TITUS
Svan (Lashx) Texts ed. A. Oniani
Part No. 7
Previous part

Text: 7 
Page: 17 
Line: 31 
VII. მე̄`ჲსარობ ლა̄შხარეშ ი ეჩჷნღო̄ნა სახმახარ.


Line: 32       გამდრჳალ მუჟღორნეშ ხა̄ლ ზომხა̄ჲ ლა̄ნშყას ხაგნეხ ლე̄ნშყად, ეჩაცახან
Line: 33    აგნეხ მე̄ჲსარაჲს ი ა̄ნშყეხ მე̄ჲსარობნუნ. ლე̄ნშყად ჴან ი̄რჲა ხამ,
Page: 18  Line: 1    მა̄მ სერდე-მერდე ლი, მარა̀ ნაჳბეცჳოშ ჴანარე მჷქაფ ლა̄შხარ ხამარს
Line: 2    ხჳაგნედ ლა̄ნშყად ნე̄შკათეჟი. მე̄ჲსარობ ჩიგარ აღაბისა ლი საფტინუ̄შ.
Line: 3    ხა̄ლ თანაფ დე̄მ ხოქა̄ბი მიშლადეღს, ეჩა̀ ნახუმსე̀რ საფტი̀ნს დე̄მ
Line: 4    ხოქა̄ბი მე̄ჲსარობ. ჲერუ ნაგზას იცჳრე ყჳელჲერთე აღაბისა ი მანკჳი̄.
Line: 5    საფტინჟი ჲერუ ნაგზი ეჯემ ხეკლი̄ ყჳელჲერნუნ, ეჩქა̀ ლი მე̄ჲსარობ.
Line: 6    მე̄ჲსარჳბა სგობნე ლადეღ ჳობიშ ჩჳანჴდეხ ნე̄შკახენ ჩუ მე̄ჲსარაჲს ი
Line: 7    ჩჳადძი̄ნეხ ქორს, ჩჳაყჳფეხ, ჟოხო̄ზონნეხ ი ჩოხწებნეხ. სგა̄შურე̄მიშს
Line: 8    კეპლარს ანსყე̄ნნეხ ი ჩჳადშხუნნეხ. ეჯ ლადეღ ლიზობ მა̄ შიდ მე̄ჲსარა̄ჲშ.
Line: 9    ქა დეშსამამ მოშ ხეფდა̄ლხ ეჯ ლადეღ. ეჯღა ერე ჳოდ მე̄ჲსარჳბა
Line: 10    ლიმზჷრ დო იჩმინი მე̄ჲსარობს, ეჩქა̀დ მა̄ შიდ მე̄ჲსარა̄ჲ ლეღჳი ლიზობ.
Line: 11    მე̄ჲსარობ ლადეღ საფტი̀ნ ძინარს ჟენგენიხ დო̄სგ ალჲო̀ნჟი ზურა̄ლე̄ლ
Line: 12    ი ანნაყნეხ ჲედურდ კოჭო̄ლ დიარი̄ლარს თეჲ-ზუმე̄ლარს ეჩშელდს,
Line: 13    ჳოშა̄ჲ თე არი ქორისა. ჳოშა̄ჲ მა̄რე ჲედ ჳოშა̄ჲ ზურა̄ლ
Line: 14    ჲედ ჳოშა̄ჲ ბობშ ი̄რდი ქორს, ეჩშჷლდ ჲერუ დიარი̄ლ ენჷნაყი
Line: 15    თე̄რალე ნაშჷლდაჟი. თე̄რალე ნაშჷლდი კოჭო̄ლ დიარი̄ლარს, მე̄ჲსარა̄ჲ
Line: 16    ხამი თხუმს მჷჯაბს ჟესდე̄სხ გობთეჟი ი ხოშა ღჳაჟმა̄რე ქორა მახჳში
Line: 17    ლიმზჷრს იჩო, ხატ მე̄ჲსარაჲს ლეხჴჷ̄რი თე̄რალე ბედჟი. ჲერჳაჲ ალ
Line: 18    წესს დოშ იჩო, ეჯის თე̄რალ ეხზიგა ეჯ ზაჲსა. ლიმზჷრა̄ლჟი ყჷლეხ:
Line: 19    "ხატ მე̄ჲსარჲაშ, სი ლო̄გჳეშდ ი ლოგმეჴერ, თე̄რალე მაზიგ ოგქაბჷნ,
Line: 20    მა̄რე̄მი ნაშჳდობოშ ოგხი̄დ, კუმაშ ოგფიშირ!" მე̄ჲსარჳბჲელ ლი
Line: 21    ჩიგარ ხატ-მე̄ჲსარჲა ლიჴჷ̄რა̄ლ ი ლიმზჷრ. მე̄ჲსარა̄ჲ ლეღჳი ლიზობს
Line: 22    ენბინჷ̄ნეხ ი ეჯი მე̄სარჳბა მი̄შ ხეკჳეს, ქა̄ხა̄დეხ ლეზობდ. მე̄ჲსარობ
Line: 23    ლადეღ ძღჳდ გა̄ნგალ ლადეღ ლი ლჷლა̄შხუდ ი ძღჷდ წყჷლჲანდ
Line: 24    ხეხო̄ლიხ მე̄ჲსარჳბჲელ ლიგნა̄ლს. ლეღჳი ლიზობი გუ̄ნღა მჷრე̄ს
Line: 25    ხახჲა̀დხ ხოშა ნაღალდ მე̄ჲსარჳბა ლიგნა̄ლ. მე̄ჲსარა̄ჲ კეპლარსი̄ ეჯ
Line: 26    ლადეღ ანტყაბა̄ლნეხ ი ლიმზჷრჷნღო ლე̀ჲზობნეხ ლეღჳცახან. ლადეღჳშ
Line: 27    ჟი იხჳრჲელიხ სოფელისა ი ინყაჳა̄ლხ. აღბიერისა ეში̄ ლინყაჳა̄ლ ხჳაჲდინ
Line: 28    ხაზნახ. მე̄ჲსარჳბა სგობნე ჳობიშ ი ნანგაზა ჳობიშ, მე̄ჲსარჳბა
Line: 29    მი̄შჷნღო ერ ჳობიშ ანჴჷდენი, ეჯ ლადეღ ნებოზთე ნაღალდ მე̄ჲსარა̄ჲცახან
Line: 30    ნარდჳ გოჭს ათძი̄ნეხ, ჟანტყაბნეხ, ჟი ლიჯბი მა̄ შიდ ეჩა,
Line: 31    ეში ეში̄ მჷტყაბ ხეკჳეს ლე̄სეს. ჟი ლჷტყაბჷნღო იჩოხ ლიმზჷრს, ხემზჷრხ
Line: 32    ჯჳარ ჳობშჲაშს. ალ ჳობიშს, გოჭი ლიძჲენალ ლადეღს, ხოჩა
Line: 33    ჳობიშ ხა̄ჲშხა. მე̄ჲსარჳბა მი̄შენღო იგნი ხოჩა ჳობშა მი̄შ ი ეჯ მი̄შს
Line: 34    აღბა მი̄ში̄ ხა̄ჲშხა ჳოდ თჳეთჳნა დოშდიშნუნ. მე̄ჲსარობჷნღო მეჲად
Page: 19  Line: 1    ლეღჳ ხაკუჩ ერ ჯუღჳა̄ნდეს ჳოდ აღაბ ლე̄თნუნ. ალ მი̄შარქა მეჲად
Line: 2    ლინყაჳა̄ლ ლი სოფელისა, ლიშდრა̄ლ ი ლიღრა̄ლ ჩუ უქჳი̄ცად ლადეღჳშ
Line: 3    ჳოდ აღაბ ლე̄თნუნ. სოფელისა იჩოხ ჭიშხაშს, მახე ღჳაჟარ იბჷრგიელხ,
Line: 4    მეჩჲარ ინყაჳხ უშხჳა̄რცახან ი ამ კალიბდ ღჷრი ქა აღბიერ.
Line: 5    აღაბ ლე̄თ ძღჷდ ლეხჲადე ლე̄თ ლი მჷლა̄შხიშდ. ეჯ ლე̄თიშჳდ მე̄ჳარ
Line: 6    ღალ იმა̄რალ მაგ. ჲესჳაჲს ღალ მა ჩუ ე̄`სამა ხეღჳე̄ნიხ, ეჯ ლე̄თიშდ
Line: 7    დე̄მამ მოშ აზა̄რეხ. ჲას ხოხალ, თანაფ ეხჲა̀ ღალ მა̄რასა̄ მა̄დე, ი სერ
Line: 8    აღაბ ლე̄თ მანდს დე̄მშა იცჳრეხ გუ̄ჲსა. მაშე̄ნა̄მ ლეღჳს ხებზიხ, სერ
Line: 9    ამ ლე̄თჷნღო მა̄ შიდ თანაფნუნ ლეღჳ ი თანაფ ჲას ბედნჲერს ეხჲა,
Line: 10    ჲას ხოხალ, ეხჲა̄ მა̄დე, ი ამ ლე̄თ სერ ჟი იხჳრჲელიხ ეშხუდ ნა̄თჳარალ
Line: 11    მაგ, ჲერუ, სემი, ჳო̄შთხჳ, ჳოხუშდ მეზგე ჲედ ხოფშირა ჲედ ხომჷრხელდა
Line: 12    ი ეჯ ლე̄თ ი̄რი ყჳიჩე ლიტუ̄ლა̄ლნუნ ძღჷდ ჳორი̄რა. ხჳაჲ მე̄რმა-მე̄რმა
Line: 13    შუმ ი ლიღრა̄ლს ლე̄ქჳნეხ ეჯ ლე̄თ. ი̄რი ძღჷდ ლითრე არყიშ.

Line: 14       ჯჳინელდ ღჳინელ ხაღჳე̄ნახ ჩი̄ს აღაბ ლე̄თ ი ეჯის ლჷმკიდინხ ი
Line: 15    ლჷმთჷრინხ, მარა̀ ათხე̀ ჩი̄ს მა̄ ხო̄გ ღჳინელ ი ჲესჳა̄ჲ ხეგნი ღჳინელ
Line: 16    სგა̄ნ ქანაჴიდ, ჟენკედხ ეჩა̄შხენ. ლიკედს ხაყლეხ, მეზგახენ ერ ენყიდნეხ
Line: 17    კაკლარღა. ღჳინელ ემო̄ ხეგნი ჲესჳა̄ლას, ეჩქა̀ რანგს ხეთხე̄ლიხ. რანგს
Line: 18    ლჷღობ მეზე̄ლცახან გარ იკჳჲა̄ლჲელხ, ეჯღა ერე რანგ ეჯჲარს გარ
Line: 19    ხო̄გხ ფიშრე̄მინ ი იშგენს და̄ს ჟი უყდად. ჲერხი იყდიხ ლენჴე̄რას
Line: 20    თუს, ჴჷდეხ აგითე ლა̄შხთე ი ჟასყიხ რანგდ ი ჲედ მინ ლეჲთრეხ
Line: 21    ქორდ ი ჲედ ქა̄ჳდინეხ აღაბლე̄თ, ლესჳფელად ენკედხ, ენყიდნეხ აღაბ
Line: 22    ლე̄თიშჳდ სოფელ მაგ მინე მინეშჳდ, მაჲზუმჳა̄ჲ ხეწხიხ. ჲას მაჲ
Line: 23    ზუმ ხეკჳდი, ეჯი მიჩა მანდა ლი მჷყდი̄შ. აღაბ ლე̄თ ერ ღჳინელს
Line: 24    იკედხ ჲედ რანგს მეზგახენქა (ლიკედს ლიყდი ხა̄ჲშხა), ეჩა ნაფასდ
Line: 25    კაკლარ ხა̄რ ლეჳდი მჷყდის ჲედ სიმინდიშ ი ჲედ კჳეცნაშ ი ჲედ ქერიშ,
Line: 26    მარა̀ ათხე̀ მა̄დე ლაჲესჟი ლეთრე̄ლეშ, ალეს ერ ლუფხჳ ახჭიმ ი
Line: 27    ზაჳ ლადეღ ლიკლაჳჲერ ერ ქე̄დგათჳი, ეჩქა̀ს ლი ლეჳდი ლეთრე̄მი
Line: 28    მუჳდი̄შდ, მაჲზუმდი̄ ლჷრგაჳე ხი̄რი, ქაჲ ეჯზუმს გარ ლახო̄დნე კაკალს.
Line: 29    აღაბლე̄თ ხჳაჲ შუმ ი ლიღრა̄ლილიბრჲა̄ლ ი̄ქჳი მეჲღაბ ი მეზგამჷყ ი
Line: 30    ამ სახიშდ აღაბლე̄თჲა ვახშამი ქალჷგა̄თჳნჷღო ნამსედჳ დიარს ი
Line: 31    ლეღჳს, აჯაღ მა̄ჲმა ხეღჳე̄ნო̄ლხ, ეჯ ლე̄თ ტაბაგჟი ჩჳედი̄თა̄ლნეხ, მინე
Line: 32    მინე ნაჴიდჷხჷნქა, ქა მა̄ჲ ოხსედნო̄ლხ, ლიზობჷნღო ალეს ჩჳედი̄თნეხ
Line: 33    ლასგჳრად ეშხუდ ლუხჳრჲჷლე ნა̄თჳარალ ი ა̄დიესხ მინე მინე ნამსედჳს
Line: 34    აგჲართე. აღაბლე̄თ ჩიგარ მიშლე̄თ ხეხჳი.


Page: 20 
Line: 1       აღაბჷნღო დოშდი ძინარს ხა̄ჲშხა თჳეთჳნე დოშდიშ ჲედე ყჳელჲერი
Line: 2    დოშდიშ. თჳეთჳნე დოშდი ძინარს სგობლე̄თ მჷჲღაბა ნა̄თჳარალ
Line: 3    ჟი უდ ენხურჲელიხ ეშხუდ, ქა უდ ანნაყნეხ თაშა̄რ ტაბლარს, სგა
Line: 4    უდ ეთჴჷ̄რიხ ღე̄რბათს თანაფი შჳიდობდ ლიჲესს ი ჩუ უდ ესსგურიხ
Line: 5    ლაზობ-ლათრად ი ლალხნად, მარა̀ ათხე̀ ძღჲჷდ ლხინს დე̄მამ იჩოხ.
Line: 6    ლეღჳს ამ მი̄შ და̄რ იზბი, თაშო̄რას გარ ხათილხ, რიგ მა̄ ლი ყჳელჲერისა
Line: 7    ლეღჳი ლიზობ; ღედრა̄ლ დჲარალს ანყეხ ყჳელჲერისა̄, ჲეს
Line: 8    ქართოფილა̄რალს ანყენხ ი იზბიხ.

Line: 9       ლეღჳი აღაბლე̄თჷნღო ეშხუ ნაგზანღო ყჳელჲერი მი̄შ ანჴდენი ქა
Line: 10    ი ეჩა მიშ-ლე̄თ გჳა̄რ ყჳელჲერი აღაბლე̄თ. ყჳელჲერი აღაბლე̄თი̄ ეჩჟი
Line: 11    ი̄რი, იმჟი̄ ლეღჳი აღაბლე̄თ, ჩუ ლისგჳრე ეშხუდ ნა̄თჳარალეშ, ეჩჟი
Line: 12    დი̄რობ, იმჟი ლეღჳი აღაბლე̄თ, მაგ ეჯჟი ლი იშგენი̄, იმჟი მიჩა
Line: 13    ნანგაზა ლეღჳი აღაბლე̄თ ლას. ლიზობ-ლითრე ლეღჳუნქა ჩი̄მიშ.

Line: 14       მე̄რმა ლადეღ დოშდი ძინარს ყჳელჲერჷნღო უტკუნ დოშდიშ
Line: 15    ხა̄ჲშხა. ეჯ ლადეღ იბნი ლინჩა̄ლ. ეჯ ლადეღ ლა̄შხარს ხოხალხ
Line: 16    ლიმუ̄რყჳამა̄ლ. ძღჷდ გაჲნგალ უქმ ლადეღ ლი ლა̄შხისა ლიმუ̄რყჳამა̄ლ.
Line: 17    ეჯ ლადეღ ჲედურდ ჴეჳ ჩუ ინზო̄რი ჟაჴუნდური სუფისა.
Line: 18    ბობშ, ზურა̄ლ-ღჳაჟმა̄რე მჷლა̄შხ ძჳირდ ე̄რ ესკჳედნი ლიმუ̄რყჳამა̄ლს.
Line: 19    მანკჳი ლეჟა̄ ლა̄შხარ ანჴდენიხ ჟაჴუნდერი სუფთე, ეჩხენ ანჴდეხ
Line: 20    ლექჳა სანყურს, ბაჲრახალს ი ლექჳა ანჴდენიხ მაუნდთე (მაუნდ
Line: 21    სოფელ ლი). ეჩეჩუ ენბინი ლიბჷრგიელ. ლიკჳჲალუნა̄ლ ლიმუ̄რყჳამა̄ლ
Line: 22    ლადეღ ლი ძღჷდ ლეჟა̄შ ი ლექჳა̄ ლა̄შხარეშ. მანკჳი მაუნდს ენბინი
Line: 23    ლიბჷრგიელ, ჟა̄ნ ლა̄შხხენ ნაჴდჳარ ადშჷმნიხ სამყურს ი ჟანსყე̄ნნეხ
Line: 24    ძღჷდ მუსი მუ̄რყჳამს, საჯენდ ხოშა̄მ ნანკლათხან იჩოხ მუ̄რყჳამს.
Line: 25    ეჩეჩუ ესციყეხ ბა̄ჲრახს ი ეჩჷნღო ჟენბინი ლებჷრგიელ-კე̄სრობ. ეშხუ
Line: 26    კე̄სარ ჟა̄ნისა ხეყე̄ნიხ მაჩე̄ნე მებჷრგიელ ჲედ ხოფშირა ლეჟა̄ ლა̄შხარს.
Line: 27    ამჟი ჩჳა̄ნ უდ ხეყე̄ნიხ ლჷთიშ კე̄სარ მებჷრგიელ ლექჳა̄ ლა̄შხარს
Line: 28    ი ჟენბინი ლიბჷრგიელ. ხედი̄ ჩჳენდი კე̄სარ ჩჳა̄ნეშ ი̄რჲა̄ ჟა̄ნეშ, ეჩხა̄ჳ
Line: 29    ადკაფნეხ მუ̄რყჳამს ი ლჷწნე̄ჲ ეჯი̄ მიჩა მჷნჴრი სუმრა. სუმრა ხა̄ჲშხა
Line: 30    მენგრაჲ ნეცინ ხალხს, ეშხუ მახჳში ერ ხეჟღჳიხ სგობინ, ეჩის. ხაჭიმხ
Line: 31    სუმრა კე̄სარს ჲედ მებჷრგიელს ღოშგინისა. იმთე̄ჲ ედკა̄ფა̄ნ
Line: 32    მუ̄რყჳამ, ეჩის ი მიჩა სუმრას ძღჷდ ღალ ხოშგურხ ჴეჳისა, მინე კე̄სარი
Line: 33    ლირღჳე ი მინეშთე ნაღალდ მუსი მუ̄რყჳამი ლიკა̄ფე. ბაჲრახს
Line: 34    გამურჯობილ კე̄სარს ხაბშეხ შიარისა. ქა ლახჭიმ ეჩის მიჩა სუმრა ი
Page: 21  Line: 1    ადრი̄ნეხ მაუნდხენ ლეჟა ჟაჴუნდერი სუფთე. ეჩეჩუ ენბინი მაშე̄ნე
Line: 2    ლიბჷრგიელ. იმთეჲ იკა̄ფო̄ლნი კე̄სარ, ეჩხა̄ჳ აკა̄ფნიხ მუ̄რყჳამსი̄ ქა. მუ̄რყჳამ
Line: 3    იმთე̄ჲ იკა̄ფი, ხოჩა ზაჲობ ლოქ ლი ეჩხა̄ჳ ნაღალდ ეჯ ზა̄ჲსა. ჲეს
Line: 4    ლეჟა̄ მჷლა̄შხ აკა̄ფე ლექჳა̄შს ი ჲეს ლექჳა̄` მჷლა̄შხ აკა̄ფე ლეჟა̄შს, აშ
Line: 5    ხოშა ხჳაჲდინ ლექჳა̄ჳიშარ ლჷმრიღჳინხ ლეჟა̄ჳიშარს ლამუ̄რყჳამა̄ლჟი.
Line: 6    ჳო̄ბა ხანს მჷსსა̄შ ჲეჯაშთა̄ნ გოჩშა მებჷრგიელ მა̄ ლჷმარდ ლა̄შხა
Line: 7    ლამუ̄რყჳამა̄ლისა, ეჯი ხასრინა ჩი̄ს ლაბჷრგიელისა.

Line: 8       ლიბჷრგიელ ეჯემ ქე̄დგა̄თჳ, ეჩჷნღო იჩოხ ხოჩა ღჳაჟარ ლჷლა̄შხუ
Line: 9    წესარს. წესარ ჳობა შუმიშ ლიხ, ჟახა ლჷმდად უსგჳა̄მთექა: წესარ ლიხ
Line: 10    ჩულეჩომ ლიმუ̄რყჳამა̄ლ ლადეღ ამშელდ: 1. ადრეკილაჲ, 2. მე̄ლჲაჲ
Line: 11    ტელე̄ფჲაჲ, 3. კჳირჲა (ლეჟაჳ უშკჳი ლაჩმუშ), 4. ჭიშხაშ,
Line: 12    5.იჲაჳქალთი-ბეჲბუცია, 6. ლიღრა̄ლ ი ლიბრჲა̄ლ, 7. მორილ, 8. რერაშა.

Line: 13       1. ადრეკილაჲ ლი ალე: მჷჭშხაშჲერ ესგენიხ ჲეშდ მა̄რე, არა
Line: 14    ეშხჳხენ ი არა მე̄რმახენ, ჩიქ ეშხუ წყება ლე̄ქჳნეხ ამჟი:

Line: 15       "ადრეკილაჲ ოგჩიდაჲ ო̀გჴიდა" _

Line: 16       ადრეკილა წეჳიდა და მე̄ჳიდა.

Line: 17       ალ ქართულ ლე̄ქჳისს ლე̄ქჳნეხ მე̄რმე წყება არა მა̄რე. ამჟი ლიცა̄დუნუშ
Line: 18    არა მა̄რე ლუშნუდ ყჷლნი ეშხუ წყება ი მერმე წყება არა მა̄რე
Line: 19    ლუ̄ლჩხუმად:

Line: 20       "ა̄ ისგჳეშთან ღჳაჟარს თხუმჳარ ქა ჟეღიშ კოლილს ხოცჳე̄ნი̀დ ი
Line: 21    ხოცჳე̄ნიდ" *.

Line: 22       თქჳენისთანა კაცებს თაჳზე ძაღლის ძღნერი ასხიი̄ა̀ ი ასხი̄ა̀.

Line: 23       "ა̀ ისგჳე̀შთან ღჳაჟა̄რსა̀ მათუშ კოლიდ ხაცო̄მა̀ხ ი ხაცო̄მა̀ხ" _

Line: 24       თქჳენისთანა კაცებსა მათუს ძღნერი აცხია და აცხია.

Line: 25       "ა ისგჳა̀შთან ნიგბა̄ქა̀ ი ნიგბა̄ქა̀ ტიაშ კოლილ ხაცო̄მა̄ ი ხაცო̄მა̀" _

Line: 26       თქვენისთანა ბიჭებჷთა შუბჷლებზე-ი̀ შუბჷლებჷზე ტიას ძღნერი
Line: 27    აცხი̄ა̀ ი აცხი̄ა̀.


Line: 28       სერ ალეს ეხჭემნიხ ნიქჭას, აყბას, ფათჳარს, ბარჯა̄ლს, გუს ი ჩი̄ს
Line: 29    მა̄რე̄მი ასჳს ქე̄ნშჷლჷდნიხ რიალჳშ. ალე ლი ლჷლა̄შხუ ადრეკილაჲ.

Line: 30       2. ათხე̀ მე̄რმე. მე̄ლიაჲ ტელე̄ფია: ეშხუ მა̄რას ჩჳათკედხ შარჳალს
Line: 31    ი არშულს თელდ, ჴჳემ-ყურნა ქა ხოწჳა. ეჯ მა̄რას ღოშგინ მე̄რმე მა̄რე
Line: 32    ლეხგუდრი, ეჯის აჯაღ მესმე ლოშგინხენ, ეჯის უდ მეჳშთხჳე, ღო
Page: 22  Line: 1    მოჳხუშდე, ღო მეჳსგჳე ი ჳოშა̄ჲ ი̄რიხ, ეჩშელდ, ჲედ ხოფშირა ი ჲედ
Line: 2    ხომჷრხელდა. ღოშგმეშარ სგობნე არშლურ მა̄რას, ჴჳემ-ყურნა ერ
Line: 3    ხოწჳა, ეჯის ხოქზუნეხ ღოშგინისა ი ყჷლეხ: "მე̄ლიაჲ ტელე̄ფია, ჲოჰ-
Line: 4    ჲოჰ!" ჴჳემ-ყურნა ეჯ სგობნე მა̄რას ტოტისა ხეკჳეს ხოყდა̄ნე̄ნდეს.
Line: 5    ტოტისა კჳედელ ხუღჳა ი ერ ლოხქუზნიხ, ეჩქა ლახსხჳეპნე
Line: 6    ღოშგმეშარს მუქზუნა̄ლას ეჯ კჳედელს.

Line: 7       3. ათხე̀ მესმე კჳირიაჲ ღერთა ლიღრა̄ლ ლი. დე̄სამა სასოფლო
Line: 8    ლიმზჷრ იჩმი̄ნი ეჯჟი, ერე მანკჳი კჳირიაჲ მო̄ ლე̄ქჳეხ. კჳირიაჲ
Line: 9    ლა̄ქჳი̄სჟი უშკჳს მაგ ლეჟა იჩო ი ეჯჟი ყჷლეხ კჳირიაჲს. ალე ძღჷდ
Line: 10    ლჷჴჷ̄რა̄ლ ლიღრა̄ლ ლი ღერთაშ. ეჩა ლა̄ქჳი̄სჟი მაგ უსტა̄რუნს ი̄რენი ი
Line: 11    ფაყჳარ ჩუ ლჷკი̄დ ხა̄რხ ჩი̄ს. ალე ჯჳინელ მა̄რე̄ლს გარ ხაშყიდხ, ოდო
Line: 12    ათხე̀ მა̄რე̄ლ იშგენ ლიბრჲალს ჩი̄ს ქა ყჷლეხ, მარა̀ კჳირიაჲს დეშ
Line: 13    ყჷლეხ. ჯჳინელ მა̄რე̄ლ ცჳირხ ათხე̀ კჳირიაჲ მჷ̄ქჳი̄სალა ჲედურდ
Line: 14    ლა̄შხისა ჳო̄შთხჳ, ჳოხუშდ მა̄რე, სერ მა̄დე. ალჲარ ლიხ: ბანი მუ̄ქჳი̄სდ
Line: 15    სასა̄შხენ გიგიშა თაფუ ი როსტომაჲ ბერაძე ი ლეჟა̄ ლაშხხენ ჯაბუ
Line: 16    ყაფოშა, სასო ლეკოშა, ნასო ბაპშა ი ჳონი ჳონჲა̄ნშა. ალჲა̀რს გარ
Line: 17    ხაშყიდხ კჳირიაჲ. აშ ჩო̄ლურსი̄ ჩუ ხოხალხ კჳირიაჲ. ეზარ ი̄რი,
Line: 18    კჳირიაჲს ერ დო̄მ აქრაჳდეხ სგა̄ჳი ლჷ̄თორ მა̄რე̄ლ. ხჳინუკოჳდ შჳანარ
Line: 19    ერე ალე სგე̄დი̄რე̄ნდეს ი მო̄დ ედქარჳე̄ნდეს.

Line: 20       4. ჭიშხაშჟი ჩი ნუკჳი ლიღრა̄ლს ყჷლეხ: ამირანი ამბაჳს, ყურშაჲს,
Line: 21    დიდებ-დიდებ თარიგძელარს, ჳოჲ ლილე ი სანადიროს მივიდოდი
Line: 22    ი აჯაღ იშგენს ამ კალიბარს.

Line: n.1    ხოცჳე̄ნი̀დ ი ხოცჳენი̀დ [ასხი̄ა̀ ი ასხი̄ა̀] ლაბრჲალუშ ალე ლექჳი̄ს ^



Line: 23 
5. ი~აჳქალთი̄ ბე~ბუცია,


Line: 24     სო~ფელქალთი̄ შუ~შპარია,   ქალაქს ჩაგვიგზა~ნიაო,
Line: 25     შუშპარ ჩუბენ ქჳიანია,   ქა~ლაქური დე~დლებიო
Line: 26     ქჳიან ჩჳენი მოყვარეა,   ადი~ა~ნ და ჩა~დიანო,
Line: 27     მო~ყვრის მოყვარულია.   ხუცის ცოლთან ჩადიან,
Line: 28     მო~კლეს ხვარამძი~ანია,   ხუცის ცოლი პურს აცხობდა,
Line: 29     ე~ლია და მე~ლიაო,   თანუშია წყალს უსხამდა,
Line: 30     ახლა რაჭა ჩვე~ნიაო,   დედაბერმა გააკუა,
Line: 31     ვე~ნახისა სთვე~ლიაო,   ჯამ-ჭურჭელი დაამტვრია,
Line: 32     ჩი~ტი მოგვიწვე~ლიაო,   ციხეს თავი გადასტეხა,
Line: 33     ა~ხლა რაჭა ჩვე~ნიაო,   დადიანი გააქცია,
Line: 34     კათხაც ჩაგვიწკე~პნიაო,   გურიელი გააბრუნა.



Page: 23 
Line: 1       6. ლიღრა̄ლს ი ლიბრჲა̄`ლს ხჳაჲ. ნუკჳიშს ყჷლეხ. შუშპარს იჩოხ
Line: 2    ღჳაჟარ ი ზურა̄ლე̄ლ შუშპრეხ, დაჳრას ი ბუწყანტს ხატსიხ ი აშმუნეხ,
Line: 3    ტაში̄ ხოხალხ ლაშუშპარჟი.

Line: 4       7. მორილ ხა̄ჲშხა ეჯის ერე ჭიშხშეხ უსგჳა მა̄რე, გიმჟი ხო̄გხ
Line: 5    ჭიშხარ, მაჲ საკჳრელ ლი, ი ეჯჲარე ბარჯა̄ლთეჟი ჟი უდ ღჷჳრიხ,
Line: 6    აჯაღუდ ისგჳა მა̄რე იჭიშხშეხ ამჟი: "მორილ მიაქე̄`ლა, ჟი̄ ეჯასიპჷნედ".
Line: 7    ჩუბოჳიშარ ლე̄ქჳნეხ. ათხე̀ ჟიბოჳიშარ ლე̄ქჳნეხ: "ჟი̄ ეჯაჯიჯჳნედ".
Line: 8    სერ ჩუბეშარ: "მორილ მიაქე̄ლა, ჩჳეჯსაქადნედ, ფოყს ეთგიბედ!"
Line: 9    სერ ჟიბეშარ: "ჟეჯაჯიჯჳნედ, ბარჯა̄ლს აჯატყიცჷნედ". ათხე̀
Line: 10    ჩუბეშარ: "მორილ მიაქე̄ლა, თანაფ შჳიდობდ ოგჳაჲენა. ხონკჳი̄
Line: 11    დოშდიშ-ყჳელჲერი დოშდიშ ჩოგჳე̄შდჷნ!" ეჯ ლადეღ ბერო̄ლს ლჷმსყეინხ
Line: 12    ლა̄შხარ, თხუმჟი ხანცო̄ლნახ მა̄რას ცხიკო̄ლი̄ლს, ჩუბაჳ ჴჳემ-ყურნას
Line: 13    მეგმიშს ხასყე̄ნნახ ძღჷდს ი ში̄სა მეგმი დაშნაჲს ხაჳდინახ ი ისკნა̄ლდა
Line: 14    ჲეზჳარისა, ბურდალ ხეჭო̄ნო̄ლ თხუმქა იშგნა̄გ ი ლასკნა̄ლჟი ტუ̄ლნი
Line: 15    ჰო̄პუპუ-ჰო̄პუპუ. დაშნაჲს ჴჳემჟი ლჷმშე̄რინ. დაშნაჲ ლჷღაფ ლჷმა̄რ
Line: 16    შიხჳშ. ბერო̄ლ ჰო̄პუპუ ერ ქე̄ხჭემნო̄ლ, ლა̄შხს მეზგაჟი ლეჳდი ხა̄რ
Line: 17    ეჩა მჷნჴრალა̄შდ საციქჳ. ჲედ ლჷგრალ ჲედ უსკჳარ ი ჲედ თაშ
Line: 18    ჲედ ლჷჯმარე. ჟი ერ ენხურჲელო̄ლ ჳობაშ კეთილ თელდ ლა̄შხისა
Line: 19    ნაზორ, ჩჳესსგურო̄ლხ ეშხუდ ბერო̄ლ ი მიჩა მჷნჴრა̄ლა ი იჩმინახ
Line: 20    ხინობს.

Line: 21       მე̄ჲსარობჷნღო ჳოდ უტკუნ დოშდიშნუნ მაგ ამჟი გჳიხალ ლა̄შხარს.
Line: 22    სერ ამჷნღო იგნი ლინჩა̄ლ ი ლინჩა̄ლისა ჟი იტბიდი ლა̄შხისა,
Line: 23    ლითო̄დრი̄ მი̄შჷნღო ი ლეშდაბს ხეთხე̄ლიხ ი იმა̄რა̄ლხ ლაჴან-ლალა̄შჲად.
Line: 24    ლითო̄დრი̄ მი̄შისა იზჲარებიხ, ლილოცაჳა̄ლ ლი ეჯ მი̄შისა
Line: 25    ლითო̄დრი̄ საფტინნუნ. საფტინს ლითო̄დრის ზიარებას ხაკდუნეხ
Line: 26    მჷლოცაჳა̄ლას ბაპარ ი ჩუ ისგჳრიხ ზიარებჷნღო. ეშხუდ მაგ მოზჲარება
Line: 27    მინე ლჷბაპდ ი ეხე̄რიხ ხინობ. ნა̄ყუნჳარს ანჴდეხ მე̄რმა-მე̄რმა შუმიშს,
Line: 28    ქჷნშა̄რალს ანჴდეხ, ტაბლარს ანჴდეხ, ბაპ ჩჳადჯგირნე ტაბლარს
Line: 29    ი ჩჳესჩოქჳი მაგ ღერთა ლაჴჷ̄რა̄ლჟი, ტაბლარე ლაჯგირჟი ი
Line: 30    ეჩანღო ტაბლარს ბაპს ლახო̄დნეხ ი ჩჳესსგურიხ სადილდ.
Line: 31    ნასდილობენნჷღო მაგ ჩუ ფხეჟნიხ მინე მინეშჳდ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.