საქმენი ჴელთა შენთანი. და ავასხებდე ნათესავთა მრავალთა, ხოლო შენ არა ივასხებდე. და ჰმსთავრობდე შენ ნათესავთა მრავალთა, ხოლო შენ არა ბოლოდ, და იყო შენ ზენა და არა ქუენა, უკუეთუ ისმინო მცნებათა უფლისა ღმრთისა შენისათაჲ, რაოდენთა მე გამცნებ შენ დღეს დაცვად და ქმნად.
არა გარდაჰჴდე ყოველთაგან სიტყუათა, რომელთა მე გამცნებ შენ დღეს, მარჯუნ ანუ მარცხნ სლვად შედგომად ღმერთთა სხუათა მსახურებად მათდა.
და იყოს, უკუეთუ არა ისმინო ჴმისა უფლისა ღმრთისა შენისაჲ დაცვად და ქმნად ყოველთა მცნებათა მისთა, რაოდენთა მე გამცნებ შენ დღეს, და მოიწინენ შენდა მომართ ყოველნი ესე წყევანი და გპოონ შენ,
წყეულ იყო შენ ქალაქსა შინა და წყეულ იყო ველსა ზედა.
წყეულ იყვენენ დასაკრებელნი შენნი და ნეშტნი შენნი.
წყეულ იყვნენ შვილის წულნი მუცლისა შენისანი და ნაშრომნი ქუეყანისა შენისანი და მროწეულნი ზროხათა შენთანი და სამწყსონი ცხოვართა შენთანი.
წყეულ იყო შენ შესლვასა შინა შენსა და წყეულ შენ გამოსლვასა შინა შენსა.
გამოგივლინოს შენ უფალმან ნაკლულევანებაჲ და სიყმილიანობაჲ ყოველსა ზედა, რომელსაცა მიჰყო ჴელი შენი, რაოდენიცა-რაჲ ჰყო, ვიდრემდის წარგწყმიდოს შენ მწრაფლ ბოროტთათჳს ჴელ-ყოფათა შენთა მით, რამეთუ დამიტევე მე.
მოავლინოს უფალმან შენდამი სიკუდილი, ვიდრემდის მოგსპოლოს შენ ქუეყანისაგან, რომლისა მიმართ შეხუალ შენ მუნ დამკჳდრებად მისსა.
და გცეს შენ უფალმან უძლურებითა და ჴურვებითა და ცხროჲთა და განმწარებითა და კლვითა და ქახრწნილებითა და სიყჳთლითა. და მიგდევდენ შენ, ვიდრემდის წარგწყმიდონ შენ.
და იყოს შენდა ცაჲ ზეშთა თავისა შენისა რვალ და ქუეყანაჲ ქუეშე შენსა -- რკინა.
მოსცეს უფალმან წჳმად ქუეყანასა შენსა მტუერი და მიწაჲ ზეცით გარდამოვიდეს სენ ზედა, ვიდრემდის წარგწყმიდოს შენ ქუეყანისაგან, რომელსა შეხუალ დამკჳდრებად მისსა.
და მიგცეს შენ უფალმან დასახედავად წინაშე მტერთა შენთა. გზით ერთით შეხჳდე მათდა მიმართ და შჳდით გზით ივლტოდი პირისაგან მათისა, და იყო განთესულ ყოველთა შორის მეფობათა ქუეყანისათა.
და იყვნენ მკუდარნი თქუენნი შესაჭმელ მფრინველთა ცისათა და მჴეცთა ქუეყანისათა და არა იყოს დამაფრქულეველი.
გგუემოს უფალმან წუთხითა ეგჳპტისაჲთა საგურკლველთა შორის და სიმღიერითა ველურითა და საფხანითა, ვიდრემდის ვერ ძალ-გედვას შენ განკურნებად.
და გცეს შენ უფალმან განცჳბრებითა და ვერმხედველობითა და განკრთომითა განმგონებელობისაჲთა.
და იყო შენ მფეშუებელ შუადღე, ვითარცა ეფეშუებინ ბრმაჲ ბნელსა შინა, და არა წარგემართენ გზანი შენნი, და იყო შენ მიმძლავრებულ და დატაცებულ ყოველთა დღეთა შენთა და არა იყოს შემწე შენი.
ცოლი მიიყვანო და მამაკაცმან სხუამან მიიყვანოს იგი. სახლი აღაშენო და არა დაემკჳდრო მას შინა. ვენაჴი დაასხა და არა დასწიხნო იგი.
ზუარაკი შენი დაკლულ იყოს შენ წინაშე და არა შჭამო მისგან. კარაული შენი წარგიტაცოს შენგან და არა კუალად-გეგოს შენ. ცხოვარნი შენნი მიცემულ იყვნენ მტერთა შენთა და არა იყოს შენდა შემწე.
ძენი შენნი და ასულნი შენნი მიეცნეს ნათესავსა სხუასა და თუალნი შენნი არა ჰხედვიდენ მიმხედველნი მათდა და ვერ ეძლოს ჴელსა შენსა.
გამონაღებსა ქუეყანისა შენისასა და ყოველთა ნაშრომთა შენთა ჭამდეს ნათესავი, რომელი არა იცოდი, და იყო მიხუეწილ და ვნებულ ყოველთა დღეთა.
და იყო გულპებულ სახილავთა მიერ თუალთა შენთაჲსა, რომელთა ჰხედჳდე.
და მიგცეს შენ უფალმან სალმობაჲ ბოროტი მუჴლთა ზედა და სხჳლბარკალთა ზედა, ვიდრემდის ვერ ძალ-გედვას განკურნებად კუალითგან ფერჴთაჲთ ვიდრე თხემადმდე შენდა.
წარგასხნეს უფალმან შენ და მთავარნი შენნი, რომელნიცა დაგედგინნენ თავსა თჳსსა ზედა, ნათესავისა მიმართ, რომელი არა უწყოდე შენ და მამათა შენთა, და ჰმსახურო მუნ ღმერთთა სხუათა ძელთა და ქვათა.
და იყო მუნ მაგალითად და იგავად და მისათხრობელად ყოველთა შორის წარმართთა, რომელთაცა მიმართ წარგგზავნოს შენ უფალმან მუნ.
თესლი ფრიადი განიპო ველად და მცირედი შეიღო, რამეთუ შეჭამოს იგი მკალმან.
ვენაჴი დაასხა და მოჰქმნა და ღჳნოჲ არა ჰსუა, არცა იხარო მისგან, რამეთუ შეჭამოს იგი მატლმან.
ზეთისხილნი იყვნენ შენდა და ზეთი არა ჰპოვო ცხებად, რამეთუ უჟამოდ დამოსცჳვეს ნაყოფი.
ძეებ და ასულებ ისხნე და არა სარგებელ-გეყვნენ, არამედ წარისხნეს ტყუედ.
ყოველნი ხენი შენნი და ნაშრომნი ქუეყანისა შენისანი მოჴოცნეს გესლმან.
მწირი, რომელი იყოს შენ შორის, აღვიდეს შენ ზედა ზემო-ზემო, ხოლო შენ შთახჳდე ქუენა-ქუენა.
იგი გავასხებდეს, ხოლო შენ ვერ ძალ-გედვას ესე. იგი იყოს თავ, ხოლო შენ იყო ბოლო.
და მოიწინენ შენ ზედა ყოველნი ესე წყევანი და გდევდენ შენ და გეწინენ შენ, ვიდრემდის მოგასრულონ შენ და ვიდრემდის წარგწყმიდონ შენ, რამეთუ არა ისმინე ჴმისა უფლისა ღმრთისა შენისაჲ დაცვად მცნებათა მისთა და სამართალთა მისთა, რაოდენნი გამცნნა შენ.
და იყვნენ შენ შორის სასწაულნი და ნიშნი და თესლსა შენსა შორის ვიდრე საუკუნომდე
მის წილ, რომელ არა ჰმსახურე უფალსა ღმერთსა შენსა მხიარულითა და კეთილითა გულითა სავსებისათჳს ყოველთაჲსა.
და ჰმსახურო მუნ მტერთა შენთა, რომელნი მოავლინნეს უფალმან ღმერთმან შენ ზედა სიყმილითა და წყურილითა, შიშულობითა და ყოვლითა ჭირითა და დაგდვას საჴივი რკინისაჲ ქედსა ზედა შენსა, ვიდრემდის მოგსპოს შენ.
მოავლინოს უფალმან შენ ზედა ნათესავი შორიელი დასასრულით ქუეყანისაჲთ, რომლისა ბრდღუენაჲ, ვითარცა ლომისაჲ, და მიტევებაჲ, ვითარცა არწივისაჲ; ნათესავი, რომლისაჲ არა გესმა ჴმისა მისისაჲ,
ნათესავი შეუკდემელი პირითა, რომელსა არა დაუკჳრდეს პირი მოხუცებულისაჲ და ჭაბუკი არა შეიწყალოს.
და დაჭამნეს ნაშობის წულნი საცხოვართა შენთანი და ნაშრომნი ქუეყანისა შენისანი, ვიდრემდის არა დაგიშთინოს შენ იფქლი, ღჳნოჲ, ზეთი, მროწეული ზროხათა შენთაჲ და სამწყსოჲ ცხოვართა ცხოვართა შენთაჲ, ვიდრემდის წარგწყმიდოს შენ.
და ვიდრემდის აღდჴუარდოს შენ ყოველთაგან ქალაქთა შენთა, ვიდრემდის დაირღუენ Page of ms. Ga: 277r ზღუდენი შენნი მაღალნი და მაგარნი, რომელთა მიმართ შენ ესავ მათდამი ყოველსა შინა ქუეყანასა შენსა, და შეგაურვონ შენ ყოველთა შინა ქალაქთა შენთა, რომელნი მიგცნა შენ უფალმან ღმერთმან შენმან.
შეშჭამნე ნაშობის წულნი მუცლისა შენისანი, ჴორცნი ძეთა შენთა და ასულთა შენთანი, რომელნი მოგცნა უფალმან ღმერთმან შენმან, იწროებასა შინა შენსა და ჭირსა შენსა, შეგაიწროს რაჲ შენ მტერმან შენმან ქალაქთა შინა შენთა.
ჩჩჳლი შენ შორის და ფუფუნეული ფრიად ეშუროს თუალთა ძმასა თჳსსა და ცოლსა თჳსსა, რომელი იყოს უბეთა შინა მისთა, და დაშთომილთა შვილთა, რომელნიცა დაშთომოდინ მას,
რაჲთა მისცეს ერთსაცა მათგანსა ჴორცთაგან შვილთა მისთაჲსა, რომელთა ჭამდეს, არა დაშთომისათჳს მისდა არარას იწროებასა მას შინა და ჭირსა, შეგაიწროს რაჲ შენ მტერმან შენმან ყოველთა შინა ქალქთა შენთა.
ჩჩჳლი მდედრი თქუენ შორის და ფუფუნეული ფრიად, რომლისასა არა მიეღოს გამოცდილებაჲ ფერჴსა მისსა სლვად ქუეყანასა ზედა სიჩჩოებისათჳს, ეშურვოს თუალითა ქმარსა თჳსსა, რომელი იყოს უბეთა შინა მისთა, და ძესა და ასულსა თჳსსა,
და ნაშობსა თჳსსა, გამოსრულსა წყვილთაგან მისთა, და შვილი, რომელიცა შვა, შეჭამოს თჳსაგან ნაკლულევანებსიათჳს ფარულად ყოველთაგან იწროებასა შინა და ჭირსა შინა, რომლითაცა გაჭირვოს შენ მტერმან შენმან ყოველთა შინა ქალაქთა შენთა,
უკუეთუ არა ისმინოთ ქმნად ყოველთა სიტყუ\ათა Page of ms. Ga: 277v ამის შჯულისათა დაწერილთა წიგნსა ამას შინა შეშინებითა სახელისაგან პატიოსნისა ამის და საკჳრველისა უფლისა ღმრთისა შენისა.
და განსაკჳრველნეს უფალმან წყლვანი შენნი და წყლვანი თესლისა შენისანი, წყლვანი დიდნი და საკჳრველნი.
და მოაქციოს შენ ზედა ყოველი სალმობაჲ ეგჳპტისაჲ ბოროტი, რომლისა მოშიშ იყავ პირისაგან მათისა, და შეგეყვნენ შენ.
და ყოველი სნეულებაჲ და ყოველი წყლულებაჲ არადაწერილი წიგნსა შჯულისა ამისსა მოაწიოს უფალმან შენ ზედა, ვიდრემდის მოგსპოლოს შენ.
და დაგაშთინოს შენ ტიცხჳთა მცირედ ნაცვალად, რამეთუ იყვენით თქუენ, ვითარცა ვარსკულავნი ცისანი სიმრავლისთა, რამეთუ არა ისმინეთ ჴმისა უფლისა ღმრთისა თქუენისაჲ.
და იყოს, ვითარ-სახედ იშუებდა უფალი თქუენ ზედა მოსრულებად თქუენდა და განმრავლებად თქუენდა, ეგრეთვე იშთუებდეს უფალი თქუენ ზედა მოსრულებად თქუენდა და აღსპოლვად ქუეყანისაგან, რომლისა მიმართ თქუენ შეხუალთ მუნ დამკჳდრებად მისსა.
და განგთესოს უფალმან ღმერთმან შენმან ყოველთა მიმართ წარმართთა კიდითგან ქუეყანისაჲთ ვიდრე კიდედმდე მისსა. და ჰმსახურო მუნ ღმერთთა სხუათა ძელთა და ქვათა, რომელნი არა უწყოდენ შენ და მამათ შენთა.
არამედ წარმართთაცა მათ შორის არა განისუენო შენ, არცა იქმნეს დგომაჲ კუალისა ფერჴთა შენთაჲსა და მოგცეს შენ უფალმან მუნ გული ჭუვნეული და მოკლებულნი თუალნი და დამდნარი სული.
და იყოს ცხორებაჲ შენი დამოკიდებულ წინაშე თუალთა შენთა და გეშინოდის დღე Page of ms. Ga: 278r და ღამე და არა გრწმენეს ცხორებაჲ შენი.
განთიად სთქუა: ოდესმე იქმნეს მწუხრი? და მწუხრი სთქუა: ოდეს იქმნეს განთიადი? შიშისაგან გულისა შენისა, რომელთა გეშინოდის, და სახილავთაგან თუალთა შენთაჲსა, რომელნი იხილნე.
და მიგაქციოს შენ უფალმან ნავებითა ეგჳპტედ და გზასა, რომლისაჲ ვთქუ, არღა შესძინოთ ხილვაჲ მისი მერმე, და შესძინნეთ მუნ მტერთა თქუენთა მონებად და მჴევლებად და არა იყოს მომყიდელი.
ესე სიტყუანი Page of ms. Ga: 278v არიან აღთქუმისანი, რომელი ამცნო უფალმან მოსეს მიცემად ძეთა ისრაელისათა ქუეყანასა მოაბისასა, თჳნიერ აღთქუმისა, რომელი აღუთქუა მათ ქორებს.
