და მიუწოდა მოსემან ყოველთა ძეთა ისრაელისათა და თქუა მათდა მიმართ: თქუენ იხილენით ყოველნი, რაოდენნი უყვნა უფალმან ღმერთმან თქუენმან ყოველთა ეგჳპტისშინათა წინაშე თქუენსა ფარაოს და ყოველთა მსახურთა მისთა და ყოველსა ქუეყანასა მისსა:
განსაცდელნი დიდნი, რომელნი იხილნეს თუალთა შენთა, სასწაულნი და ნიშნი იგი დიდნი, ჴელი მტკიცე და მკლავი მაღალი.
და არა მოგცა უფალმან ღმერთმან თქუენმან გული ცნობად Page of ms. Ga: 279r და თუალნი ხილვად და ყურნი სმენად ვიდრე დღესამომდე.
და მიმოგავლინნა თქუენ ორმეოც წელ უდაბნოსა შინა. არა დაძუელდეს სამოსელნი თქუენნი და ჴამლნი არა განკფდეს ფერჴთა თქუენთაგან.
და პური არა შჭამეთ და ღჳნოჲ და თაფლუჭი არა ჰსჳთ, რაჲთა სცნათ, ვითარმედ ესე არს უფალი ღმერთი თქუენი,
და მოხუედით ვიდრე ამის ადგილისამდე და გამოვიდა სიონ მეფე ესებონისაჲ და ოგ მეფე ბასანისაჲ შემთხუევად თქუენდა ბრძოლითა.
Page of ms. Ga: 279v და დავსცენით იგინი და დავიპყართ ქუეყანაჲ მათი და მივეც იგი ნაწილად რუნებს და გადს და კერძოსა ტომსა მანასისსა.
და დაიმარხეთ ქმნაჲ ყოველთა სიტყუათა ამის აღთქუმისათაჲ, რაჲთა გულისჴმა-ჰყოფდეთ ყოველთა, რაოდენთა ჰყოფდეთ.
თქუენ სდეგით აქა დღეს ყოველნი წინაშე უფლისა ღმრთისა თქუენისა, ტომთმთავარნი თქუენნი და წერილის-შემომყვანებელნი თქუენნი, ყოველი მამაკაცი ისრაელისაჲ,
ცოლნი თქუენნი და შვილნი Page of ms. Ga: 280r თქუენნი და მწირი, მყოფი ბანაკსა შორის თქუენსა შეშის-მკოდელით თქუენითგან ვიდრე წყლის-მკრებელთა თქუენთამდე.
ნუმცა ვინ გარდაჰვალს მცნებასა უფლისა ღმრთისა შენისასა და წყევათა მისთა, რაოდენთა უფალი ღმერთი შენი აღსთქუამს შენდა მიმართ დღეს,
რაჲთა დაგამტკიცოს მისსა ერად და იგი იყოსშენდა და ვითარ-სახედ ეფუცა მამათა შენთა -- აბრაამს, ისაკს და იაკობს.
და არა თქუენ მხოლოთა აღგითქუამ მე აღთქუმასა ამას,
არამედ აქა მყოფთაცა თქუენ თანა დღეს წინაშე უფლისა ღმრთისა თქუენისა და არამყოფთა აქა თქუენ თანა დღეს.
რამეთუ თქუენ უწყით, ვითარ მკჳდრ ვიყვენით ქუეყანასა ეგჳპტისასა და გარდავლეთ შორის წარმართთასა, რომელთა თანა-წარჰვლეთ.
და იხილენით საძაგელნი მათნი და კერპნი მათნი -- ძელი და ქვაჲ, ვეცხლი და ოქროჲ, რომელნი იყვნეს მათ შორის.
ნუ არსა ვინა მამაკაცი, ანუ დისაცი, ანუ ნათესავი, ანუ ტომი, რომლისაგან გონებაჲ განდრეკილ არს უფლისაგან ღმრთისა ჩუენისა მისლვად მსახურებად ღმერთთა წარმართთა მათსა? ნუმცა ვინ არს თქუენ შორის ძირი, აღმომაცენებელი ნავღლისა და სიმწარისაჲ.
და იყოს, ესმას თუ სიტყუაჲ წყევისაჲ ამის და ზრახვ\იდეს Page of ms. Ga: 280v გულსა შინა თჳსსა, მეტყუელი: უშჯილეს ჩემდა იქმნა, ცთომილებასა შინა გულისა ჩემისასა ვიდოდი, რაჲთა არა თანა-წარწყმიდოს ცოდვილმან უცოდველი.
არა ინებოს ღმერთმან კეთილ ლხინებად მისსა, არამედ მაშინ აღატყდეს რისხვაჲ უფლისაჲ და შური მისი კაცსა მას ზედა და აღეთქუნენ მას ყოველნი წიგნსა შინა შჯულისასა, და აღჴოცოს უფალმან სახელი მისი ცის ქუეშისაგან.
და განყოს იგი უფალმან საბოროტოდ ყოველტაგან ძეთა ისრაელისათა, მსგავსად ყოველთა წყევათა აღთქუმისა, დაწერილისა წიგნსა შინა ამის შჯულისასა.
და ჰრქუან ნათესავსა სხუასა ძეთა თქუენთა, რომელნი აღდგნენ შემდგომად თქუენსა, და უცხოჲ, რომელი მოვიდეს ქუეყანით შორით, და იხილნენ წყლულებანი მისნი, რომელნი მოავლინნა უფალმან მის ზედა.
წუნწუბითა და მარილითა დაიწუას ყოველი ქუეყანაჲ მისი, არა დაითესოს, არცა აღმოეცენოს, არცა აღმოჰდეს მის ზედა ყოველი მწუ\ანე, Page of ms. Ga: 281v ვითარცა დაიქცა სოდომაჲ და გომორაჲ, ადამაჲ და სოვაიმი, რომელნი დააქცისა უფალმან გულისწყრომითა და რისხვითა.
და თქუან ყოველთა წარმართთა: რად უყო უფალმან ესრეთ ქუეყაასა ამას, რაჲ არს გულისწყრომაჲ ესე რისხვისაჲ დიდი?
და თქუან, რამეთუ დაუტევეს აღთქუმაჲ უფლისა ღმრთისა მამათა მათთაჲსაჲ, რომელი აღუთქუა მამათა მათთა, რამეთუ გამოიყვანა იგინი ქუეყანით ეგჳპტით,
და წარსრულთა ჰმსახურეს ღმერთთა სხუათა და თაყუანი\ს-სცეს, Page of ms. Ga: 282r რომელნი არა უწყოდნეს, არცა მეცნიერ იყვნეს მათდა.
და განრისხნა უფალი გულისწყრომით ქუეყანასა მას ზედა მოწევნად მას ზედა მსგავსად ყოველთა წყევათა ამის აღთქუმისათა, დაწერილთა წიგნსა შინა ამის სჯულისასა.
და აღიხუნა იგინი უფალმან ქუეყანისაგან მათისა გულისწყრომითა და რისხვითა და განძჳნებითა დიდითა ფრიად და განიყვანნა იგინი ქუეყანად სხუად ვითარცა აწ.
დაფარულნი უფალსა ღმერთსა, ხოლო ცხადნი თქუენ და შვილთა თქუენთა უკუნისამდე ქმნად ყოველთა სიტყუათა შჯულისათა.
