TITUS
Svan (Lashx) Texts ed. A. Oniani
Part No. 9
Previous part

Text: 9 
Page: 24 
Line: 29 
IX. თამფიერ ლა̄შხისა.



Line: 30       თანაფი ლიჴედს ეჯჟი ხეხჲადა̄ლხ ერე ამჷნ ხოშა ლეხჲადე დე̄სამა
Line: 31    ჴედნი ზაჲსა. ჩი̄ს ხეკჳეს ლეთნაფ ლერექჳ მახე ხა̄ქჳდეს, ჲერხის
Page: 25  Line: 1    ქუთა̄შხენ ნაჴიდ ი ჲერხის აგის ნაშხებ. სახრებთე მე̄ზი ჟენრექჳი მაგ
Line: 2    მახე ლერქჳალშჳ ი ადრი̄ნეხ სახრებთე, თჳით მუტჳარს შიდ ლეჲყედნიხ
Line: 3    სახრებჟი ლეტჳრენიდ, თჳით მუტჳარს ლჷდგარუს ხოტჳრენიხ
Line: 4    საფლაჳჟი̄ნ. სახრებ ერ ქე̄დგა̄თჳი, ეჩჷნღო ხომზჷრიხ უშხჳა̄რ "ქრისდე"
Line: 5    ჲედ "ქრისდე ადგა", მე̄რმე ლახტიხე: "ადგა ჭიშმარიტად". ჩჳანჴდენიხ
Line: 6    სოფელთე მინე აგითე, ჟენმეზრიხ ქრისდე̄ ადგომი ლიმზჷრს, ჟანმა̄რნეხ
Line: 7    ლეზობ-ლეთრას: ლეღჳს ხამიშ, თამფა̄ჲშ, ლორს, ქათალს მჷჯაბს,
Line: 8    წჷრნი ლჷგრალს, ტაბლარს, აშ შჳეთარს, არაყს სტამა̄ნშიჳ ი ჟადინეხ
Line: 9    საყდრი სუფთე ი ჟოსჯგირნეხ ტაბაგს ლჷდგარუს, მჷჯგრი ბაპს
Line: 10    მიჩა საწესს ლახო̄დნეხ ლეჯგრიხენქა, ეშხუ თაშა̄რს, ეშხუ შჳეთს, ეშხუ
Line: 11    ნახჳტ ლეღჳს ი ეშხუ ჭიქ არაყს. ეჩჷნღო ლჷჯგირ ტაბაგთე აწი̄ნე ეჩე
Line: 12    მერდა მესჳფელას. ეჩჷნღო ეჯჲარ ერ ადჯგირნეხ, ეჯჲარ ლახწი̄ნეხ
Line: 13    მანკჳი̄ მჷწჲენის ი ამჟი ი̄რი ხინობ სუფისა კაჩუშ ჩუუსგჳრად. სუფხენ
Line: 14    ჩჳანთტხენიხ აგჲართე ი ეჯ ლადეღ ინყაჳა̄ლნიხ სოფელისა ი ჲედ
Line: 15    იღრა̄ლნიხ ი იბრჲალნიხ. მე̄რმა ლადეღ თამფა დოშდი ძინარს ანნაყნე
Line: 16    მაგ ტაბლარს ი ადინეხ ქჳიშთე.

Line: 17       ქჳიშ საყდარ ლჷგ თამარ დედჳფალი ნაგემ. ლიმზჷრ ი სკარობ ეჩე
Line: 18    ხოხალხ დოშდი ლადეღ თამფაშ. ალ საყდრი მჷგემ ჴელჳანდ ჳონჲა̄ნშა
Line: 19    ხოშა ქორონო ხეკჳეს ლჷმა̄რე̄ლას. ჯჳინელ ამბაჳდ ა̄მბჳიხ ამჟი. ეჯ
Line: 20    ქორონო̄შდ მაბჟა ტოტი̄ ქო̄თქჳი̄ცახ ი ათხე̀ ლაჲრაკდ არი ლა̄შხისა.
Line: 21    ქჳიში საყდარ სასა̄შრეშ ლი. ლეჟა ლა̄შხარს მა̄მ ხოგადხ ეჩხა̄ჳ, აშ
Line: 22    ჴედნიხ ლამზჷრდ ტაბლარსი̄ ჴჷდეხ.

Line: 23       ჟი ერ ენხურჲელი მაგ ქჳიში სუფისა, ხოჩა ღუნს ჩჳადძი̄ნეხ,
Line: 24    აგიხენ ნაჴიდ ლეზობ-ლეთრას ენკედხ. ჩიქე ტაბლარს ი არაყს ლახმეზჷრიხ
Line: 25    ქჳიში თა̄რიძელს, ეჩანღო ქა̄ნჲესხ ბაჲრახს, ხატს თა̄რიძელიშს,
Line: 26    ჟენჩოქჳიხ სუფისა საყდარ ქა̄მენ ი ლე̄ქჳნეხ კჳირჲას ღერთალე ლიღრა̄ლს.
Line: 27    ეჩანღო ჩჳადმეზრიხ ჩი̄ს ეჩეჩუ მჷმზჷრდ მეჴედ მა̄რე̄ლს ი ჩჳესსგოჯნიხ
Line: 28    ქა̄მ სუფისა ხატს ი ბა̄რახს ი ჟენბინი შენაწირი ლიჴდე ხატ
Line: 29    სგობინთე. შენაწირი მჷხდას ბაპ სგა̄ჲრენი ლაჲრთე: ამზუმ ლოქ ოხჴი̄და
Line: 30    ალ მა̄რას. მჷლზონა ჩჳამზჷრიხ ეჯის ი მაგ ერ ქე̄დგა̄თჳი, ეჩჷნღო
Line: 31    ჩჳესსგურიხ სკარობდ. მჷლზონა ჭიშხაშს იჩოხ, "დოდი სანადიროთ
Line: 32    მიჳიდოდის" ლე̄ქჳნეხ ლაჭხაშჟი ი ეჩანღო ეჯჲარი̄ ჩჳესსგურიხ
Line: 33    მოსკარა̄ცახან, ყჷლნიხ ლიბრჲა̄ლს "ჳოი ლილეს"ს, "ქრისდე ადგა"ს.
Line: 34    სკარობჟი თამფიერ ჩიგარ ხოშა ნაღალდ "ქრისდე ადგას" ყჷლეხ ამჟი:



Page: 26 
Line: 1     "ქრისდე ადგა გიხაროდენ,   აბა შეღებული,
Line: 2     მადლი მახარობელსაჳო!   ურიასა კეკელასა,
Line: 3     ჩჳენსა მახარობელსაჳო!   აბა კეკელაჲსა,
Line: 4     აბა რობელსაჳო?   გოჭის ხორცის ჭამელასა,
Line: 5     გეიხაროს ყველმა სულმა,   აბა ჭამელაჲსა,
Line: 6     აბა სულიერმა,   შოუწვავს, შოუჭამია,
Line: 7     ჩიტმა, კაჭკაჭმა, შროშანმა,   ხდის რისხვა შოუჭამია,
Line: 8     აბა და შროშაჲნმა,   აბა უჭამია,
Line: 9     ვაგლახური ურიამა,   ნიავ წრილი ბზეს მოხავდა,
Line: 10     აბა ურიაჲმა,   ნიავმა შეგვინძრიელა,
Line: 11     გუშინ ჩვენმა მოყვარემა,   ავსა დარსა წვიმრიანსა
Line: 12     აბა მოყვარეჲმა   კაი დარი გვირჩენია,
Line: 13     ზედ ჭიშკარი გადიარა,   ბერსა ქალსა ფანჩრიანსა
Line: 14     აბა გადიაჲრა,   ახალგაზრდა გვირჩენია,
Line: 15     ტანსა ეცვა თეთრი ჩოხა,   ბერსა კაცსა ბებერასა,
Line: 16     თეთრი ჩოხა არღავნისა,   ახალგაზდა გვირჩენია
Line: 17     თავს ეხურა თეთრი ქუდი,   რჩევნებითა.
Line: 18     ქუდი ლალში შეღებული


Line: 19       თამფიერ მეჲად ლიღრა̄ლდ ქრისდე ადგა̄ ლიდრა̄ლს ყჷლეხ. შენაწირ
Line: 20    ტაბლარ ქჳიშ ჳო̄ბაშ ინზო̄რი. ჲერუ ნა̄თის მინეშჳდ იცჳრეხ მჷლზონა
Line: 21    ი ეშხუ ნა̄თის ბაპს ხა̄ჳდიხ ტაბლარხენ. აძჲენიხ ჟი̄ბ შენაწირდ ნაჴიდ
Line: 22    ქჳშარე̄ლს. ქჳიშარა̄ჲ ბარჯს ბაპს ხა̄ჳდიხ, ეჯღა ერე ლალგენა ლი ქჳიშარაჲ
Line: 23    ი ბაპა ნაცხულ ხა̄რ თხუმ ი ეჯღა ხეხჳი ბარჯ ბაპს. თხუმე ლაცხულჟი
Line: 24    ოსსკიბახ თა̄რიძელს ერე ამშა ლაძიენჟი ბარჯ ლოქ ბაპაშუ
Line: 25    ლას. სკარობ ერ ქე̄დგა̄თჳი ქჳიშ, ეჩჷნღო ჟენგენიხ, აჯაღ ჭიშხაშს
Line: 26    იჩოხ ხატარ სგობინ ი ხატი მუსგჳჯინა̄ლა მჷლზონა ანსგოჯნიხ ბა̄ჲრახალს
Line: 27    ი ხატარს ქჳიშხენ ლეჟა̄ სოფელთე, შუკჳარჟი ხო̀ჴდეხ ხატარს
Line: 28    შენაწირს ჲერ თეთრს ჲერ მუტჳარს ჲერ ლალგენა ქჳიშარაჲ გიცრალს
Line: 29    ჲერ ჴანარს, მარა̀ ჴანარს ქა დე̄მ ხა̄ჳდიხ მჷლზონას ი ბაპს, მინე
Line: 30    აგითე იტხეხ ი შომა̄ჲ ჩჳადძი̄ნეხ, ფუსნაჲ ე ი̄რი, ბარჯს ლახო̄დნეხ
Line: 31    ბაპს, დო̄რიღო̄ჲ დე̄მამ. შუკჳარჟი ერ ოხსგოჯიხ ხატარ, ბაპ სგობინ
Line: 32    ხოჟოღჳ ხატარს ი მინე მუსგჳჯინე მჷლზონას ი ჩუუქჳი̄ცად ყჷლეხ
Line: 33    ლიღრა̄ლს:



Page: 27 
Line: 1     დიდებ-დიდებ თარიგძელას,   ძირჳას რიონი ხოგენდა,
Line: 2     ლელჷჴრალედ ლიშედს გუშგჳე,   შდულჳას შაურდენ ხაცხეპა,
Line: 3     მაშედ გუშგჳე ჯეი სგოჯილე,   ლესგას ღჳაშარი ხოყურდა,
Line: 4     ძღუდი მურგჳალდი ხაცხეპა,   სარკი ლასგიდის ხოჩა̄ნდა,
Line: 5     სჳეტი ჳოქრეში ხაგენა,   ლალგინა მიჩა ჴანარე,
Line: 6     ისგან დიდებან გოში ლი,   მუჭჳარ ლჷშკადილ ხარინახ,
Line: 7     ჩხერჲალაჲ მიჩა თასარე,   სუფილ მეტყჳეფილ ხარენა,
Line: 8     თასი ამჯარიჳშ გოშილე,   ზაგნიშ ზაგარნ იბირღჳჲელეხ,
Line: 9     ლჷშკადე მიჩა აჳჯარე,   ლალცხატაჲ მიჩა გიცრალე,
Line: 10     ლჷნქეჭა მიჩა მურყჳამე,   ზაგნიშ ზაგარნ იბაცქჳჲელეხ.


Line: 11       ლა̄შხარ ამჟი ყჷლეხ ალ დიდებას. აშ ხოჩულდ უშგჳლარს ხოხალხ
Line: 12    ამჷნ ალ ლიღრა̄ლ ი იშგენი̄ ლაჭშხაშჲა ლიღრა̄ლარ.

Line: 13       თამფა მესმა ლადეღ ეშჲეში̄ მა̄მა ხა̄რხ უქმ ლა̄შხს, ბაპარ ერ ხამბე̄დეხ,
Line: 14    მარა̀ ჲესიჲეს დემა̄მ ხეჭჳდიელხ ბაპარს ი მინეშურად ხაშდბახ
Line: 15    გჳეშს. ალ ლადღარს თანაფს ი მე̄რმა ლადეღ დოშდიშ ქჳიშთე ლი̄ზის
Line: 16    ხა̄ჲშხახ სგობნე თამფიერალ. ლიხ აჯაღ ღოშგმე თამფიე̄რალ. თანაფჷნღო
Line: 17    მიშლადეღს ი დოშდიშს ხაყლეხ ღოშგმე თამფიერალ. მიშლადეღ
Line: 18    ღოშგმე თანაფს ლინყე ტაბლარეშ, ლიმზჷრი ი ლილხნე. სკარობ
Line: 19    თამფიერალისა მე̄რმა მე̄რმა აგის ხაზნახ სოფლობჳშ ქალჷთიშდ.
Line: 20    სგობნე თამფა დოშდიშ ი ღოშგმე თამფა დოშდიშ ლექჳაჳ ხოხალხ
Line: 21    სასა̄შარს, ლეკოსა̄ნდარს ი მებცარს. აშ ლჷწიად ლეჟა̄ ლა̄შხხენ ი
Line: 22    ჴედნიხ მუშგჳრალ, ჩო̄ლურხენი ი იშგნა̄გხენი, ლამზჷრდ ჴედნიხ. სგობნე
Line: 23    თამფა თახაშ მელე̄დარს ხოხალხ სკარობ ი ეჩე ი̄რდიხ ლჷწიად ი
Line: 24    მჷმზჷრიდ. საფტინს ჲერუ თამფა ნე̄სგა ჩუკუ̄ლარს ხოხალხ ძღჷდ
Line: 25    ლიმზჷრ ი სკარობ. წესარ ჩჲაგ ამჟი ლიხ, იმჟი̄ ეშხჳ აგის გჳი̄ჲრა
Line: 26    ქჳიშობჟინ.

Line: 27       ღოშგმე დოშდიშ თამფიშ აჯაღ სასა̄შარს უდ ხოხალხ სკარობ,
Line: 28    მარა̀ ეჩქა̀ ძღჷდ ლჷწიანჲობ ლი ჩი̄ხენ ძღჷდ გაჲნგალ ლიმზჷრ.
Line: 29    შენაწირ ხატიშ ღოშგმე თამფა დოშდიშ ქჳიშობჟი ხოშულ ჴედნი,
Line: 30    ტაბჷლი̄ ი თეთრი̄, ღოლჲა̄ქარი̄ ი ხალხი̄ ხოფშირა ჴედნი ქჳიშობთე
Line: 31    ღოშგმეშ ი ხოშულ მი̄მან ლი. ქჳიშობჟი შენაწირდ ნაჴიდ
Line: 32    არაყ ჳო̄ბაშ იხჳრჲელი ი ეჯის ჩჳაშხჳნიხ ეშხუ მეზგამჷყ ხატი მუსგჳჯინა̄ლა
Line: 33    მჷლზონა ი მე̄რმა̄ მინ წირს ხაჩმუ̄ნდეხ სოფელისა მჷლზონა
Page: 28  Line: 1    ბაპს ი ანნაყნეხ ტაბლარს, ჟენხურჲელიხ ეშხუდ საროსტა̄ ქორისა ი
Line: 2    ლეღჳსი̄ ანჴდნეხ, ჩჳესსგურიხ. ტაბლარე ლჷჯგირჷნღო ჟენბინნეხ სკარობს,
Line: 3    იზბიხ, ითრეხ ი ილხნეხ. ტაბლარს მეზგაჟი თჳით ჲერჳს ქა
Line: 4    ხა̄ჳდიხ ბაპს ი დი̄კონს. ჟი საროსტა ანხურჲელნე ტაბლარს. სადილს
Line: 5    ბაპარს მინეცახან ხა̄მნეხ მჷლზონა -- მინე მჷმწირჳელი ბაპარს.

Line: 6       თანფიერჷნღო ხოხალხ აჯაღ ლა̄შხარს უსხჳობ. ჯჳინელდ ხოშა
Line: 7    უსხჳაჲ ხაყე̄ნახ ჩი სოფელჟი ი ეჯ უსხჳაჲს ჩუ ლჷმძი̄ნხ. ბაპს წირს
Line: 8    ხაჩჳმა̄ნდჳნახ, ტაბლარს ი ლესკარს ლჷმჴიდინხ, ჩუ ლჷმსგურო̄ლინხ
Line: 9    ეშხუდ სკარდ სოფელ ი ხა̄რახ ძღჷდ სკარობ ი ლილხნე, მარა̀ ათხე̀
Line: 10    დრო̄ჲჟი უსხჳაჲს ძჳირდ გარ ე̄სა აძჲენიხ. ეჩა̀ მჷქაფ ღუნს აძჲენიხ ი
Line: 11    ეჩჟი იჩოხ უსხჳობა ლიმზჷრს. უსხჳობ სკარი გუ̄ნღა გარ მა̄ ლი მაშე̄ნე.
Line: 12    ლიმზჷრი გუ̄ნღა ლი. დო̄სგჷნღო ნაგად ხოშე̄ლხენქა ი სერ ნაი̄
Line: 13    ხეკჳეს ერე ჩჳელგჷჭიდ ჯჳინელ ჩო̄ულობ ი ჯჳინელ ბედი გჳეშარ.
Line: 14    უსხჳობა ნაგზას უსხჳობიერი მი̄შს ხჳაყლედ. ქრისდე ადგას უქჳი̄ცად
Line: 15    ყჷლეხ ანღლებნუნ. პერპო̄ლდაში ლიჳჭმა̄ლნუნ ერ ეშხუ ნაგზი ი̄რდი,
Line: 16    ეჯ საფტინს სასა̄შ ხოხალხ ლიმხა̄რწი. ნაქა̄მ მა̄რას დე̄მ იხნეხ ეჯ
Line: 17    ლადეღ სოფელთე̄ჲსა, ნადირხენ ხა̄რხ ლჷკაბ ნაქა̄მ მა̄რე̄მი ლიხნე
Line: 18    სოფელთე̄ჲსა. ჟი ღჷრიხ ლიმხა̄რწი ლადეღ ზურა̄ლე̄ლ სგიმრაშული
Line: 19    თხუმთე, ხოშა ლამზჷრ ბეჩმჷყ ქა ირბიელხ ტაბლარს, თაშა̄რალს. ჲერხი
Line: 20    გიმ ჩუქჳა̄ნთე ხემზჷრხ გიმი ანგლოზს ი ეჩეჩუ გიმ ლი ჩუმებჭკჳე ი
Line: 21    სგა იდე̄სხ ეჩხა̄ჳთე̄ჲსა გიმი ანგლოზიშდ მჷნაყ ტაბლე̄ლარს. ბაპ მა̄მ
Line: 22    ხეჩდა ლიმხა̄რწი ლიმზჷრთე, მინეშურად ლი ნაგად იჳანდჷ̄რან, ჟი
Line: 23    ღჷრიხ წირი დროჲჟი ღჳაჟარ, ზურა̄ლე̄ლს მჷნაყ ხეღჳე̄ნიხ ტაბლარ
Line: 24    თაშა̄რალ ი ქა ადიესხ სგიმრაშული ლიცე პილთე ი ჟი ლახმეზრიხ
Line: 25    ღე̄რბათს, ლიც ერ დო̄სა ედჷლუ̄ხჳე̄ნდეს მაშე̄ნა̄მ, ეჯ ბედჟი ლეხჴჷ̄რიხ
Line: 26    ღერბათს. ჩუ ლეჲზობიხ ეჩე თაშა̄რ-ტაბლარს, სკარობ მა̄მ ლი ეჩე ი
Line: 27    ღჳაჟარ ჩჳატხენიხ სოფელთე. ბობშარს ყა̄რ ი დაშნა̄რ ხუღჳახ, ეთნეჩდიხ
Line: 28    უშხვა̄რ ყა̄რ ი დაშნა̄რშჳ ი მჷგდა ძღჷდ ლიცჳა̄ლ ხა̄რხ, ეჯჟი
Line: 29    ხექჲოლა̄ლხ დაშნა̄რშჳ. ლიმხა̄რწი ამჟი ლი.

Line: 30       ულშიერ. ლეჳლიშად ლა̄შხთე ჲადურდ ხჳაჲ ინზორიხ. ჩი̄ხენ
Line: 31    ჴედნიხ მუშგჳრალ. თელდ სადა̄დ შჳანხენ, ლეჩხუმხენ. ჩი̄ს მიჩა
Line: 32    მიჩა მასძელ ხაყა, მაგ ლჷწიე ლიხ ლადღიშდ. მჷლზონა ასგჳჯინეხ
Line: 33    ულშა თა̄რიძელს ჟი ულიშთე, ძღჷდ ჟიხი ლი ლა̄შხე თხუმთე ნაღალდ.
Line: 34    ეჩე̄` საყდარ ხო̄გხ ულშა თა̄რიძელიშ, ადჲესხ ტაბლარს, ლახმეზჷრიხ
Page: 29  Line: 1    ულშა თა̄რიძელს, არაყსი̄ ლახმეზჷრიხ. მჷლზონა ამე̄ნ-ამე̄ნს
Line: 2    ტუ̄ლიხ. ეშხუ ხოშა მა̄რე ტაბლარს ში̄სა ლეჲყედნი, არაყსი̄ ჭიქჳშ ი
Line: 3    ლე̄ქჳნე: "თა̄რიძელ, მადილშჳ გოში, სი ლე̄ხეშდ ჯაბას ბეროშა ი მიჩა
Line: 4    ჲეხვს ი გეზალს ი მადილ ჯე̄რი". იშგენ მჷლზონა ამე̄ნ-ამე̄ნ ლოქ
Line: 5    ესტუ̄ლნეხ მაგ ეშხუდ.

Line: 6       ამჟი ლი მაგ ლუშნუ ლიმზჷრა̄ლ. ულიშ გარ მადეი ჩჲაგ ამ ჟი
Line: 7    ლი, იმე̄ჲ კელდ ე̄სა ეშხუდ ლიმზჷრ ხაგადხ ჲედ მა̄ლე დღეობ ე̄სამა
Line: 8    ლი სასა̄ში ქჳიში̄, ამჟი̀ ხოხალხ, ჩუკუ̄ლსი̄ ლილშო̄შა̄ლ ლადეღ ჲერუ
Line: 9    თამფა ნე̄სგა საფტინს, სერ ლიმჷზრალ ერ ქე̄დგა̄თჳი ულიშს, ჩჳესსგურიხ
Line: 10    სკარდ მაგ ი ხე̄რიხ ხინ. ხჳაჲ შჷმი ლიღრა̄ლ ი ლიბრჲა̄ლ
Line: 11    ედი̄ქჳი ულშობიერ. ხჳაჲ შუმიშ ი ნუკჳი ჭიშხაშ ი̄ქჳი ეჩე̀. ტაბლარს
Line: 12    ეჩე̄ჲ ქა ხო̄თეხ მჷლზონა ბაპარს, შენაწირ ჴედნი: ტაბლარ, თეთრ-არაყ
Line: 13    ი ღოლჲა̄ქარ. თეთრს ეჩე̄ჲ სგა̄ჲრენიხ ი საყდრიშ ლი. იშგენს
Line: 14    მინ ი̄თა̄ლიხ მჷლზონა ჳო̄ბა კეთილს. სკარობჷნღო ჩჳანსგოჯეხ ხატარს
Line: 15    მჷლზონა ულიშხენ "დიდება, ჳოჲ თა̄რიძელა̄" ლაბრჲა̄ლუშ ჩუ
Line: 16    ლჷგ ჩჲა̄გ თოფრე გჷრმჷნ. ლითოფ ჩჲაგ ხოხალხ ჩულჷზორ ხალხ
Line: 17    ლემშჳანჲერა̄ჲსა̄ დღეობჟი̄ ი აში̄ ხჳაჲდინ. ულიშხენ ნაჴდრჳალ ადინეხ
Line: 18    მინე მინე მასძელართე ი ხე̄რიხ ხინ მასძლარმჷყ ჲერუ სემი ლადეღ
Line: 19    ი ეჩჷნღო ჩჳაფხჟენიხ ეში-აშ ი ამკალიბდ იგა̄თჳი ულშიერალ ი
Line: 20    იბნი პერპო̄ლდაში უჭმ.

Line: 21       პერპო̄ლდაში ლიჳჭმა̄ლე მი̄შისა ხოხალხ ლეჟა̄ ლა̄შხარს.



Next part


This text is part of the TITUS edition of Svan (Lashx) Texts ed. A. Oniani.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.