TITUS
Svan (Lashx) Texts ed. A. Oniani
Part No. 8
Previous part

Text: 8 
Page: 24 
Line: 1 
VIII. ლინჩა̄ლ ლა̄შხისა.


Line: 2       უტკუ̄ნ დოშდიშჷნღო, ლიმუ̄რყჳამალ ლადეღ ერ ლი ეჩჷნღო, ლინჩა̄ლ
Line: 3    გჳა̄რ ლა̄შხარს თანაფნუნ. ლინჩა̄ლისა ღჳაჟარ მეჩდე ლიხ ლაქმათე
Line: 4    ქუთა̄შთე ი აგის ეშხჳს გარ ცურეხ ზექი მჷჴდას ი კუმში მჷზნა̄ნის
Line: 5    მჷკა̄რიელის. ლუნთისა ლიზქინქა დე̄სამა გჳეშ ლი ი აგის ერ ადჷ̄გე̄ნდეხ,
Line: 6    ღჳაჟარ ნაქიმი უჴი̄დად ღო გადასახადს დეშ ღალ იმშგჳა̄ნეხ ღო ი
Line: 7    ლერქულ სედნიხ აგის მერდა̄ლა ნაქჳთა̄შს ედო̄მ ანჴდეხ ღჳაჟარ. ეჯჲარე
Line: 8    ლიჴედს ქუნუშ ახღელიხ აგი̄შარ. აგის მესდე მა̄რე ლინჩა̄ლისა ზექს
Line: 9    ჴჷდე ი ლელფხჳად ლიჴნი-ლილა̄შის ხემა̄რა̄ლ. ქორს მა̄რე̄მი უცჳი̄რად
Line: 10    მა̄ ხაყა ლუნთისა, ქორალს ძღჷდ მუს ერ ჴედნი, ულღაჲად მა̄
Line: 11    ხაყახ ი ღჳაჟ-მა̄რე ემო̄დ ი̄რდი აგის ჲარ ღალ ანლაღი̄. ლინჩა̄ლისა
Line: 12    გჳიხალ ლა̄შხს ლილა̄შუნალ. ლილაშუნალ ლი უტკუნ დოშდიშჷნღო.
Line: 13    მე̄რმა საფტინჟი, ლითო̄დრი̄ საფტინი ნანგაზა საფტინს. ეჯ ლადეღ
Line: 14    ანყეხ კჳეცნა დიარიშს დიარალს ნამშაჳი ლიჳზერე̄ ბედჟი. ხაკუჩერ
Line: 15    ანნაყახ ჩინუკჳიშ მურგჳალ დიარ. კჳეცნა შდა̄მი მაჯო̄ნ დიარ, სიმინდი
Line: 16    ტარო̄ მაჯო̄ნ, ლაღქანა̄ მაჯო̄ნ, ღენწუში მაჯო̄ნ. მა̄ჲ სახიში̄ ჲედ
Line: 17    ლამშიჳა̄რ ხუღჳახ ჲედ ნამშაჳ ლი, ეჯ სახი დიარალს ანყეხ, ჟი ხამზჷრიხ
Line: 18    ჯგჷრა̄გ ლილა̄შუნე̄შს ნამშაჳი ბედჟი, ერე უზმად ოგჴეს მაჴედ. ჩუ იზბიხ
Line: 19    დიარალს. ალე ლი ლილა̄შუნე̄ ლადეღ. ალ ლადეღ ბაპს მა̄მ ხო̄ჲრა
Line: 20    უქმდ, მარა̀ ლა̄შხარს ძღჷდ უქმ გჳა̄რ ეჯ ლადეღ ჩიგარ. გჳიხალ აჯაღ
Line: 21    უქმ ლინჩა̄ლისა ისგლინინჩა̄ლისა. ეჯი̄ ძღჷდ უქმ ლი. ეჯ ლადეღ
Line: 22    ტაბლარს ანყეხ უშკუბარდ ი ეჯჟი უშკუბარდ ხაკუჩ ლალე̄მახ, ჟი̄
Line: 23    უშკუბარდ ლახმეზრიხ, ტოტარს გარ აკჩენჷნიხ ჟიბაჳ ი ქა დეშ იშდა̄ლხ.
Line: 24    ჩუ̄ი უშკუბარდ ლეჲზობნეხ. ლაზობჟი ჲერჳაჲ ქე̄ნშდაი, შიშდ ქო̄თღე̄შხ
Line: 25    ტაბჷლს ი მე̄რმე̄ლ ლეჲზობნეხ ქა მჷშდა̄ლე̄მი ტაბჷლს. ლამზჷრა̄ლჟი
Line: 26    ყჷლეხ: "ჯგჷრა̄გ, სი ოგჳაჲ თანაფ შჳიდობდ!" ოგმურჯ ლიჴნი-ლილა̄ში
Line: 27    ი მადილ ჯე̄რი. ისგლინჩა̄ლჷნქა გჳიხალ უქმ ლინჩა̄ლისა აჲა
Line: 28    ბაჲა ი ურჲალე ჳობიშ. ალე ლი ლინჩა̄ლი ამბაჳ ლა̄შხეშ.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.